N'KANGULU WUMOONË

Bunë Yeesu kwamani kuvaanë mëloonji mooso omo, naandi wusë kaambë bilaanzi byaandi : « Luzabisi ti, n'saangu Paakë wum'ba fë bilumbu byooli i Mwaanë muutu wun'vakulu wum'baandu fë kuluusu. »
Mu bwaawu, bëkuluutu bë singangë-Nzaambi yi mëkakëtë më Sizwiifë bëkukumë ku luumbu lu n'kuluutu singangë-Nzaambi bën'teelë Kayiifë. Bisë kotë fuundu mu kubwililë Yeesu mu mëlyeelë i kun'voondë. Baawu bisë tubë : « Beeso kupodi ve kum'bwiilë mu ntaangu n'saangu, mu kumaangë yekësë-yekësë mu nkoongë baatu. »


Yeesu bunë kwabë ku Betani, ku n'zo yi Simu wunë wabë yi bwaasi. Bunë kwabë fë meesë, n'cyeetu wusë kotë yimunë cibulikë ci alëbaatë ciwaalë yaafë bukaalu. Naandi wusë sekulë yaawu fë n'tu Yeesu. Bilaanzi bye moni obo, kunyotëkënë yi bisë tubë : « Libungë olyo li mbicye? Nkanë be bësumbisi yaafë oyo mu luvunu lunenë i kukabilë biyeembi! »
Yeesu, kwabakuli simbalulu syaawu wusë bëkaambë : « Mbici lulë mu kunyokulilë n'cyeetu owo? Naandi liboti kwavaangë mu miinu. Cibilë, biyeembi bikalilë yiinu, kasi miinu yisë n'kalë yiinu ntaangu syooso ko. Kasi mu kutuulë yaafë oyo mu nyitwaami, naandi wavangilë obo mu kubelikë luzyamunu lwaami. Licyelikë yilukaambë, mwakë mooso munë Mpolu Mboti oyo yin'tendulu buloongo n'viipë, bën'tubilë mu n'cyeetu owo mu manë kwavaangë. »


Mu lyaawu, wumweekë mu likuumi bëbwaali li bilaanzi, awu bëteelë Zuda Iskalyootë, wuye takënë bëkuluutu bë singangë-Nzaambi, i wusë tubë : « Mbici lun'toombë kum'pandikë i miinu mu kuluvakulilë naandi? » Baawu bisë n'vaanë mëkumë-tatu më binkongulu bi mboongo. Mu ntaangu be yiinë, naandi wulëtoombë luvoto luboti mu kuvakulë Yeesu.


Mu cilumbu cin'tetë ci n'saangu mëmpa mëkaambu m'bweeli, bilaanzi bisë kaambë Yeesu : « Kuni njeeyi wuzolisi ti beeso tukubelikilë ndiiwu Paakë? » Naandi wusë bëvutulilë : « Yendaanu ku daalë ke cingaandi i lwe n'kaambyaanu : “Fumu watubë: Ntaangwaami yekë bëlë. Mati ke njeeyi kwaawu yin'kwambulilë ndiiwu Paakë yimunë bilaanzi byaami.” » Bilaanzi bisë vangilë bo Yeesu kubëtuminë i baawu bisë belikë ndiiwu Paakë.
Mësikë matuuci, naandi wusë sungëmë fë meesë yimunë likuumi bëbwaali li bilaanzi. Ntaangu bëlëkwambulilaangë, naandi wusë tubë : « Cyelikë yilukaambë : Wun'viipë mu beeno mba wukun'sumbisi. » Cyuundë cisë bëkotilë beenë i kadë muutu kusiimbë li kun'yufulë : « Abu miinwe, a Fumu? » Naandi wusë bëvutulilë : « Wunë wum'bwiikë yaami kooko mu lubuci, mati naandi wukun'sumbisi. Cyelikë, Mwaanë muutu mba wun'fwa, bunë busoniminë mu cibilë cyaandi. Kasi mënyonyi ke wunë wun'sumbisi Mwaanë muutu! Mëyoolë muutu be woowo, kuleembu kubutu! » Zuda, wunë wulën'vakulë, wusë bulë mbeembu : « Abu miinwe, a N'loonji? » Yeesu kun'vutulilë : « Njeeyi walitubë. »


Fanë bëlëkwambulilë, Yeesu kuboongë limpa i kwatoondi Nzaambi, naandi kulimukënë i wusë litambikë ke bilaanzi byaandi i wusë tubë : « Boongaanu, lulyaanu, ayiiyi nyitwaami. » Naandi kuboongooso mbuungu i kwamani kutoondë Nzaambi wusë bëvaanë yaawu i wusë tubë : « Lwe nwaanu beeno booso. Cibilë ama meengë maami, meengë më n'kangulu yimunë Nzaambi i mësekulu mu lukoongu lu mpaapë baatu, mu lobukulu lu mësumu. Yilukaambë lyaawu, yisë be nwa ko viinyi tee cilumbu cinë yin'nwa viinyi yimoonë fë cimweekë yimunë beeno kunë Lwaangu lu Tataami. » Bunë bayoli twiimbu tunsaangu baawu bisë basikë, tee ku moongo miti Oliivë.


