San Juan 11

Lázaro imtu

1Mane nane an ñamin ishtumikawa kwinta kinamtus. Usne Lázaro mun. Uskas paiña paas kwampihshkas Betania pɨpulura uzara. Sun paasne Maríakas Martakas munwail. 2An Maríane, Lázaro imtumikawa kwampihshne, watsal piam pihshpi Anpatpa mittɨkin pattain kit paiña ashkasa pul chakninta. 3Lázarowa kwampihshne paiña pit ɨnin kit Jesústa ka kaizpailta:

—Anpat. Up wat izmuruz imtu tui.

4Sun mɨrawane, Jesúsne kaizta:

—Imtukas, Lázarone irɨt nukkulmanazi. Sunkana Lázaro akwa, awane Dios kwisha wari kizanazi. Sun irɨt akwa, awane Diospa painkul kwisha wari kizanazi.

5Jesús Martarakas paiña aizpihshtakas Lázarorakas pashinarakas, 6ussa Lázaro ishtu i kiztakas, Jesúsne us tukin an paas payu mara. 7Sun kitpane, usne kammuruza kaiznara:

—Mamasa Judea sura ɨzhain.

8Uspane sɨnkaara:

—Kamtam. Akkwan payu chin Judío awa ɨninturuzne nua uk kishiara. Nune imasara. ¿Mamasa ta ɨshimtukish?

9Jesús kaiznara:

—Pãn doce urakima kai maltu akwa, mɨnpazha au sukin chamtumikane, Taitta pashit aizpa kishiarawa. Na Dios pashit aizpa kimtuasmin, mɨnminkas nawa kwail kisachi. 10Sunkana Diosta nɨjkultuchimikane, amtawara chamtumikakana i. Diosta pianchimikane, Dios uztukin pianasachi, Dios kamtamtu aizpa kanpamtuchi akwa.

11Sun kiztawane, Jesúsne an kaiznara:

—Au izmumika Lázarone pirɨt tui. Sunkana nane ussa izkulninnash.

12Suasne paiña kammuruzne kaizara:

—Anpat. Pittane, usne suas kakultanazi.

13Jesús Lázaro irɨtpa paranamtuasmin, kammuruzne Lázaro pittɨttu minñara. 14Suasne Jesúsne usparuza nil kaiznara:

—Lázarone me irɨt. 15Na uskasa tuchikas, nane u akwa watsal kultus, u nawa nɨjkulamɨznapa. Ta ussa izna ɨzhain.

16Suasne Tomásne, gemelo muntɨtmikane, mamaz kammuruza kaiznara:

—Aukas ɨzhain, an kamtamkasa ina.

Jesúsne Martakasa Maríakasa wanmaltu

17Piannakane, Jesúsne Lázarora ampara payu uk kulta kamtɨt piankamta. 18Betania pɨpulune Jerusalén pɨpulurakima kashawazhain uz. Kutña kilómetrokin uz. 19Akkwan Judea suras awane Maríarakas Martarakas uzkɨnpainna ɨara, kiwainanapa, uspa tayalamanpa, nalpihsh irɨt akwa. 20Jesús amtu piankamarawane, Martane ussa wanmalna ɨt. Sunkana Maríane yaltain nukkulta. 21Martane Jesústa kaizta:

—Anpat. Nu akki tuaratne, ap nalpihsh irakianai. 22Sunkana nane nu chiwazha Diosta paikumtu aizpa Dios nua mɨlanazi pianish.

23Jesúsne kaizta:

—Up nalpihshne mamasa uznazi.

24Martane kaizta:

—Nane nu kaizta aizpa watcha i pianish. Usne mamasa minpa payura irɨttas kuhsnazi.

25Suasne Jesúsne ussa kaizta:

—Nane irɨttas kuhsnintumika ish, awaruza uzninnanapa. Irakas, nawa nɨjkultamikane mamasa uznazi. 26Wan ka uztuzkas nawa nɨjkultuzkas mizurainkas sunkanain iamanazi. ¿Sun nɨjkultukish?

27Ussa kaizta:

—Watcha, Anpat. Nune Dios narɨtmika i. Nune Dios painkul, au sura atmika i. Sun nɨjkultus.

Jesúsne Lázaro irɨt kamkin aztu

28Sun kiztawane, Martane aizpihshta, Maríara, akwana ɨt kit puintain kaizta:

—Kamtammikane kashain tu. Usne nawa ɨninta, nua akwanpa.

29Sun mɨrawane, sun urain Maríane kuhsak kit Jesústa izna ɨmɨzta. 30Jesúsne pɨpulura naptachi mama. Usne Marta uskasa wanmaltakin tuara. 31Judío awane uskasa yalta purat kit uzkɨnnaara, us tayalmanpa. María kuhsak kit azain puzta izarawane, uspane ussa kanpaara. Us kamkin azna ɨmtuka minñara.

