मत्ती 10
10
भेजे भए चेलौ के नाम
(मरकुस 3:13–19; लूका 6:12–16)
1फिर ईसु नै अपने बारैह चेलौ कै अपने धौंरे बुलाकै, उनकै दुसट आत्माऔ के ऊपर हक दओ कै उनकै लिकारैं और सब तरै की बेमारिऔ और सब तरै की कमजोरिऔं कै ठीक करैं। 2और बारैह खास भेजे भए चेलौ के जे नाम हैं, पैलो समौन, जो पतरस कैह लाओ और उसको भईया अन्दरयास, जबदी को लौंड़ा याकूब, और उसको भईया यहून्ना, 3फिलिप्पुस और बरतुलमै, थौमा और चुंगी लैनै बारो मत्ती, हलफई को लौंड़ा याकूब और तदै। 4समौन कनानी, और यहूदा इसकरोती, जिसनै ईसु पकड़बा बी दओ।
अच्छी खबर के ताँई भेजे भए चेलौ को जानो
(मरकुस 6:7–13; लूका 9:1–6)
5इन बारौंह कै ईसु नै जौ आगियाँ देकै भेजो कै, “गैर यहूदिऔं की ओर ना जईओ, और ना सामरी लोगौ के किसी सैहर मै जईओ। 6पर ईसराइल केई घराने की खोई भई भेड़ौ के धौंरे जईओ। 7और चलते चलते परचार करकै कैओ कै सुरग को राज धौंरे आ गओ है। 8बेमारौं कै ठीक करौ, मरे भए कै जिन्दगी दो, कोढ़िऔं कै सुद्द करौ, दुसट आत्माऔ कै लिकारौ, तुमकै मुफत मै मिलो है मुफत मै दे दो। 9अपने थैलिया मै सौनो, चाँदी या पैसा ना रक्खौ 10#1 कुर 9:14; 1 तीमु 5:18रस्ता के ताँई ना झोला, ना दो कुरता, ना जूता, ना लठिया ले जाऔ कैसेकै मजदूर कै रोटी को हक है।
11 “जिस किसी सैहर या गाम मै जाऔ तौ पतो लगाऔ कै बहाँ कौन बिसवास लायक है? और जब तक बहाँ सै ना लिकरौ, उसई के हिंया रैहऔ। 12उस घर मै घुसते टैम उसकै सान्ति की आसीस दो। 13अगर उस घर के लोग इस लायक हौंगे तौ तुमरी सान्ति उस घर मै उतरैगी, अगर बौ घर इस लायक ना होगो, तौ तुमरी सान्ति तुमरे धौंरे लौहट आगी। 14#चेलौ 13:51अगर कोई तुमरो सुआगत ना करै या तुमरी बात ना सुनै, तौ उस घर या सैहर सै लिकरते भए अपने पाँऐऔं की धूदर झाड़ दो।#10:14 धूदर झाड़नै को मतलब जिसके खिलाप धूदर झाड़नी है बासै कोई मतलब ना रखनो 15#मत्ती 11:24#लूका 10:4–12मैं तुमसै सच कैरओ हौं, कै नियाय के दिन उस सैहर की हालत सदोम और अमोरा देस की हालत सै जादा बुरी होगी।
भेजे भए चेलौ कै ईसु की चितौनी
(मरकुस 13:9–13; लूका 21:12–17)
16 #
लूका 10:3
“देखौ, मैं तुमकै भिड़ियौ के बीच भेड़ौ की हाँई भेज रओ हौं, इसताँई साँप के हाँई चालाँक और कबूतर के हाँई भोले बनौ। 17#मरकु 13:9–11; लूका 12:11,12; 21:12–15 पर लोगौ सै चौकस रैहऔ, कैसेकै बे तुमकै अदालतौं के हवाले कर दंगे, और अपनी पंचातौ मै तुमकै कोड़ा मारंगे। 18तुम मेरे कारन अधकारिऔं और राजाऔं के सामने पेस करे जाऔगे, जिस्सै मेरे बारे मै तुम उनकै और गैर यहूदिऔं कै गभाई दे सकौ। 19जब बे तुमकै अदालत के हवाले कर रए हौं, तौ जौ चिन्ता ना करिओ कै हम कैसे बोलंगे और का कैंगे, कैसेकै जो कुछ तुमकै कैनो होगो, बौ उसई घड़ी तुमकै बता दओ जागो। 20कैसेकै बोलनै बारे तुम ना हौ, पर अब्बा को आत्मा है, जो तुमरे दुआरा बोलै है।
21 #
मरकु 13:12; लूका 21:16 “भईया अपने भईया कै धोके सै पकड़बाकै मरवा डारंगे और अब्बा अपने बालक कै, औलाद अपने अईया-अब्बा के खिलाप उठ खड़ी हौंगी और उनकै मरवा डारंगी। 22#मत्ती 24:9; मरकु 13:13; लूका 21:17; मत्ती 24:13; मरकु 13:13मेरे नाम के कारन सब लोग तुमसै बैर करंगे, पर जो अन्त तक बिसवास मै बनो रैहगो उसई कै मुक्ति मिलैगी। 23जब बे तुमकै एक सैहर मै सताँऐ, तौ दूसरे सैहर कै भाज जईओ, मैं तुमसै सच कैरओ हौं कै तुम ईसराइल के सैहरौं के चक्कर पूरे बी ना कर सकौगे कै आदमी को लौंड़ा आ जागो।
24 #
लूका 6:40;
यहून 13:16; 15:20 “ना चेला गुरू सै बड़ो होवै है और ना नौकर अपने मालिक सै 25#मत्ती 9:34; 12:24; मरकु 3:22; लूका 11:15चेला के ताँई अपने गुरू जैसो और नौकर कै अपने मालिक जैसो बन जानोई भौत है, जब उनौनै घर के मालिक कै सैतान कैई तौ उसके घर बारौ कै का ना कैंगे?
