Madiu 4
4
Setani Yesu gi'aladibidibiyena.
Maki 1:12-13; Luke 4:1-13
1 #
Hi 2:18, 4:15 Tu Yesu Yolidani againe gibafitaiso, muliya Alu'aluwa Mahalina givehimeyena be ginauwena babigaga againe gilakavena be Setani gina'aladibidibiyena fa'ina. 2Ada uyadayada foti kadu bogi foti agaidiya keke tamo a'a gida'u'ani-yo mafu gilauna. 3Au to'aladibidibi Setani Bana againe gilakayemu ada gigahena gigayo, “Ka'i velemo'ena O'eni Yaubada Natuna, hida kabala unavehimeyedi be hinave'a'a.”
4 #
2Veh 8:3
Tu Yesu gigayo, “Yaubada bonana eto'etoladina gigahe gigayo,
Keke a'a-mo'a gagana againe kaliva yawaimi wanavivaini, tu Yaubada bonana tova moya'aina givelevelemi-ma againe yawaimi wanavaivaina.”
Au hidedemi Yaubada bonana Yesu giyakahina.
5Kadu'e Setani Yesu Yelusalema againe ginauwena, manuwa-tafalolo ana udu'uduya gilakavena. 6#Sam 91:11-12Ada gigahena gigayo, “Ka'i O'eni velemo'ena Yaubada Natuna, au babiya una'auhifu, fa'ina Yaubada bonana eto'etoladina gigahe gigayo,
Iya Yaubada yaku tovenuwa'ata ganavehimeyedi be hina'itave'avi, ada nimadiya o hinakamohi be age keke kuga ginatalani.”
Au hidedemi Yaubada yana gahe sa'eyana Setani giyakahina.
7 #
2Veh 6:16
Tu Yesu Setani againe gigahe gigayo, “Tu Yaubada bonana eto'etoladina kadu gigahe gigayo,
Ka'i o tauni vita againe unavetalaiye digo, keke Yaubada ya Kaiwabu yana leme ana ve'o'ola againe unagaluvaluvani.”
Au hidedemi Yesu gigahe.
8Kadu'e, Setani oya tunugi-mo'ena kabune gilakavena, ada yo'o moya'aidi fafali tulina tulina agaidiya Yesu againe givehawale-'owodi, kadu yo'oi-dina moya'aidi adi kikaiwabu givehawalena. 9Givehawaleni tu gigahena gigayo, “Ka'i iya agaikuya una'ibo'ula-mo'a be unahawadavadavaku amine o, yaku abavehimeya hida yo'o moya'aidi agaidiya ganavele.” Hidedemi Setani gigahe.
10 #
2Veh 6:13
Tu Yesu gigahena gigayo, “Setani, auhe una. Yaubada bonana eto'etoladina gigahe gigayo,
Yaubada yami Kaiwabu againe wana'odu'odu, Bana anakaibe wanahawadavadavana.”
Hidedemi Yaubada bonana Yesu giyakahina.
11 #
Hi 1:14
Ada au Setani ginuyabuyabuni tu Yaubada yana tovenuwa'ata hiyemu be hilemena.
Yesu yana faisewa Galili againe givebutu.
