Yoni 5
5
Yesuʼa ani kotuteʼmo maiʼniya vekamo kaitaʼamo alino hageno ateʼniya gemae
1Mago afinaʼmo utegeno Yesuʼa Yulusalemu taonifiʼmo hopa afinaʼmo uʼniye. 2Yulusalemu taonifiʼmo sipisipi anagaʼmo uʼa lamiteʼa eʼa hai eteʼa nehaya kipaʼmo haneʼniya yateʼmo ani kotuʼmo haneʼniye. Ani ani kotufeʼmo Himulu gefatiʼmo agiʼamo Metasaitagayagae. 3Ani ani kotuʼmo haopaleʼmo faefuʼa noʼmo nokatoʼmuʼageʼmo haneʼniya hiyato nopiʼmo asole vayaʼmo kaita hapauʼniya vayaʼmo eʼa havaeʼa maiʼnae. Apaulagamo ali huʼniya vayaʼmo maige apaiyamo hosuʼniya vayaʼmo maige kanage kanaga osuʼa havaeʼa neʼmaiya vayaʼmo maige huʼnae. Ani ani kotuʼmoʼa kanage kanage hisiyaʼaeʼmo maiʼneʼa ageʼa maiʼnae. 4Goti enisole vekaʼamoʼmo mago afinaʼmo emineno ani ani kotuteʼmo ame aliʼnigeno kanage kanage huʼnigeʼapaeʼmo aeno apakaseno ani kotupiʼmo hogoteno uno lamiʼniya vekamo na agufa kaitaʼmo hauʼnifi alino hageno ateʼnigeno afaʼa maiʼniye. 5Ani vayapatiʼmo mago vekamo teti eitiʼa kafugamo kaita hauge hauge huno maiʼniye. 6Yesuʼa eno ageyana havaeno maiʼnigeno agetenoʼaeʼmo yatala afinaʼmo kaita hauge hauge huno maiʼniye, huno agesa afitenoʼaeʼmo, kaitakamo kahagesiyafeʼmo kahauʼnifiye, huno afi geʼnigenoʼaeʼmo, 7Ala kava nene, huno, aniʼmoʼa kanage kanage nehisigenoʼaeʼmo navalelinuno lamino ani kotupiʼmo natesiya vekamo nagaeʼeʼmo oʼmaiʼniyaʼmofeʼmo mago vekamoʼa ago aeno nagaseno ani kotupiʼmo hogotenuno lamiʼniye, huno ha paiʼnigeno 8#Mt 9:6Yesuʼa hunoʼaeʼmo, he tika yakaikonakamo aliteka uvo, huno ha nepaigenoʼaeʼmo 9kaitaʼamo hageʼnigeno yakaikonaʼamo aliteno uʼniye. Ani afinaʼmo Sapati afinane. 10#Yo 9:14; Niy 13:19; Yel 17:21; Lu 13:14Yu vayaʼmogimo ageteʼapaeʼmo, lagae keʼaepa gemoʼa hunoʼaeʼmo, yakaikonakamo aliteka neʼvana kavafeʼmo Sapati afinaʼmo ani kavaʼmo osiyo, huno ka akani maleʼniye, huʼa ha paiʼnagenoʼaeʼmo, 11alino nahageno nateʼniya vekamoʼmo hunoʼaeʼmo, yakaikonakamo aliteka uvo, huno naha paiʼniye, huno hapa paiʼniye. 12Hapa paiʼnigeʼapaeʼmo, ina laʼmo yakaikonakamo aliteka uvo, huno kaha paiʼniye, huʼa afi geʼnagenoʼaeʼmo 13ani alino hageno ateʼniya vekamo Yesuʼae huno oʼageʼniye. Asole vayaʼmo maiʼnayaʼmofeʼmo Yesuʼa uʼniyana ageno alagepa osuʼniye. 14#Yo 8:11Henagaʼamo agaemo Yu vayaʼai alopa mono nopiʼmo Yesuʼa maiʼnigeno agetenoʼaeʼmo, afiyo, huno, hemenimo alagepa huka maiʼnane. Hosu kavakamo ataleka magoʼe huka osuvo, fiku yanageka magoʼe huka hosu kavaʼmo hisanagenoʼaeʼmo kaitakamo aeno agaseno magoʼe hanageke yaʼmo kagaeteʼmo afole aigiye, huno ha paiʼniye. 