Zenezi 7
7
I'â pusizé wasu'u
1Tawamhã Uburé Danhib'apito te Nowéhé ma tinha ãne:
— Te za oto uba're wa aimro me, ai'ra si'aibâ norĩ me duré asani aba norĩ me uburé asisisi 'wa. E marĩ wa. Aiwétési te i'uwaibaba na si 're aimo, ti'ai ãma asiré 're ihâimana za'ra mono norĩ upana. 2Tahawa te za duré ipoto mono bâ 7 na imro ré abaze iwẽ hã, ãma 're i'asaihuri aba mono da hã, uiwada pese na hã asiré i'mazasi za'ra. Te za duré misi imro ré iwẽ'õ inhizei'õ hã, ãma 're i'asaihuri aba mono õ da hã, ipoto mono bâ uiwada pese na asiré i'mazasi za'ra. 3Duré te za ipoto mono bâ 7 na, si norĩ uiwada pese na, asiré i'mazasi za'ra, apâ sitébré mono da, ti'ai 'remhã. 4E marĩ wa. Ã hawimhã 7 bâtâ ãma wa za 40 bâtâ 'rem na, duré 40 mara na tã ta'a da hã tãma rob'ru. Ãne wa za tawamhã uburé hâiba ré 're ihâimana za'ra mono norĩ hã uprosi.
5Tawamhã Nowé, Uburé Danhib'apito te te iwaihu'uzéb zarina uburé pese ma tô ab'manha. 6Tawamhã Nowéhé ãma 600 na ãma iwahub ãma, ma tô i'â pusi mono zé hã ti'a upsi poré. 7Tahawa, i'â pusi mono wi sisõ'reptu da ma tô ti'ra norĩ siré hã, timro siré, duré tisani'aba norĩ siré uba're 'remhã ãzé. 8Tawamhã abaze ĩwẽ norĩ hã, ĩwẽ'õ norĩ hã, di'i na 're inomro mono norĩ hã, duré si norĩ hã 9ma tô Nowéhé siré asisi uiwada pese na, aibâ na duré pi'õ na, 'Re ihâimana u'âsi mono te te tãma iwaihu'uzéb zarina. 10Tawamhã 7 na bâdâ morĩ pari, ma tô oto â, ti'a te te i'upsibi mono na hã ãma sãna'rata.
11Tô taha wamhã, 600 na Nowéhé ãma iwahubzéb ãma, dia 17 maparane a'amoi ãma ma tô ti'ai hawi ub're hã pu'u mono.#7.11 Ti'ai 'rowi ropâ â u'â hã te wasu'u. Duré hâimo â 're ihâimana mono ma, ma tô hâiwa hã tãma si'ridawa, we sisa'wari da hã. 12Tawamhã ma tô tã hã ti'ai u tita'a, 40 bâtâ 're, duré 40 mara na. 13Tawamhã tô taha bâtâ na Nowé norĩ, timro me hã ma tô ti'ra Sẽ norĩ siré, Cãhã siré, Zaféhé siré, duré ta norĩ mro za'ra siré uba're 'remhã tizasi zahuré. 14Duré uburé abaze norĩ ipoto mono bâ sipu'u pese na ma tô isiré asisi, da te 're itébré za'ra mono norĩ hã, rom na 're ihâimana za'ra mono norĩ hã, di'i na 're inomro mono norĩ hã, duré si norĩ hã. 15Uburé abaze norĩ uiwada pese na ma tô Nowéhé siré uba're 'remhã asisi. 16Aibâ na, pi'õ na uiwada pese na ma to abaze norĩ hã ipoto mono bâ asisi, 'Re ihâimana u'âsi mono, Nowéhé ma, te te tãma iwaihu'uzéb zarina. Taha pari 'Re ihâimana u'âsi mono, ma tô oto uba're hã iré sito.
17Tawamhã 40 bâtâ na â pusi mono wamhã, hâimo te â si'ré. Tahawa ma tô oto uba're hã â te te sa'ré hâimo, ti'ai hawimhã. 18Â hã te hâimo si'réi u'âsi. Tahawa, te duré uba're hã â nhisiwimhã 're wara u'â. 19Tawamhã duré â watobro pese wamhã, ma tô uburé ẽne i'rãihâ uptabi norĩ hã te te upsibi, ropâ. 20Taha parimhã 7 metru na â pibuzém na, ma tô ẽtẽ'rãihâ te te i'upsibi za'ra mono hawimhã oto â hã tihâiba. 21Tawamhã uburé ti'ai ãma 're ihâimana za'ra mono, si norĩ hã, abaze da te 're itébré za'ra mono norĩ hã, rom na 're ihâimana za'ra mono norĩ hã, di'i na 're inomro mono norĩ hã, duré a'uwẽ norĩ hã ma tô si'utõrĩ. 22Uburé ti'ai ãma 're ihâimana za'ra mono hã ma tô ai'utõrĩ pese, pẽ'ẽzani ré 're inomro mono hã. 23Nowéhé siré uba're wa, ihâimana za'ra norĩ si, si'utõrĩ õ di. Uba're wa, isiré ihâimana za'ra õ norĩ si ma tô ai'utõ, a'uwẽ norĩ hã, abaze da te 're itébré za'ra norĩ hã, rom na 're ihâimana za'ra mono norĩ hã, di'i na 're inomro mono norĩ hã, duré si norĩ hã. 24Tawamhã 150 na bâdâ i'â pusi mono na ãma si'utõrĩ parip si, ma tô apâ i'â nhi'ré mono na hã ãma sãna'rata.
Atualmente Selecionado:
Zenezi 7: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
