Zenezi 18
18
'Re ihâimana u'âsi mono, Abra'ãhã ma, i'ra na te te tãma iropisutuzé wasu'u
1Tawamhã Uburé Danhib'apito, Abra'ãhã ma, ma tô tãma sihâi'ré, rowede iwazéb zahi, Mare na isisi 'rata hâimana ré. Tawamhã Abra'ã, hâiwahâ tẽme rowa'ro wa, ma tô romhâ 'manharĩ na tinhorõwa 'ridawa zahâpâmhã nhamra rowi. 2'Rãi wahutu wa, te te rob'madâ'â wamhã, ma tô si'ubdatõ aibâ norĩ isõ're isimasa 'madâ'â za'ra. Te te 'madâ'â za'ra wamhã, ma tô si'aba'ré na itẽme tiwara za'ra, te te sina uzusi za'ra da. Tawamhã hi'rãtitõ, ma tô isõ'reb za'ra nhamra. Ti'ubu na ti'ai u ma tô ropto. 3Tawamhã ma tô ãne tãma nharĩ za'ra:
— Ĩnhib'apito norĩ, niha na asiwi ĩwẽsãmri aba wamhã, ma'ãpé wasitẽme wasihutu ãna wahâimana za'ra da hã, ĩnhorõwa ĩré asiwi sa'rei wa'aba õ di za. 4Â hã wa za dama ti'ru, da te we dasiwi 'mai'a'âri da, ãma asipara upsõ za'ra wa'aba zéb da hã. Taha parip si te za rowede zahâpâmhã aiwa'utu za'ra wa'wa. 5Dasa zama suru na wa za aima amrami za'ra wa'wa a'â, asiptete sina bâdâdi na ai'aba'réi wa'aba zém na ãma uzusi za'ra wa'aba da, aima romhuri'wa tẽme we ãwa ĩtẽme aihutu aba dâ'âsina.
Tawamhã ma te ãne asa hã ãma tãma wa'rãmi za'ra:
— Wẽ di tô. Marĩ õ di, wa ãma wasiwi asaze ni.
6Tawamhã Abra'ãhã ma tô si'aba'ré na 'ri para u hã ãzé, Saraha tẽme. Sébré wamhã, ma tô ãne tãma tinha:
— Ma'ãpé, ai'aba'ré na 10 kilu na ipire pibuzém na trigu 'mai'âri, i'u'ẽtẽ wapu waptu na 'ma'manharĩ da.
7Tawamhã powawẽ 're isimasa mono zéb u, ma tô sapraba sina wara. Tahawa ma tô powawẽ zapu iprédup té hã 'mai'â. Tawamhã tite romhuri'wai ma, ma tô tãma tisõ, dasa te te ãma 'manharĩ da. 8Tawamhã powawẽ hâiwa'u tom norĩ, ihâiwa'ui me duré romnhi zebre norĩ me hã ma tô itẽme isihutu norĩ nho'remhã tãma sa'ra za'ra. Tawamhã saihuri ré hã, ma tô Abra'ã i'ratab za'ra rowede zahâpâ hâiwim haré za. 9Tawamhã imro zô, te ãne duré siwi sadanha:
— E mahãta aimro, Sara hã.
— 'Ripara te nhamra. — Ãne te asa tãma wasu'u za'ra.
10Tawamhã te Abra'ãhã ma, nimahã tãma tinha ãne:
— Wahup tém na tô ã a'amo na wa za we apâ atẽme mo. Tawamhã taha na te za aimro Saraha ma, i'ra hã tãma podo.
Tahawa, Sara 'ridawa ãma ibabarã na isa hã ma tô isimirobzanhamrizé sina wapa. 11Abra'ã norĩ Saraha me hã hâiba prédub zahuré di oto. Tahawa Saraha 'razéb da, ãma iwahu hã ma tô oto sa're. 12Tahawa te sihâ sina ãne 'râwi sima tinha:
— E niha wa za ĩnhib'apito ãma te ĩsima rosa'rata ze, wa norĩ hã oto ihire nherẽ, ãhã na hã. Sadai õ di.
