Versete biblice populare din Tutui Makasososak 27

Partajează

Elan fo Manetualain nakonda dinis numa lalai mai, fo tao nala o osi-lutum mara raisi-mina! Elan fo Ana fee o hade heta-pepede, ma anggor boan nara sofe ta ela luꞌa-lembaneu. Hatahori nusa-nusak kara dadi neu o atam, ma leo-leor holu ei ma fee hada-horomatak neu o. Elan fo o parenda basa o toranoom mara, ma ara sendek luu-langgan nara reu o matam. See ndia fee neketook neu o, na, ara oo hambu neketook boe. Ma see ndia fee babaꞌe-babatik neu o, na, ara oo hambu babaꞌe-babatik boe.”

Boe ma Esau kokolak nae, “Ana kedi nala au laꞌe dua ena. Makasososan, ana kedi nala au haak ana uluk. Hatematak ia ana kedi nala au babaꞌe-babating bali. Nandaa ndia naden, ‘Yakob’. Tehuu papa bei naena babaꞌe-babatik laen fee au bali, do?” (Nade Yakob sosoa-ndandaan ‘toꞌu neu ei tinggak’. Tehuu sosoa-ndandaan laen ‘mana kedi-irak.’)

Basa boe ma Isak naselu mbalin nae, “O masodam neu ko dook ka numa osi-lutu maisi-minak mai, huu ta hambu dinis konda numa lalai mai fo tao makoe o daem. O tafam ndia neu ko fee o masoda. Tehuu leo mae talo bee oo, o dadi ata neu o fadim boe. Kada mete ma o bisa laban neun, na, dei fo o bisa makamboꞌik numa liman mai.”

Esau namanene nala naa, boe ma ana honi nakandoo neu aman nae, “Papa babaꞌe-babatim kada esak ka, do? Neu ko papa bei bisa sangga babaꞌe-babatik laen fee au. Leo mae babaꞌe-babatik baꞌu anak oo malole boe!” Boe ma ana mulai buꞌi bali.