Luki 19

Sakiyasifeʼmo huʼniya gemae

1Yeliko taonifiʼmo uno avaʼyi huteno neʼvigenoʼaeʼmo 2mago vekamo agiʼamo Sakiyasiʼa takesi monimo neʼaliya vayaʼaiteʼmo yagaino apateʼniya vekamo asole kagemi yaʼamo haneʼniya vekamo maiʼniye. 3Agaemo haiya agufa vekamofi huno agesiyafeʼmo huʼniyana aupa vekamo maiʼniyaʼmofeʼmo asole vayaʼmogi aeʼa akaniʼnageno oʼageʼniye. 4Oʼagenoʼaeʼmo aeno apaka seno nagu nagu huno neʼunoʼaeʼmo mani katekeʼmo egaiyanageʼna agegauve, huno agesamo afiteno mago yosafiʼmo uno haino maiteno agesiyafeʼmo yagaino maiʼniye. 5Yesuʼa ani maiʼniya yateʼmo eno he tino maiʼneno alino maku huno agetenoʼaeʼmo, Sakiyasiyo, huno, malage huka emikeno. Hemenimo kagae nopiʼmo utaʼa maiguʼae, huno ha paiʼnigeno 6malage huno emineno amogaga aiteno avalelinuno noʼafiʼmo alino falu fala huno ateʼniye. 7#Lu 15:2Ani kavaʼmo ageteʼapaeʼmo, hosu vekamo nopiʼmo uno haiʼniye, huʼa huteʼa hagalu hagalu huʼa ge hauʼnae.

8 # Hat 22:1; Nap 5:6-7 Sakiyasiʼa muki vayaʼai apaulagaleʼmo he tino maiʼnenoʼaeʼmo, Ala kava nene, huno, ago, huno, kagemi yaʼnimo folagapatiʼmo aliʼna fako huʼna kagemi yaʼapimo ohaneʼnisiya vayaʼaina apamiteʼna mago vayaʼaifeʼmo aigofe gemo huteʼna kumayaʼmo aliʼnisuvana foʼa afinaʼmo aliʼna fako huʼna anonaʼapilefeʼmo apamite apamite huʼna neʼapamuve, huno ha paiʼnigeno 9#Ap 16:31; Lu 13:16Yesuʼa hunoʼaeʼmo, Emalehamu aginago vekamo maiʼniyaʼmofeʼmo ani afinaʼmo mani afamo anagaʼai apakufamo ago aliʼna katiʼna apateʼnove. 10#Lu 15:4; Yo 3:17; 1 Ti 1:15Vemo Mafaʼnemoʼmo afela heʼnaya vayaʼmo kahauya huno apaketeno apakufamo alino katino apatesiyafeʼmo emineʼniyaʼmofeʼmo ani kavaʼmo ago afole aiʼniye, huno hapa paiʼniye.

Monimo alino apamiʼniya kavafeʼmo aeno kalafefa gemo huʼniya gemae

(Mt 25:14-30)

