གོ༌ཟུག༌ 3
3
སྡིག༌པ༌ ཏང༌པོ༌།
3:1-19
1ཏ༌ རུལ༌བོ༌ ནི༌, ཡ༌ཝ༌ དཀོན༌མཆོག༌གི༌ ཛད༌ཁན༌ནི༌ ནག༌ཚོགས༌སི༌ སེམས༌ཅན༌ ཚང༌མའེ༌སང༌, སྐྱོན༌ཇན༌ ཡོད༌པིན༌། ཁོའེ༌ བུ༌མོའ༌ ཟེརས༌, “དཀོན༌མཆོག༌གི༌ ཏན༌ཏན༌ལ༌, ཁྱོ༌རང༌ང༌ འི༌ ཚས༌སི༌ ལྕང༌མ༌ ཅིག༌གི༌ ཀ༌ནེའང༌ ཁ༌ཟས༌ ཟའ༌ མ༌གོས༌ མོལ༌ལ༌ རག༌ག༌?”
2ཏེ༌ནེ༌ བུ༌མོའེ༌ རུལ༌ལ༌ ལན༌ཏངས༌, “དཀོན༌མཆོག༌གི༌ ང༌ཞའ༌, ‘ཚས༌སི༌ ནང༌ནེ༌ ཁ༌ཟས༌ ཚང༌མ༌ ཟའ༌ནའང༌ གྲིག༌, 3ཨིན༌ནའང༌ ཚས༌སི༌ སྐྱིལ༌ལ༌ ཡོད༌ཁན༌ནི༌ ལྕང༌མའེ༌ ཁ༌ཟས༌པོ༌ ཟའ༌ མ༌གོས༌ ཡ༌ ལག༌པའང༌ མ༌རྩེ༌, ཏེ༌ཟུག༌ ཅོ༌ན༌ ཁྱོ༌ཞའ༌ ཤི༌ཨིན༌’ མོལ༌ལ༌རག༌།’”
4ཨིན༌ནའང༌ རུལ༌བོའེ༌ བུ༌མོའ༌ ཟེརས༌, “ཁྱོ༌ཞའ༌ ཤིའ༌ མ༌ནོག༌། 5ཏེ༌ ཁ༌ཟས༌པོ༌ ཟའ༌ན༌ ཁྱོ༌ཞའེ༌ མིག༌ བེ༌ཏེ༌, ཁྱོ༌ཞ༌གུན༌ དཀོན༌མཆོག༌ ཙོགས༌ གྱུར༌ཏེ༌ ཟང༌པོ༌ དང༌ ངན༌པ༌ གུན༌ ཧ༌གོ༌ཅེས༌པོ༌ དཀོན༌མཆོག༌ག༌ གྱུས༌ཡོད༌ པ༌སང༌, ཏེ༌ ཁ༌ཟས༌པོ༌ མ༌ཟ༌ མོལ༌ཏེ༌ ཨིན༌ནོག༌།”
6བུ༌མོའ༌ ཏེ༌ ལྕང༌མའེ༌ཀ༌ ཡོད༌ཁན༌ནི༌ ཁ༌ཟས༌གུན༌ མ༌ ལྡེ༌མོ༌ དང༌ ཞིམ༌པོ༌ ཡོད༌ཁན༌བོ༌ ཐོང༌ ཡང༌ ཏེ༌ ཤེས༌རབས༌པོ༌ ཐོབ༌ཅེས༌སི༌ དོད༌པ༌ ཡོད༌ པ༌སང༌, ཁོའེ༌ ཁ༌ཟས༌ཞིག༌ ཁྱོངས༌ཏེ༌ ཟོས༌། ཡང༌ ཉམ༌པོ༌ ཡོད༌ཁན༌ ཁོ༌རང༌ངི༌ མག༌པ༌ ཟའ༌ཅེས༌ལ༌ ཏངས༌པ༌, ཁོའེང༌ ཟོས༌། 7ཏེན༌ན༌མལ༌ལ༌, ཁོང༌གུན༌ནི༌ མིག༌ ཕེད༌ཏེ༌, ཁོང༌ ཉིས༌ཀོ༌ ལྗེར༌ཉལ༌ལ༌ ཡོད༌ཁན༌བོ༌ ཧ༌གོ༌པ༌, ཕིག༌ ཟེར༌ཁན༌ནི༌ ལྕང༌མའེ༌ ལོ༌མ༌གུན༌ ཙེམས༌ཏེ༌ ཁོང༌གུན༌ནི༌ ཟུགས༌པོའེ༌ རྨད༌བོ༌ ཀབས༌།