32Jesús tukin pianarawane, Maríane paiña mittɨkin wakpuj wain kit kaizta:

—Anpat. Akki tuaratne, ap nalpihshne irakianai.

33Maríakas Judío awa uskasa amturuzkas azara. Sun iznarawane, Jesúsne ayukta kwail maz kit tayal kit 34mɨmanara:

¿Mɨntama ussa kamanas?

Sɨnkaara:

—Anpat. Us tukin izna ɨzhain.

35Jesúsne azta. 36Judío awane usparuzpain kaizara:

—Usne ussa watcha pashira.

37Sunkana mɨnpazha kaizara:

—Usne kasu izsachimikasha izkulninta. ¿Usne chiwazha kishinaka, Lázaro imanpa?

Lázaro irɨttas kuhstu

38Jesúsne mamasa ayukta kwail maz kit tayal kit kamkin ara. An kamkin kul azi. Napmukin sɨptɨt tu katsa ukkasa. 39Jesúsne ka ɨninta:

—Uk tainkarain.

Martane, irɨtmikawa kwampihshne, kaizta:

—Anpat. Kwail piamka. Ampara payu i me kamtɨt.

40Jesúsne sɨnkara:

—Nane nua ka kaiztau: “Nawa nɨjkultune, nune Dios kal kimtu aizpa piankamanazi.”

41Suasne uspane uk tainkaara. Jesúsne chiyura izak kit tɨnta kaizta:

—Ap Taitta. Aishtaish kiztus, pailta payukima nawa mɨmtu akwa. 42Nane nu nawa pailta payukima mɨmtu pianish. Mane nane uspa puraruz akwa sun kiztus, nu nawa ɨninta nɨjkulanapa.

43Sun kiztawane, Jesúsne tɨnta kwianta:

—Lázaro, suas puzti.

44Irɨtmikane chihtɨkas mittɨkas iptɨt tu puzta. Matsɨhkas maza pĩnkasa iptɨt. Jesúsne kaiznara:

—Iptɨt pĩn chɨhttain, ɨnpa.

Judío awane Jesústa pizshiamtu

(Mt 26.1-5; Mr 14.1-2; Lc 22.1-2)

45Suasne sun izarawane, akkwan Judío awaruzne Jesústa nɨjkulara. Uspane Maríara kanpanat kit Jesús kit aizpa izara. 46Sunkana mɨnpazha usparuztas Fariseo awaruza ɨat kit Jesús kirɨt aizpa kainaara. 47Suasne Fariseo awaruzkas pariya ɨnintuzkas anza katsa Judío ɨnintuzkasa wanmakkat kit kaizara:

—¿Aune chima kianapas? An ampune akkwan iztasparɨt kal kimtui. 48Sunkana us paiña kal kimɨztune, au ussa chɨhkatne, wanne ussa nɨjkulanazi. Suas Romano awa mikwaruzne aanazi, Dios katsa yalta azpianna, au Judío awa kwalkasa waya kiana, wan chiwal piantanakima.

49Sunkana mazane usparuztas, Caifás muntɨtmikane, sun año pariya ɨninmika azi. Usne kaiznara:

—Une sun kimtu aizpa pianchimai. 50Une sun piankamtain. Maza ampu au wan Judío awa akwa irane, anza wari. Suasne Romano awaruzne au Judío awaruza piantaamanazi.

51Sunkana Caifásne sun pit paiña minpain kaiztachi. Caifásne sun año katsa pariya azi. Diosne ussa an ñamin sun kimtu aizpa piankamnin kit kizninta: “Jesúsne Judío awaruz akwa inazi.” 52Sun Judío awa akwa imtukas, usne mamaz sura uztukas inazi, Dios usparuza maza kwalkanain, Dios painkulkanain wanmakkanapa. 53Sun payurain Judío ɨninturuzne Jesústa piantana nɨjkulara.

54Katmizna Jesúsne Judío awa ɨninturuz purakin izpanarachi. Usne Judea sukis puz kit Efraín pɨpulura ɨt. Sun pɨpulu pul su kashakin uz. Sua nukkulta paiña kammuruzkasa.

55Judío awaruzpa Pascua pishta taiznapain. Pascua pishta taiztachasmin, akkwan awane nanmals Jerusalén pɨpulura nuara, Dios iztakin sɨnam saninnanapa, Pascua pishta izanapa. 56Uspane Jesústa sayara. Dios katsa yalta wanmakkamtuasmin, uspane usparuzpain ka mɨmaara:

—¿Chima minñamtu? ¿Usne pishtara ansa?

57Pariya ɨnintuzkas Fariseo awaruzkas wanta ka ɨninnara:

—Mɨnpazha Jesús tura pianne, aumɨza kainanazhain, ussa piz kit kajchira sɨpna.

Selectat acum:

San Juan 11: kwi

Evidențiere

Partajează

Copiază