Yohanes 2

Pesta kopongawin nyan lowu Kana

2:1-11

1Duo ondo opahiyoh opah Pilipus doruo Natanael tonaah, oko pesta kawin nyan lowu Kana nyan propinsi Galilea. Tinan Yesus dombut ka nyan intin. 2Yesus hintang kawan murid-Eh mahi tomundang hia pesta kopongawin cioh. 3Hiah waktu pesta cioh incah rahat, danum angur ocop punah. Tinan Yesus mantun ma-Eh, “Iroh punah angur!”

4Hien Yesus maeh, “Ine, aroko usah Akuh umba campur ponah urusan conon. Arinai okot waktueh indang-Kuh.”

5Tapi tinan Yesus mantun ma kawan polayan nyan lopo cioh, “Nguan ehyoh ome bewe co tomantun-Eh ma ikan.”

6Nyan lopo cioh oko onom buong co bahai tolungan danum, co tonguan ingkan batu. (Danum ponah kawan buong taiyoh hapan ika munjah arop doh monurut adat dulun Yahudi.) Sangan sika buong taiyoh sokitar jalum pulu atawa solatuh duam pulu liter. 7Yesus mantun ma kawan polayan taiyoh, “Nyanganbat kawan buong tanon nguntop ma danum.” Jadi, iroh nyangan eh dapot kuntop. 8Opah iyoh, Yesus mantun ma iroh, “makitu monu isut danum conon paluh mehen hia pomimpin pesta.” Jadi, iroh nguan iyoh.

9Pomimpin pesta cioh nongkomo danum co ocop borubah jarin angur. (Are aroko monau ingkan omoh angur cioh, tapi kawan polayan co monu danum taiyoh ocop monau.) Pomimpin pesta cioh naah ponganten bakah, 10paluh mantun ma are. Hieeh, “Biasaeh dulun meleh soun matang angur co poko pio. Amun kawan tamu ocop sumpu ngorih, hanyar bat dulun matang angur co biasa. Tapi iko mika angur co poko pio dapot makitu!”

11Yesus nguan aang co mosotahir yoh nyan lowu Kana nyan propinsi Galilea. Cioh co portama ingkan kokon ciri co porahan ome Are sobujur eh. Ma ciri cioh, Yesus porahan korinah lau kuasai-Eh. Maka, kawan murid-Eh porocaya ma-Eh.

Yesus ngomuho kawan podagang ingkan polontaran Lopo Mohotara

2:12-25

(Mat. 21:12-13; Mrk. 11:15-17; Luk. 19:45-46)

12Opah iyoh, Yesus tulak mahah kota Kapernaum homboh-homboh ma tinai-Eh, kawan konduang-Eh hintang kawan murid-Eh. Iroh nukui nyan idi baya pira-pira ondo leh. 13Kotika ondo raya paskah dulun Yahudi ocop jonyo,#2:13 Dulun Yahudi hopingat jaman sinan hiah iroh tomombebas ingkan tohocipon nyan Mesir. Mohotara mohukum dulun Mesir, sika anak co pokongongko dulun Mesir matoi. Dapot kawan komolum doh ka, tapi dulun Israel tonyalamat. Yesus tulak hia Yerusalem.

14Nyan idi, Are noto oko kawan podagang nyan polontaran Lopo Mohotara! Oko co hoborakang sapi, domba, beleu merpati. Oko ka kawan tukang nosuloi duit co tuot nyan intin.#2:14 Pasar cotuh posutir kawan dulun co dombut ingkan ocu ika moli komolum ika porsembahan. Tapi pasar cioh sobulih eh tonguan nyan ika co bokon. Bokon ma onon, iroh sobulih nosuloi duit awi baya boraoi hapo duit husus indan Lopo Mohotara. Dulun co tukang nosuloi duit yoh derek curang ka. 15Jadi, Are nguan ico cambuk ingkan tali holuh ngomuho kokon doh yoh ingkan Lopo Mohotara, tomasuk kokon domba hintang sapi doh. Are mahi nobalik kawan meja co hapan kawan tukang nosuloi duit. Dapot, duit doh ngonyawu hantin hanoh. 16Are mahi mantun ma kawan dulun co hoborakang beleu merpati yoh. Hie-Eh, “Mehen pusit kokon beleu tatuh. Aroh umpi Lopo Tamang-Kuh jarin lopo ika bodagang!” 17Poristiwa cioh umpi kawan murid Yesus topingkat antun cotuh co tonulih nyan Surat Borasih: “Akuh korinah cinta Lopo-Mu, Iyoh Mohotara. Tapi tului onon, Akuh angar tomohancur.”#2:17 Antun ingkan buku Masmur 69:10 tuh iyohco antun Laca Co Tomonjanji Mohotara. Artieh, Yesus ngomuho kokon podagang taiyoh tului are korinah cinta Lopo Mohotara. Tapi, tului alogawi cioh, oko dulun co molai dolee Are dapot ahir eh umpi kewak ika ngompatoi Are.

18 Kawan pomimpin agama Yahudi co oko nyan intin monentang Yesus. Hien doh, “Mombukti bat bahawa Iko oko hak ika nguan aang isan co punan Iko umpi non. Suwah Iko nguan aang co mosotahir ina oko ciri indan kaih!”

19Yesus museh, “Ngehak ngekah Lopo Mohotara cotuh. Paluh, ponah tolu ondo, Akuh angar mangun eh hopuli.”

20Hien doh ma-Eh, “Lopo Mohotara cotuh tomangun kotahin opat pulu onom toun! Moh bodai Iko lian mangun eh hopuli ponah tolu ondo?” 21Tapi Yesus aroko bomaksut Lopo Mohotara cioh. Ma antun ‘Lopo Mohotara’, Are bomaksut beti-Eh tarop. 22Kawan murid-Eh topingkat antun-Eh yoh opah Are bolum hopuli ingkan pompatoi. Maka, iroh porocaya ma kokon antun co tonulih nyan Surat Borasih hintang ma kokon antun Yesus.

23Kotahin Pesta Paskah yoh tomoraya, Yesus oko nyan Yerusalem. Are umpi kawan aang co mosotahir sobagai ciri co porahan ome Are sobujur eh. Jadi, orong dulun porocaya ponah Arai-Eh awi iroh noto kawan aang co mosotahir tongompiai-Eh yoh. 24Tapi Yesus leh aroko porocaya ma iroh, awi Are monau ome co oko nyan ponah atoi doh. 25Are aroko porulu ico beti ika mara ma-Eh tintun kolunon, awi Are ocop monau uras co oko nyan ponah atoi kolunon.

Atualmente Selecionado:

Yohanes 2: TBSS

Destaque

Copiar