Zenezi 17
17
Danhihâiwata nhihâri na rotizé wasu'u
1Tawamhã Abrãhã ãma 99 na iwahub ãma, ma tô Uburé Danhib'apito tãma sihâi'ré. Tahawa, ma tô ãne tãma tinha:
— Wa hã 'Re ihâimana u'âsi mono, ĩwaihu'u pese uptabi. Aipẽ'ẽ na te za ĩ'ãmap si 're aimo. Te za duré ĩmreme 're iwapari pese mo. 2Ĩnhimiropisutuzé te aima i'manharĩzéb zarina, wa za asihudu norĩ ahâ uptabi na 're ihâimana za'ra mono da hã aima 'manha.
3Tawamhã Abrã, hi'rãtitõ ma tô tãma nhamra. Ti'ai u ti'ubu na ma tô ãma ropto. Tahawa, te 'Re ihâimana u'âsi mono ãne duré tãma tinha:
4— Ĩnhimiropisutuzé wa aima 'manha, ãne: A'uwẽ wamri mono bâ da'ahâ uptabi hi'rata na 're aihâimana mono da, wa aima ropisutu, ãhã na hã. 5Tahawa ã hawimhã za oto asisi hã Abra'ã#17.5 Abra'ã hã hebreu norĩ mreme na “da'ahâ mama” aiwa prã na ne iwapari na hã. na. Asisi õ di za oto, Abrã#17.5 Abrã hã hebreu norĩ mreme na “dahi'rada dama iwaihu'u za'ẽne” aiwa prã na ne iwapari na hã. na hã. E marĩ wa. A'uwẽ wamri mono bâ da'ahâ uptabi hi'rata na 're aihâimana mono da, za te aima 'manharĩ wa. 6Asihudu ahâ uptabi di za. Te za duré ta norĩ 'remhã nima norĩ dama 're si'apito za'ra. 7Ĩnhimiropisutuzé õne u'â aima 're hâimana mono da, duré asihudu norĩ ma zama õne u'â tãma 're hâimana za'ra mono da zama wa aima 'manha ãne: Õne u'â, ate 'Re ihâimana u'âsi mono na, duré asihudu norĩ te 'Re ihâimana u'âsi mono na, wa za tãma 're ĩhâimana za'ra. 8Ti'a wa za aima tisõ. Asihudu norĩ ma zama wa za tisõ, dasiré a'uwẽ'õ na iwa 're i'aihâimana mono zé hã. Uburé Cana'ã ãma ti'a te za õne u'â asihudu norĩ ma, ite na tãma 're hâimana za'ra. Tawamhã wa za duré ite za'ra na 'Re ihâimana u'âsi mono na tãma 're ĩhâimana za'ra.
9'Re ihâimana u'âsi mono te duré zahadu ãne tãma tinha:
— Abra'ã, a hã te za aima ĩnhimiropisutuzém na, asihudu norĩ me ãma 're aihâimana u'âsi za'ra wa'aba mo. 10Ĩnhimiropisutuzé aima, duré asihudu norĩ ma, te i'manharĩzéb zarina, te za uburé ai'reb za'ra wa'aba aibâ norĩ tinhihâiwata nhihârizé te te sima 're 'manharĩ za'ra. 11Danhihâiwata nhihârizé hã, wanhimiropisutuzé wa te wasima i'manharĩzé aime, te wasu'u. 12Tahawa ã hawim haré te za oto uburé 'watébrémi na ai'uté 're ipoto za'ra mono ãma 8 na bâdâ ipotozém na ãma 're isi'utõrĩ za'ra mono ãma 're i'anhihâiwata nhihâri mo. Asõrõwa 're, 're ipoto za'ra mono pawa'âbâ ãna aima romhuri'wa norĩ, asiré a'uwẽ'õ norĩ wi i'uipra za'ra norĩ zama te za 're i'anhihâiwata nhihâri mo. 13Uburé te za 're i'anhihâiwata nhihâri mo, taré hã 'maihâimana ãna. Aihâiba na za'ra wa'aba ihâiba hã te za aima ĩnhimiropisutu za'ra wa'aba zé waihu'uzéb da hã õne u'â 're hâimana. 14Ni'wa da te sihâiwata nhizâri ãna hâimana wamhã, asiré za'ra wa'aba 're ihâimana mono da hã mare di za. E marĩ wa. Ĩnhimiropisutuzé te te wazéb õ na hâimana wa.
