Génesis 11
11
Nisha nisha nananquë Yosëri anoninsoꞌ
1Pacon piquëran notohuaroꞌ piyapiꞌsa naꞌantapi. Naporoꞌ yaꞌipiya aꞌna nananquësáchin nonpi. 2Piꞌi pipirinso parti quëran pipirahuatonaꞌ, Sinaro parti canquipi. Inaso noꞌpaꞌ, noyápiroꞌtëchin niꞌton, inaquë yaꞌhuëcaiso marëꞌ quëparitopi.
3Aꞌna tahuëri inahua capini ninontatonaꞌ, napopi: “Huëco paꞌahuaꞌ, natëricho noꞌpa quëran nicatëhuaꞌ, aꞌpëahuaꞌ,” nitopi. Ina nisahuatonaꞌ, natëricho quëran naꞌpi yaꞌhuërënamën pëipi. Achinpitacaiso marëntaꞌ, toꞌni pochin nininquë achinpitopi. Siminto pochin nininso yaꞌhuërënamën, inaquë achinpitopi. 4Ina quëran ninontaantapi: “Huëco chiníquën cancantatëhuaꞌ, ninano ocoiaꞌahuaꞌ. Ina nisahuatëhuaꞌ, aꞌna torinta piꞌiroꞌtëquë huarëꞌ nincaninso niahuaꞌ. Inapoatëhuaꞌ, sacóshin nahuinarihuaꞌ. Naporahuaton, co huachi itohua itohua yanquëcaso yaꞌhuaponhuëꞌ,” nitopi.
5Napopirinahuëꞌ, Sinioroso oꞌmarin. Oꞌmarahuaton ninanoꞌ, tori, inapita nisapiso niꞌquimarin. 6Niꞌquimarahuaton, yonquirin: “Isopitaso inaquësáchin yaꞌhuatonaꞌ, ina nananquësáchin nonpi niꞌton, nani caniaritopi sacatacaisoꞌ. Poꞌpachinara, co incari tëranta nanitarinhuë atananpitacasoꞌ. 7Napoaton acopitacaso marëꞌ, paꞌmatëhua nonpiso anishatahuaꞌ. Ama huachi ninatanacaiso marëhuëꞌ, napotahuaꞌ,” tënin. 8Inapotaton, Siniorori piyapiꞌsa itohua itohua ayanquëërin. Ninano nisapisonta aꞌporahuatonaꞌ, tananpitopi huachi.
9Inaquë chachin Siniorori, yaꞌipi piyapiꞌsa nonpiso anishatërin. Ina quëran chachin, yaꞌipi isoroꞌpaquë ayanquëërin. Napoaton ina ninanosoꞌ, Papiri#11.9 Papirisoꞌ: “Co ninatananpiquëhuëꞌ,” tapon naporin. itopi.
Simo shinpita napopisoꞌ
10Simo shinpita napopiso shaꞌhuichinquëmaꞌ. Pacon paꞌninso piquëran cato piꞌipitapasoꞌ, Simo pasa piꞌipitarin. Naporoꞌ aꞌnara huiꞌnin nasitërin. Nasitohuachina, Aropasa, itërin. 11Ina piquëran Simosoꞌ, aꞌnatërápo pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
12Aropasa cara shonca aꞌnatërápo piꞌipitasoꞌ, huiꞌnin nasitërin. Nasitohuachina, Saro itërin. 13Ina piquëran Aropasasoꞌ, catapini pasa cara piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
14Saro cara shonca piꞌipitasoꞌ, huiꞌnin nasitërin. Nasitohuachina, Ipiri itërin. 15Ina piquëran Sarosoꞌ, catapini pasa cara piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
16Ipiri cara shonca catapini piꞌipitasoꞌ, huiꞌnin nasitërin. Nasitohuachina, Piriqui itërin. 17Ina piquëran Ipirisoꞌ, catapini pasa cara shonca piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
18Piriqui cara shonca piꞌipitasoꞌ, huiꞌnin nasitërin. Nasitohuachina, Nio itërin. 19Ina piquëran Piriqui cato pasa iscon piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
20Nio cara shonca cato piꞌipitasoꞌ, huiꞌnin nasitërin. Nasitohuachina, Siroco itërin. 21Ina piquëran Niosoꞌ, cato pasa canchisë piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
22Siroco cara shonca piꞌipitasoꞌ, huiꞌnin nasitërin. Nasitohuachina, Nacoro itërin. 23Ina piquëran Sirocosoꞌ, cato pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
24Nacoro cato shonca iscon piꞌipitasoꞌ, huiꞌnin nasitërin. Nasitohuachina, Tari itërin. 25Ina piquëran Nacorosoꞌ, pasa shonca iscon piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.
26Tari canchisë shonca piꞌipitasoꞌ, huiꞌnin paninantërinso nasitërin. Ina quëran cato huiꞌninpita yaꞌhuëtaantarin. Huiꞌninpitasoꞌ: Apran, Nacoro, Aran, inapita.
Tari, naporinsoꞌ
27-28Shaꞌhuitëranquëmaso chachin Tari huiꞌninpitasoꞌ, isopita: Apran, Nacoro, Aran, inapita. Aran huiꞌninsoꞌ, Noto itopi. Aransoꞌ, Orë ninanoquë chiminin. Ina ninanosoꞌ, Cartia parti yaꞌhuërin. Coꞌhuara paꞌpin chiminyátërasohuëꞌ, chiminin. Huaꞌhuatërinso ninanoquë chachin naporin. 29Apransoꞌ, Sarai manin. Nacorontaꞌ, Mirica manin. Miricasoꞌ, Aran huiꞌnin. Inasoꞌ, aꞌnara caipayain yaꞌhuëtërin, Isca itopisoꞌ. 30Saraiso co huaꞌhuanaꞌpihuë niꞌton, co huaꞌhuaninhuëꞌ.
31Tarisoꞌ, Orë ninano quëran pipirin. Cartioroꞌsa yaꞌhuërin quëran pipirahuaton, Canaan parti chinoton, paꞌnin. Huiꞌnin Apran itopiso Sarairë chachin quëparin. Naporahuaton, shionta Noto itopiso quëparin. Paꞌsapirinahuëꞌ, Aran ninanoquë canconpachinara, inaquë quëparitonpi. 32Inaquë yaꞌhuëasoiꞌ, Tariso chiminin. Cato pasa aꞌnatërápo piꞌipitaso chiminin huachi.
Atualmente Selecionado:
Génesis 11: cbt
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc. All rights reserved.
