Matie 20

Ɛkɛ̀tɛ̀-kɔ̀hɔ̀n-hán-bɔ̀

1“Nyàn eci léyi Anhobɩ́ Nɛ̀ncüì-dúyri dú cá nɔn: Ɛkɛ̀tɛ̀-nɛ́n-zi tɔ̀n srɔ ɛntrɛ ɔsɔ̀wrɔ̀ fùtàn, ô kè bɩ́ ɔkɔ̀hɔ̀n-hán-bɔ̀ kɛ̀ hɔ̀n hán ɔkɔ̀hɔ̀n n'ɛkɛ̀tɛ̀ lɔ mɛ̀n. 2Yɔ mɛhi ɔmùan krɔn yɔ ɔwɔɛ̀n-diemɛ̀n, dɔlà kɔ̀prɛ̀ zri ɛnbì zri, kɩ nɛ̀n hán yɔ, yɔ hɔ́n ankɛ̀tɛmɛ̀n ɔkɔ̀hɔ̀n-hán-yri. 3Ɛkɛ̀tɛ̀ nɛ̀n zi lɔ vru srɔ ɛntrɛ wacɛ̀n ɔmɔ̀rɔ̀ vra kɩ kán anwrɔn ndɔ hɔ̀n nyɔn ɛntrɛa, ke sɩ́ hán eci zriɛmɛ́n. 4Nɛ dɔ́ yɔ le: ‘Nyɛ́n mán nyɛ́n hɔ́n m'ɛkɛ̀tɛ̀ lɔ mɛ̀n nyɛ́n hán ɔkɔ̀hɔ̀n, kɩ me le di nyɛ̀n ɔwɔɛ̀n léyi ke ji nɔn.’ 5Kɩ anwrɔn hɔ̀n lɔ hɔ́n n'ɔkɔ̀hɔ̀n lɔ mɛ̀n. Ɛnbri shɛ́n mùan mɛ̀n lɔ, ɛkɛ̀tɛ̀-nɛ́n-zi vru srɔ ɛntrɛ, zɛtɛn ɔwɔɛmɛ̀n wacɛ̀n anhɔ̀n mán, nɛ̀n hán eci zri lɔ. 6Ɔtrɔmɛ̀n lɔ, ɔwɔɛmɛ̀n wacɛ̀n ɛnrì nɛ̀n srɔ ɛntrɛ kɩ nɛ̀n cɔ́ anwrɔn jan nyɔn ɛntrɛa. Ne yrɛ yɔ le: ‘Cɛci kruhú kɛ nyɛ́n nyɔn ɛnu lɔ ɛcɛ̀n mumù lɔ fɛn kɩ nyɛ́n sɩ́ hán eci zriɛmɛ́n?’ 7Yɔ mrɛ́n ɔmùan le: ‘Ɔmuhi ɔwrɔn zriɛmɛ́n ke sɩ̀ bɩ́ bɔ̀ ɔkɔ̀hɔ́n hán mɛ̀n nɔn.’ Nɛ dɔ́ yɔ le: ‘Kɛ zrɔ, nyɛ́n mán nyɛ́n hɔ̀n nyɛ́n hán ɔkɔ̀hɔ́n m'ɛkɛ̀tɛ̀ lɔ mɛ̀n.’

