Lukas 24
24
Yesus ocop bolum hopuli
24:1-12
(Mat. 28:1-10; Mrk. 16:1-8; Yoh. 20:1-10)
1Nyan ondo Menggu, kawut-kawut lau, kawan bawe taiyoh tulak mahah kolowong Yesus mehen kawan ramuan co ocop tonyodia doh indan ontun Yesus. 2Nyan kolowong cioh, kitan doh batu tutup kolowong yoh ocop kolinang. 3Iroh muntam hia ponah kolowong cioh, tapi ontun Tuhan Yesus arelu oko nyan intin.
4Pondehan iroh tonjok bingung momikir aang cioh, nongkocok duo beti dulun hapo lembon co molet montin tonjok dokin iroh. 5Iroh potontakut lau, paluh nukup bolutut. Tapi dulun duo iyoh mantun ma iroh, “Kura ikan nganyap dulun bolum nyan halo dulun matoi? 6Are arelu oko nyan intoi. Are ocop hopuli bolum ingkan pompatoi! Mingkat ome co ocop tomantun-Eh ma ikan tumun aang tuh kotika Are incah nyan derah Galilea. 7Hiah iyoh Yesus mantun ma ikan, ‘Anak Kolunon sobulih tonyarah hia dulun bodosa, paluh tomohukum matoi nyan sompolaki. Tapi nyan ondo co kotolu, Are angar hopuli bolum.’ ” 8Maka topingkat bat kawan bawe taiyoh ma kawan antun Yesus. 9-10Kawan bawe taiyoh iyohco: Maria Makdalena, Yohana hintang Maria tinan Yokobus, kawun kawan bawe co bokon eh co homboh-homboh ma iroh.
Opah hopuli hia Yerusalem ingkan kolowong cioh, iroh ngesah kokon kojadian taiyoh ma sobalas rasul hintang kokon murid co bokon eh. 11Tapi, kawan rasul aroko porocaya ma kawan bawe taiyoh tului ngoneh kesah doh co naintagas eh aroko muntam akar.
12Tapi Petrus tonjok paluh tongkoru hia kolowong Yesus. Are hoohoop ina noto hia ponah kolowong cioh, tapi aroko kitai ka ontun Yesus. Baya oko benang leh, benang co hapan ika mungkuh ontui yoh. Are hurong lau paluh tulak samir momikir ome co ocop tojadi.
Yesus Poleha Arop-Eh Ma Duo Murid-Eh Nyan Calan dahat doh nuntuh Lowu Emaus
24:13-35
13Nyan ondo cioh ka, oko duo murid Yesus dahat nyalan hia lowu Emaus, kira-kira sobalas kilometer ingkan kota Yerusalem. 14Nyan oang calan, doruo bokesah tintun kokon aang co tojadi. 15Kotika doruo dahat hotaleh tintun masalah cioh, Yesus leh co dombut, nyalan hontong-hontong ma iroh. 16Tapi oko aranaang co nompi doruo aroko sadar bahawa Are yoh mula Yesus.
17Paluh Yesus ngisok doruo, “Arai aang co tongesah ikan duo nyan ponah solanam me tuh?”
Maka, doruo tondo. Tampa doh jarin karas jorung. 18Paluh ico beti ingkan doruo co arai Kleopas, mantun, “Kokon dulun co hia kota Yerusalem ika moraya Paskah ocop monau ome co tojadi nyan Yerusalem kotahin pira-pira ondo tuh. Borati baya Iko leh co aroko monau, hanteeh?”
19Are ngisok, “Poristiwa ome co tojadi?”
“Poristiwa co tojadi ma Yesus, dulun ingkan desa Nasaret yoh,” hien doh. “Are ico beti nabi co kuasai borasal ingkan Mohotara. Are nompi aang co mosotahir co luar biasa. Are majar kawan dulun ma akar pikir co hebat. Kokon dulun herak ma Are. Mahi bat Mohotara herak ngonyangit ma Are! 20Tapi kawan imam kopala hintang kawan pomimpin co bokon ingkan bangsa kitan ocop nyarah Are hia gubernur pomorintah Romawi ina-Eh tomohukum dapot matoi. Tomaku doh Are nyan sompolaki. Are ocop matoi. 21Podahar sulak eh kaih karas boharap Are co angar nyolamat bangsa Israel ingkan kuasan musuh, tapi aroko nyolung. Nohani makitu aroko mungkin awi ngondaii tuh ocop tolu ondo opah-Eh matoi.
22Tapi pira-pira beti kawan bawen kaih ingkan murid Yesus yoh, punan ngesah aang co pohurong-hurong kaih. Iroh tulak hia kolowong Yesus yoh manyuap niin ngonyua-nyua lau,
23tapi arelu oko ontun Yesus nyan ponah kolowong cioh. Paluh iroh ngesah tintun kawan molekat co poleha arop eh ma iroh. Hien kawan molekat taiyoh Yesus ocop bolum hopuli!
24Opaiyoh, pira-pira tongkanyoh kaih tulak hia kolowong Yesus hintang isandeoi kesah kawan bawe taiyoh mula bujur. Tapi iroh mahi aroko kito Yesus.”
