Luk 21

Tuwei ŋope ende wiche wuhyau ti lalme wende ofa

(Mak 12.41-44)

1-2Jisas ŋanange wusyep uku miꞌe pe, kin bep na netekeꞌe lenge miyeꞌ lowe yate yember wuhyau tinge ya jah luh ŋaiye tinge yiche ofa ya yoto yukoh yirise, topoꞌe kin plihe ŋetekeꞌe tuwei ŋope ende wate wember wuhyau ŋeser talah malaih hoi ti wa gwah. 3-4Pe Jisas ŋanange na, “Bwore mise! Ŋam mana yip, wuhyau ŋaiye tuwei ŋope luku wiche pe, kin nengelyembe mitiŋ lalme. Detale, lenge miyeꞌ lowe tinge wuhyau embere topoꞌe ŋaiꞌe ŋaiꞌe wula wula sekete. Pe tinge yoworꞌe syeꞌ yende ofa, kut syeꞌ ter ŋanar yokoh tinge. O tuwei uku pe, ti ŋaipwa ŋiꞌ supule, kom wuhyau ti lalme luku, ti wende ofa.”

Wutuꞌ ŋaiye ŋup yuwo, ka tuꞌe la ŋai?

(Mat 24.1-14, Mak 13.1-13)

5-6Tinge ter jan ya yoto yukoh yirise pe, lenge jetalah syeꞌ bep ya yetekeꞌe ŋeser ŋaiye tinge yenge juhurꞌe yukoh yirise luku dunduhur miꞌ supule, topoꞌe yitini tetehei ŋaiye lenge mitiŋ yaŋaꞌe Got. Taꞌe luku pe, lenge jetalah uku yanange wusyep yurume yukoh yirise luku. Kom Jisas ŋanange na, “Ŋup ende ka ot pe, ŋaiꞌe ŋaiꞌe lalme liki ŋaiye tukwini yip yetekeꞌe pe, lenge wachaih se ka yute yuluwau lalme. Yukur ŋeser ende ka tikir e unuh ŋeser ende, pakai supule.”

7Tinge yisilihme Jisas na, “Jetmam, tumboi yukur ŋai uku ka ot, topoꞌe ya metekeꞌe wutuꞌ mune no, ka pasam poi nange ŋup uku si nat sehei?” 8Jisas nungwis lenge na, “Ŋoihme ŋaiye lenge miyeꞌ syeꞌ se ka yuta homboꞌe yeh yip. Miyeꞌ wula wula se ka yut pe, ka yininge na, ‘Hai, tukwini ŋup kin. Ŋam Miyeꞌ alaŋatme tikin Got ihei!’ Kom yukur pa junde tinge, na pakai. 9Ŋupe ŋaiye pa yusyunde wondoh topoꞌe wachaih embere ka tuhur kekep eꞌe pe, yukur pa hiꞌjirnge, na pakai. Ŋai uku ka ot yer, kom ŋup yuwo teter.” 10Pe kin plihe ŋanange na, “Lenge miyeꞌ tuweinge moi sambe ende ka yurmbe topoꞌe lenge miyeꞌ tuweinge moi sambe ŋoinde. Topoꞌe kantri ende ka yurmbe topoꞌe kantri ende. 11Yoime ŋembere ka tuhur, ŋasarp nimbot embere ka ongombe lenge miyeꞌ tuweinge, topoꞌe wahriꞌ epwa pupwa ŋembere ka sisil elꞌe elꞌe ende yumbune lenge miyeꞌ tuweinge. Lenge miyeꞌ tuweinge se ka yetekeꞌe ŋaiꞌe ŋaiꞌe nange ka ende tinge ŋaiye ka hiꞌjirnge, topoꞌe ka yetekeꞌe wutuꞌ supule ŋambaran ka si unuh ŋaitem hlaꞌ.

