Mwanduso 37
37
Yusufu na ndugu zake
1Yakobo kakala mwiisi iyakalile tatake, isi ya Kanaani. 2Ino ayo simulizi ya Yakobo na wanage.
Yusufu viyakalile na miyaka longo na saba, kakala kosusila bumbila da fugo hamoja na ndugu zake. Nayo kakala mbwanga hamoja na wanage Biliha, na wanage Zilipa, wehe wa tatake. Nayo Yusufu kamulongelaga tatake gose gehile ga ndugu zake.
3Avo, Izilaeli kamnogela ng'hani Yusufu kubanza wanage wose, kwavija kamulela muuvele, na kamsonela kanzu tali dinogile.
4Ndugu zake viwonile tatao komnogela ng'hani Yusufu kubanza hewo wose, wamwihila na hawalongile nayo kwa tindiwalo.
5Yusufu kalota nzozi, na viyawalongele ndugu zake, avo wabanza kumwihila. 6Kawalongela, “Chonde, tegelezeni nzozi ino indotile, 7siye tukala kumgunda tofunga makinza ga ngano, bahaja kinza jangu dima wima, na makinza genu gema kuzunguluka kinza jangu, abaho gadifugamila.”
8Ndugu zake wamulongela, “Vino, kogesa gweye kokuwa mndewa na kututawala siye?” Avo, wengeza kumwihila ng'hani mbuli ya nzozi yake na gaja gayalongaga mbuli yao.
9Abaho kalota nzozi iyagwe, na kawalongela ndugu zake, kawalongela, “Loleni nilota nzozi iyagwe, avo zuwa na mbalamwezi na nhondo longo na imoja vikala vinifugamila.” 10Viyamulongele tatake hamoja na ndugu zake, tatake kamkomhokela kamulongela, “Nzozi gani ayo yuulotile? Vino niye na mamako na ndugu zako tokufugamila mbaka hasi?” 11Ndugu zake wamonela migongo, lakini tatake keka mbuli ayo muumoyo.
Yusufu kouzigwa na kogaligwa Misili
12Siku dimoja ndugu zake wachola kususila ng'hondolo wa tatao ako Shekemu, 13na Izilaeli kamulongela Yusufu, “Gweye kojuwa ndugu zako, osusila ng'hondolo ako Shekemu, avo izo nikutume kumwao.” Yusufu kedika, “Ona.”
14Avo kamulongela, “Genda kawalole kamba wose ogendelela goya hamoja na zifugo zose, abaho ubwele unongele.” Avo Yakobo kamtuma kulawa kubonde da Hebuloni. Yusufu viyavikile ako Shekemu, 15kamvika munhu kokwanga mmigunda, munhu ija kamuuza, “Kozahila choni?”
16Yusufu kedika, “Nowazahila ndugu zangu. Chonde nongela osusila kwahi?”
17Munhu ayo kalonga, “Hano wahalawa, niwahulika olonga ochola Dosani.” Avo Yusufu kagendelela kuwazahila ndugu zake kawavika ako Dosani.
18Avo ndugu zake wamona toka yeli kutali, na yang'hali hanavika wakala kiseto cha kumkoma. 19Wailongela, “Amweye, ayo nyamiloto kokwiza. 20Mulopole tukamkome na tumwase kudisima dimoja dili hano, abaho tulonge kadigwa na mng'onyo. Tulole nzozi zake zokuwa kwahi.”
21Lubeni viyahulike vivo kageza kumuhonya na makono gao, kalonga, “Bule, sikutumkome. 22Sikumwite damu ya munhu. Mwaseni kudisima dino dili hano kuluwala, lakini sikummulumize.” Lubeni kalonga avo ili yamuhonye kulawa mmakono gao abaho yambweze kwa tatake. 23Avo Yusufu viyavikile kwa ndugu zake, wamsaula kanzu jake ditali diyavalile, 24na wamgoga wamwasa kudisima dijo. Avo kudisima dijo kukala kuduhu mazi, dikala dinyalile.
25Viwakalile hasi na kuja, wenula vihanga vao, wawona mwanza wa Waishimaeli olawa Gileadi ochola Misili. Ngamiya wao wakala wapapile ubani na mkegeni na manemane. 26Yuda kawalongela ndugu zake, “Vino topata choni twahamkoma ndugu yetu na kulufisa lukuli lwake? 27Lekeni tumchuuze kwa Waishimaeli wano, na makono getu sikugamulumize kwavija ino ndugu yetu wa usungu.” Ndugu zake wamtogolela. 28Viwabitile wachuuzi Wamidiani, ndugu zake Yusufu wamulava kudisima, wamchuuza kwa Waishimaeli kwa vihande malongo mabili va shaba, awo wamsola Yusufu mbaka Misili.
29Lubeni viyabwelile kudisima, na viyone Yusufu kamduhu, kadega kiwalo chake kwa usungu. 30Kawacholela ndugu zake kalonga, “Imbwaga kamduhu muja, na niye nichole kwahi?”
31Avo, wachinja bofu da mbuzi, wadivabika dikanzu mwiidamu. 32Abaho wamgalila tatao dikanzu, wamulongela, “Tudidondola kanzu dino, tanhu dilole goya kamba da mwanago hebu siyo.”
33Kadijuwa kalonga, “Ona, dino kanzu da mwanangu Yusufu, kadigwa na mng'onyo, loo, mwanangu kadegigwa degigwa.” 34Abaho Yakobo kadega kiwalo chake kwa usungu, kavala gunia. Kamulilila mwanage kwa siku nyingi. 35Wanage wose, wa ikimbigalo kwa wa ikitwanzi weza kumuhoza umoyo tatao, lakini kalema kuhozigwa umoyo, kalonga, “Bule, nogendelela kumuyalalila mwanangu mbaka vonda nichole hasi kuna iisi ya wafile kuyali.” Avo, Yakobo kagendelela kumuyalalila Yusufu.
36Kipindi acho ako Misili awo Iwamidiani wamchuuza Yusufu kwa Potifa, imoja wa iwakulu wa mndewa Falao, ayo kakala mkulu wa iwakalizi wa ng'anda ya mndewa.
Selectat acum:
Mwanduso 37: King'hutu
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
NT: © 2014 Pioneer Bible Translators and The Word for the World
OT: © 2019 Pioneer Bible Translators