8Ɛnvra léyi ɔwɔɛmɛ̀n cɔ̀ nɔn, ɛkɛ̀tɛ̀-nɛ́n-zi dɔ́ n'ezìwú wrɔn lɔ le: ‘È bi ɔkɔ̀hɔ̀n-hán-bɔ̀ lɔ, ô è di ɔwrɔn-wrɔn n'ɔwɔɛ̀n. Ɛ̀ bukru ɛmɛẅi trɔ bɔ̀ lɔ yri, ô kpàkpà-bɔ̀ lɔ kɛ̀ trɔ ɛmɛẅi.’ 9Anwrɔn hɔ̀n léyi ye bi ɔkɔ̀hɔ́n mɛ̀n ɔwɔɛmɛ̀n wacɛ̀n ɛnrì nɔn, nvà kɩ yɛ tán ɔwrɔn zrizri dɔlà kɔ̀prɛ̀ zri. 10Ɛnvra léyi kɛ́n kpàkpà-bɔ̀ lɔ nɔn, yɔ tro le yɔ lɛ cɔ́ ɔkùa ke le fɛ́-ɛwú; tɛ́n yɔ mán, yɛ tán yɔ ɔwrɔn zrizri dɔlà kɔ̀prɛ̀ zri. 11Ɛnvra léyi yɔ cɔ́ ɔkùa lɔ nɔn, yɔ dɔ́ ankà gbàngbàn tán ɛkɛ̀tɛ̀-nɛ́n-zi lɔ, 12kɩ yɔ dɔ̀ le: ‘Ɛmɛẅi trɔ kɔ̀hɔ̀n-hán-bɔ̀ léyi ye bɩ nɔn, hán ɔkɔ̀hɔ̀n wacɛ̀n zri granmɛ̀n kɩ è di yɔ ɔwɔɛ̀n hán bɔ́ léyi bɔ̀ hán ɔkɔ̀hɔ̀n ɛnbri shishi wú, ɛcɛ̀n mumù lɔ fɛn nɔn!’ 13Tɛ́n ɛkɛ̀tɛ̀-nɛ́n-zi mrɛ́n ɔtɔ̀n ɔmùan le: ‘M'annyran, mɛ́n sɩ̀ frɛ́n mɛ́n. Vɛ́n mán mɛ̀n mɛhi ɔmùan krɔn bɔ̀, ô mɛ̀n di ɛnbì zri kɔ̀hɔ̀n-hán wɔɛ̀n léyi dú dɔlà kɔ̀prɛ̀ zri nɔn, kè sɩ̀ dù yiɛ? 14Bɩ v'ɔwɔɛ̀n-dì lɔ, ô ɛ̀ hɔ̀n. Mɛ lɛ tán ɛmɛẅi-trɔ-wrɔn ndɔ lɔ eci zri léyi mɛ̀n tán mɛ́n nɔn. 15Kɛ̂, mɛ̀n sɩ̀ wɛ̀n ɛkɔrɛ̀levri m'ɔkùa-ci-hán wúɛ? Kàle ɛ kɔ́n ecüì-hi ɔmuhi ɛnbɔrɛ wɔ́ mɛ̀n nɛ́n?’ 16Ɔmu lɔ de Zhezü kɛ dɔ̀ le: ɔmu lɔ de ɛmɛẅi-trɔ-bɔ̀ ke le dú kpàkpà-bɔ̀ kɩ kpàkpà-bɔ̀ kɛ lɛ trɔ ɛmɛẅi.”

Zhezü kɛ dɔ́ andɛ̀n anhɔnmɛ̀n n'owù mán n'owúemɛ̀n-dù-frɔ́ ankà

(Nyɛ́n nyan Markɛ̀n 10:32-34; mán Lükɛ̀n 18:31-34 wrú lɔ mɛ̀n)

17Zhezü kɛ hɔ́n Zherüzalɛmɛ̀n. Nɛ̀n bi ɛsɛ̀nkɛn-bɔ̀ ɛvà-anhyrɛ̀ lɔ ɔhɔnán kɩ nɛ dɔ́ yɔ esùnàn hɔ́n mɛ̀n lɔ le: 18“Nyɛ́n die nukùɛ, bɔ́ hɔ́n Zherüzalɛmɛ̀n, nanvrɛn lɔ, yɛ lɛ bɩ́ ɔwrɔnẅì Ẅì yɛ tán Ɔwɔ-cice-bɔ̀ cüìcüì hɔ̀n mán ɛnyànmàn-gbànvri-ankà-yé-bɔ̀. Yɔ le di nɛ̀n owúemɛ̀n. 19Kɩ yɔ lɛ ẅɛn nɛ̀n yɔ tán anwrɔn hɔ̀n léyi ke sɩ̀ nyrì Ɔwɔ nɔn, kɩ yɔ lɛ hán nɛ̀n ɛnhyürɛ̀, yɔ le gorɛ nɛ̀n ɛngbele mɛ̀n, kɩ yɔ lɛ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n. Kɩ ɛbi-anhɔnmɛ̀n bì lɔ, ne le dú owú-bɔ̀ mɛ̀n nɛ́n vá ɔkɔrɛ-bɔ̀ mɛ̀n.”

Zhakɛ̀n, Zhan mán yɔ muan ci-sán

(Nyɛ́n nyan Markɛ̀n 10:35-45 wrú lɔ mɛ̀n)

20Zɛtɛn Zebede nɛ́n hi sɔnba Zhezü ɛtɛ̀sɛ̀n nɛ́n mán n'ɛẅì hɔ̀n anhyrɛ̀ lɔ; Zebede hi lɔ sɩ́ ɛnkru ɛnhi Zhezü zìwú, ô, kɛ̀ sán nɛ̀n eci tɔ̀n. 21Zhezü ke yrɛ nɛ̀n le: “Cɛci e jiɛ̀?” Nɛ̀n mrɛ́n yi ɔmùan le: “Ɛ̀ wá mɛ̀n ɔmùan le, m'ɛẅì hɔ̀n anhyrɛ̀ léyi nyɔn nɔn, kɛ lɛ yɛ́ mɛ́n, ɔtɔ̀n ezì-kɔrɛ̀, ndɔ lɔ ebrì-kɔrɛ̀ ɛnvra léyi e le dú ɛnnɛ̀ncüì nɔn.” 22Zhezü mrɛ́n ɔmùan le: “Nyɛ́n sɩ̀ nyrì eci léyi nyɛ sán nɔn. Nyɛ́n le mi ɛgbànkán-shi grashɛ̀n léyi mɛ vá emi-yri nɛ́n?” Ɛẅì hɔ̀n anhyrɛ̀ lɔ mrɛ́n nɛ̀n ɔmùan le: “Bɔ́ le mì tɛ̀.” 23Zhezü mrɛ́n yɔ ɔmùan le: “Annanwɔrɛ mɛ̀n lɔ, nye le mi m'ɛntàn glashɛ̀n lɔ. Tɛ́n kè sɩ̀ dù mɛ̀n de mɛ̀n ẅɛ̀n ezì-kɔrɛ̀ mán ebrì yɛ́-yri lɔ nɔn; ɛyɛ́-yri ndɔ hɔ̀n lɔ dú anwrɔn léyi Dade wá ɔmùan nɔn tɛn.” 24Ɛnvra léyi ɛsɛ̀nkɛn-bɔ̀ ɛvà ndɔ hɔ̀n lɔ yá ankà lɔ nɔn, yɔ bɩ́ ɛmɛ̀nhyì ku Zhakɛ̀n mán zhan ɛwú.