13Tawamhã Uburé Danhib'apito, te Abra'ã hã sadanha ãne:
— E marĩ wa, te Sara hã aihâ. E marĩ da, te tinha, ihi wa, za oto i'ra waihu'u õ na hã. 14E Uburé Danhib'apito ma, marĩ hã ĩma waihu'u prã pâ. Uburé marĩ hã ĩma waihu'u pese di. Tahawa, te inharĩzéb zarina wahup tém na wa za we atẽme mo apâ. Tawamhã taha na te za i'ra hã tãma podo, Saraha ma.
15Tawamhã ãne na imreme te te wapari wamhã, ma tô Sara hã tãma tipahi. Tahawa te tiwi ai'udâ ãne:
— Ĩsihâ õ di.
Tane nherẽ, Uburé Danhib'apito, ma te ãma tãma wa'rã ãne:
— Senai õ di i'asiwasu'uzé hã. Ma! Te tô aihâ.
Abra'ã, Sodoma wa, 're idahâimana za'ra mono norĩ ãma te te irowaptẽrẽzé wasu'u
16Tawamhã itẽme isihutu norĩ, ihawi si'aba'ré da, oto wahutu za'ra wamhã, ma tô 'ri nho'u Sodoma sisahâpâ siwi 'madâ. Tahawa, Abra'ã ma tô isiré timorĩ za'ra, bâdâdi te te a'â tãma wasu'u za'ra mono da. 17Tawamhã Uburé Danhib'apito te 'râwi sima tinha, ãne: “Abra'ãhã wi, za marĩ te i'manharĩzé te tiwi i'udâ da hã mare di za. 18Isihudu sidâpâsi ahâ uptabi na 're hâimana za'ra mono wa, te za a'uwẽ misi ãma isitom na dama siptete na 're hâimana za'ra. Ta norĩ u'âbâ wa za uburé a'uwẽ mono bâ iwẽ hã te tãma 're sõmri za'ra, ti'ai mono bâ. 19Wa hã, Abra'ã wa tô pisutu, ti'ra norĩ ma, tinhihudu norĩ ma, ĩzadawa na si 're sõpré mono da hã te te tãma 're waihu'u za'ra mono da, tãma ĩnhimirotizé hã te te 're wapari pese za'ra mono da, duré i'uwaibaba na si sena na ãma 're nomro mono da. Tawamhã ta norĩ ĩmreme te te 're iwapari pese za'ra mono na 're hâimana za'ra mono wamhã, wa hã wa za Abra'ãhã ma, te tãma iropisutuzé hã uburé ãma tãma a'uwaimra.”
20Tawamhã Uburé Danhib'apito, te Abra'ãhã ma oto tinha ãne:
— Sodoma norĩ ãma Gomora me, iwasédé da te ãma 're inomri zahuré mono zé sa'ẽtẽ uptabi di. Duré iwa 're idahâimana za'ra mono norĩ wasété za'ra zé hã pire uptabi di. 21Tahawa, õwamhã ĩmorĩ da si, dawasédé te 're iwapari mono, sena zô te waihu'u da, duré niha wamhã, taré na te waihu'u da.
22Tawamhã maparane itẽme isimasi, ma tô oto tineb zahuré, Sodoma nho'õmoi baba. Tane nherẽ, Uburé Danhib'apito si te Abra'ãhã siré tihâiba, isa'u zahuré hã. 23Tawamhã Abra'ã ma tô itẽme sina rotété. Tahawa, te ãne sadanha:
— E 're idanomro wasété mono norĩ zu, te za iwẽ norĩ hã isu i'upro. 24Bété 50 na 'ri nho'õmo 're, dawẽ norĩ dahâimana za'ra wamhã. E tane nherẽ, te za 'ri nho'u hã iré i'uprosi za'ra. E 50 na dawẽ norĩ aima isawi pe ihâimana za'ra zéb zarina, asimihâzé hã bété 'ri nho'õmo ma, ba'a õ di za. 25'Re idanomro wasété mono zu, dawẽ na 're idahâimana za'ra mono i'uprosi da hã te ãma rosa'rata waihu'u õ di, dasine tiwasédé te te 're 'manharĩ za'ra mono õ nherẽ. Asimirob'manharĩzéb uwaibaba õ di, ãne hã. E marĩ wa. A hã uburé pese da'ãma 're irowairébé mono 'wa te 're aihâimana mo. Tahawa te za i'uwaibaba na si niha na dama 're i'ab'manharĩ mo.