25Paluh Yesus mantun ma doruo, “Oo, ikan duo tuh dalo komona me paham. Songam me dalo komohoeh porocaya ma kokon aang co tomara kawan nabi sinan tintun Laca Co Tomonjanji Mohotara! 26Mohotara ocop nantu Are sobulih soranta isanioh soun hangki Are tomohormat.” 27Paluh Yesus monarang eh ma doruo kokon aang co tonulih tintun Are ponah soluruh Surat Borasih, molai ingkan kawan buku co tonulih Musa dapot kokon buku co tonulih kawan nabi bokon.
28Kotika iroh ocop jonyo dapot ika co tonuju doh, iyohonon lowu Emaus, Yesus deon tagas eh nyau ngompaluh solanai. 29Tapi iroh nyompakat Are ika hiloi nyan ika doh hiloi. Hien doruo ma Are, “Ondo tuh ocop jonyo pindong. Hiloi umba kaih nyan intoi leh.” Yesus paluh muntam hintang hiloi umba iroh.
30Kotika Are tuot kuman umba iroh, Are monu rute. Opah mongucap doa sukur, Are nyila rute cioh hapo silui-Eh paluh mihieh ma iroh. 31Kotika iyoh ka pukap bat pikiran doh, jarin sadar bahawa Are yoh mula Yesus oluh eh. Tapi Are paluh lanyap niho ingkan halo iroh. Iroh aroko boraoi noto Are bat. 32Iroh mantun samah arop doh, “Onon boh tuluieh kite nongkomo karas bosomangat kotika ponah solana Are monarang eh ma kite kokon aang co tonulih tintun Are ponah soluruh Surat Borasih!”
33Aroko kojuan umbot kuman iroh paluh tulak hia kota Yerusalem. Nyan intin iroh sopopak ma sobalas rasul hintang kawan murid co bokon ocop kumpur. 34Kokon dulun co oko nyan intin mantun ma doruo, “Tuhan Yesus tuu-tuu ocop hopuli bolum! Are ocop poleha Arop-Eh ma Simon Petrus.” 35Doruo mahi ngesah kokon aang co tojadi nyan oang calan hia desa Emaus yoh dapot waktu doruo potosadar bahawa Are yoh mula Yesus opah Are nyila rute cioh.
Yesus poleha Arop-Eh ma kawan murid-Eh dapot koraon doh bahawa Are ocop hopuli bolum
24:36-49
(Yoh. 20:19-23)
36Pondehan doruo incah bokesah, songola Yesus leh co ocop tonjok nyan tohun kokon doh yoh paluh mantun, “Tontoke indam me!”
37Iroh tokocit hintang potontakut, tului sompan doh Are yoh liou. 38Tapi Yesus mantun ma iroh, “Aroh ikan takut. Aroh dapot nyamam me jajong mainboh Akuh tuh bujur-bujur hopuli bolum. 39Noto kawan nyulon dingan nyan silung-Kuh hintang paang-Kuh. Mula Akuh boh otuh! Ngangkap eh hintang nyorolieh. Co liou yoh arelu oko usok hintang arelu oko tulang eh, isan co kitam me nyan Akuh tuh.” 40Samir mara aang cioh, Are poleha nyulon dingan nyan silui hintang paai-Eh. 41Tapi iroh tenden moho porocaya tului iroh incah karas kohurong hintang karas kojorih doh tului popak Yesus. Maka, Yesus ngisok, “Main boh ikan oko kanon nyan intoi?” 42Ihin doh isak ocin indai-Eh. 43Hintang uras doh lian noto, Are kuman eh.
44Opah iyoh Are mantun ma iroh, “Kotika Akuh incah hokohico ma ikan batuh, ocop tomara-Kuh ma ikan bahawa kokon aang co tonulih tintun Akuh sobulih tojadi, ingkan co tonulih nyan kawan buku Musa, kokon buku kawan nabi, dapot buku kawan Masmur.”
45Opaiyoh Yesus mukap pikiran doh ika paham ma aang co nyan Surat Borasih yoh. 46Hie-Eh, “Nyan ponah Surat Borasih ocop oko tonulih tintun Laca Co Tomonjanji Mohotara. Are sobulih tonyoranta dapot matoi, paluh tolu ondo opah iyoh Are hopuli bolum. 47Paluh ponah kuasan Laca-Eh, angar tongorapot tarung bahawa dulun sobulih naat dosa hintang hopompaluh ngonjorih songan Mohotara, paluh Mohotara angar mongampun dosan doh. Tarung cotuh sobulih tomomborita molai ingkan Yerusalem, paluh ma kokon bangsa co bokon nyan dunia tuh.
48Ikan ocop noto kokoieh yoh. Maka ikan sobulih momborita tarung cioh indan kawan dulun bokon. 49Tapi nukui nyan kota Yerusalem tuh soun awi Akuh angar nyoruhan Roh Mohotara hia ikan, isan co ocop tomonjanji pian Tamang-Kuh. Nukui dapot Roh Mohotara dombut ika ngohomboh ikan ma kuasa co ingkan Mohotara.”
Yesus tokatang hia sorga
24:50-53
50Opah iyoh Yesus mehen kawan murid-Eh pusit ingkan kota Yerusalem dapot desa Betania. Nyan intin Are mangkat silui-Eh, paluh mantun aang co pio indan iroh. 51Pondehan Are nompi aang cioh, Are topisah ma iroh, tokatang hia sorga. 52Iroh sujut nyembah Are, opah iyoh iroh hopuli hia Yerusalem mehen kojorih nyaman doh. 53Iroh hopompaluh nara Mohotara nyan polontaran Lopo Mohotara sika ondo.
Atualmente Selecionado:
Lukas 24: TBSS
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