11 # Mt 25:14-30 Ani gemo afitagenoʼaeʼmo Yulusalemu taonimo haopaleʼmo ago uno avaʼyi huʼniyaʼmofeʼmo hemenitomo Gotiʼa yagaino neʼapateya kavaʼmo ago afole aigiye, huʼa apakesamo afiʼnayaʼmofeʼmo Yesuʼa ina gemo huno aeno kalafefa gemo huno hapa paiʼniye. 12#Mk 13:34Mago yagaino neʼapateya nofi vayapati vekamoʼmo hunoʼaeʼmo, Ala kini vekamo afagi kotega maiʼniyategamo visugeno lekana paino natesigeʼna halate aiʼna atagi neʼna eʼna ala kini vekamo maiguve, huno agesamo afiʼniye. 13Agaemo teniʼa vayaʼmo aliʼyaʼamo neʼaliya vayaʼaifeʼmo ge huʼnigeʼa eʼnagenoʼaeʼmo magoke magoke monimo fako huno apamite apamite hutenoʼaeʼmo, mani moniletiʼmo aliʼyaʼmo aligenoʼao akamelegaʼamo magoʼe monimo afole aino. Aliʼyaʼmo alime alime neʼvigeʼna eno, huno hapa paiʼniye. 14#Yo 1:11Hapa paiteno uʼniyaʼmonanafa vayaʼamogimo agaefeʼmo apaini huteʼa mago vayaʼmo aliʼa apateʼnageʼa uʼa Ala kini vekaeʼmo huʼapaeʼmo, ani vekamoʼmo yagaino latesiyafeʼmo olahauʼniye, huʼa ha paiʼnae. 15Ha paiʼnayaʼmonanafa Ala kini vekamoʼmo geʼapimo oʼafino alaʼapimo yagaino apatesiya vekae, huno huteno lekana paino ateʼnigeno aino atagi neno eno hogoteno apamiteno uʼniya moniletiʼmo akamelegaʼamo na magi monimo afole aiʼnifi huno agesiyafeʼmo muki vayaʼaifeʼmo ge huʼniye. 16Mago vekamo hogoteno enoʼaeʼmo, Ala kava nene, huno, magoke monikaletiʼmo akamelegaʼamo teniʼa monimo aliʼnove, huno ha paiʼnigenoʼaeʼmo, 17#Lu 16:10alagepa huka aliʼyaʼnimo aliʼnane. Aise yateʼmo alagepa huka yagaiʼnanaʼmofeʼmo teniʼa taonileʼmo yagaisanafeʼmo lekana paiʼna kateʼnove, huno ha paitegenoʼaeʼmo 18agae akamelegamo mago vekamo eno, Ala kava nene, huno, magoke monikaletiʼmo akamelegaʼamo faefuʼa monimo aliʼnove, huno ha paiʼnigenoʼaeʼmo, 19faefuʼa taonileʼmo yagaisanafeʼmo lekana paiʼna kateʼnove, huno ha paitegenoʼaeʼmo 20anile mago vekamo eno, Ala kava nene, huno, monikamo manileʼmo haneʼniye. Hanipausifiʼmo aiteʼna fala kiʼna ali kateʼnove. 21Kagaemo lokiya kaipa vekamo maiʼneka mago vayaʼmogi maleʼnaya yaʼmo alige mago vayaʼmogi vai maleʼnaya hoyafatiʼmo alige nehanaʼmofeʼmo kagaefeʼmo kolikamo huteʼnaeʼmo fala kiʼna aliʼnove, huno ha paiʼnigenoʼaeʼmo, 22kagaemo hosu aliʼyaʼmo aliʼnane. Kagaemo naha paiʼnana gekaletiʼmo agoti huʼna kategauve. Ago nageʼnanana lokiya naipa vekamo maiʼneʼna mago vayaʼmogi maleʼnaya yaʼmo alige mago vayaʼmogi hoyafatiʼmo alige huʼnogeka nageʼnane. 23Nageʼnanaʼmofeʼmo na kava higeka moniʼnimo monimo neʼmalaya nopiʼmo oʼmaleʼnane. Maleʼnanesinana akamelegatiʼmo magoʼe monimo aliʼnovesine, huno ha paiteno 24he tiʼa maiʼnaya vayaʼaifeʼmo hunoʼaeʼmo, moniʼamo aliniteta teniʼa monimo aliʼniya vekamo amiyo, huno hapa paiʼnigeʼapaeʼmo, 25Ala kava nene, huʼa, teniʼa monimo ago aliʼniye, huʼa ha paiʼnagenoʼaeʼmo, 26#Mt 13:12; Lu 8:18lapa nepauve, huno, aliʼnisaya vayaʼmo magoʼe huʼna apamiguve. Oʼaliʼnisaya vayaʼmogi apayapatiʼmo hapa falegauve, huno hapa paitenoʼaeʼmo, 27inagi kame vayaʼnimogi agaemo yagaino latesiyafeʼmo olahauʼniye, huʼa huʼnaya vayaʼmo apavaleliteta naulagaleʼmo kamitimo apamagiyo, huno hapa paiʼniye, huno Yesuʼa hapa paiʼniye.

