Nouveau Testament en langue Gabri Maja du Tchad

Kɔl gɨ da Kumu gɨ Hɨrwa / Gabri Maja

Jesu te ka-aye-cay-tɨbayi ga mɔjɨ-cayge-sɔɔ bɨ, bɨge dɔnɔ di ni tan̰ turnɔn̰əŋ ga ɨsɨndəŋ bɨ, poɗɨn̰ hɔmɨn̰ɛ ga toyge kan̰dɨge kan̰dɨge bɨ, torɨn̰ modo ga toyge kan̰dɨge kan̰dɨge bɨ. Guson̰ ka-gɨre-gɨye ga mɔjɨ-cayge-sɔɔ le ba kɛ: Ban gɨ cay wase cɨg cɨg na Simo, gɨ kan teeyige Pɨyɛr, dan̰ kurɨndi Andɨre bɨ, Jag kurɨn̰ Jebede dan̰ kurɨndi Ja̰ bɨ, Pilib dan̰ Bartelemi bɨ, Tomas dan̰ Matɨyo ba-hɔgɛ lambo bɨ, Jag kurɨn̰ Alpe dan̰ Tade bɨ, Simo kɨye ba-cay ƴaa gɨ gey dɔrɛ kalaŋ kayi kobi ka-dɔɔ cayge, dan̰ Judasɨ Isikarɨyɔt, ba-aye cay Jesu bɨn̰ ka-baadi bɨ.


Na kan ma na ka-gɨre-gɨye ga mɔjɨ-cayge-sɔɔ. Jesu gɨyge duroy kalaŋ ayɨn̰ te tumoyi bɨge yege hɨn̰: «Ɔrɛgɨŋ gusi kalaŋ ga toyge na Jubɨ naŋ le naŋ bɨ, ɔrɛgɨŋ a cay ƴaan̰əŋ ga gɨmdəŋ ga a cay gɨsəŋ ga Samari gaŋ naŋ bɨ. Ama ɨragɨŋ na gusi te kalaŋ ga ni Ɨsɨrayɛln̰əŋ ga woyge hɨn̰ gamge ga kayaŋge coŋ wo̰. A te ɔrɛ kogɨŋ gɨ te gɨyəŋ gɨŋ le, tɨgagɨŋ bɛrnɛ daa daa, yagegɨŋ hɨn̰: “Dɔɔ-ƴaa di daa nii le ɨrga mɨnde ɨni.” Pɨɗagɨŋ ka-hɔmɨn̰ɛ bɨ, lɨbɨgɨŋ kalaŋ ga madɨrdaŋ bɨ, dɨran̰gɨŋ ka-mada mɨra bɨ, tayagɨŋ turnɔn̰əŋ ga ɨsɨndəŋ bɨ. Kɨŋ way na kalɨn̰ bɨ, bɨn̰gɨŋ kalaŋ na kalɨn̰ bɨ. Kɨŋ ɗɔɔ ba aye lɔr naŋ le, nare gɨ ni arja̰ naŋ le, sɨle di yɨle boy magɨla kogɨŋ gɨŋ kobɨgɨŋ naŋ. Kɨŋ ɗɔɔ ba aye sangɨ kobɨgɨŋ naŋ bɨ, dɔnɛ badɨge sɔɔ cay kamdɨge gaŋ naŋ bɨ, dɔnɛ gɨyabe naŋ bɨ, aye jor naŋ bɨ. Kɨya wa ba-lɔɔ gɨye le, ojɨ gɨ ban kɨya wɔɔ hɨnga kayi ga ni dɔɔ.
«Boy cay ƴaa-di-gumu wala, boy cay gulɔŋ gɨ ani ani gɨ kɨŋ na andaŋ boy nee na, ɨngɨrdɨgɨŋ ɗe kan gɨlgɨŋge ungo gɨ ɗari gɨ ɓal ƴomgɨŋ gusi bɨ, sɨmagɨŋ tayi bɨrɨŋ gɨsɨn̰ gɨ kɨŋ kɨya son̰ daa. Kɨɗɨn̰ ga kɨŋ na andaŋ duroy ƴaa gɨŋ na, yan̰gɨŋ kalaŋ ga duroy nee yagegɨŋ hɨn̰: “Ɗe gusi-dɔbɛ da Kumu baa danagɨŋ.” Hɨn̰ gɨ kalaŋ ga duroy ƴaa di nee le na kuɗudaŋge na, ɗa gɨ gusi-dɔbɛ togɨŋ baa danage, ama kan naa kalaŋ ga kuɗudaŋge naŋ na, ɗa gɨ gusi-dɔbɛ togɨŋ jɨga wayagɨŋ. Hɨn̰ gɨ kalaŋ na ƴɨmagɨŋge gusɨge naŋ bɨ, jage kɔl kogɨŋ naŋ bɨ na, andaŋgɨŋ duroy ƴaa di nee le, wala duroy cay ƴaa-di-gumu di nee dɨŋ le coŋ. Bɨ ɗagɨdagɨŋ bundu di cay tɨbaygɨŋ dɨŋ ɗɨga ɗɨga dɨran̰gɨŋ naji togɨŋ bɨgage cayge. Aŋ yəgɨŋ daa waŋ na cɨndi: Wɔlɛ bɔyɛ kɔl gɨŋ le, kɔl gɨ kɨya ƴɔmɛ cay ƴaa-di-gumu di nee le, kɨya osɨwa tɔgɨ ɗɨn̰ kɔl gɨ kɨya ƴɔmɛ cay gɨsəŋ ga Sɔdɔm bɨ, Gɔmɔr bɨ.