Mu lyaawu, Yeesu wusë bëkaambë : « Mu bwiilu be buubu, beeno booso lukun'yacikë, cibilë mësonëmë mu Libuuku li Nzaambi : “Miinu yin'voondë n'luungë-mëmemë i mëmemë mën'yambëkënë tweeku twaaku tooso.” Kasi, bunë yin'vulumukë, yilutwaminë ku Ngalilee. » Pyeelë wusë bulë mbeembu, kutubë : « Ningë ti bakë booso bëkun'yacikë, miinu yisë kunyacikë ko. » Yeesu wusë n'vutulilë : « Cyelikë yikukaambë, mu bwiilu be buubu, i susu kokilë ve, njeeyi wukun'tunë fë vyaasi tatu. » Pyeelë wusë tubë : « Keti li kufwa yaaku, miinu yisë kutunë ko. » Bilaanzi byakë byooso bisë tubë bo bumweekë.


Mu bwaawu, Yeesu wusë kweendë yaawu ku mbiinji bën'telaangë Ngetësëmaanë i wusë kaambë bilaanzi : « Kalaanu afaafë, cinaanu yin'kwakininë mu ke sambilë. » Naandi wusë boongë yaandi Pyeelë yi baanë bë bwaali bë Zebedee i wusë ba mu cyuundë i lusweenu. Mu lyaawu, naandi wusë bëkaambë : « N'timaami weekë mu cyuundë ci lufwa. Lwe kalyaanu afa i zungululaanu yaami. » Naandi wusë kwakënë mwa cinaanu, wusë kudikë mbuunzu fë n'toto i wusë sambilë Nzaambi : « A Tataami, ningë wum'podi, kwakini yaami mbuungu lusweenu! Kasi, yaaku bo yizolisi ko, vandi kasi bo wulizolisi. » Naandyooso wusë vutukë kuke bilaanzi bi tatu i wusë bëzakënë bëyidofaangë tolo. Naandi wusë kaambë Pyeelë : « Beeno lusye podi ko kukalë mu kuzungululë keti zoolë mweekë yi miinu? Lwe zungululaanu i sambilaanu, mu kumaangë kubwa mu lisokë. Cibilë ciluunzi ci muutu ciciindë, kasi n'sunyi wudekë. »
Naandi kwe yakini vyaasi yimwaali i wusë sambilë : « A Tataami, mooti mbuungu ayi kupodi ve kwakënë yaami kaambu miinu kuyinwa, biikë n'vwiilwaaku we vangini. » Bunë kwayisyooso, kutakënë bilaanzi byaandi bëyidofaangë tolo. Baawu bësye podi ko kukalë meeso mëtyemunë. Naandi wusë bëbiikooso, kwayakini mu kusambilë vyaasi yin'tatu ke tubaangë bikumë byo bimweekë. Mu lyaawu, naandi wusë kwiisë kuke bilaanzi byaandi i wusë bëkaambë : « Beeno lucili yidofaangë tolo i lucili n'vuundë! Talaanu, zoolë yabelëmë yinë Mwaanë muutu wavakulu mu myooko bisumuci. Lwe manyaanu n'telë, ndookwaanu! Talaanu, wunë wukun'sumbisi wabëlëmë! »


Bo kulutubaangë, kuzimbukulabu, Zuda wumweekë mu likuumi bëbwaali li bilaanzi, wusë kutuukë yimunë nkoongë yinenë yi baatu yiba yi bisabë i bimbondo bi miti, bëfilu ke bëkuluutu bë singangë-Nzaambi i mëkakëtë më Sizwiifë. Wo wulësumbisi Yeesu, wubëlubulë : « Wo yin'namikë miinu lufifu, na woowo, m'bwiilyaanu. » Mëlengë-lengë, kwabelëmi Yeesu, wusë tubë : « Mëleembi maaku omo, a N'loonji! » Wusë n'fifë. Yeesu wusë n'kaambë : « A wayaami, lyo wakwisilë mu kwivaanji, we livaanji. » Mu bwaawu, baatu beenë bisë bwiilë Yeesu i kun'kaangë. Wun'viipë mu bo babë yimunë Yeesu wubaasi cisabë cyaandi, wusë bulë ciseelu cin'kuluutu ngangë-Nzaambi i kun'cyelë kutu. Mu lyaawu, Yeesu wusë n'kaambë : « Vutulë cisabë cyaaku mu cipokuluko. Kasi wunë wuvondilë mu cisabë, n'fwiilë mu cisabë. Njeeyi wum'balë ti miinu yilëkaambu kutelë Tataami, wulëkum'paanë mu zoolë beenë likuumi li mingolo wali yi siyaanzi? Kasi buni bulëdedikininë manë mësonëmë mën'leesi ti bwa boobo bwa bufwenikini kubeelë. »
Mu lyaliili, Yeesu wukaambë nkoongë : « Beeno lwakwisë yi bisabë i bimbondo bi miti mu kum'bwiilë dedë mweekë cibaabi. Bilumbu byakë byooso mu n'zo-Nzaambi yabë yikalë yilëloongaangë i beeno nusye kum'bwiilë kuve. » Vandi makë mooso omo mën'vangënë, bwiinji manë mësonëmë ke mibici mëdedëkënë. Mu lyaawu, bilaanzi byooso bisë m'biikë i bisë tiinë.