Yesuʼa Yulusalemu kotegamo uʼnigeʼapaeʼmo, ala kini vekae, huʼa huʼnaya gemae

(Mt 21:1-11; Mk 11:1-11; Yo 12:12-19)

28Ani gemo hapa paitenoʼaeʼmo hogoteno Yulusalemu taonifilagamo neʼvaya kateʼmo uno 29Metapesi taoniʼe Metani taoniʼeʼmo haneʼniya avemo agiʼamo Alifiʼaepa avemo aiyafiʼmo haneʼniya koteʼmo uno avaʼyi huteno geʼamo neʼafiʼa vekalaʼanifeʼmo hunoʼaeʼmo, 30lanaulagaleʼmo haneʼniya taonifiʼmo utana haiʼao. Utana avaʼyi hutetanaeʼmo agesaʼana mago aikeli hosimo aeʼa ateʼnisaya hosileʼmo mago vekamo fai maiteno uneno osuʼniya hosimo maiʼnisigetana agetetanaeʼmo hatu maetana avalelitana eʼao. 31-32#Lu 22:13Mago vekamoʼmo hunoʼaeʼmo, na agufa kavaʼmo hisaʼafeʼmo hatu neʼmaʼae, huno ge huno lanafi gesigetanaeʼmo, Ala kava neʼmoʼa aliʼyaʼamo alisiyafeʼmo higetaʼaene, hutana ha paiʼao, huno hana paiteno alino anateʼnigeʼana uʼana hana paiʼniya kavaʼmo huno maiʼnigeʼana ageʼnaʼae. 33Aikeli hosimo nofiʼamo hatu neʼmaʼageʼapaeʼmo hosimo afoʼamogimo huʼapaeʼmo, na agufa kavaʼmo hisaʼafeʼmo hatu neʼmaʼae, huʼa ge huʼa anafi geʼnageʼanaeʼmo 34Ala kava neʼmoʼa aliʼyaʼamo alisiyafeʼmo higetaʼaene, huʼana hapa paiteʼana 35Yesutegamo avaleliʼana eʼnaʼae. Kukenaʼanimo asagiʼana aikeli hosileʼmo yakai maleʼneʼana Yesuʼmo asagauʼana faiʼana ateʼnaʼageno 36#2 Kin 9:13fai maiteno uʼnigeʼapaeʼmo visiya kateʼmo kukena yaʼapimo asagiʼa yakaime yakaime uʼnae. 37Yulusalemu haopalega Alifiʼaepa aveletiʼmo uno lamigefeʼmo nehigeʼapaeʼmo muki vayaʼmo geʼamo neʼafiya vayaʼamogi aepa faiʼa apamogaga aiteʼa himamuʼaletiʼmo noʼagaya agufa aune kavaʼmo huʼnigeʼa ageʼnayaʼmofeʼmo alopa gefatiʼmo huteʼa Goti agiʼaleʼmo aliʼa asaga hume hume uʼnae. 38#Sam 118:26; Lu 2:14Apakaemo huʼapaeʼmo,

Ala kava neʼmo agiʼalefeʼmo neʼeyanagi alita auleta ateyo. Gotiʼa lagaefeʼmo aipamoʼmo falu hino. Gotiʼa hogote vekamo anaga vekamo agiʼaleʼmo alita asaga hiyo,

huʼa huge huge huʼa maiʼnae. 39Mago Falasi vayaʼmo asole vayaʼeʼmo magokepi lokaeʼa uʼnaya vayaʼmogimo huʼapaeʼmo, Tisao, huʼa, gekamo neʼafiya vayaʼaifeʼmo hukaeʼmo, ge osiyo, huka hapa paiyo, huʼa ha paiʼnagenoʼaeʼmo, 40lapa nepauve, huno, ge osuʼa afaʼa maisayaʼmoʼmo yafaʼmoʼa age aigiye, huno hapa paiʼniye.

