MARKUS 2

Yeso yǝ Roɓ Sirsǝ ra Ete ra

1Ndiira tǝrsǝ ngeek wa, Yeso yǝ ɓaarǝ yǝ kang Kafarnahum, pa ɓeta ɓǝ kura me yǝ won ɗuuru. 2Ɓeta ɓǝ kwau dem hana handa pee a inntii ra. Yeso yǝn nkee ɓǝ mara Kaa ra. 3Pa ɓaataka wosǝsǝ ma yaake natsa sǝrsǝ, ɓeta kurun ɓǝ toosǝsǝ wa. 4Pa ɓǝ nkaa ɓa sa wo a wii Yeso wa ra; me ɓeta her kwang, pa ɓǝ taa ɓǝ will para hito ra ngwang ma ham Yeso yǝsǝ ɓa. Pa ɓǝ tung eɗ kaya ma ɗikra ira nsaad a wii Yeso wa. 5Pa Yeso yǝ wǝrsǝ na ɓongtǝrato ɓoso wa, yǝ nkee yaa sǝrsǝ siya me, “Auwe, ɓaa lee ngǝ tentenato nwaagon.”

6Pa ɓaata malǝmaa Masakasa ɓǝ ɗa kǝnso, ɓǝn sensen a kuti ɓose, 7ɓǝn nkee me, “Tomtom ni eɗ ɗa yǝn kansǝ maasou? Yǝn kan mbu kwalakwala ɓa a ɗuura Kaa ra! Ən yamni yǝsǝ ma kwangto kiyaa lee tentenato, meen Kaa fin mbusa rau?”

8Nok kǝnso Yeso yǝ maan a kuɗa ira, mbu ɓǝn sensǝ a kuti ɓose ɓan, pa yǝ ɓǝ nkee me, “Mbu kwa mbi sǝn sensǝ mbusǝsa maasou? 9Ən u na nwa faɗsǝ papato, a nkee yaa sǝrsǝ ya me, ‘Ɓaa lee ngǝ tentenato nwaagon’ hana a nkee me, ‘A nii ngǝ too ɗikra nga ngǝ sikiu’? 10Pa kǝnǝsǝ weɗa me, Au Ete ya, yǝ ma kwangto kiya lee tentenato a put ntaandi wa ɓa,” 11“Pa yǝ nkee yaa natsa sǝrsǝ siya me, “A nii, ngǝ too ɗikra nga ngǝ faɗ ɗuuru.” 12Pa yǝ nii, yǝ too ɗikra ira, yǝ fiɗi yǝ siki a wii nuunwa ɓosa nsaad. Nwa a tom ɓǝ weɗara ɓa hana nyamni, pa ɓǝ nyoo Kaa, ɓǝn nkee me, “Ndǝ pǝta wǝr mbuka maaso hunda.”

Yeso yǝ yar Lawi

13Yeso pa ya piɗ ɗǝm yǝ ko a kira aulaara Galili ra. Ɓeta dem ɓǝ kwau a sani yǝ ɓǝ ntii fǝɗko. 14Yǝn talǝsǝn talǝ wa, pa yǝ wǝr Lawi au Halfa ya, yǝ ɗa a ham kon samra ɓa. Pa Yeso yaa nkee me, “Ənǝ ɓǝɗǝ,” pa Lawi yǝ nii yaa ɓǝɗǝ. 15Pa Yeso yǝn sesǝ mbuseyan se a ɗuur Lawi wa, ɓan kon samra ɓa dem, ma “ɓan ma tentenato ɓa” ɓǝn se mbuseyaa ke ma sase, ma emfǝɗkaa ɓisa, me ka ɓaata kǝn dem u ɓǝ ɓǝɗsǝsǝ wa. 16Pa malǝmaa Masakasa ma ɓaa Farisiyawa ɓa, ɓǝ wǝrsǝ yǝn se mbuseyaa ke ma ‘ɓan ma tentenato ɓa’ ma ɓan kon samra ɓa, pa ɓǝ taa emfǝɗkaa ɓisa, ɓǝ nkee me, “Tomtomni yǝn sesǝ mbuseyaa ma ɓan kon samra ɓa, ma ‘ɓan ma tentenato ɓau’?” 17Pa Yeso yǝ kurasǝ maso wa, yǝɓǝ nkee me, “Ɓaa ɓǝsǝ kwakwa ɓa, ɓǝ taa siwi ra, pa ɓaa sem kwakwa ra ɓa, ɓǝn taa ɓosa. Niina nǝ wo me nǝ yar ɓaa ɓǝn tomsǝ mbu keke a wiiyo a Kaa ni ɓa ra, pa nǝ wo me ɓaa ɓǝsǝ ma tentenato ɓa.”

