གོ༌ཟུག༌ 6
6
ཇིག༌རྟེན༌པའེ༌ ངན༌པ༌གུན༌ དང༌ དཀོན༌མཆོག༌གི༌ ཐུགས༌ཚེར༌།
6:1-8
1མི༌གུན༌ ཇིག༌རྟེན༌ནི༌ཀ༌ ཕེལ༌ཅེས༌ གོ༌ཟུག༌ ཟ༌ནེ༌ ཁོང༌གུན༌ལ༌ བུ༌མོ༌ མང༌པོའང༌ སྐྱེས༌། 2དཀོན༌མཆོག༌གི༌ བུ༌ཚ༌གུན༌ནི༌#6:2 དཀོན༌མཆོག༌གི༌ བཀའ༌ མ༌ཉན༌ན༌ ཁོང༌ ཕངས༌ཏེ༌ ཆའ༌ཁན༌ནི༌ ཕོ༌ཉ༌གུན༌ ཡ༌ དཀོན༌མཆོག༌གི༌ གྱབ༌ནེ༌ གྲུལ༌ཁན༌ནི༌ བུ༌ཚ༌གུན༌ ཨིན༌ནོག༌། མིའི༌ བུ༌མོ༌གུན༌#6:2 དཀོན༌མཆོག༌གི༌ གྱབ༌ནེ༌ མ༌གྲུལ༌ཁན༌ནི༌ བུ༌མོ༌གུན༌ ཨིན༌ནོག༌། མ༌ཛེས༌མོ༌ ཐོང༌པ༌, ཁོང༌གུན༌ནི༌ ཁོ༌རང༌ ཐད༌ཁན༌ནི༌ བུ༌མོ༌གུན༌ལ༌ ན༌མ༌ ཅོས༌ ཡང༌ ཏེ༌ བུ༌མོ༌གུན༌ནའང༌ ཏེ༌ཟུག༌ ཅོ༌ཅེས༌ལ༌ ཐད༌དད༌པིན༌། 3ཏེ༌ནེ༌ ཡ༌ཝའེ༌ མོལས༌, “ངའེ༌ མི༌གུན༌ལ༌ ཏང༌ཁན༌ནི༌ ཏེ༌ མི༌ཚེ༌བོ༌ ཁོང༌གུན༌ནི༌ ནང༌ང༌ ཏུས༌གྱུན༌ནི༌ ཕིའ༌ ལུས༌ མི༌ཅུག༌, ཅིའ༌ཟེར༌ན༌ ཁོང༌གུན༌ ཏུས༌གྱུན༌ སོན༌ཏེའ༌ མི༌ལུས༌ཁན༌ནི༌ རིགས༌ནེ༌ ཨིན༌ནོག༌། ཁོང༌གུན༌ ལོ༌ 120 མ༌ནེ༌ སོན༌ཏེའ༌ མི༌ལུས༌།”
4ཏེ༌ཏུས༌ ཡང༌ སྟིང༌ནེའང༌, ནེ༌ཕི༌ལིམ༌ ཟེར༌ཁན༌ནི༌ མི༌ མ༌ ཆེན༌མོ༌གུན༌ ཇིག༌རྟེན༌ནི༌ཀ༌ དུག༌གད༌པིན༌, ཀ༌གུན༌ དཀོན༌མཆོག༌གི༌ བུ༌ཚ༌གུན༌ དང༌ མིའི༌ བུ༌མོ༌གུན༌ ཛོམས༌ཏེ༌ སྐྱེ༌ཁན༌ནི༌ ཕྲུ༌གུ༌གུན༌ ཨིན༌པིན༌། ཁོང༌གུན༌ ཏེན༌ན༌ ཏུས༌སི༌ སྤའ༌འོ༌གུན༌ དང༌ མག༌གི༌ ནང༌ང༌ ནོལ༌ཁན༌ མིང༌ཅན༌གུན༌ ཨིན༌པིན༌།
5ཇིག༌རྟེན༌ནི༌ཀ༌ མི༌གུན༌ནི༌ ངན༌པ༌བོ༌ མངས༌ཏེའང༌ རྩོག༌པོ༌ ཡང༌ ཁོང༌གུན༌ནི༌ སམ༌བ༌ དང༌ དོད༌པ༌ ཚང༌མ༌ ཏུས༌གྱུན༌ ངན༌པ༌ ཅོ༌ཅེས༌ ཡོད༌ཁན༌ གུན༌ ཡ༌ཝའེ༌ ཟིགས༌། 6ཏེ༌ནེ༌ ཁོང༌ངི༌ འི༌ ཇིག༌རྟེན༌ནི༌ཀ༌ མི༌གུན༌ ཅོའ༌ ཛད༌ཁན༌བོའེ༌ཀ༌ ཡ༌ཝའ༌ མ༌སྲན༌ཏྲེ༌ གྱོད༌པ༌ སྐྱེའ༌ ཛདས༌, ཡང༌ ཁོང༌ངི༌ སེམས༌སི༌ ཏིང༌ང༌ སྲན༌ཏྲེ༌ རྡུག༌ངལ༌ ཇུང༌། 7ཏེ༌བོའེ༌ ཞས༌ཏེ༌ ཡ༌ཝའེ༌ མོལས༌, “ངའེ༌ ཅོ༌ཁན༌ནི༌ མི༌ཚང༌མ༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཨིན༌། མི༌གུན༌ མ༌ཚད༌ སེམས༌ཅན༌ ཆེན༌མོ༌ དང༌ ཆུ༌ངུན༌ ཡང༌ ནམ༌མི༌ ནང༌ང༌ འུར༌ཁན༌ནི༌ ཅ༌ ཚང༌མའང༌ མེད༌ཁན༌ ཅོ༌ཨིན༌། ཏེ༌གུན༌ ཅོ༌ཁན༌བོའེ༌ཀ༌ ངའ༌ མ༌ ཚེར༌ཁ༌ རག༌།” 8ཨིན༌ནའང༌ ཡ༌ཝའ༌ ནོ༌ཨའེ༌ཀ༌ ཐུགས༌ཐདས༌།
ནོ༌ཨ༌ དང༌ ཆུ༌ལོག༌གི༌ སྐོར༌།
6:9-22
9འི༌བོ༌ ནི༌ ནོ༌ཨའེ༌ མི༌ཚེའེ༌ སྐོར༌ལ༌ རུངས༌པོ༌ ཨིན༌ནོག༌། ཏེ༌ཏུས༌ལ༌ ནོ༌ཨ༌ ཅིག༌པོ༌ ནི༌ ཇིག༌རྟེན༌པ༌ ཚང༌མའེ༌ ནང༌ནེ༌ སྐྱོན༌མེད༌ཁན༌ དང༌ མི༌ ཀྲང༌པོ༌ཞིག༌ ཨིན༌པིན༌། ཁོའེ༌ བྲེལ༌ དཀོན༌མཆོག༌ ཉམ༌པོ༌ མ༌ ཉེ༌མོ༌ ཡོད༌པིན༌། 10ནོ༌ཨའ༌ བུ༌ཚ༌ སུམ༌, ཤེམ༌, ཧེམ༌ དང༌, ཡབ༌ཕེད༌ ཟེར༌ཁན༌གུན༌ ཡོད༌པིན༌།
11ཏ༌ དཀོན༌མཆོག༌གི༌ འི༌ ཇིག༌རྟེན༌པ༌གུན༌ མ༌ ངན༌པ༌, ཛིང༌མོ༌ དང༌ ནོད༌སྐྱལ༌ཅེས༌ གུན༌ གངས༌ཏེ༌ ཟིགས༌། 12ཡང༌ དཀོན༌མཆོག༌གི༌ ཇིག༌རྟེན༌བོ༌ ངན༌པའེ༌ གངས༌ཏེ༌ ཟིགས༌, ཅིའ༌ཟེར༌ན༌ ཇིག༌རྟེན༌ནི༌ཀ༌ སྲོག༌ ཡོད༌ཁན༌ ཚང༌མའེ༌ ངན༌པ༌ མི༌ཚེ༌ཞིག༌ ཕུད༌དད༌པིན༌། 13ཏེ༌ནེ༌ དཀོན༌མཆོག༌གི༌ ནོ༌ཨ༌ མོལས༌, “ཇིག༌རྟེན༌ གང༌པོའེ༌ ནང༌ང༌, འུགས༌ ཡོད༌ཁན༌ ཚང༌མའ༌ སྲོའེ༌ གངས༌ཏེ༌, ཅིག༌ དང༌ ཅིག༌ག༌ ནོད༌སྐྱལ༌ པ༌སང༌, ངའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ཐག༌ཅད༌ཏེ༌ ཨིན༌།”