Yesuʼa Yulusalemu taonifiʼmo maiʼnaya vayaʼaifeʼmo aviʼyaʼmo huʼniya gemae

41 # Yo 11:35 Yesuʼa Yulusalemu taonifiʼmo uno hogo hutenoʼaeʼmo uno avaʼyi huno taonimo agetenoʼaeʼmo aviʼyaʼmo huʼniye. 42#Aiy 6:9-10; Mt 13:14; Lo 11:8Agaemo hunoʼaeʼmo, Yulusalemu vayaʼmogitapae, huʼna, Lapakaemo alagepa huta maisaya kaʼmo oʼageʼnae. Lapakaemo alagepa huta maisayafeʼmo visaya kaʼmo ageʼnaesinana kanale huʼniyesinaʼmonanafa hemenimo Gotiʼa aeno ati kaeno lapateʼniyanagetapa afaʼa oʼagegae. 43Mago afinaʼmo afole aisigeʼapaeʼmo kame vayatapimogi Yulusalemu taonifiʼmo eʼa taonileʼmo mopamo kafi maleʼa vego huʼa avemo haiʼa muki lapaune hetapa visaya kateʼmo maleʼa akanigae. 44#Lu 21:6; 1:68Apakaemo Yulusalemu taonifiʼmo maiʼnaya vayaʼmogitapaʼe mafaʼne anagatapiʼeʼmo alagi lahapaege eʼa muki nokomo heʼa halagape vaige hugae. Eʼa mago yafateʼmo akalo huʼa maleʼnaya yafaʼmo aliʼa mopafiʼmo yaga auʼa atalesageno magoke yafaʼmo agotofuleʼmo akalo huno ohanegaiye. Gotiʼa lapa maesiyafeʼmo lahapaopaleʼmo emineʼniyana ageta aeto osuʼnayaʼmofeʼmo ani hosu kavaʼmo afole aigiye, huno hapa paiʼniye.

Yesuʼa alopa mono nopiʼmo maketi nehaya vayaʼmo alino hapafaino apataleʼniya gemae

(Mt 21:12-17; Mk 11:15-19; Yo 2:13-22)

45Agaemo Yu vayaʼai alopa mono nopiʼmo uno haino aepa faino maketi nehaya vayaʼmo alino hapafaino apataleʼniye. 46Agaemo hunoʼaeʼmo, avoʼmo kae maleʼniya gemoʼmo hunoʼaeʼmo, noʼnieʼmo, nunumuʼmo nehaya none, huʼa hugae, huno avoʼmo kae maleʼniyaʼmonanafa lapakaemo kumaya vayaʼmo eʼa fala kiʼa neʼmaiya none, hutapa alita hamaleta ateʼnae, huno hapa paiʼniye. 47#Lu 21:37; 22:53; Yo 18:20Muki afinaʼmo mono nopiʼmo alino apaya malege malege huno maiʼnigeʼapaeʼmo mono huʼa neʼapataya vayaʼaiteʼmo yagaiʼa neʼapataya vayanagi keʼaepa gemo avoʼmo kaeʼa aliʼa apaya neʼmalaya vayanagi ala apaki vayanagi huʼa amagisaya kafeʼmo kahauya huʼnae. 48#Mt 21:46; Mk 14:1-2; Lu 20:19Huʼnayaʼmonanafa muki afa vayaʼmogiʼeʼmo geʼamo afisayafeʼmo hapauʼniyaʼmofeʼmo amagisaya kaʼmo oʼageʼnae.

Selectat acum:

Luki 19: kyg2013

Evidențiere

Partajează

Copiază