Lukas 23
23
Yesus tomehen hia Gubernur Pilatus ika tomongadili
(Mat. 27:1-2,11-14; Mrk. 15:1-5; Yoh. 18:28-38)
1Kokon dulun ponah sidang cioh tonjok, paluh mehen Yesus hia Pilatus, gubernur propinsi Yudea. 2Nyan intin iroh nondah Are. Hien doh, “Dulun cotuh ocop mehen ajaran co sala ma bangsa kaih. Are ngosiit dulun ika aroko usah nahur pajak hia Laca nyan Roma hintang Are mahi nisi arop eh iyohco ico beti laca, iyohonon Laca Co Tomonjanji Mohotara.”
3Paluh Pilatus ngisok Yesus, “Bujur jah Iko co Laca dulun Yahudi?”
Hien Yesus museh, “Isanioh hiem mu.”
4Paluh Pilatus mantun ma kawan imam kopala hintang kawan dulun bokon co ocop hokumpur, “Kitang kuh Dulun cotuh arelu oko kosolaai. Arelu oko alasan dapot Are sobulih tomohukum.”
5Tapi kawan pomimpin dulun Yahudi horoholuh monggasak. Hien doh, “Are tuh mohasut kawan dulun ika momboruntak. Ononboh ajaran-Eh nyan ngolauh tana Yudea. Are molai ingkan derah Galilea, dapot makitu hia kota Yerusalem tuh!”
6Ngoneh iyoh, Pilatus ngisok, “Mainboh Yesus tuh asar-Eh ingkan derah Galilea pai?”
7Opah tomara bahawa Yesus mula ingkan Galilea asar-Eh, Pilatus nyuhu kawan tontara mehen Yesus hia Herodes, laca derah Galilea. Potohorong are oko nyan kota Yerusalem ka.
Yesus tomehen hia Herodes ina tomongadili
8Herodes ocop derek ngoneh borita tintun Yesus. Ocop tahi jere nyopopak Are. Jadi kotika kito Yesus, sulak eh Herodes sanang lau tului are boharap lian noto Yesus nompi aang co mosotahir. 9Maka, Herodes orong kisok ma Yesus, tapi Yesus aroko museh samah sindo.
10Kawan imam kopala hintang kawan guru agama Yahudi tonjok nyan intin. Korinah angit doh, iroh bohimat nondah Yesus. 11Paluh Herodes hintang kawan tontaraeh mohina Yesus. Toposungkop doh Are ma jubah laca ika polea-lea Are. Paluh, Herodes nyuhu kawan tontara mehen Yesus hopuli hia Pilatus. 12Sorinai iyoh Herodes doruo Pilatus yoh hobomusuh, tapi nyan ondo cioh iroh jarin hojolahan.
Gubernur Pilatus mutus ika Yesus tomohukum matoi
(Mat. 27:15-26; Mrk. 15:6-15; Yoh. 18:38–19:16)
13Pilatus ngumpur kawan imam kopala, kawan pomimpin, hintang rayat, 14paluh mantun ma iroh, “Ikan mehen Dulun cotuh hia akuh paluh nondah bahawa Are nyasat kawan dulun ika ngolawan pomorintah Romawi. Ngoneh eh, akuh ocop morisa Are nyan tohimo ikan, tapi akuh samah sindo aroko haba ico mahi kojahat co tonondah me ma-Are. 15Herodes ka ocop momutus eh nain otuh. Maka, are nyuhu kawan tontara mehen Yesus hopuli mahah intoi. Ocop nyata Dulun cotuh aroko nguan ome bewe aang co jahat co patut ika tomohukum matoi. 16Jadi, akuh angar moholu Are tomoncambuk leh, paluh molapas-Eh.”
[17Pilatus mantun aang cioh tului sika Ondo Moraya Paskah are sobulih molapas ico beti tohanan indan dulun Yahudi.] 18Tapi uras dulun co kumpur nyan intin noriak, “Ngompatoi-Eh leh! Molapas Barabas indan kaih!” 19Nah, Barabas yoh tomokuntam hia ponah seper tului nyan kota Yerusalem are tolibat ponah pomboruntakan ngolawan pomorintah Romawi. Are ka ngompatoi dulun.
20Pilatus jere molapas Yesus. Jadi, are mantun kole ma suara co muhat ma dulun orong yoh bahawa Yesus aroko sala. 21Tapi iroh noriak hopompaluh, “Ngompatoi-Eh nyan sompolaki! Ngompatoi-Eh nyan sompolaki!”