26Tawamhã Uburé Danhib'apito, ma te Abra'ãhã ma ãma tãma wa'rã ãne:
— Sodoma 're, 50 na 're idanomro wẽ mono na dahâiba te waihu'u wamhã, ta norĩ u'âbâ wa za uburé 'ri nho'õmo 're a'uwẽ norĩ ma tãma ba'a za'ra za, ĩnhimihâzé hã.
27Tawamhã Abra'ã te duré apâ tãma tinha ãne:
— Ĩ'ruiwaparĩ õ di za, aima ĩwapure nherẽ, za apâ te aima inharĩ na te isahu na hã. E marĩ wa. A hã Uburé Danhib'apito. Wa hã tarére hã ti'ai ãma a'uwẽ. 28Bété 45 na si dawẽ norĩ dahâimana za'ra wamhã, e te za tane nherẽ, marĩ hã tihâiba. Duré e 5 na sô irowaptâ'â zarina te za 'ri nho'u hã daré i'upro.
Tawamhã 'Re ihâimana u'âsi mono, ma te ãma sada'â ãne:
— 45 na 're idanomro wẽ mono, dahâiba na te waihu'u wamhã, 'ri nho'u hã te uprosi õ di za.
29Te duré Abra'ã tãma tinha ãne:
— Bété 're idanomro wẽ mono 40 na dahâiba wamhã, e niha te za tawamhã tiromhâiba.
— 40 na dawẽ norĩ dahâiba wamhã, ĩma isawi za'ra zéb zarina, 'ri nho'u hã te uprosi õ di za. — Ãne ma te asa ãma sada'â, 'Re ihâimana u'âsi mono hã.
30Tawamhã Abra'ã te duré ãne tãma tinha:
— Ĩnhib'apito, ĩzada asiti'rui õ di za, za duré te aima inharĩzém na hã. Bété 30 na 're idanomro wẽ mono dahâiba wamhã, e niha za tawamhã.
Tawamhã 'Re ihâimana u'âsi mono, ma ãne ãma sada'â asa:
— 30 na 're idanomro wẽ mono dahâiba wamhã, te uprosi õ di za, 'rinho'u hã.
31Abra'ã te duré ãne tãma tinha:
— Ĩnhib'apito, ĩmreme nhiséb'õ na wa tô aima nharĩ siwapto. Tane nherẽ, ĩ'ruiwapari õ di za. Bété 20 na 're idanomro wẽ mono dahâiba wamhã, e niha za duré.
— 20 na dawẽ norĩ dahâiba wamhã, ĩma isawi za'ra zéb zarina, 'ri nho'u hã te uprosi õ di za. — Ãne ma te asa ãma sada'â 'Re ihâimana u'âsi mono hã.
32Abra'ã hã irẽme ma, te duré ãne tãma tinha:
— Ĩnhib'apito, ĩzada asiti'ru tõ. Irẽme ma wa za oto asadanha. Bété 10 na 're idanomro wẽ mono dahâiba wamhã, e ta norĩ u'âbâ 'ri nho'u hã uprosi õ di za.
— 10 na 're idanomro wẽ mono dahâiba u'âbâmhã, 'ri nho'u te duré uprosi õ di za. — Ãne ma te asa ãma sada'â 'Re ihâimana u'âsi mono hã.
33Tawamhã Uburé Danhib'apito, Abra'ãhã ma, te te nharĩ pari, ma tô oto tiwi mo apâ. Abra'ãhã zama te duré oto apâ mo, tinhorõwa u.
Atualmente Selecionado:
Zenezi 18: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