«Jagɨŋ, ɨŋ-bandi ɨŋ kɨya gɨygɨŋ duroy kalaŋ, na hɨn̰ gamge a duroy gaye ga coŋ gaŋ wo̰. Na toy di hɨn̰ wo̰ ma, ɗagɨŋ muɗɔlɛ cay gusɨgɨŋ gɨŋ hɨn̰ kumbulo wo̰ bɨ, ɗagɨŋ gɨ kuduroygɨŋ bɛrɛ-kən̰jəŋ hɨn̰ guu di bɛrɛ-kən̰jəŋ wo̰ bɨ. Ɗagɨŋ muɗɔlɛ cay gusɨgɨŋ kɨya cay kalaŋ, kɨya wa kan kɨya se kɔl caygɨŋ tumoy ka-bɔyɛ kɔl gaŋ bɨ, kan kɨya somdɨgɨŋge duroy ƴaa-daye koge gɨŋ bɨ. Kan kɨya tolgɨŋge orɨn̰ge danagɨŋ tumoy ka-kɨbɨ kɛrɨmbɛlɛŋ ga gɨmdəŋ gaŋ bɨ, tumoy kɛrɨmbɛlɛŋ gaŋ bɨ, kɨya canɨ. Na hɨn̰ wo̰ ma, kɨŋ kɨya wan̰ gɨyəŋ gɨ ni leen̰ tɨmon̰ cay kɔl gɨ cɨndi ojɨn̰ canɨ tumoy Jubɨn̰əŋ bɨ, tumoy kalaŋ ga toyge na Jubɨn̰əŋ naŋ bɨ. Kɨɗɨn̰ ga kan kɨya ƴomgɨŋge orɨn̰ge danagɨŋ kɨɗɨn̰ bɔyɛ kɔl gaŋ na, ɗɔɔgɨŋ ɗugoygɨŋ algɨŋ kɛ na koldi wa ma magɨŋ kɨya yɔ ga, naŋ bɨ, cay jɨba di ni yon̰ naŋ bɨ, kɨya wa Kumu kɨya bɨgɨŋ kɔl gɨ ni yɔ a tɨwadi di nee dɨŋ le. Kɨya wa na kɨŋ-gandi ba kɨya yɔɔ kɔl naŋ, ama na Turnɔ di da Baygɨŋ ba kɨya ɗɔɔ kɔl kɨbɨgɨŋ.
«A boy wɔlɛ gɨ ba kɨya ɨrga gɨŋ le, kalaŋ kɨya ayege cay karmiige bɨn̰ ka-dɔɔ cay ƴaa ɗe kan na dɨɗɨgege bɨ, karɨn̰aŋ ban̰ige kalɨn̰ ma kɨya lɔɔge na hɨn̰ wo̰ dan̰ karɨndɨge bɨ. Karɨn̰aŋ kɨya bɨləŋge ka-baa ga da ban̰ige dan̰ ƴon̰ige coŋ bɨ, ayege cayge bɨn̰ kalaŋ ɗe na dɨɗɨgege coŋ bɨ. Kalaŋ nɔm kɨya ƴomgɨŋge dan̰ kuduroyge kɨya cay gusoŋnɨ. Ama ungo gɨ na ƴɨma usa bɨrɨŋ dɨɗɨn̰ kɨbi na, kɨya wɔɔ pɔɗɛ. Kɨɗɨn̰ ga kan na gɨlgɨŋ-cɨn̰ a cay ƴaa-di-gumu di pɨna dɨŋ na, gɨrgɨŋ ɨragɨŋ a cay ƴaadi ɗaŋ dɨŋ. Aŋ yəgɨŋ daa waŋ na cɨndi: Kɨŋ kɨya gɔrɛ a cay ƴaan̰əŋ ga gɨmdəŋ ga Ɨsɨrayɛl gon̰ cayge nɔm togɨn̰-bɛrnɛ naŋ ƴee bɨ ga ma, Kurɨn̰-ungo kɨya caga.
«Ba-aye-cay-tɨbay ba-gɨlii hɨnga ɗɨn̰ ba-gɨlii hɨnga naŋ bɨ, marɨna ba-gɨye ɗɨn̰ ba-gulondi naŋ bɨ. Hɨn̰ gɨ ba-aye-cay-tɨbay ba-gɨlii hɨnga na gɨlɨn̰ dan̰ ba-gɨlii hɨnga bɨ, marɨna ba-gɨye na gɨlɨn̰ dan̰ ba-gulondi bɨ ɨni na, ɓal hɨn̰ wo̰. Hɨn̰ gɨ kalaŋ na ɨrage bɨrɨŋ tɔgɛge ba-ƴaa Bɛljebul na, kɛ kan gɨ tɔgɛge kan ga a duroy ƴaadi dɨŋ na mɨna bɨ ga?