22Paluh indan kohontolu kalieh Pilatus mantun muhat ma iroh, “Dulun cotuh aroko sala! Are aroko nguan ome bewe aang co jahat co patut ika tomohukum matoi. Akuh angar moholu Are tomoncambuk leh, paluh molapas-Eh.”
23Tapi iroh tenden hopompaluh noriak muhat bahawa Yesus sobulih tongompatoi. Kojekaieh iroh bohasir tului toriak doh yoh. 24Pilatus nguan kokoieh sosuai ma kojere doh. 25Oluco Barabas tomokuntam hia ponah seper tului tolibat ponah pomboruntakan hintang ngompatoi dulun, Pilatus molapas are, holuh nyuhu kawan tontaraeh ika mohukum matoi Yesus nyan sompolaki tului iyoh kojere dulun orong yoh.
Yesus tomehen ika tomohukum matoi nyan sompolaki
23:26-32
(Mat. 27:32-46; Mrk. 15:21-41; Yoh. 19:17-30)
26Maka, iroh mehen Yesus pusit ingkan kota Yerusalem hia ika-Eh tomohukum matoi. Kotika iroh rahat nyalan, oko ico beti bakah jere muntam kota Yerusalem yoh. Araieh Simon, ingkan kota Kirene. Kawan tontara taiyoh nawan are, maksaeh nyanon sompolaki, paluh nyalan nyan uwoi likut Yesus.
27Orong lau dulun ngonulu Yesus, nyan halo iroh yoh oko kawan bawe co nangih, nohuang Are. 28Tapi Yesus bopaling nohimo iroh paluh mantun, “kawan bawe ingkan Yerusalem, aroh nangih nohuang tului ome co tojadi ma Akuh. Tapi sobalik eh nangih leh tului ome co angar tojadi ma ikan hintang kawan anak me. 29Awi angar dombut kotikaeh dulun angar soranta korinah kongorong dapot mantun, ‘Meleh pio indan kawan bawe co arelu oko anak, aroko piji nganak, aroko piji pokosu anak eh!’ 30Nyan waktu cioh dulun angar mantun ma kawan puruk, ‘Botusut tungkui kaih.’ Paluh ma kawan lungkuh, ngohop kaih!#23:30 Ingkan Hosea 10:8. Dulun angar jere matoi nontekas hangki horoholuh soranta. 31Awi, amun dulun nguan aang cotuh ma kaju co incah julung, ome co angar tojadi ma kaju co kojang?”
32Oko duo dulun bokon co tomehen ika tomohukum matoi hontong ma Yesus. Kokon doruo yoh dulun jahat.
Yesus tomaku nyan sompolaki
23:33-43
33Kotika dapot nyan ika co tonisi “Ongang”, kawan tontara Romawi nyompolaki Yesus hintang duo ponjahat yoh, ico nyan topit kontoui hintang ico kole nyan topit komuloi Yesus. 34Paluh Yesus bodoa, “Apa, mampun iroh awi iroh aroko monau ome co tongompian doh.”
Paluh, kawan tontara monu lembon Yesus. Iroh moundi ika nantu pira-pira beti halo iroh yoh co haba bagian ingkan lembon Yesus. 35Dulun orong tonjok nyan intin noto ome co tojadi. Kawan pomimpin dulun Yahudi polealea Yesus. Hien doh, “Amun Dulun cotuh bujur-bujur Laca Co Tomonjanji Mohotara hintang Are tuh Dulun co Tomili Mohotara dapot Are boraoi nyolamat dulun bokon, olueh ka Are makitu nyolamat arop-Eh tarop.”
36Kawan tontara mahi polea-lea Are. Iroh ngoroni Are nowaran Are ma angur co mosom. 37Hien doh, “Amun Iko bujur-bujur Laca dulun Yahudi, nyolamat arop-Mu bat!” 38Oko ka tulisan co tomatop nyan hunyung kuhung Yesus nyan sompolaki. Santuh nain tulisan cioh, “Tuhboh Laca Dulun Yahudi.”#23:38 Pomorintah Romawi umpi hukuman matoi nyan sompolaki nyan ika umum ina orong dulun boraoi kito. Iroh ka matop pongumuman nyan sompolaki cioh ika dulun monau ome kosolaai. Iyoh pokingat dulun ika tuhit ma pomorintah. Tulisan co tomatop nyan hunyung Yesus borupa kelat kemor ma Yesus (awi iroh aroko porocaya Are iyohco laca) ATAWA kelat kemor ma dulun Yahudi (awi poremeh kuasan doh tomombanding ma kuasan pomorintah Romawi).