परभु सै डरौ लोगौ सै ना
(लूका 12:2–7)
26 #
मरकु 4:22; लूका 8:17 “इसताँई उनसै ना डरौ, ऐंसो कुछ बी गुप्त ना है, जो उज्जेरे मै ना लाओ जागो और ऐंसो कुछ बी छिपो भओ ना है, जो जानो ना जागो। 27मैं जो तुमकै इन्धेरे मै कैरओ हौं उसकै तुम उज्जेरे मै सुनाऔ और जो कानौ कान सुनौ हौ, उसकै मकान की छत सै परचार करौ।
28 “उनसै ना डरौ, जो सरीर कै मार डारै हैं, पर आत्मा कै ना मार सकैं हैं; पर उस्सै डरौ, जो आत्मा और सरीर दौनौ कै नरक मै नास कर सकै है। 29का एक पैसा मै दो चिरईया ना बिकै हैं? फिर बी तुमरे अब्बा की इच्छा के बिना उनमै सै एक बी जमीन मै ना गिरै है। 30हाँ, तुमरे खोपड़ी के बार बी सब गिने भए हैं। 31इसताँई, डरौ ना, तुम तौ भौत सी चिरईयौ सै जादा कीमती हौ।
(लूका 12:8,9)
32 “जो कोई सब लोगौ के सामने मैंकै मान लेगो, उसकै मैं बी सुरग मै रैहनै बारे अपने अब्बा के सामने मान लंगो। 33#2 तीमु 2:12पर जो कोई सब लोगौ के सामने मेरो इनकार करैगो बाको मैं बी अपने सुरग मै रैहनै बारे अब्बा के सामने इनकार करंगो।
ईसु के पिच्छे चलनै सै होनै बारी परेसानी
(लूका 12:51–53; 14:26,27)
34 “जौ ना सोचौ कै मैं, धरती मै सान्ति लेकै आऔं हौं, मैं सान्ति ना पर तरवार चलवानै आऔं हौं। 35मैं लौंड़ा और अब्बा मै, लौंड़िया और अईया मै, बहू और सास मै फूट डान्नै आऔं हौं। 36आदमी के बैरी उसके अपने घर केई लोग हौंगे।
37 “जो अपने अईया-अब्बा और लौंड़ा लौंड़िया कै मैंसै जादा पियार करै है, बौ मेरे लायक ना है। 38#मत्ती 16:24; मरकु 8:34; लूका 9:23और जो अपनो कुरूस लेकै मेरे पीछे ना चलै बौ मेरे लायक ना है। 39#मत्ती 16:25; मरकु 8:35; लूका 9:24; 17:33; यहून 12:25जो अपने पिरान बचावै है, बौ बाकै खोगो, और जो मेरे कारन अपनो पिरान खोवै है, बौ बाकै पागो।
ईनाम
(मरकुस 9:41)
40 #
लूका 10:16; यहून 13:20;
मरकु 9:37; लूका 9:48 “जो तुमरी इज्जत करै है, बौ मेरी इज्जत करै है, और जो मेरी इज्जत करै है, बौ बाकी इज्जत करै है, जिसनै मैं भेजो हौं। 41जो नबी की इज्जत इसताँई करै है, कै बौ नबी है, बौ नबी को ईनाम पागो, और जो धरमी की इज्जत इसताँई करै है, कै बौ धरमी है, बौ धरमी को ईनाम पागो। 42जो कोई इन छोटो मै सै एक कै चेला जानकै सिरप एक गिलास ठंडो पानी पिबाय, मैं तुमसै सच कैरओ हौं, बौ किसी तरै सै अपनो ईनाम ना खोगो।”
Atualmente Selecionado:
मत्ती 10: TKB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
New Life Compute Institute [NLCI] - CC BY-NC-ND 4.0