14“ཏེ༌བོའེ༌ཕིའ༌ ཁྱོ༌རང༌ངི༌ གོ༌ཕེར༌ ཟེར༌ཁན༌ནི༌ ཤིང༌ངི༌ མ༌ ཆེན༌མོ༌ གྲུ༌ཟིང༌ཞིག༌ རྩིག༌, ཡང༌ ཏེ༌ནང༌ང༌ ནང༌མིག༌ རིག༌ ཅོས༌། ཏེ༌ནེ༌ ཆུ༌ ནང༌ཀུག༌ག༌ མི༌ཡོང༌ཅེས༌སི༌ ཕིའ༌ ཕི༌ནང༌ ཉིས༌ཀོའ༌ ཏར༌ཀོལ༌ སྐུས༌། 15གྲུ༌ཟིང༌ངི༌ རིང༌བོ༌ མི༌ཀྲར༌ 135, ཞང༌བོ༌ མི༌ཀྲར༌ 22 དང༌ ཐོན༌བོ༌ མི༌ཀྲར༌ 13 ཡོང༌གོས༌། 16ཡང༌ ཏེ༌ གྲུ༌ཟིང༌བོའ༌ ཐོག༌གའང༌ ཅོས༌, ཨིན༌ནའང༌ རྩིག༌པ༌ དང༌ ཐོག༌གི༌ ནང༌ང༌ མི༌ཀྲར༌ ཕེད༌དི༌ པར༌ བོར༌གོས༌། གྲུ༌ཟིང༌ངི༌ ནང༌ང༌ ཐོག༌ཚད༌ སུམ༌ ཡང༌ ཆོགས༌ ཅིག༌ག༌ སྒོ༌ ཅོ༌གོས༌།”
17“ཏ༌, འུགས༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ངའེ༌ ཇིག༌རྟེན༌ གང༌པོ༌ ཆུ༌ལོག༌གི༌ཆུའི༌ གང༌ཅུག༌ཨིན༌། ཇིག༌རྟེན༌ནི༌ཀ༌ ཡོད༌ཁན༌ ཚང༌མ༌ ཤི༌ཨིན༌། 18ཨིན༌ནའང༌ ངའེ༌ ཁྱོ༌རང༌ ཉམ༌པོ༌ ཆད༌དོན༌ཞིག༌ ཅོའད༌, ཁྱོ༌རང༌ དང༌ ཁྱོ༌རང༌ངི༌ ན༌མ༌, ཁྱོ༌རང༌ངི༌ བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ངི༌ ནང༌ང༌ ཡོང༌གོས༌། 19ཡང༌ ཁྱོ༌རང༌ངི༌ སེམས༌ཅན༌ དང༌ ཅ༌ཅིའུ༌ རིགས༌ ཚང༌མའེ༌ ཕོ༌ དང༌ མོ༌ གུན༌ སོན༌ཏེའ༌ ལུས༌ཤེས༌ལ༌ གྲུ༌ཟིང༌ངི༌ ནང༌ང༌ ཁྱོང༌གོས༌། 20ཅ༌ཅིའུ༌ རིགས༌ ཚང༌མའེ༌ ཆའ༌ཅིག༌, སེམས༌ཅན༌ ཆེན༌མོའེ༌ རིགས༌ ཚང༌མའེ༌ ཆའ༌ཅིག༌ དང༌, སེམས༌ཅན༌ ཆུ༌ངུན༌ནི༌ རིགས༌ ཚང༌མའེ༌ ཆའ༌ཅིག༌, སོན༌ཏེའ༌ ལུས༌ཤེས༌ལ༌ ཁྱོ༌རང༌ངི༌ཀ༌ གྲུ༌ཟིང༌ངི༌ ནང༌ང༌ ཡོང༌ཨིན༌། 21ཡང༌ ཁྱོ༌རང༌ དང༌ ཏེ༌གུན༌ནི༌ ཟའ༌ཅེས༌སི༌ ཕིའ༌ སྣ༌ཚོགས༌སི༌ ཟ༌གྱུ༌ ཚང༌མ༌ གྲུ༌ཟིང༌ངི༌ ནང༌ང༌ སག༌གོས༌།”
22ཏེ༌ནེ༌ དཀོན༌མཆོག༌གི༌ ཅོས༌ མོལ༌ཁན༌ ཚང༌མ༌ ནོ༌ཨའེ༌ ཅོས༌།
Selectat acum:
གོ༌ཟུག༌ 6: lbj
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Wycliffe Bible Translators, Inc. All rights reserved.