Mateo 7

Is Ketudluanan Mehitenged te Kedsawey

(Mateo 7:1-5; Lucas 6:37,38,41,42)

1“Kenè kew medsawey te zuma niw ne kenè kew zaan edsewayen te Megbevayà. 2Su is idsawey niw te zuma niw ne iyan daan idsawey keniyu te Megbevayà. Is kezekelà te idsawey nu te zuma nu, iyan daan kezekelà te idsawey kenikew te Megbevayà. 3Sikew is layun edsawey te zuma nu, maan is edsawey ka te salà te zuma nu he iring dà te pesek he nekeahuk diyà te mata zin? Ne sikew, duen nu salà he iring kezekelà te vatang he nekevuta te mata nu ne ebpesegdanen nu. 4Ne egkeg̵iyan nu pa sikandin he id-awè nu haazà is nekepesek kandin, iyan, nepesek mulà is kenikew he mata te vatang ne ebpesegdanen nu! 5Utew tarù is ulaula nu! Ihuna nu iawà is batang he nekepesek kenikew ne human ka ebpekeahà. Ne zutun melemu nu zà igkeawà haazà is nekepesek te zuma nu.”

6 Ne zutun insempità ni Jesus is menge etew he kenà egkesuat he ebpemineg te Lalag te Megbevayà. Ke sikandin te, “Kenè niw iveg̵ey te asu is butang he mahal ziyà te Megbevayà su kela ke keg̵ata kew zin. Ne kenè niw zaan isawed is menge mahal he ebelieg̵en diyà te etuvangan te menge vavuy su egketekutakan dan dà.

Is Kebuyù Diyà te Megbevayà

(Mateo 7:7-12; Lucas 11:9-13)

7Penigudu kew vuyù diyà te Megbevayà ne ebeg̵ayan kew zin; penigudu kew pen-ahà ne ibpeturedu zin keniyu is ebpen-ahaan niw. Penigudu kew penelehuzan ne ebpuwasan kew zin. 8Su is langun he ebuyù diyà te Megbevayà ebpekezawat. Ne sikan is ebpen-ahà, ebpeketuredu; ne sikan is ebpenelehuzan, ne ebpuwasan daan te Megbevayà. 9Ne sikiyu is menge g̵inikanan, ke zuen ebuyuen te anak niw he egkeenen kenà egkehimu he vatu is ibeg̵ey niw. 10Ne emun ebuyù keniyu te pait, kenà daan egkehimu he uled is ibeg̵ey niw. 11Ne sikiyu is menusiyà he kenà memetazeng, emun meupiya is ibeg̵ey niw ziyà te menge anak niw, iyan pe be is Amey tew he Megbevayà diyà te langit kenà meupiya is ibeg̵ey zin diyà te minsan hentei keniyu ke ebuyù ziyà te kandin.

12Is egkesuatan niw he ed-ul-ulahan te menge zuma niw ziyà te keniyu, iyan niw zaan ul-ulaha ziyà te kandan. Iyan heini hustu he kedtumana te kesug̵uan he imbilinbilin ni Moises. Iyan daan heini kes impenurù dengan te menge ebpeneuven te Megbevayà.

Is Dalan Pehendiyà te Langit wey Is Pehendiyà te Impirnu

(Mateo 7:13,14; Lucas 13:24)

13Diyè kew ikul te melig̵et he pultahan he idselang pehendiyà te untung he wazè din pidtemanan su meluag mulà is pultahan wey melemu he ed-ikulen is dalan he ibpehendiyà te Impirnu, ne mezakel he etew is ed-ikul zutun. 14Melig̵et mulà is pultahan wey mereg̵en he ed-ikulen is dalan he ibpehendiyà te untung he wazè din pidtemanan ne mezelag dà is ed-ikul kayi.

Is Beg̵as te Pinemula

(Mateo 7:15-20; Lucas 6:43-44)

15Likayi niw is menge ebpeneuven kun te Megbevayà he tarù is ibpenurù dan. Henduen be te hustu sikandan he tumutuu te Megbevayà, iyan, ebpekezezaat is ibpenurù dan. 16Egketuusan niw he teruen sikandan pinaag̵i te ulaula zan su is banag, kenà ebeg̵as te paras ne is seg̵à, kenà ebeg̵as te igira. 17,18Is kayu he wazè din erat, meupiya is beg̵as din; kenà ebpemeg̵as te mezaat. Is kayu he zuen din erat, mezaat is beg̵as din; kenà ebpemeg̵as te meupiya. 19Is kayu he mezaat is beg̵as din, ne ebpilayen ne ebinsulan. 20Iring din ded daan is menge ebpeneuven kun te Megbevayà he tarù is ibpenurù dan su edsilutan sikandan te Megbevayà. Ne egketuusan niw he teruen sikandan tenged te menge ulaula zan he mezaat.

Is Kenà Ebpekeragkes te Edhedian te Megbevayà

(Mateo 7:21-23; Lucas 13:25-27)

21Su zuen menge etew he ebpengumew-umew kedì te, ‘Nengazen, he Nengazen!’ Iyan, kenà langun te sikandan ebmehimuwen he mehedii te Amey ku he Megbevayà he ziyà te langit, kekenà, iyan dà sikan is edtuman te egkesuatan te Megbevayà. 22Ne zutun keuzemà te andew te kedsilut, mezakel is ebpehizuhizu zini te kedìey he egkag̵i te, ‘He Nengazen, pinaag̵i te g̵ehem nu neketagnè key, ne nengeulian dey is ebpenlelungen te mezaat he mulin-ulin, ne mezakel is menge egkein-inuwan he nengehimu zey.’ 23Ne iyan tavak ku kandan dutun is: ‘Kenè ku sikiyu egkekilala. Sikiyu is memezaat is ulaula, awà kew kayi!’

Is Dezuwa he Mibevaley

(Mateo 7:24-27; Lucas 6:46-49)

24Ne minsan hentei he nekezineg kayi te langun he sambag ku ne ebpezumdumahan din, iring sikandin te etew he uluwanen, su heini is uluwanen, diyà mebevaley te zivavew te zekelà he vatu. 25Ne mibegyuwan. Mid-uzan te mereg̵es ne midalem is menge wahig ne utew mevendes is keramag, iyan, wazà merundus haazà is baley su ziyà benguna te zivavew te zekelà he vatu. 26Ne is minsan hentei he ebpemineg dà kayi te sambag ku ne kenè din ebpezumdumahan, iring sikandin te etew he tulebung. Heini is tulebung, ne ziyà mebevaley te pantad. 27Ne mibegyuwan daan; ne midalem haazà is wahig ne mibpengeramag te mevendes ne nerundus haazà is baley zin ne nepurung mewag̵ey.”

28Ne nekepasad si Jesus te ebpenurù dutun. Ne neinuinu is mezakel he nengetig̵um dutun 29su is kebpenurù din, kenà iring te kebpenurù te menge menunudlù te kesug̵uan su zuen gehem mulà te penurù din.

Selectat acum:

Mateo 7: mbbNT

Evidențiere

Partajează

Copiază