15Taha pari 'Re ihâimana u'âsi mono, te Abra'ãhã ma, duré tãma tinha ãne:
— Ã hawimhã za oto aimro nhisi, Sara'i na i'mahârâzé ihâimana da hã mare di za, Sara#17.15 Sara hã hebreu norĩ mreme na “dama ipire sipi'õ” aiwa prã na ne iwapari na hã. na za oto isisi hã. 16Ĩwẽ uptabi wa za te tãma 're anhomri. Tahawa wa za duré ai'ra aima tisõ, isé're hawimhã. Wa za tô iwẽ hã te tãma 're anhomri. Tahawa te za a'uwẽ wamri mono bâ da'ahâ uptabi hi'rata sipi'õ na dama 're hâimana. Te za isihudu norĩ 'remhã nima norĩ hã dama 're si'apito za'ra.
17Tawamhã Abra'ã, hi'rãtitõ ma tô nhamra. Ti'ubu na ti'ai u hã ma tô ropto. Tahawa, te te tãma iwaihu'uzém na ma tô aihâ. Tahawa te ãne 'râwi sima tinha: “E aibâ 100 na ãma iwahu hã sidamama waihu'u pese di. E niha te za merẽ Sara ãma 90 na iwahum nherẽ ti'ra.” 18Tawamhã Abra'ã, te 'Re ihâimana u'âsi mono ma, ãne tãma tinha:
— Tô aré iwẽ, iwẽ hã ĩma 're i'anhomri mono ne, ĩhâiba u'âbâ Ismaeu ma, iwẽ hã duré 're anhomri mono da, taha ré 're hâimana u'âsi mono da.
19Tane nherẽ, 'Re ihâimana u'âsi mono, ma te ãne asa ãma tãma wa'rã:
— Te inharĩzéb zarina te za tô aimro Sara aima ti'ra. Tawamhã a hã te za isisi, Izaqui#17.19 Izaqui hã hebreu norĩ mreme na “Te aihâ.” aiwa prã na ne iwapari na hã. na. Tawamhã taha ma, wa za ĩnhimiropisutu zahi isi'utõrĩ'õ õne u'â te tãma 're 'manharĩ, isihudu norĩ ma ropibu ma. 20Tawamhã duré Ismaeu ma irowaptẽrẽzéb zama wa tô wapa. Tahawa iwẽ hã wa za te tãma 're anhomri. I'ra norĩ, duré isihudu norĩ ahâ uptabi na 're hâimana za'ra mono da hã wa za 'manha. Tahawa te za 12 na dama ipire norĩ mama na 're hâimana. Duré isihudu norĩ hã a'uwẽ misi ãma isitom na dama siptete na 're hâimana za'ra mono da, wa za 'manha. 21Tane nherẽ, wa za ai'ra Izaquihi ma, ĩnhimiropisutu zahi hã tãma 'manha, tô ãhã a'amo wahup tém na Saraha zé're ipoto ma.
22Tawamhã Abra'ãhã ma, ãne na te te tãma nharĩ mono pari, ma tô 'Re ihâimana u'âsi mono hã oto tiwi mo hâimo. 23Tawamhã tô taha bâtâ na Abra'ã, 'Re ihâimana u'âsi mono te te tãma iwaihu'uzéb zarina ma tô 'manha. Tahawa ti'ra Ismaeu ma tô sihâiwata nhizâ. Uburé aibâ isõrõwa 're, 're ihâimana za'ra mono norĩ zama hã ma tô anhihâiwata nhihâ. Isiré a'uwẽ'õ te te tãma 're iromhuri za'ra mono, te te i'uipra za'ra norĩ zama ma tô anhihâiwata nhihâ. 24-25Tawamhã Abra'ãhã ãma 99 na iwahub ãma ma tô sihâiwata nhizâri ni, i'ra Ismaeu hã 13 na ãma iwahub ãma. 26Tô taha bâtâ na ma tô sahuré sihâiwata nhihâri zahuré ni, Abra'ã norĩ hã i'ra me. 27Pawa'âbâ ãna tãma romhuri'wa norĩ zama ma tô uburé sihâiwata nhihâri za'ra ni, isõrõwa 're, 're ipoto za'ra mono hã duré isiré a'uwẽ'õ norĩ wi, te te 're i'uipra za'ra mono norĩ zama hã.
Atualmente Selecionado:
Zenezi 17: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