Maki 1:14-15; Luke 4:14-15
12Tu Yesu Yoni valeyana ginogalina higa deliya hisena. Ada hidedemi ginogalini-yo gilowoga fafali ana egana Galili againe gina. 13Ada yana melala Nasaledi againe giyemu tu keke medede againe gidamiya, au kadu gilowoga be gina Kafeneumi melala againe gimiyami. Hida melala tobu ana egana Galili liline, fafali adi egana Sebuloni kadu Nafitalai agaidiya gidauda. 14Hida fafali-dina agaidiya gina gimiyami be Yaubada bonana ana to'awatalatalaina ana egana Aiseya yana gahe boi tuwai-mo'ena gigaheye-vagahina ma velemo'ena ginalakayemu. Bana Aiseya gigahe gigayo,
15 #
Ais 9:1-2
Fafali ana egana Sebuloni kadu fafali ana egana Nafitalai medema tobu ana egana Galili wa'amine Yolidani yuwa fafaline hidauda. Kadu fafali ana egana Galili ma keke miYuda tu yo'o tulidiyao kalivai-dina nuwadi keke mahamahalina ma medede againe himiyami. 16Au hida fafali moya'aina kalivai-dina tova uyu'uyuyuna againe himimiyami tu mahalina lakahina hina'itana. Ada badi gaveyao yadi nuwanuwa uyu'uyuyuna againe himimiyami kadu alu'aluwadi vaita ali'alikadiyao amine gimimiyami, medema mahalina badi to'uyuyu ginatuvemahalidi nuwadi kadu alu'aluwadi ginamahalina.
Au hidedemi bana Aiseya gigahe.
17Tu Yesu Galili ana fafaliya giyewana ana toveya, givebutu gilulumamala gigayo, “Yami dewa koyona wanavenikohiyena be wanahagavilami, fa'ina tova kabisona kaliva Yaubada yana itave'avina againe hinamiyami be ase'asediya ginavehivehimeya.”
Yesu tobayauma laufuli gikovadi be hinamuliyena.
Maki 1:16-20; Luke 5:1-11
18Tova sa'eyana Yesu tobu ana egana Galili ana taliyeya ginauna tu kaliva sa'eyana watobohiyana gi'itadi. Kaliva sa'eyana ana egana Saimoni kadu ana egana velugana Fita, kadu taina ana egana Anidulu. Ada alevatu hisesehobuyeni tu gi'itadi, fa'ina badi tobayauma. 19Gi'itadi-yo gigahedi gigayo, “Wa'ela wanamuliyeku be kaliva adi bayauma ganavehawalemi.” 20Ada auhe'ama kaliva adi'iselu yadi alevatu hisehobuye-vagahini tu himuliyena.
21Kadu ginauna tu kaliva sa'eyana watobohiyana gi'itadi, adi egana Yemesa kadu Yoni Sebedi natuneyao. Au badi tamadi Sebedi buye waka againe hihiyoto yadi alevatu gi'akaninina-ma hikidewedewena. 22Au Yesu gikovadi ada auhe'ama yadi waka kadu tamadi buye hinuyabuyabudi tu Yesu himuliyena.
Yesu gilulumamala kadu to'aulolo gisisiveyawadi.
Maki 3:7-8; Luke 6:17-19
23Tu Yesu Galili ana fafaliya ginunuwaliwaliliuga, miYuda yadi manuwa-abavehawala ana egana sinagogi agaidiya givehavehawala, Venuwa'ata Yamumuna Yaubada yana yo'ogaga ana luku fa'ina gilulumamalena, kadu kaliva yadi to'aulolo moya'aidi yadi aulolo tulina tulina ma gisisiveyawadi. 24Ada au Bana valeyana Siliya ana fafali matatabuna againe ginauna fa'ina yadi to'aulolo moya'aidi Bana againe hi'aliyedi. E, to'aulolo yadi aulolo tulina tulina hi'aliyedi, kadu badi yadi aulolo againe hikoyo-mo'a higa badi wayafunediyao kadu toletolediyao kadu badi walogidi gi'a'uwa-mo'a be nau hifaniyena amanadi hi'aliyedi ada Yesu gisiveyawadi. 25Ada au kaliva moya'ai-mo'edi Bana againe hiyo'oyo'o, miGalili kadu melala teni matatabudi adi egana lakahina Dekafolisi kalivadi, kadu miYelusalema miYudiya kadu fafali Yolidani yuwa fafaline kalivadi Yesu againe hiyo'oyo'o.
Selectat acum:
Madiu 4: viv
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2003, Wycliffe Bible Translators, Inc. All rights reserved.
