ဒေါ ဂုဝ် 9
9
လွင် ဇဝ်ဖြာ ဒွါ ကာဒိက် ဆတ်ဇာ ဒီ အာနုဝ်
1ဇဝ်ဖြာ ဟဲ့ ဟွတ့် ခြာမ် ခဲင် နဝ်း အန် ပါယ် တီ အန် ဝီ မွင့်ကာရာ ဒွါ ဒီ အာနုဝ် ဂေ ဂွန် အီမာယ် အန်။ အန် တဝ်း၊ “တဲး ဘေ ဘြဲ၊ တဲး ဘေ ကိူန်၊ တဲး အာမျုဝ် ဘေ ကော နုဝ့် ဒဲင် ကာဒါယ်။ 2ဂေ ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ ဘော မာဆိမ် အီ ကွယ် ခဲင် ဘ့လေန့် ဘော မာဂါ အီ ကွယ် ခဲင် အိုမ်၊ ဂေ ဘောကာဂ့လျီတ် လုဝ် ယုဝ် ဘေ ဒူအီ။ အုဝ် ဟဲ့ တဲး ဘေ အိုပ် ဂေ။ 3ဘေ ပွိုန် ဟူမ် ဒုဝ် ဆတ်ဒါဝါ အီ အိမ်၊ အီ ပွိုန် ဟာဝ် ဒွန် မျုဝ်။ အုဝ် ဒွါ တူတ့် ဒီ ဘေ၊ တဲး ဘေ ဟူမ်၊ တဲး န့ ပီ ဘေ ဒွိုမ် ဟူမ် ဒဝ် အီ လတ့် ဘဲန် မျုဝ် ဘဲန် မျုဝ်။
4ဆေ ဘေ ယီ ဟူမ် ယင် ဂေ ဒုဝ် ဆတ်ဒါဝါ၊ ဘေ လုဝ် တဲး နှာမ် အီ ကွယ် ခဲင် ဒုဝ် အန် လေး တူတ့် ဒီ အာတ့်။ နှာမ် အန် တီ မုး အာဆာက် အီ ကွယ် ခဲင် ဒုဝ် ဘူင့်။ ခုဝ်၊ ဘေ တူ ပွိုန် ဟူမ်။ 5ဆေ အူ ဝီ ငဝ်း အာဆာက် အီ၊ အုဝ် ဒီ ဒမ် မှာပ် ဒီ အန်။ ဆေ ဒုဝ် ဆတ်ဒါဝါ ငဝ်း အာဆာက် ဒူအီ၊ အုဝ် ဒီ ဝီ ဒိုဝ်း အာဆာက် ဒုဝ် ဆတ် တီ။
6အာဆေ ငဝ်း ယမ် ဒူအီ၊ အုဝ် ဒီ ဝီ တဲး ပေါ အူ ဝီ ဝီ ငဝ်း ယမ် အန်။ ခုဝ်၊ ဇဝ်ဖြာ ဟဲ့ ဘူင် ဒူအီ၊ တဲး ဂေ ပီ ဇဝ်ဖြာ။ အာဝ် ပွိုန် ငဝ်း အာဆာက် ဂေ။
7အီ မုး ဘေ၊ ဘေ ဝီ လုဝ် ဘြဲ ကိူန် ဒဲင် ကာဒါယ် တဲး ဘေ ကော နုဝ့် ဒဲင် ကာဒါယ်၊ တဲး ဘေ ဘော အိုပ် ကာဒါယ်။”
8ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အန် ဝီ တဝ်း ဒီ အာနုဝ် ဂေ ဂွန် အီမာယ် အန်၊ 9“အုဝ် ဒီ ဒွါ ကာဒိက် ဆတ်ဇာ ဒီ ဘေ။ ဘော ဘေ၊ ဘော လှုက်လှာန် ဘေ၊ 10ဘော ဂေ ဒုဝ် ဆတ်ဒါဝါ အီ ကွယ် ရိုမ် ဒူပ် ဘေ ဘောကာဂ့လျီတ်၊ ဘော မာဆိမ် အီ ဘိုန့် ခဲင် ဘ့လေန့်၊ ဘော ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ ဂေ ဒွန် ဒုဝ် အီ ဟဲ့ လေး ခဲင် ရိုဝ် ဆင်ဖုဝ်၊ အုဝ် ဒီ ဒွါ ကာဒိက် ဆတ်ဇာ ဒီ ဂေ။ 11အုဝ် အာဝ် ဟူ တဲး အိုမ် တာင် ပုန် ကာဒါယ် ဘော ပျာတ့် ဝဲန် မျုဝ် အီ မိုဝ်း အာဆာက် ဒွန် မျုဝ်။ အုဝ် ဟူ တဲး အိုမ် တာင် တး ပုန် ယမ် တူတ့်။ ဘော ကာဒါယ် ဘော မျုဝ် အီ ကွယ် ဒဲင် ကာဒါယ်၊ အုဝ် တူ တဲး န့ ဝီ လိုဝ် ဒေါ မှဝ်။”
12ဟဲ့ ဟွတ့် ဇဝ်ဖြာ ဝီ တဝ်း၊ “အုဝ် ဒီ ဝီ ဒွါ လက်ဆာနာ ဒီ ဘေ၊ တဲး ဘေ လှုဝ်း လွင် ကာဒိက် ဆတ်ဇာ ပဲ့ ဟဲ့ ဒွါ အုဝ် ဒီ ဘေ။ ဘော အီ မိုဝ်း ဖွိုမ် ဒွန် မျုဝ်၊ ဘော ဘေ ဘော လှုက်လှာန် ဘေ ဒွန် ဇိုဝ် ဒွန် ခြိုဝ်၊ တဲး ဘေ နပ် လွင် ကာဒိက် ဆတ်ဇာ ပီ ဒွါ အုဝ် တီ။ 13အုဝ် ဒီ ဘ့လေး ခုန်မာယဲင် ခဲင် ဘ့လေန့်။ ခုန်မာယဲင် တီ ဟဲ့ ဘဲန် လက်ဆာနာ ပီ ဒွါ အုဝ် ဒီ ဘေ။ 14ဆေ အုဝ် ဒီ တဲး န့အု ကွယ် ခဲင် ဘ့လေန့်၊ ဝါယ် အန် တီ၊ ဆေ ဘေ ဝီ ယိုဝ် ခုန်မာယဲင် ကွယ် ခဲင် ဘ့လေန့်၊ 15အုဝ် ဒီ လှုဝ်း ကာဒိက် ဆတ်ဇာ ပီ ဒွါ အုဝ် ဒီ ဘေ၊ ဘော ဒီ မျုဝ် အီ မိုဝ်း ဖွိုမ် ဒွန် မျုဝ်။ အုဝ် ဟဲ့ ဒွိုမ် တဝ်း၊ ဂ့လာယ် တူ ဝီ ဘဲန် အိုမ် တာင် အီ ဒီ ပုန် ယမ် တူတ့် ဒွန် မျုဝ်။ 16ဆေ ဘေ ယိုဝ် ခုန်မာယဲင် ခဲင် ဘ့လေန့်၊ အုဝ် ဒီ ယွတ် အန်။ အုဝ် ဒီ လှုဝ်း ပီ တဝ်း အုဝ် ဒီ ဘေ ဒေါ တီ နီ ဘော ပီ ဒွါ အုဝ် ကာဒိက် ဆတ်ဇာ ဒီ ဂေ လှုက်လှာန် ဘေ၊ အီ ဒီ ကွယ် ဒဲင် ကာဒါယ် နီ။ အုဝ် ဒီ လှုဝ်း လွင် အန် တီ ဆေဆေ။”
17ဇဝ်ဖြာ တဝ်း ဒီ အာနုဝ်၊ “ခုန်မာယဲင် တီ မုး လက်ဆာနာ ပီ ဒွါ အုဝ် ဒီ ဘေ။ ဘော ဘေ ဘော ဂေ အီ မိုဝ်း အာဆာက် ဒွန် မျုဝ်၊ တဲး ဘေ လှုဝ်း ဆေဆေ။”
လွင် ဂေ ဂွန် အာနုဝ်
18ဂေ ဂွန် အီမာယ် အာနုဝ် တွိုန်၊ ဂေ အီ လေး ခဲင် ရိုဝ် ဆင်ဖုဝ် တာင် တွိုန်၊ ဂေ စိူဝ် အာဆေမ်၊ အာဟာမ် ဘော အာယာဖေတ်။ အာဟာမ် ယီ မုး ဂုန့် အာကာနန့်။ 19ဒူအီ ဒွန် အီ အီ ကွယ် ဒဲင် ကာဒါယ် နီ၊ ဂေ ဒွန် အီ မုး လှုက်လှာန် အီ တး ဒီ အူယ် ဝီ တီ။
