Mateu 4

Yesu Vamueseka

(Mako1:12-13; Luka4:1-13)

1Ambahoni Yesu vamutualele kuli Cimbembesi mu mpambo linga vakamueseke kuli Liyavolo. 2Ualiuminine kulia ha matangua makumi auana vutsiki na mutania, kaha hanima yakuliumina kulia uevuile njala. 3Kaha muka kumueseka uezile kuli ikeye nakuhandeka nguendi, “Nga u Muna Njambi, shika aua mavue linga ahimpuke mbolo.”

4Vuno honi Yesu uamukumbuluile nguendi, “Vanacisoneka nguavo, ‘Muntu kasa kuyoya na mbolo lika kuahi, vuno honi na mezi oshe aje Njambi ahandeka.’”

5Ambahoni Liyavolo uamutualele mu nganda yakulela, uamuhakele helu lia kashongua ka Njivo ya Njambi. 6Kaha uahandekele kuli ikeye nguendi, “Nga u Muna Njambi,” “liumbile ha mavu. Muomu vanacisoneka nguavo,

“‘Akashika tungelo vendi hali yove,

kaha vakakukavuila na mavoko avo, linga viliato viove keti vikansunsuke ku mavue.’”

7Yesu uamukumbuluile nguendi, “Vanacisoneka naua nguavo, ‘Keti ueseke Muene Njambi yove.’”

8Kaha naua Liyavolo uamutualele ku munkinda ualaha cikuma, uamumuesele vumuene vuoshe vua hano ha mavu na vumpau vuavuo. 9Kaha uahandekele kuli Yesu nguendi, “Vioshe evi njikakuhanavio, nga ukatsikama ha mavu na kunjilemesa.”

10Yesu uamukumbuluile nguendi, “Huma kuli yange Satana! Omuo vanacisoneka nguavo, ‘Ukalemesa Muene Njambi yove na kumupangela ikeye lika!’” 11Ambahoni Liyavolo uamusezele, kaha tungelo vezile nakumukuasa.

Yesu Aputuka Vipangi viendi mu Ngalileya

(Mako1:14-15; Luka4:14-15)

12Omo Yesu uevuile nguendi Iuano vanamukutu, kaha uaile ku Ngalileya. 13Kaha hakuhuma mu Nazaleta uaile nakukakala mu Kapenauma kuyehi na mema a kalunga a Ngalileya, mu nginga ya Zembuloni na Nafetali, 14linga cije cahandekele kananguizi ua Njambi Isaya cilishulisise nguendi:

15“Cihela ca Zembuloni na cihela ca Nafetali,

vije viakala mu ngila yakuya ku mema a kalunga, kulutue lua Yundau,

Ngalileya, lifuti lia vaje keti Vayunda.

16Vantu vaje vakala mu milima

vanamono ceke cakama.

Kaha na vaje vakala mu cihela na mu cimbembe ca kutsa,

ceke cinavatuila.”

17Kuhuma ha ntsimbu ije Yesu uaputukile kuambulula nguendi, “Tengulukeni ku vipi vieni, omuo vumuene vua muilu vuli muyehi.”

Yesu Asana vandongisi vendi vakulivanga

(Mako1:16-20; Luka5:1-11)

18Omo Yesu uakele nakuenda kucikulo ca cisali ca Ngalileya, uamuene vamunaina vavali, Simoni uje ivatumbula Petulu namunaina Anduleo, vatele manda avo mu cisali, omuo vapuile vakakuta vantsi. 19Kaha uahandekele kuli vakevo nguendi, “Njikaveni, kaha njikamipuisa vakakuta vantu.” 20Kaha hajevene vasezele manda avo nakumukava.

21Omo uakele nakutualelelaho kuya kaha naua uamuene muntu mukuavo na munaina, Tiango muna Zembendeo na munaina Iuano mu vuato hamo na ishavo Zembendeo vakele nakutungulula manda avo, kaha uavasanene. 22Kaha hajevene vasezele vuato na ishavo, kaha vamukavele.

Yesu Alongesa na Kuambulula na Kukanguisa

(Luka6:17-19)

23Yesu uahitanganene mu Ngalileya muoshe, nakulongesa muvi njivo viavo via malombelo, na kuambulula muzimbu uacili ua vumuene nakukanguisa mishongo yoshe ya vantu yakuliseza seza na vakakuvavala. 24Kutsimana cendi cevuikile naku Siliya kuoshe, kaha vamunehelele vaka kuvavala voshe, na vaka mishongo yakuli seza seza na kuvua kuvavala, na vaka mahamba, na vaka kushinia, na vaka tulepa, kaha voshe uavakanguisile. 25Kaha vivunga viakama via vantu kuhuminina mu Ngalileya, namu Ndekapolisi #4:25 (Ndekapolisi ilumbununa vimbonge likumi) na ku Yelusalema, na ku Yundeya, na musinia lia ndonga ya Yundau, viamukavele.

Atualmente Selecionado:

Mateu 4: nkn

Destaque

Copiar