15Ha paiʼnigeno ataleno uno Yu vayaʼaifeʼmo hunoʼaeʼmo, Yesuʼa alino hageno nateʼniye, huno hapa paiʼnigeʼapaeʼmo 16#Mt 12:14aepa faiʼa apaini huʼa ateʼnae. Yesuʼa Sapati afinaʼmo alino hageno ateʼniyaʼmofeʼmo apaini huʼa ateteʼa amagisayafeʼmo huʼnae. 17#Yo 9:4Yesuʼa geʼapileʼmo aeno atagaina huno hapa painoʼaeʼmo, afoʼnimoʼmo aliʼyaʼamo oʼataleno muki afinaʼmo alime alime eno hemeniʼeʼmo aliʼyaʼmo neʼaliya agufa kavaʼmo huʼna aliʼyaʼamo neʼaluve, huno hapa paiʼniye. 18#Mt 26:4; Yo 7:1,30; 10:30,33Ani gemo huʼniyaʼmofeʼmo magoʼe huʼa amagisayafeʼmo huʼnae. Agaemo Sapati afina keʼaepa gemo amagino ataleʼniya kavakeʼmo osuʼnifa magoʼe hosu kavaʼmo huʼniye, huʼa apakesamo afiʼnayaʼmofeʼmae. Agaemo Gotiʼa afoʼnimoʼmo maiʼniye, huno hapa paiʼniya gemo huno agaiʼaʼe Gotiʼeʼmo magoke aiyaya vekalane huno hapa paige huʼniyaʼmofeʼmo magoʼe huʼa amagisayafeʼmo huʼnae.
Gotiʼa mafaʼneʼamoʼmo agoti huno apatesiya vekamo lekana paino ateʼniya gemae
19 #
Yo 5:30; 8:28 Yesuʼa hunoʼaeʼmo, alagi lama gemo lapa nepauve, huno, Mafaʼneʼamoʼmo agaiʼamo mago kavaʼmo afaʼa osugiyaʼmonanafa muki yaʼmo Afoʼamoʼmo nehiya kavaʼmo agetenoʼaekeʼmo nehiye. Agaemo nehiya kava huno mafaʼneʼamoʼmo ani agufa kavaʼmo nehiye. 20#Yo 3:35Muki yaʼmo Afoʼamoʼmo mafaʼneʼaeʼmo hau ayamopafiʼmo hauʼnigeno muki nehiya kavaʼamo alino ave neliye. Mani kavaʼmo aeno agaseʼniya kavaʼmo magoʼe huno alino ave lisigeno hisigetapaeʼmo lahapau aigae. 21#Lo 4:17; Ef 2:5; Yo 11:25Muki yaʼmo Afoʼamoʼmo faliʼnaya vayaʼmo alino he tino apateteno afaʼa maisaya yaʼmo neʼapamiya kava huno Mafaʼneʼamoʼa afaʼa maisaya yaʼmo apamisiyafeʼmo hauʼnisiya vayaʼaina afaʼa neʼapamiye. 22#Yo 3:17; 5:27; 9:39; Ap 10:42Muki yaʼmo Afoʼamoʼmo vayaʼmo alino fako huno noʼapate. Agaemo Mafaʼneʼamokeʼmo alino fako huno apatesiyafeʼmo lekana paino ateʼniye. 23#Fl 2:10-11; 1 Yo 2:23Muki vayaʼamogi muki yaʼmo Afoʼamo agiʼaleʼmo aliʼa asaga huʼa neʼataya kava huʼa Mafaʼneʼamo agiʼaleʼmo aliʼa asaga huʼa atesayafeʼmo alino ateʼnigeno emineʼniye. Ina lagimo Mafaʼneʼamo agiʼaleʼmo aliʼa asaga huʼa noʼatesafi ani kavaʼmo huʼa muki yaʼmo Afoʼamoʼmo alino ateʼnigeno emineʼniya vekamo agiʼaleʼmo aliʼa asaga huʼa noʼatae. 