20အာနုဝ် တွိုန် ယီ ဘူင် နာ၊ ဘူင် မာန်။ ဝါယ် ဟဲ့ လေး ခဲင် ရိုဝ် တွိုန်၊ အန် ဝီ ဆမ် ဟေ မာငုန် ဒီ မာန် အန်။ 21အန် ဘော ဒျီင် အိုမ် မာငုန်၊ တဲး အန် ကော ယိုတ့်။ အန် ဝီ ဟာဝ် အိတ် ခဲင် ထိုပ် ဘိက် အန်၊ တူ စှိုပ် ခြိုင် အန်။ 22န့ ယီ မုး အာဟာမ်၊ ဂုန့် အာကာနန့်၊ အန် ဘော ယိုဝ် ဂုန့် အန် အိတ် ပါယ် တီ။ အန် ဝီ ဟာဝ် ကာလာင် ဒီ အီကတ် အန်။
23အာဆေမ် ဂါယ် အာယာဖေတ် ဝီ ဒိုဝ်း ခြိုင် ဂုန့် ဂါယ်၊ ဘ့လေး ဒီ ယ ဂါယ်၊ ဝီ ထိူတ် ဝိဝ် နာ ပန် ဒေါ လိုပ် ဂါယ် ခဲင် ထိုပ် ဘိက်၊ ကွဲ့ တဲး ဂါယ် ယိုဝ် ဂုန့် ဂါယ် ဟဲ့ ဂ့လ၊ တဲး ဂါယ် ကာဘိတ် ဒုဝ် အန်။
24ဝါယ် အန် တီ ဒါ အာနုဝ် ဝီ န့ဆိုဝ်း အာဝ် ဟူ ယိုတ့်။ အန် ဘော နပ် မာဆေ ပီ ဘူင် ဂွန် ဝီ တျီ့ ဒီ အန်။ 25အန် မိူဝ် တဝ်း၊
“အုဝ် ဒိူင် အာကာနန့် တွိုန် အီ မုး ဂွန် အာဟာမ်။ အီကတ် အန် ဒီ ဝီ စ်ု အန်၊ တဲး အန် ဘဲန် မှာယ် ဂေ။”
26ဟဲ့ ဟွတ့် အာနုဝ် ဝီ တဝ်း၊ “အုဝ် အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် အာဆေမ်။ အာကာနန့် ယီ ဘဲန် မှာယ် အန်။
27ဇဝ်ဖြာ မိူဝ် တဲး အာယာဖေတ် မိုဝ်း မာန် မိူင် ကိူန်၊ တဲး အန် ဘော ကွယ် ခဲင် ထိုပ် ဘိက် အီကတ် အန် အီ စိူဝ် အာဆေမ်။ တဲး အာကာနန့် ယီ ဘဲန် မှာယ် အန်။”
28ဝါယ် အိုမ် တာင် တွိုန် ဟဲ့ ဟွတ့် ပုန် ကာဒါယ်၊ အာနုဝ် တွိုန် ဝီ ကွယ် ပေါ အူယ် မာ ယဝ်း ဒီ ဖန် ဂိုဝ် ဆီနမ်။
29အာဆာက် အာနုဝ် တွိုန် ယီ နုဝ့် ဒိမ် မာယဝ်း ဒီ ဖန် ဂိုဝ် ဆီနမ်။ ဟဲ့ ဟွတ့် အန် ဘော ယမ်။
Atualmente Selecionado:
ဒေါ ဂုဝ် 9: pce
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023, Wycliffe Bible Translators, Inc. All rights reserved.
