Mwanduso 42
42
Ndugu zake Yusufu ochola Misili
1Yakobo viyahulike kamba ako Misili kukala na ndiya nyingi, kawalongela wanage, “Habali mokala kwa kuibunhulila meso?” 2Niye mhulika kamba Misili kuna ndiya. Gendeni kuko mkagule ndiya sikutufe kwa nzala. 3Avo ndugu zake Yusufu, longo wachola Misili, kugula ndiya. 4Lakini Yakobo hamulekile Benjamini, mdodo wake Yusufu yachole nao kwavija kadumba kodaha kupata gehile gogose.
5Avo wana wa Izilaeli wavika Misili kamba wanhu wayagwe wacholile kugula ndiya, kwavija hata mwiisi ya Kanaani kukala na lufilili lwa nzala. 6Kipindi acho Yusufu iyo yakalile mkulu ako Misili. Heyo iyo yakalile mkulu wa kuwauzila ndiya wanhu wa isi zose. Avo ndugu zake weza wamfugamila Yusufu na wamgwaa ukulu. 7Bahaja Yusufu viyawonile ndugu zake kawajuwa, lakini kaitenda kamba munhu baki na kawakomhokela. “Mweye mulawa kwahi?” Wamwidika, “Tulawa mwiisi ya Kanaani, twiza hano kugula ndiya.”
8Hamoja Yusufu kawajuwa ndugu zake, wao wakala hawamjuwile bule. 9Baho kakumbuka nzozi zake za umwaka mbuli ya awo ndugu zake, kawalongela, “Mweye mwiza kutusepa, mwiza kusepa ili mujuwe kwahi isi yetu haikalizigwa.”
10Wao wamwidika, “Bule, go mkulu, siye wasang'hanaji zako, twiza kugula ndiya. 11Siye twa ndugu, twa wana wa tata imoja, siye twa wanhu tutamaniligwa, hatwizile kuwasepa bule.”
12Lakini Yusufu kasusumiza kulonga, “Mweye mwiza kusepa isi yetu mujuwe hanhu hahakalizigwa.”
13Wamulongela, “Siye wasang'hanaji zako tukala wana longo na wabili, wose wana wa munhu imoja, yokala mwiisi ya Kanaani. Mdodo wetu kasigala na tataetu na ndugu yetu imoja kafa.”
14Lakini Yusufu kawalongela, “Kamba vinongile mweye mwiza kutusepa mwiisi yetu. 15Na vino avo vonda nijuwe, noiduwila kwa twaga da Falao, honda musegele hano mbaka vonda yeze mdodo wenu. 16Mtumeni imoja wenu yakamsole ayo indugu yenu imdodo, kuno mweye wayagwe mombeta mkifungo baho nojuwa kamba molonga ukweli, buleavo noiduwila kwa twaga da Falao kamba mweye mwa wasepaji!” 17Abaho kaweka wose mkifungo kwa siku ndatu.
18Siku da kadatu Yusufu kawalongela, “Kwavija niye nomdumba Imulungu, tendeni vino ili muwe wagima. 19Kamba kweli mweye mwa wanhu mutamaniligwa imoja wenu yasigale hano mkifungo, na mweye wayagwe muwagalile ndiya wanhu zenu weli na nzala. 20Abaho mumgale kumwangu ndugu yenu imdodo baho nojuwa kamba mulonga kweli, na mweye honda mukomigwe bule.” Avo waitogolela kutenda vivo. 21Wailongela wenyego, “Siye totagusigwa mbuli ya mdodo wetu. Siye tumona viyagaiye lakini viyatupulile tumtaze tumulemela, lekaavo gano gose gotupata.”
22Lubeni kawalongela, “Vino niye siwalongele bule sikutumulumize imbwanga? Lakini mweye hamunhegeleze bule! Avo sambi totagusigwa mbuli ya damu yake.” 23Wao hawajuwile kamba Yusufu kajuwa gose gawakalile olonga, kwavija viyalongile nao kalonga kubitila munhu yakalile yotafasili. 24Yusufu kachola kumgwazo, kalila kwa usungu. Viyanyamale kabwela kalonga nao. Abaho kamgoga Simeoni na kamfunga nzabi mgameso gao.
Ndugu wa Yusufu obwela Kanaani
25Yusufu kalagiza mikoba yao imemezwe ndiya na kila munhu yabwezelwe sente yake mumkoba wake, na wagweleligwe mhamba ya mnzila. Watendeligwa vinhu vose avo. 26Wawadikwa imizigo vihongwe wao wasegela. 27Mnzila, viwavikile hanhu ha kuwasa wanhu baki, imoja wao kafungula mkoba wake ili yamgwee ndiya kihongwe wake, kakanganya kona sente yake ya mmulomo wa mkoba wake. 28Kawalongela ndugu zake, “Sente yangu ibwezigwa, aino hano mmulomo wa mkoba wangu!” Viwahulike vivo, wahomba. Wailola kuno ogwaya na kuiuza, “Mbuli gani ino iyatutendele Imulungu?”
29Viwavikile mwiisi ya Kanaani kwa tatao Yakobo wamulongela mbuli zose ziwalawilile, wamulongela, 30“Mkulu wa isi ya Misili kalonga na siye kwa kutukomhokela, na katugesa kamba siye twa wasepaji wa isi yake. 31Lakini siye tumulongela, ‘Siye twa wanhu otamaniligwa, hatuli wasepaji bule. 32Tumulongela kamba siye twa ndugu longo na wabili wa tata imoja, na imoja wetu kafa, na ija imdodo ka ako ukae Kanaani hamoja na tata yetu.’ 33Avo mkulu wa isi ayo katulongela, ‘Baho nojuwa kamba kweli mweye motamaniligwa, mulekeni kumwangu ndugu yenu imoja na mweye wayagwe mugale ndiya ukae kwa wanhu zenu weli na nzala. 34Abaho mgaleni kumwangu ndugu yenu imdodo na baho nojuwa kamba mweye hamuli wasepaji lakini mwa wanhu mutamaniligwa. Mwahatenda vivo nomulekesa ndugu yenu, na mweye motogolelwa kuchuuza na kugula vinhu mwiisi ino.’”
35Viwakalile okung'husa mikoba yao, wakanganya kona kila imoja wao kabwezelwa kikoba chake cha sente mna umkoba wake. Viwonile vivo, wose na tatao wakanganya, wadumba ng'hani. 36Tatao Yakobo kawalongela, “Moniboka wanangu, Yusufu kahaduhu, Simeoni kahaduhu, na sambi molonda kumsola na Benjamini. Gose gago gamhata niye.”
37Baho Lubeni kamulongela tatake, “Kamba simbweza Benjamini wakome wanangu wabili. Muleke Benjamini mmakono gangu, niye nomkaliza na kumbweza kumwako.”
38Lakini tatake kamwidika, “Mwanangu hachola na mweye, ndugu yake kafa mwaka, na heyo yaiyeka iyo yasigale. Niye namvele na uhenga kamba mbwanga yuno yahapata gehile mmwanza wenu, mong'homa kwa lusikisiki.”
Selectat acum:
Mwanduso 42: King'hutu
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
NT: © 2014 Pioneer Bible Translators and The Word for the World
OT: © 2019 Pioneer Bible Translators