24#Yo 3:15-18; 8:51; 1 Yo 3:14Lama gemo lapa nepauve, huno, ina lagimo geʼnimo afiteʼa alino nateʼnigeʼna emineʼnova vekaeʼmo apakesamo afiʼa fatago nehisafigeʼa alagepa huʼa maige maige huʼa maisaya yaʼmo aliʼnae. Apakaemo fali kavategatiʼmo atale eʼa afaʼa neʼmaiyategamo maiʼnayanageʼna agoti huʼna apateteʼnaeʼmo, hosu vayaʼmo maiʼnae, huʼna hapa opaiguve. 25#Mt 8:22; Ef 2:5-6Lama gemo lapa nepauve, huno, Mago afinaʼmo afole aigiyana ago afole aiʼniye. Nefaliya kavategamo maiʼnaya vayaʼmogi Goti mafaʼneʼamo geʼamo afaʼa afigae. Afiʼnisaya vayaʼmogi afaʼa maisaya yaʼmo aliteʼa maigae. 26Muki yaʼmo Afoʼamoʼmo agaiʼamo afaʼa maisiya yaʼmo aepa vekamo maiʼniya kava huno Mafaʼneʼamoʼa agaiʼamo afaʼa maisiya yaʼmo aepa vekamo maisiyafeʼmo lekana paino ateʼniye. 27#Yo 1:4; 5:22Ani kava huno Mafaʼneʼamoʼmo alino fako huno apatesiyafeʼmo lekana paino ateʼniye. Vemo Mafaʼnemo maiʼniyaʼmofeʼmae. 28-29#Nen 12:2; Mt 16:27; Yo 6:40; Ap 24:15Lahapau oʼaiyo. Agae afinaʼmo afole aisigenoʼaeʼmo agemo neʼaisigeʼapaeʼmo faliʼnaya vayaʼmogi afiteʼapaeʼmo he tigae. Alagepa kavaʼmo huʼnisaya vayaʼmo he ti eʼa afaʼa neʼmaiyategamo maigae. Hosu kavaʼmo huʼnisaya vayaʼmo he tiʼa visageno agoti huno apatetenoʼaeʼmo, hosu vayaʼmo maiʼnae, huno hugiye.
Yesufeʼmo na agufa vekamo maiʼnifi huʼa huʼnaya gemae
30 #
Yo 5:19; 6:38 Nagaiʼnimo nagesa afiʼna mago kavaʼmo afaʼa osuguve. Muki yaʼmo Afoʼamokeʼmo naha paiʼnigeʼna aliʼna fako huʼna neʼapatove. Nahauʼniya kavaʼmo akame osuʼna alino nateʼnigeʼna emineʼnova vekamoʼa hauʼniya kavaʼamo akame nehuvaʼmofeʼmo fatago kava huʼna aliʼna fako huʼna neʼapatove. 31#Yo 8:13-14Nagaemo nagaiʼnieʼmo faigoko geʼnimo huʼna naha maeʼna nehuva gemo lapa paisuvana alagi lama gemo haneʼniye, hutapa osugae. 32#Yo 5:36-37; 1 Yo 5:9Osugayaʼmonanafa nagaefeʼmo faigoko geʼnimo huno naha maeno nehiya vekamo maiʼniyaʼmofeʼmo, alagi lama gemo nehiye, huʼna afiʼnove. 33Lapakaemo Yonitegamo alita apateʼnageʼa uʼnagenoʼaeʼmo nagaefeʼmo alagi lama gemo aeno hakalo huno hapa paiʼniye. 34#Yo 1:19-34; 3:27-30Nagaemo ma mopafi vekamoʼa nagaefeʼmo faigoko geʼnimo huno naha maeno hisiya geeʼmo nagesa alaʼamo oʼafiʼnovaʼmonanafa Gotiʼa lapakufamo alino katino lapatesiyafeʼmo mani gemo nehuve. 35Yoniʼa lamugana huno aeno ha leʼniye. Lapakaemo aeno ha leʼniya yategamo etapa maiʼneta agaefeʼmo aise afinaʼmo amuse huʼnae. 36#Yo 3:2; 10:25,38; 14:11Huʼnayaʼmonanafa nagaefeʼmo faigoko gemo huno naha maeno nehiya gemoʼa Yoniʼa huʼniya gemo aeno agaseʼniye. Nehuva kavaʼmo muki yaʼmo Afoʼamoʼmo huvo, huno naha paiʼnigeʼna nehuva kavaʼmoʼa nagaefeʼmo faigoko gemo huno naha maeno nehiya gemoʼa hunoʼaeʼmo, Muki yaʼmo Afoʼamoʼmo alino ateʼnigeno emineʼniye, huno alino apave neliye. 37#Mt 3:17; Yo 5:32; 8:18Muki yaʼmo Afoʼamoʼmo alino nateʼnigeʼna emineʼnova vekamoʼmo nagaefeʼmo faigoko gemo huno naha maeno nehiye. Lapakaemo mago afinaʼmo avayafatiʼmo huʼniya gemo oʼafige augosafiʼmo oʼagege huʼnae. 38#Yo 6:29Lapakaemo alino ateʼnigeno emineʼniya vekamo geʼamo oʼafiʼnayaʼmofeʼmo geʼamo alita lapaipafiʼmo alagi oʼmaleʼnae. 39#Lu 24:27,44; Ap 13:27; 2 Ti 3:15-17; 1 Pi 1:10-11Lapakaemo Goti Mukufiʼmo haneʼniya geeʼmo kahauya hutapa agege lekana paige hutapa maiʼnetapaeʼmo, alagepa huta maige maige huta maisuna yaʼmo aligune, hutapa lapakesamo neʼafiyaʼmonanafa ani gemoʼa nagaefekeʼmo huʼniye. 40Huʼniyaʼmonanafa maige maige hutapa maisaya yaʼmo alisayafeʼmo nagaetegamo esayafeʼmo alagi olapauʼniye. 41Nagaemo ago apaketeʼnaeʼmo, ma mopafi maiʼnaya vayaʼmogimo ala nagiʼnimo namigae, huʼna nagesa noʼafuve. 42Ago lapakeʼnovana Gotifeʼmo lapau lapayamopafiʼmo alagi olapauʼniye. 43#Mt 24:5Nagaemo Afoʼnimo agiʼalefeʼmo emiʼneʼnogetapaeʼmo alita falu fala hutapa noʼnatayaʼmonanafa mago vekamoʼa agaiʼa agiʼalefeʼmo agesa afiteno esigetapaeʼmo alita falu fala hutapa ategae. 44#Yo 12:43Vayaʼmogi lapakitapileʼmo aliʼa asaga huʼa lapatesayafeʼmo lapauʼniyaʼmonanafa Gotiʼa lapakitapileʼmo alino magokeʼamokeʼmo asaga huno lapatesiya kavafeʼmo kahauya nosayaʼmofeʼmo haiya kava hutapa nagaefeʼmo lapakesamo afitapa fatago hugae. 45#Loa 31:26-27Lapakaemo nagaefeʼmo hutapaeʼmo, agaemo Afoʼamotega uno hainoʼaeʼmo ge faino ha paiteno agoti huno lategaiye, hutapa lapakesa oʼafiyo. Magoke vekamo Mosesefeʼmo alita amufa amiʼnaya vekamoʼmo ge faiteno agoti huno lapategaiye. 46#Loa 18:15; Ap 3:22Moseseʼa nava gemo huno avoʼmo kae maleʼniyaʼmofeʼmo Mosese geʼaeʼmo lapakesamo afita fatago huʼnaesinana geʼnieʼmo lapakesamo afita fatago nehaesine. 47#Lu 16:31Lapakaemo avoʼmo kae maleʼniya geeʼmo lapakesamo afita fatago osuʼnisayana haiya kava hutapa navayafatiʼmo nehuva geʼnieʼmo lapakesamo afita fatago hugae.
Selectat acum:
Yoni 5: kyg2013
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2013, Wycliffe Bible Translators, Inc. All rights reserved.