«Kɨŋ ɗɔɔ ba hundɔrɔ ungo naŋ. Kɨya wa hɨnga nɔm ga woy a kɨɗɨn̰ ɓurɔŋgɛdɨge gaŋ ga kan kɨya dɔrɛ toyge daa naŋ le unɔ bɨ, hɨnga nɔm ga woy a kɨɗɨn̰ wɔsɛdɨge gaŋ ga kan kɨya dɨle sɔlɛ naŋ le unɔ bɨ. Kɔl gɨ ɨŋ yəgɨŋ duroy dɨlɨm dɨŋ le, yayigɨŋ cɨn̰-tɨwa dɨŋ waŋ waŋ bɨ, kɔl gɨ kan n̰amgɨŋge sɨmaygɨŋ le, nayan̰gɨŋ cay kɨdɨbar gɨŋ daa tɨgan̰gɨŋ bɛrnɛ. Kalaŋ ga ɓalge dɨɗege kuyoŋdi-gusɨgɨŋ, ama kɨya ɓalege dɨɗe turnoygɨŋ naŋ le, kɨŋ hundorge naŋ. Ungo gɨ ojɨ gɨ kɨŋ kɨya hɨndari le, na Kumu. Ban ba ɓale lɔɔ gɨ ɗe kuyoŋdi-gusu ungo bɨ, turnoyi bɨ, na mundoŋ ɗəndəŋ duroy tɨwa di ƴee dan̰ tumɔɔ di ni gehɛn dɨŋ. Kɛ kan kɨlge mɔrɔŋ won̰ge sɔɔ dan̰ gursu pɨna naŋ ga? Ama na hɨn̰ wo̰ kalɨn̰ ma, pɨna duroyge na ba gɨsəŋ na, Baygɨŋ Kumu sol. Kogɨŋ kɨŋ-gandi na, teɗi caygɨŋ kalɨn̰ ma Kumu ɗoŋsɨ pɨna pɨna nɔm. Hundɔrɔ gɨŋ naŋ: Kɨya wa kɨŋ-gandi le, kɨledɨgɨŋ ɗɨn̰ ga da mɔrɔŋ ga kondi ɗɨgɨ ɗɨgɨ.