12Yer ŋendehei ŋaiye ŋaiꞌe ŋaiꞌe taꞌe luku ka ot pe, lenge wachaih ka syep yurpe yip, topoꞌe ka yumbe yip yende yumbune. Pe ka yember yip yi yoto yukoh jahilyeh ŋaiye pa jin wusyep, topoꞌe ka yember yip yil mwahupwaiꞌe, topoꞌe ka yember yip pa jin wusyep yil ŋembep lenge miyeꞌ ondoh, topoꞌe lenge miyeꞌ mbep lenge gavman titinge haiten. Tehei kin ŋaiye yip pa yambaꞌe hwap uku ki taꞌe leꞌe na, yip jande ŋam. 13-15#Luk 12.11-12Kom ŋupe ŋaiye hwap uku ka ot pe, yukur pa ŋoihyeryembe wula wula, topoꞌe pa yahaiꞌe yaŋah ŋaiye pa jin wusyep. Detale, ma se yul yip wusyep topoꞌe sande tekeꞌe bwore ŋaiye pa yininge wusyep no, yukur lenge wachaih ka se yengelyembe yip, pakai. Taꞌe luku pe, ŋup uku ki bwore ŋaiye pa yininge wusyep bwore me ŋam, ŋaiye ŋam Miyeꞌ nalaŋatme tikin Got.

16-17O ŋup uku pe, mitiŋ lalme se ka jirnge yip. Lenge yai mam, toꞌ tatai, bamtihei ilyeh yip topoꞌe lenge ŋimei yip, se ka yember yip yil syep lenge miyeꞌ ondoh no, ka yumb yip syeꞌ pe, pa yule. Tehei kin taꞌe leꞌe na, yip jande ŋam. 18Kom yukur ka yende yumbune laip bwore yip ŋaiye sai nye nyermbe, pakai supule. 19Taꞌe luku pe, pa jin bongole no, pa yambaꞌe laip bwore ŋaiye pa yurp nye nyermbe.”

Jisas nanange ŋaiye Jerusalem ka pupwa

(Mat 24.15-21, Mak 13.14-19)

20“Ŋupe ŋaiye pa yetekeꞌe lenge miyeꞌ wondoh ka yute yoyorꞌme Jerusalem pe, yip pa sisyeme nange sehei ka yende yumbune Jerusalem pupwa supule. 21Taꞌe luku pe, lahmende yip ŋaiye yarp ya yoto Jerusalem pa tus jirnge yusme moi uku, topoꞌe lahmende ŋaiye yarp ya yoto provins Judia pa jirnge yi yunuh hwate, topoꞌe lahmende ŋaiye yarp yal moi bwahe, yukur pa plihe yi yoto moi Jerusalem, na pakai. 22#Hos 9.7Detale, ŋup uku pe, ŋup tikin Got ŋaiye ka tungwisme wachaih tuꞌe ŋaiye wusyep tikin Got si ŋanange. 23-24Pe ka nihe supule me lenge tuweinge ŋaiye talahe, topoꞌe ka nihme lenge tuweinge ŋaiye yengeꞌe talah wimbe. Detale, ka nihme tinge ŋaiye ka jirnge tupwaihme nihe syohe luku. Pe lenge haiten syeꞌ se ka yenge ŋim yongomb lenge miyeꞌ tuweinge, topoꞌe ka syep yurpe lenge yenge yil kantri tinge yember yi yoto mwahupwaiꞌe. Taꞌe luku pe, nihe syohe luku ka aparaꞌe provins Judia lalme leꞌe no, ŋoihmbwaip nihe tikin Got ka si lenge miyeꞌ tuweinge Juta lalme. Pe Got se ka osme lenge haiten uku ka yende yumbune Jerusalem yi tutume ŋup tikin ŋaiye kin si nalaŋatme.”

