Mwanduso 35
35
Imulungu komtendela ganogile Yakobo ako Beseli
1Imulungu kamulongela Yakobo, “Segela uchole Beseli, ukakale kuko. Kanzengele niye upango wa kulavila nhosa, niye Imulungu nikulawilile viukalile komkimbila ndugu yako Esau.”
2Yakobo kawalongela wanhu wa mng'anda yake, na wose wakalile hamoja na heyo, “Segeseni minyago yenu ili kumwenu, isunheni, mkasaule viwalo venu. 3Tusegele tuchole ako Beseli kuko nomzengela Imulungu upango wa kulavila nhosa, ayo yanidike siku ya kugaya kwangu, kakala hamoja na niye muumwanza wangu wose.” 4Wao wamgwaa Yakobo vinyago vose viwavitambikile vikalile mmakono gao na heleni zikalile mmagwiti gao, Yakobo kavihimbila hasi ya biki da mwaloni dikalile ako Shekemu.
5Yakobo na wanage viwakalile osegela Imulungu kawatenda wanhu wa mabuga gakalile behi wadumbe, avo hawawakweleleze bule. 6Avo, Yakobo hamoja na wanhu wose yakalile nao wavika kudibuga da Luzu, vivija dokemigwa Beseli mwiisi ya Kanaani. 7Ako kazenga upango wa kulavila nhosa, kahakema hanhu aho Eli Beseli, kwavija ako Imulungu yamulawilile viyakalile komkimbila ndugu yake. 8Debola msang'hanaji wa Lebeka kafa, kazikigwa ako behi ya Beseli, hasi ya mwaloni. Avo hanhu aho hakemigwa, “Mwaloni wa kuiyalala.”
9Yakobo, viyabwelile kulawa Padani Alamu, Imulungu kamulawilila kabili kamtenda yamwede. 10Imulungu kamulongela, “Twaga jako Yakobo, lakini sambi hukemigwa Yakobo kabili, twaga jako dokuwa Izilaeli.” Avo Yakobo kakemigwa Izilaeli. 11Nayo Imulungu kamulongela, “Niye iyo Imulungu nili na Udahi wose, ulele ng'hani na mongezeke. Makabila mengi golawa kumwako na wandewa olawa mkigudi chako. 12Isi iniwagwelele Abulahamu na Isaka vivija nokugwelela gweye, na nowagwelela wanhu wa ulelo wako baho kumwande.” 13Avo, Imulungu kamuleka kulawa hanhu aho kuyakalile kolonga nayo. 14Yakobo kasimika dibwe hanhu aho hayalongile na Imulungu, kagida nhunza ya king'waji na vivija kagida mavuta. 15Yakobo kahakema hanhu aho hayalongile na Imulungu, Beseli.
Laheli kofa
16Wachola kulawa Beseli, mbaka hasigala hadodo kuvika Efulata, Laheli kagogigwa na usungu wa kulela, usungu wake ukala mkulu. 17Usungu viumgogile ng'hani, imtwanzi yamtazile kulela kamulongela, “Sikuudumbe, kupata mwana iyagwe wa kimbigalo.” 18Viyakalile kotapatapa, kwavija kakala kokanha loho, kamkema imwana Benoni, fambulo jake kunyunyuwala, lakini tatake kamkema Benjamini, fambulo jake kumweda.
19Laheli kafa, kazikigwa mwiinzila ya Efulata, sambi yojuwika kamba Beselehemu. 20Yakobo kasimika mhanda uchanha ya panga dijo, na mbaka lelo dojuwika kamba mhanda ya panga da Laheli. 21Abaho Izilaeli kagendelela na mwanza, keka ng'hambi yake mwambu wa kabili wa lingo da Edeli.
Wana wa Yakobo
(1 Umwaka 2:1-2)
22Avo Izilaeli viyakalile mwiisi ija, Lubeni kawasa na Biliha, imoja wa watumwa wa Yakobo yakalile kamba mwehe wake. Nayo Yakobo kaihulika mbuli ayo.
Yakobo kakala na wana longo na wabili wa kimbigalo.
23Wanage Lea wakala, Lubeni, mwana wa chaudele wa Yakobo, na Simeoni na Lawi na Yuda na Isakali na Zabuloni.
24Wanage Laheli wakala, Yusufu na Benjamini.
25Wanage Biliha mtumwa wa Laheli wakala, Dani na Nafutali.
26Wanage Zilipa mtumwa wa Lea wakala, Gadi na Asheli.
Wano awo wana wa kimbigalo wa Yakobo waleleke ako Padani Alamu.
Ifa ya Isaka
27Yakobo keza kwa Isaka, tatake ako Mamule kudibuga da Kiliati Aliba vivija dokemigwa Hebuloni isi kuwakalile Abulahamu na Isaka. 28Isaka kakala miyaka gana na malongo manane. 29Isaka kafa kuno mvele na kauja ng'hani, kailumba na wahenga zake wafile umwaka. Iwana Esau na Yakobo wamzika tatao.
Selectat acum:
Mwanduso 35: King'hutu
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
NT: © 2014 Pioneer Bible Translators and The Word for the World
OT: © 2019 Pioneer Bible Translators