Banë bëbwiilë Yeesu bisë n'natë kuke n'kuluutu singangë-Nzaambi, Kayiifë, kunë miloonji n'kaakë yi mëkakëtë mëdukënë. Pyeelë wusë laandë Yeesu ku mëswaminë i wusë kotë ku luumbu lu n'kuluutu singangë-Nzaambi. Faawu, wusë kalë yi biluungë mu kumonë buni lyaawu lin'vyokilë.
Bëkuluutu bë singangë-Nzaambi i cinzonzi cyooso cinenë bëlëtoombaangë luvoto, bumbaanji bu lupuutu mu kun'tabë lufwa. Kasi bësye bakë ko, bosuku bubeeli mpaapë bëyitubë cimbaanji ci lupuutu. Fë siitu bwaali bëyibasikë i bisë tubë : « Naandi wutubë : “Miinu kupodi kutululë n'zo-Nzaambi i kube yitulikë fë bilumbu bi tatu.” » N'kuluutu ngangë-Nzaambi kumanë n'telë i wun'kaambë : « Njeeyi, wusë n'vutulë cyosuku cikumë ko mu makë mooso bëlë mu kutubë mu njeeyi? » Yeesu wusë lingëmë. N'kuluutu singangë-Nzaambi, kwabuli mbeembu, naandi kun'kaambë : « Miinu njeeyi yin'kufulë, mu lizinë li Nzaambi wu moonyi, we tukaambi njeeyi Kliistu, Mwaanë Nzaambi? » Yeesu wusë n'vutulilë : « Njeeyi walitubë. Kasi miinu yilë mu kulukaambë, ku ntwaalë yikwisë, benubooso lum'monaanu Mwaanë muutu wun'vwaandë ku mëbakëlë më Nzaambi luleendo. Beeno lukum'monë kwisilë mu mëvweeti mëyilu. » Mu lyaawu, n'kuluutu singangë-Nzaambi wusë beenzë n'vwaatwaandi i wusë tubë : « Naandi wasafulë Nzaambi. Beeno buni lwakum'balilë? » Baawu kucikunë : « Lufwa tokë. » Mu bwaawu, bisë n'taminë matë ku ciinyi, kum'bulë bifusi yi simbatë i bisë tubë : « A Kliistu, bikuloobo, tukaambi, wo wakubulë nanye? »


Kosuku, Pyeelë wabë wukalë ku ngaandë, ku luumbu. Ciseelu ci n'cyeetu kum'belëmë i wusë tubë : « Nje yivaaku wabë yimunë Yeesu li Ngalilee. » Kasi naandi wutunë fë meeso më bakë booso i kutubë « Miinu yisye n'zaabë ko, mo wulë mu kutubë. » Bunë kulëkwesënë ku nkoonzu munu-n'zo, ciseelu ci cyeetu cin'ka kum'monë i kukaambë banë babë foofë : « Naandyaawu wabë yimunë Yeesu li Nazaleetë. » Naandi wusë mangë, i kulefë-mpesë : « Miinu yisye n'zaabë ko muutu be woowo! »
Fë mbusë mwa sintaangu, banë babë faanë, babelëmi, bisë kaambë Pyeelë : « Cibeeni, nje yivaaku wuli wun'viipë mu baatu obo, cibilë ntubulwaaku yilë mu kuleesi kunë wufuminë. » Mu lyaawu, naandi wusë tunë i kulefë-mpesë: « Miinu yisye zaabë ko muutu be woowo. » Susu kusundilë kukokilë, i Pyeelë wusë tandëkënë libuungu lyo Yeesu kutubë : « Ntetë susu kokilë, njeeyi wukun'tunë fë vyaasi tatu. » Kwabasikë ku ngaandë, naandi wusë yivoondë mu kulilë.

Ascultă Matye 26