25Zɛtɛn Zhezü bi yɔ lɔ fɛn kɩ kɛ dɔ̀ le: “Nyɛ́n nyri ɔmu le fɛcüè cüìcüì-bɔ̀, kɛ ẅɛn y'anwrɔn hɔ̀n lɔ ɛkɔrɛ̀srɔn mɛ̀n kɩ anwrɔn ɛvrivri hɔ̀n lɔ kɛ hán yɔ, yɔ kán y'ɛkɔrɛ̀srɔn lɔ. 26Tɛ́n ɛci ndɔ lɔ ke bɩ́ dú nyɛ̀n ɛmɛ̀n. Tɛ́n, ke dú kɛ ny'ɛmɛ̀n lɔ, ɔwrɔn tɔ̀n ke ji kè dú ecüìcüì hô, ke ji le nɛ̀n srɔ ny'eci-bɩtan-wrɔn, 27kɩ ny'ɛmɛ̀n lɔ, ke dú kɛ ɔwrɔn tɔ̀n ke ji kè dú kpàkpà-wrɔn, ke ji le nɛ̀n srɔ ny'ɔwɔ̀n-wrɔn: 28ɔmu lɔ de ɔwrɔnẅì Ẅì mán kè sɩ̀ và, ô kɛ̀ ẅɛ̀n eci-bɩtan-bɔ̀, tɛ́n nɛ́n và, ô nɛ̀n srɔ eci-bɩtan-wrɔn, nɛ̀n bɩ́ n'ɛwúvà nɛ̀n wá *anhɔ́ba, ô nɛ̀n srú anwrɔn bobrebe nɛ̀n ze.”

Zhezü kɔrɛ anvɛ̀-bɔyɛ-bɔ̀ anhyrɛ̀

(Nyɛ́n nyan Markɛ̀n 10:46-52; mán Lükɛ̀n 18:35-43 wrú lɔ mɛ̀n)

29Ɛnvra léyi Zhezü mán n'ɛsɛ̀nkɛn-bɔ̀ dú Zheriko anmàn srɔ ɛntrɛ nɔn, fɛcüè vri tɔ̀n kɛ́n Zhezü ɛsɛ̀n. 30Anvɛ̀-bɔyɛ-bɔ̀ anhyrɛ̀ léyi yɛ́ ɛnlevri mùan nɔn yá le Zhezü ke cì; zɛtɛn yɔ bukru yɔ di bobo le: “Ankà-yé-wrɔn, Davidɛ̀n Ẅì, è nyri bɔ̀ ɛnhyɔ̀bɔ̀!” 31Fɛcüè lɔ ke fe yɔ, ô yɔ kɛ́n ɔmùan yɔ hɛ́n, tɛ́n yɔ sán di bobo ecüìemɛ̀n: “Ankà-yé-wrɔn, Davidɛ̀n Ẅì è nyri bɔ̀ ɛnhyɔ̀bɔ̀!” 32Zhezü sannyɔn, bi yɔ kɩ ke yrɛ yɔ le: “Ecitan de nye ji le mɛ̀n hán mɛ̀n tán nyɛ̀n nɛ́n?” 33Yɔ mrɛ́n nɛ̀n ɔmùan le: “Ankà-yé-wrɔn, ɛ̀ hán anvɛ̀ kɛ̀ kán bɔ̀ ɛyri.” 34Zhezü nyri yɔ ɛnhyɔ̀bɔ̀ kɩ tɛ́ y'anvɛ̀ lɔ ɛkɔrɛ̀; ɛnvra zri lɔ, anwrɔn anhyrɛ̀ lɔ kán ɛyri, kɩ yɔ kɛ́n nɛ̀n ɛsɛ̀n.

Selectat acum:

Matie 20: ƐAA03

Evidențiere

Partajează

Copiază