Génesis 2
2
1Deyobi, nibneg obinnilesad,
napneg obinnilesad,
amargi ibmar-akar-akar obinnilesad,
bela deyob ambikunonikid.
2Ibanergwadgi (6) Bab-Dummad bato bela ibmar-obinnissoggu,
ibagugled-nagunonigu (7), Bab-Dummad obunnosad, bar arbassulid.
3Geb degine, Bab-Dummad ibagugledgi (7) ise-nued binsasad.
Bela ibmar-obinnisad-bergusgu, obunnosad.
A-ulale, a-iba, iba-islidikidye onugsasad.
4Deyob napneg obinnilesad, degi, nibneg obinnilesad.
1b. Dule abirgunagwar Edénʼgi gwisgunonikid
(2:4-25)
Dule-abirgunagwar-gwisgunonikid
Bab-Dummad-Jehová, we-napneg, degi, nibneg obinnisgua, 5amba sapimar napneggi sated, amba yoo gaganmar-aragana ainidabalid. Ar ade, Bab-Jehová amba yoo dii napagi owidaged, degi, dule napagi-arbaega satebalid. 6Unnila napagi dii-bupurmakmaid, bergwapa napa ogegar. 7Geb degine, Bab-Dummad-Jehová napa susgu, a-napagi dule-sobsad. Bab-Jehová dule-sobsagu, dule-asugi buu imaksad. Geb agi, dule burba-nika gunonikid. Agine, dule dula-gunonisunnad.
8Geb degine, Bab-Dummad-Jehová dad-nakwedsik, Edénʼgi nainu-nued nasiksad. Agi, Bab-Dummad-Jehová we-dule-obinnisad ogwisnonikid. 9Agine, Bab-Dummad-Jehová sapimar akar-akar bela yeerdaklemalad ainiega imaksad. A-sapimar-e-san bela yeer-gulle imaksad. Nainu-nued-abargi, sapi-wargwen gwichid. Dule we-sapi-e-san guchale, dula-gudii guoed, gwen burgosulid. Degine, sapi-baid gwichibalid. Dule we-sapi-e-san guchardina, wisguoed, ibu ibnuedi, ibu ib-isganabali.
10Degine, Edénʼgi diwar maid. Agi, e-saila-siid. A-diwar nainu-nued ogmaid. A-diwar ana-sogabake nikad. 11Gebe-ana-gwensakgadi Pisónʼye nugad. A-diwar bela Havila-yalaganba bipirmakmaid. Aginbali, a-yargi or nikad. 12Havila-yargine or-nikadi, or-nuedid. Agi sapi-nued-gichi-nikad-bedelioʼye-nugad nikad. Degi, akwa-nued-óniceʼye-nugad nikabalid. 13Diwar-ana-sogbogwaddi Gihón-diwarye nugad. A-diwar bela Cus-yalaganba bipirmakmaimogad. 14Diwar-ana-sogapaagwaddi Hidekelʼye nugad. A-diwar, Asiria-dad-nakwedsik maid. Diwar-sogabakegwaddi Éufratesʼye nugad.
15Nainu-nued-Edén-akwega, Bab-Dummad-Jehová, dule-ogwisnonikid, agi arbaegar. 16Agine, Bab-Dummad-Jehová dulega igar-uksad: “We-nainu-nuedgi sapimar-bukwad-e-sanmar sunna bela be gunned. 17Unnila sapi-wargwen-e-sandi melle be gunno. We-sapi, ibmar-nued-wisi, ibmar-isgana-wisi dule-saed. A-sapi-e-san be guchale, a-ibagi be burgoed.”
18Geb degine, Bab-Dummad-Jehová sogded: “Dule wargwen-gudiir, akuu dakleged. Degisoggu, dulega e-abirgined an imakoed, adi, e-bendaked-nuedga guegar.”
19Bab-Dummad-Jehová napagi bela ibmar-durgan, bela nuumar obinnisad. Bab-Jehová we-ibdurganmala Adánʼse senonikid. Adi, Adán ega nug amiegar. Dule ibmar-durganga nug-amisad, abali, ibmar-durgan nugnanaed. 20Weyobi dule bela we-ibmar-durgan:
Ibmar-durgan-sunna-akwilemaladga,
bela nuumarga,
bela ibmar-durgan-sapurbarmaladga, nug amisad.
Degi-inigwele, Adánʼgardi e-bendaked sate gusad.
21Geb degine, Bab-Dummad-Jehová Adán-ise-nue-gabega imaksad. Adán nue-gabmaigu, Bab-Jehová Adán-e-dikargar-wargwen onosad. Geb Bab-Dummad-Jehová gannar Adán-e-san edisad. 22Bab-Dummad-Jehová we-dikargargi ome-obinnisad. Agi, macheredga ome-senonikid. 23Adán ome-dakdegu, sogded:
“Ar wedi an-galado, ar ade, an-gargi obinnilealedid.
Wedi an-sanado, ar ade, an-sangi obinnilealedid.
Ar Bab-Dummad we-ome macheredgi obinnisad.
We nugguodo, Omeye.”
24A-ulale, machered e-babgi bangudoed, e-nangi bangudoed. Geb machered e-ome-ebo garmakdii guoed. Ebogwadi, san-wargwennagwadga gunonikoed.
25Deunni, Adán, Eva-ebogwa, uka-swili garmakdimalad, gwen binged nikasurmalad.
Selectat acum:
Génesis 2: cuk
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2014, Wycliffe Bible Translators, Inc. All rights reserved.