Yende miꞌmiꞌ ŋaiye Miyeꞌ Mise ka ot

(Mat 24.29-31, Mak 13.24-27)

25 # Ais 13.10, Ese 32.7, Jol 2.31, Rev 6.12-13 Jisas neŋelꞌe ŋanange wusyep na, “Wutuꞌ supule se ka bunjenge ŋau, wundehei topoꞌe nowas ka ŋoinde tikin. Pe na gah kekep, moiye moiye lalme se ka ŋoihyeryembe wula wula, topoꞌe ka hiꞌjirnge ŋupe ŋaiye ka yisyunde yetekeꞌe ŋoloh pinip kotou behembuhu nalꞌe nalꞌe embere sekete. 26Lenge mitiŋ ŋoiheryembe wula wula me ŋaimune ŋaiye ka ot kekep eꞌe pe, ka hiꞌjirnge ŋembere sekete, topoꞌe ŋembep tinge ka talalai. Detale, ŋau, wundehei, nowas topoꞌe ŋaiꞌe ŋaiꞌe lalme ŋaiye sai nanah moihlaꞌ pe, ka blohemblohe lalme. 27#Dan 7.13, Rev 1.7Dindiꞌ ŋup uku pe, lenge miyeꞌ tuweinge ŋaiye yarp kekep se ka yetekeꞌe ŋam, Talah tikin Miyeꞌ ma mut topoꞌe bongol, topoꞌe yirise supule mute gwin munuh mwahit hlaꞌ. 28Ŋupe ŋaiye ŋaiꞌe ŋaiꞌe taꞌe luku ka tus pe, yip pa tuhur jin yahraꞌe ŋondoh bep yi yunuh hlaꞌ. Detale, ŋupe ŋaiye Got ka ungwisme yip si nat sehei.”

Yip pa yambaꞌe sisyeme yilme lou fik

(Mat 24.32-35, Mak 13.28-31)

29Miꞌe pe, Jisas ŋana lenge wusyep tapimbilme ende na, “Ŋoiheryembe lou herkep mip#21.29 Luk nainge lou fik, kom poi member lou herkep mip. topoꞌe lou lalme. 30Ŋupe ŋaiye yip pa yetekeꞌe herkep mip ka owoh tup ambaran pe, yip pa sisyeme nange ŋau wa si. 31Pe ka ŋahilyeh tuꞌe ŋupe ŋaiye pa yetekeꞌ hwap embere luku ka si kekep eꞌe pe, yip pa sisyeme nange ŋup si nat sihei ŋaiye Got ka embepteme lenge miyeꞌ tuweinge kin e oto lemame kitikin. 32Ŋam mana yip bwore mise, yip miyeꞌ tuweinge ŋaiye tukwini yarp eꞌe yukur pa lalme yule, pakai. Syeꞌ teter pa yurp pe, pa yetekeꞌe ka yende yumbune Jerusalem yer ti, pa yule. 33Ŋaiꞌe ŋaiꞌe lalme nanah hlaꞌ topoꞌe gah kekep ka miꞌe, kom wusyep ŋam yukur ka miꞌe, pakai.

34Yip ŋoihme! Yukur pa hetehetur yende bwiliꞌe bwulaꞌe, yonoꞌe pinip bongol yende kwite kwote, topoꞌe ŋoiheryembe wula wula me ŋaiꞌe ŋaiꞌe kekep eꞌe, na pakai. Detale, ŋup uku se ka ot nilyehe si tuꞌe ŋaiye ŋombor esep ŋotohote yip. 35Pe ka otme lenge miyeꞌ tuweinge lalme moiye moiye kekep eꞌe. 36Taꞌe luku pe, nyermbe nyermbe yende miꞌmiꞌ yurp jeteme ŋam, topoꞌe pa yisilihme Got ŋaiye ka ende bongolme yip no, pa yikirh mane luku ŋaiye ka tus, topoꞌe pa jin bongole yil ŋembep Talah tikin Miyeꞌ.”

37-38 # Luk 19.47 Ŋup ilyeh ilyeh ŋundu hondonge pe, mitiŋ lalme sungul ya yoto yukoh yirise nange ka yisyunde wusyep ŋaiye Jisas nalaŋatme. Kin de wah uku ŋau ilyehme, kut ŋup pe, ki na tas nal Hwate Olip ŋanange wusyep topoꞌme Got.

Selectat acum:

Luk 21: urt

Evidențiere

Partajează

Copiază