39Nohani kole, songkolang ico ponjahat co tonyompolaki nyan intin mohina Yesus ka. Hieeh, “Amun Iko bujur-bujur Laca Co Tomonjanji Mohotara, nyolamat Arop-Mu bat hintang kaih ka!”
40Tapi ponjahat co ico kole nyompo jolahaieh yoh. Hieeh, “Iko sobulih eh takut hintang nyook ma Mohotara, awi sonyulu onieh iko angar matoi ka. Iko hontong-hontong tomohukum matoi isan Are. 41Baya hukuman kite mula sosuai ma gawin te. Tapi Are samah sindo aroko sala!” 42Paluh are mantun ma Yesus, “Mingkat akuh, kotika Iko dombut sobagai Laca!”
43“Porocayaleh,” hien Yesus maeh, “Ngondaii tuh ka iko angar homboh Akuh nyan sorga.”
Yesus matoi
23:44-49
44Sokitar jam duo balas tohun ondo, matanondo aroko molet. Ngolauh derah cioh jarin pindong kitop dapot pukur tolu macohit. 45Horden#23:45 Horden cioh misah ruang husus kohadiran Mohotara. Sindo ico toun baya Imam co poko bokuasa kuhan muntam. Jadi, kotika horden cioh botesah artieh aroko bat batas eh oni. Ito makitu boraoi muntam hia ika kohadiran Mohotara. Noto nyan Ibrani 6:19-20; 9:1-15; 10:19-22 hintang nyan Epesus 2:18; 3:12. co misah ika co Poko Suci ma ika co bokon nyan Lopo Mohotara, botesah duo. 46Paluh Yesus noriak ma suara muhat, “Apa! Hia ponah silum-Mu Akuh nyarah arop-Kuh!” Opah mantun isanioh, Are paluh diuh.
47Kotika kopala tontara kito ome co ocop tojadi, are mahi nara Mohotara. Paluh are mantun, “Mula tuu, Are tuh Dulun bujur!”
48Dulun orong co bokumpur nyan intin ka ocop kito poristiwa Yesus tomohukum matoi. Iroh korinah jorung paluh buli kalut korinah komoneser doh. 49Nyan intin ka, oko orong jolahan Yesus co poko haet, tomasuk kawan bawe co ngonulu Are ingkan Galilea. Iroh noto kokon kojadian cioh ka tapi tonjok ingkan ika co ocu.
Yesus tongolowong nyan ponah guha
23:50-56
(Mat. 27:57-61; Mrk. 15:42-47; Yoh. 19:38-42)
50-51Oko ico dulun araieh Yusup, co asar eh ingkan kota Arimatea nyan propinsi Yudea. Are ico dulun pio co tomohormat dulun. Are dahat nganto Korojaan Mohotara dombut. Oluco are anggota kolompok pomimpin dulun Yahudi co poko penting, are aroko sotuju ma koputusan hintang tindakan doh yoh. 52Yusup tuh tulak hia Pilatus paluh nyawot ijin amun boraoi are ngolowong ontun Yesus. 53Opah haba ijin, are potoka ontun Yesus ingkan sompolaki, paluh mungkuh eh ma kain kaci. Are mandak ontun Yesus yoh nyan ponah kolowong co tongompian nyan ponah lungkuh batu. Kolowong cioh arinai piji hapan. 54Iroh gasak-gasak ngolowong eh sorinai ondo pindong tului ndaii cioh yoh ondo Jomahat. Dulun Yahudi nyiap arop doh sorinai ondo Sabat molai awi iroh aroko boraoi bogawi nyan ondo cioh.
55Kawan bawe co dombut homboh Yesus ingkan Galilea ngonulu Yusup paluh noto kolowong cioh. Kitan doh ka maindeon ontun Yesus tomandak nyan ponah kolowong. 56Opaiyoh iroh buli hia kota Yerusalem paluh nyiap kawan ramuan hintang minyak harum ika ngominyak ontun Yesus. Tapi nyan ondo Sabat, iroh tondo bogawi awi iroh sobulih tuhit ma Hukum Mohotara.
Atualmente Selecionado:
Lukas 23: TBSS
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