8ཏེ༌ནེ༌ བུ༌ཚ༌ དང༌ བུ༌མོ༌ ཉིས༌ཀོའ༌, ཡ༌ཝ༌ དཀོན༌མཆོག༌ ཚས༌སི༌ ནང༌ང༌ ཕི༌ཏོག༌གི༌ སིལ༌མོ༌ ལུངས༌པོའེ༌ ཏུས༌ ཞབ༌གྲུལ༌ལ༌ སྐྱོད༌ཨིན༌ ཡོད༌ཁན༌ནི༌ སྐད༌ ཚོར༌པ༌, ཡ༌ཝ༌ དཀོན༌མཆོག༌གི༌ མི༌ཟིགས༌ཅེས༌སི༌ ཕིའ༌ ཁོང༌གུན༌ ཚས༌སི༌ ལྕང༌མའེ༌ གྱབ༌བ༌ ཨིབས༌། 9ཨིན༌ནའང༌ ཡ༌ཝ༌ དཀོན༌མཆོག༌གི༌ བུ༌ཚ༌བོའ༌ བོད༌ཏེ༌, “ཁྱོ༌རང༌ ཀ༌ནེ༌ ཡོད༌?” མོལས༌།
10བུ༌ཚ༌བོའེ༌ ལན༌ཏངས༌ཏེ༌, “ཉེ༌རང༌ ཚས༌སི༌ ནང༌ང༌ སྐྱོད༌ཅེས༌སི༌ སྐད༌པོ༌ ཚོར༌ར༌ཅིག༌, ང༌ ཇིགས༌ཏེ༌ ཨིབས༌པིན༌ ཅིའ༌ཟེར༌ན༌ ང༌ ལྗེར༌ཉལ༌ལ༌ ཡོད༌པིན༌།”
11ཁོང༌ངི༌ མོལས༌, “སུའི༌ ཟེར༌ར༌རག༌ ཁྱོ༌རང༌ ལྗེར༌ཉལ༌ལ༌ དུག༌ ཟེར༌ཏེ༌? ཁྱོ༌རང༌ངི༌ ཚས༌སི༌ སྐྱིལ༌ལ༌ ཡོད༌ཁན༌ནི༌ ལྕང༌མའེ༌ ཀ༌ནེ༌ ཁ༌ཟས༌, ངའེ༌ མ༌ཟ༌ ཟེར༌ཁན༌བོ༌ ཏ༌ མ༌ཟོས༌པིན༌ན༌?”
12ཏེ༌ནེ༌ བུ༌ཚ༌བོའེ༌ ཟེརས༌, “ཉེ༌རང༌ངི༌ ང༌ རོགས༌ ཅོའ༌ལ༌ སལ༌ཁན༌ནི༌ བུ༌མོའེ༌ ང༌ ཏེ༌ ལྕང༌མའེ༌ ཁ༌ཟས༌པོ༌ ཏངས༌པ༌, ངའེ༌ ཟོས༌པིན༌ལེ༌།”
13ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌མོའ༌, “ཁྱོ༌རང༌ངི༌ འི༌བོ༌ ཅི༌ ཅོས༌ཏེ༌ ཨིན༌” མོལས༌།
བུ༌མོའེ༌ ཟེརས༌, “རུལ༌ལི༌ ངའ༌ གོབ༌སྐོར༌པ༌ ངའེ༌ ཟོས༌པིན༌ལེ༌།” 14ཡ༌ཝ༌ དཀོན༌མཆོག༌གི༌ རུལ༌ལ༌ མོལས༌,
“ཁྱོ༌རང༌ངི༌ འི༌བོ༌ ཅོས༌ པ༌སང༌,
སྲལ༌ཁན༌ དང༌ ནག༌ཚོགས༌སི༌ སེམས༌ཅན༌ ཚང༌མའེ༌ ཕྲོ༌ནེ༌
ངའེ༌ ཁྱོ༌རང༌ ཅིག༌པོའ༌ ཆད༌པ༌ ཏང༌ངད༌།
ཏ༌ནེ༌ཕར༌ལ༌, ནམ༌ཚོག༌པ༌ ཁྱོ༌རང༌ ཤི༌ མི༌ཤི༌
ཁྱོ༌རང༌ གྲོད༌པའེ༌ཀ༌ གྲུལ༌ཨིན༌, སའེ༌ ཐལ༌བའེ༌ ནང༌ང༌ ཏུས༌གྱུན༌ དུག༌ཨིན༌།