«Waŋ waŋ gɨ na ya tumoy kalaŋ gɨ ɗi naa ungo hɨnge na, ɨŋ-bandi kalɨn̰ ma, ɨŋ kɨya yɔ gɨ ɨŋ naa koyi tumoy Banɨ gɨ som a daa nii bɨ. Ama waŋ waŋ gɨ na man̰a kɨbi tumoy kalaŋ gɨ ɗi na sɨlaŋ naŋ na, ɨŋ-bandi kalɨn̰ ma, ɨŋ kɨya man̰e kɨbɨnɨ tumoy Banɨ gɨ som a daa nii gɨ ɨŋ na sɨlayi naŋ bɨ.


«Ɨrɨmegɨŋ gɨ ɨŋ na ɨrga naa kɨya ɨrgan̰ dan̰ gusi-dɔbɛ a cay gɨsəŋ gaŋ naŋ. Ɨŋ ɨrɨn̰ na dan̰ gusi-dɔbɛ naŋ, ama na dan̰ pəlɨm. Əw, ɨŋ ɨrga na kɨya bɨle cɨn̰ kɨye cay bayi bɨ, turmɔ cay ƴɔɔ bɨ, tama cay malgoo bɨ. Na hɨn̰ wo̰ ma, kalaŋ ga duroy ƴaadɨgɨŋ gɨŋ kɨya bɨlege ka-baadɨgɨŋ.
«Waŋ waŋ gɨ na gey bayi bɨ, ƴoyi bɨ cɨla ɗəŋ ɨŋ-bandi coŋ na, kɨya ɓale bɨləŋ ba-aye-cay-tɨbanɨ naŋ bɨ. Waŋ waŋ gɨ na gey kurondi bɨ, turmoyi bɨ cɨla ɗəŋ na, kɨya ɓale bɨləŋ ba-aye-cay-tɨbanɨ naŋ bɨ. Waŋ waŋ gɨ na kuja sɨya-gɨ-dagɨli koyi dɨgan̰ nərɨn̰ ɨran̰ karɨnɨ naŋ na, kɨya ɓale bɨle ba-aye-cay-tɨbanɨ naŋ. Waŋ waŋ gɨ na gey pɔɗɛ gusi na, kɨya wɔɔ mundoŋ. Ama ungo gɨ na mɨnda gusi coŋ kɨya canɨ na, ban kɨya jɨga wɔɔ gusi koyi le ɗaŋ daa.


«Waŋ waŋ gɨ na ƴɨmagɨŋ kuɗa gusi na, ƴɔmɔŋ na ɨŋ-bandi kuɗa gusi bɨ. Waŋ waŋ gɨ na ƴɨmaŋ kuɗa gusi na, ƴom na ban gɨ gɨygəŋ le kuɗa gusi bɨ. Waŋ waŋ gɨ na ƴɨma ba-yɔɔ-kɔl-gɨ-Kumu-ba-yɔɔ gusi kɨya gɨ ban naa ba-yɔɔ-kɔl-gɨ-Kumu-ba-yɔɔ na, kɨya wɔɔ cay kɔbɔ hɨn̰ gɨ da ba-yɔɔ-kɔl-gɨ-Kumu-ba-yɔɔ wo̰ bɨ. Waŋ waŋ gɨ na ƴɨma ungo gɨ dan̰ durɔ ɗɨngar gusi kɨya gɨ ban naa ungo gɨ dan̰ durɔ ɗɨngar na, kɨya wɔɔ cay kɔbɔ hɨn̰ gɨ da ungo gɨ dan̰ durɔ ɗɨngar wo̰ bɨ. Aŋ yəgɨŋ daa waŋ na cɨndi: Waŋ waŋ gɨ na bɨn̰ ungo duroy kalaŋ kange ga n̰en̰əŋ kɛ le, kaŋ ga jali dan̰ ungo di dḛḛ kɨya gɨ ban naa ba-aye-cay-tɨbanɨ na, kɨya wɔɔ hɨnga ga ni cay kobi.»

Ascultă Matɨyo 10