Ɓaa taa Yeso a ɗuura kolmbara wa

18Pa waso emfǝɗkaa Yohanna an tom baptisma ya ma u ɓaa Farisiyawa ɓa ɓǝn kwal mbraa. Pa ɓaataka ɓǝ wo ɓǝ taa Yeso me, “Tomtomni emfǝɗkaa Yohanna an tom baptisma ma u Farisiyawa ɓa ɓǝn kwal mbraa, pa nwaango ɓǝ tomaa rau?” 19Pa Yeso yǝ ɓǝ kak me, “Kǝ tomtomni sik kere ɓa ɓǝkaa kwal mbraa, si kere yǝ ke ma ɓosau? Ɓǝ nkaa ra, me kere yǝ ke ma ɓosa. 20Pa fer usu kǝ wo, a fer ɓaa ka too kere ǝɓǝ lee wa. Pa a kaa sǝsa ɓǝkaa kwal mbraa wa.”

21“Yaake sem kǝn kiya mɓoɓ meera luktu ra ma u nfiinfii wa ra, me yǝ tom maaso nfiinfii ra sǝra kiya nkaa meera sǝra a faɗ u ntiiri wa. 22Yaake sem kǝn kiya mbaɗ mbraa nfiinfii emngwate inabi ma a meeta mɓukta wa ra. Me yǝ tom maaso, mbraa emngwate inabi ma kǝ pam mɓukta sǝta, ɗǝm nsaad mbraa emngwate inabi ma, ma mɓukta sǝta kǝ tǝblǝ. Pa yǝ tom maaso ra, pa yǝ mbaɗ mbraa nfiinfii emngwate inabi ma a mɓukta nfiinfii ta.”

Ankundi kaa nwiiya Yahudawa ɓa

23A kaa nwiiya Yahudawa ɓa, Yeso ma emfǝɗkaa ɓisa ɓǝn talǝntalǝ ma lau nyaanyo muuma wa, pa emfǝɗkaa ɓisa ɓǝ ntii kau ɗuuti muuma wa. 24Pa ɓaa Farisiyawa ɓa ɓǝ wǝrsǝ maaso wa, ɓaa nkee me, “A sengge! Tomtomni ɓǝn tomsǝ mbu pam me kama a tom a kaa nwiinya Yahudawa ɓa rau?”

25Yǝ kak me, “Sǝ pǝta kauwo mbu Dauda yǝ tomsǝ a fer sase ma sik ɓisa ɓǝ kurasǝ ɗoora wa rau? 26Fer Abiyatar yǝsǝ kuɓ kwang nek mbusa ya wa, yǝ kana hit Kaa wa, yǝ kǝu nkaadǝng ɗekɗek wa, u pamsǝ me kuɓsa nek mbusa sa seɗɗe ɓǝkaa kǝu wa. Pa yǝ na pera sik ɓisa.” 27Pa Yeso yǝɓǝ nkee me, “Ɓaa tom kaa nwiiya Yahudawa ɓa me ɓeta ra, ɓa tom ɓeta me kaa nwiiya Yahudawa ɓa. 28Me maaso, Au Ete ya ǝn sase Ankundi, hana u kaa nwiinya Yahudawa ɓa wa.”

Atualmente Selecionado:

MARKUS 2: LLA

Destaque

Copiar