15ངའེ༌ ཁྱོ༌རང༌ དང༌ བུ༌མོ༌ ཉིས༌ཀོ༌ གྲ༌འོ༌ གྱུར༌ཅུག༌ཨིན༌,
མ༌ཚད༌ ཁྱོ༌རང༌ངི༌ མིར༌གྱུད༌ དང༌ ཁོའེ༌ མིར༌གྱུད༌དའང༌ གྲ༌འོ༌ གྱུར༌ཨིན༌།
ཁོའེ༌ མིར༌གྱུད༌པོའེ༌ ཁྱོ༌རང༌ངི༌ གོའ༌ སྟིང༌ཟིས༌ ཏང༌ཨིན༌,
ཡང༌ ཁྱོ༌རང༌ངི༌ ཁོའེ༌ རྐང༌པའེ༌ཀ༌ ཐམས༌ཨིན༌།”
16ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌མོ༌བོའ༌ མོལས༌,
“ཏ༌ ངའེ༌ ཁྱོ༌རང༌ང༌ ཕྲུ༌གུ༌ ཇོར༌རི༌ ཏུས༌
ནགས༌ མང༌ང༌ ཐོང༌ཅུག༌ཨིན༌,
ཡང༌ ཟུ༌མོ༌ སྲན༌ཏྲེ༌ ཡོངས༌ཏེ༌ མ༌ནེ༌ ཁྱོ༌རང༌ང༌ ཕྲུ༌གུ༌ མི༌སྐྱེ༌།
ཏེ༌ནེའང༌ ཁྱོ༌རང༌ང༌ མག༌པའེ༌ ཕིའ༌ མའ༌ དོད༌པ༌ ཡོང༌ཨིན༌,
ཡང༌ ཁོའེ༌ ཁྱོ༌རང༌ངི༌ཀ༌ ཝང༌ སྲུལ༌ཨིན༌།”
17ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌ཚའ༌ མོལས༌,
“ཁྱོ༌རང༌ངི༌ རང༌ངི༌ ན༌མའེ༌ ཁའ༌ཉན༌ཏེ༌
ངའེ༌ མ༌ཟ༌ ཟེར༌ཁན༌ནི༌ ལྕང༌མའེ༌ ཁ༌ཟས༌པོ༌ ཟོས༌།
ཁྱོ༌རང༌ངི༌ ཞས༌ཏེ༌, ཏ༌ ངའེ༌ ས༌ཀྱད༌ལ༌ ངན༌ ཏབ༌བད༌,
ཏ༌ནེ༌ཕར༌ལ༌ ཀགས༌པོ༌ ཉམ༌པོ༌ མ༌ནེ༌
ཁྱོ༌རང༌ང༌ ཟའ༌ཅེས༌ལ༌ ཁར༌ཇི༌ སྨིན༌ཅུག༌ མི༌ཐུབ༌།
18ཞིང༌ངི༌ཀ༌ ཙེར༌མང༌ དང༌ ལྗང༌ཙེར༌ མང༌པོའང༌ སྐྱེ༌ཨིན༌,
ཡང༌ ཁྱོ༌རང༌ངི༌ སའེ༌ཀ༌ ཏབ༌ཁན༌ དང༌
མ༌ཏབ༌བ༌ སྐྱེས༌ཁན༌ནི༌ སྔོན༌པོ༌གུན༌ ཙལ༌ཏེ༌ ཟེན༌།
19ཁྱོ༌རང༌ སའེ༌ ནང༌ང༌ དྲེས༌དྲེས༌ ཚག༌པ༌ལ༌,
ཁོ༌རང༌ངི༌ ཚད༌པ༌ བིང༌བིང༌ ལས༌ མ༌སྲན༌ཏྲེ༌ ཅོས༌ཏེ༌ མ༌ནེ༌,
ཁྱོ༌རང༌ང༌ ཟའ༌ཅེས༌ལ༌ ཁར༌ཇི༌ མི༌ཐོབ༌།
ཁྱོ༌རང༌ ས༌ནེ༌ ཅོས༌ཏེ༌ ཨིན༌ པ༌སང༌,
ཁྱོ༌རང༌ ལོགས༌ཏེ༌ ས༌ གྱུར༌ཨིན༌།”
