Zenezi 15
15
'Re hâimana u'âsi mono, Abrãhã ma, tinhimiropisutu zahi te te i'manharĩzé wasu'u
1Tawamhã ãhã parip si Abrã ma tô sõtõ 'rowim ne marĩ 'madâ. Taha na te Uburé Danhib'apito ãne tãma tinha:
— Abrã, aipahi tõ. Marĩ isimimnhasi wi wa za wa hã 're ĩsimapa, ai'wawi. Duré iwẽ wa za te aima 're anhomri.
2Tawamhã Abrã asa ma te ãma sada'â ãne:
— Uburé Danhib'apito, ĩte 'Re ihâimana u'âsi mono! Ĩma hã marĩ dai õ di, iwẽ ĩma 're i'anhomri mono zé ĩ'ra ãna za 're ĩhâimana u'âsi mono da nherẽ. Eriézéhé si Damascu ãma, te za uburé ĩ'uirĩ na ĩnhibrob na hã ãma ate za'ra. 3Ĩ'ra hã ĩma 'manhomri õ di. Tahawa ĩma romhuri'wa ĩnhorõwa 're, ipoto si te za ĩ'uirĩ na ĩnhibrob na hã ãma ate za'ra za.
4Tawamhã Uburé Danhib'apito te duré ãne tãma nharĩ na sahu:
— Mare di. Ai'ra uptabi ma si, te za asimarĩ hã tãma irẽme za'ra. Mare di za, aima romhuri'wa Eriézéhé ma irẽme za'ra da hã.
5Tawamhã Uburé Danhib'apito, rob u te te saprõni wamhã, te Abrãhã ma tinha ãne oto:
— Ma'ãpé hâiwa 'madâ'â, wasi norĩ sa'rata waihu'u pese wamhã, aza'rata da pé. Tane asihudu norĩ hã, ahâ uptabi di za.
6Tawamhã Abrã, Uburé Danhib'apito te te tãma iwaihu'uzém na ma tô sina mreme umnhasi oto. Tahawa Uburé Danhib'apito, ma tô duré wẽsã, te te sina wawãi õ wa oto. 7Tawamhã te duré sina tãma tinha ãne:
— Wa hã, Uburé Danhib'apito. Wa hã wa tô Babilonia hawimhã we aiwaze, 'rinho'u Ur na isisi hawimhã, ã hã ti'a te aima isõmri da hã ãma 're airo mono da oto.
8Tawamhã Abrã te asa tãma tinha ãne:
— Uburé Danhib'apito, ĩte 'Re hâimana u'âsi mono, e niha wa za waihu'u, sena na ã ti'a na za ãma ĩsite da na hã.
9Tawamhã Uburé Danhib'apito, ma asa ãma tãma wa'rã ãne:
— Ma'ãpé pozé wasédé we ĩma 'mazaprõni, pone'ẽrebâ zéré uzé sipi'õ hã, pone'ẽrebâ zéré mapure si'aibâ hã, uburé si'ubdatõ ãma iwahum norĩ hã. Duré te za we ĩma i'maimra naire norĩ hã, utu'ure me.
10Tawamhã imreme zarina abaze norĩ, ma tô te te tãma simro. Tahawa, ma tô duré ro'wa na aiwa ãma sipo'o. Tawamhã ipo'o mono bâ ma tô sitẽmemhã sõ're sina te te aza'ra. Tane nherẽ, si norĩ ãmap si ma tô wahuré hã ãma aiwãnhiza, ãma sipo'o zahuré ãna. 11Tawamhã sipahutu norĩ abaze na ãma isipo'o mono zô ma tô aré nasi ana. Tane nherẽ, Abrã hã te nasi ãma te te awano'õ apâ. 12Tawamhã oto mara wamhã, ma tô Abrã hã sina tipahâ pese, aptâ ãma isimei pese zarina sõtõ pese wa. Taha nherẽ, waptu na ma tô tipahi. Ma tô ipẽ'ẽwara hã iwab ãzé. 13Tawamhã Uburé Danhib'apito te tãma tinha ãne:
— Ma'ãpé waihu'u. Sena na te za asihudu norĩ tisiré a'uwẽ'õ norĩ te ti'ai wa'õtõ nho'õmo ãma 're hâimana za'ra. Tame te za pawa'âbâ ãna te te dama 're romhuri za'ra. Tahawa, te za da te tãma 're rob'manharĩ wasété za'ra, 400 wahub 'remhã. 14Tane nherẽ, pawa'âbâ ãna te te 're romhuri za'ra mono da, te te tãma 're irob'manharĩ wasété za'ra mono norĩ hã wa za hâ za'ra. Tawamhã asihudu norĩ apto'o ré te za ta norĩ nhipti'ai hawimhã sima iwẽ na wairé. Tahawa, te za isimarĩ za'ra hã siré 'wasa, iwa'âbâ za'ẽtẽ mono hã. 15A hã atâ'â wamhã, te za aima rowẽ sina aihi'rata norĩ u aimo. Asi'ihi pese wapsi te za ai'ãma ti'a ni. 16Asihudu norĩ, maparane si'uiwa na ãma idapoto ãmap si te za apâ we sina siri za'ra. E marĩ wa. Zahadu amoreu norĩ wasété zé ibâ na hâimana õ wa, niha na te tãma irob'manharĩ za'ra da hã.
17Tawamhã oto we robra si'réi mono wamhã, ma tô oto tirobra pese. Taha wi, ma tô pré'a ré piza'a 're wawẽ waptu na sihâi'ré, ihawi isisédé isi'réi mono hã. Tahawa, 'rãsitõ ma duré isiré hã sihâi'ré. Tawamhã ta norĩ hã ma tô abaze na ãma isipo'o mono wa'wai baba ro'rahâri zahuré. 18Tawamhã tô taha bâtâ na ma tô Uburé Danhib'apito, Abrãhã ma, tinhimiropisutuzé hã tãma 'manha, ãne:
— Asihudu norĩ ma, ã hã ti'a te tãma sõmri za'ra da wa ĩnhimiropisutu zahi hã 'manha, Ezitu ãma ti'a zada'ré inomro hawi, panho'u Eufrati na isisi u hã, 19queneu norĩ nhipti'a hã, quenezeu norĩ nhipti'a hã, cadimoneu norĩ nhipti'a hã, 20hitita norĩ nhipti'a hã, perizeu norĩ nhipti'a hã, refa'ĩ norĩ nhipti'a hã 21amoreu norĩ nhipti'a hã, cananeu norĩ nhipti'a hã, gigazeu norĩ nhipti'a hã, duré zebuzeu norĩ nhipti'a hã.
Atualmente Selecionado:
Zenezi 15: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