ཨ༌དམ༌ དང༌ ཧ༌ཝ༌ ཚས༌ནེ༌ ཕིང༌ང༌ ཛདས༌།
3:20-24
20ཨ༌དམ༌མི༌ ཁོ༌རང༌ངི༌ ན༌མའེ༌ མིང༌ང༌ ཧ༌ཝ༌#3:20 ཨིབ༌རི༌པའེ༌ སྐད༌དི༌ ནང༌ང༌ ཡ༌ཝའེ༌ ཏོན༌ ནི༌ “སོན༌ཏེ༌” ཨིན༌ནོག༌། ཏགས༌, ཅིའ༌ཟེར༌ན༌ ཁོ༌ མི༌ཚང༌མའེ༌ ཨ༌མ༌ གྱུར༌ཨིན༌། 21ཡང༌ ཡ༌ཝ༌ དཀོན༌མཆོག༌གི༌ སེམས༌ཅན༌ནི༌ པགས༌པའ༌ ཀོས༌ ཙེམས༌ཏེ༌ ཨ༌དམ༌ དང༌ ཁོའེ༌ ན༌མ༌ སྐོན༌ན༌ ཛདས༌།
22ཏེ༌ནེ༌ ཡ༌ཝ༌ དཀོན༌མཆོག༌གི༌ མོལས༌, “ལྟོས༌སའང༌, ཏ༌ ཁོང༌ ཉིས༌ཀོའ༌ ཟང༌པོ༌ དང༌ ངན༌པ༌ ཤེས༌ཏེ༌, ང༌དང༌གུན༌ ཙོགས༌ གྱུར༌ཏེ༌ ཨིན༌ནོག༌། ཏ༌ ཁོང༌གུན༌ལ༌ ཏེ༌ སྲོག༌ ཏང༌ཁན༌ནི༌ ལྕང༌མའེ༌ ཁ༌ཟས༌པོ༌ ལེན༌ཏེ༌ ཟའ༌ཅུག༌ མ༌གོས༌, ཏེ༌ མ༌ནེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།” 23ཏེན༌ན༌བོའེ༌ཕིའ༌ ཡ༌ཝ༌ དཀོན༌མཆོག༌གི༌ ཀ༌ ས༌བོའེ༌ ཀ༌ནེ༌ ཁོ༌ ཞང༌ང༌ ཛད༌ཏེ༌ ཨིན༌པིན༌ ཏེན༌ན༌ ས༌ བད༌ཅེས༌ལ༌ ཁོང༌གུན༌ ཨི༌དན༌ ཚས༌ནེ༌ ཕི༌ལོག༌ག༌ ཕིང༌ང༌ ཛདས༌ 24ཁོང༌གུན༌ ཚས༌ནེ༌ ཕིང༌ཚར༌ཏེ༌ སྟིང༌ནེ༌, ཡ༌ཝ༌ དཀོན༌མཆོག༌གི༌ སྲོག༌ སལ༌ཁན༌ནི༌ ལྕང༌མ༌ སྐྱོབ༌ཅེས༌སི༌ ཕིའ༌ ཚས༌སི༌ ཤར༌ ཆོགས༌ལ༌, སྲུང༌སྐྱོབ༌ ཛད༌ཁན༌ནི༌ ཆེ༌ར༌བེམ༌གུན༌#3:24 ནམ༌ཁའེ༌ ནང༌ང༌ དཀོན༌མཆོག༌གི༌ ཞབས༌ཏོག༌པ༌ མི༌ དང༌ སེམས༌ཅན༌ དྲེས༌ཁན༌ནི༌ ཟོས༌ཏའེ༌ ནང༌ང༌ ཤོག༌པ༌ ཡོད༌ཁན༌། དང༌ མེ༌ བར༌ཁན༌ནི༌ ར༌འི༌ ཡུག༌ཨིན༌ བོར༌ར༌ ཛདས༌།
Selectat acum:
གོ༌ཟུག༌ 3: lbj
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Wycliffe Bible Translators, Inc. All rights reserved.