मत्ती 12

येसु शब्बाथोन परमेश्वर

(मरकुस 2:23-28; लुका 6:1-5)

1तिने टेमे येसु शब्बाथोन दाहळे खेतोमा गोथू जातु होतु, एने तेरा चेला काजे भूक लागी ती चे कोनसे भांगी-भांगीन खाणे बाज गोया. 2फरुशी यो देखीन तिना काजे कोयू, “देख, तारा चेला चो काम कोर रोया, जो शब्बाथोन दाहळे कोरनो वारू नी होय.” 3चू तीनाक कोयू “काय तुमु नी वाच्या, कि राजा दाऊद जेतार चू एने तेरा साती भूकला होता ती काय कोऱ्या.” 4चू कोसु परमेश्वरोन मंदीरमा गोयू, एने भेटोन रुटा खादु, जीनुक खाणो नी नि ते तीनाक एने नि ते तेरा दुस्तीदार काजे, बाकीन निसता पुजारा काजे खोरलो होतो? 5एने काय तुमु शास्त्रामा नि भोन्या कि पुजारू शब्बाथोन दाहळे मंदीरमा शब्बाथोन दाहळान रिती काजे बी भुंड कोरे ती चे बी निरदोष गीनायतेला? 6बाकीन मे तुमु काजे कोयो कि या चू छे जू मंदीर गोथू बी मोटू छे. 7ओगर तुमु एरो मतलब जानतेला, मे दयासी खुश होयतलु, बलिदान सी नि, ती तुमु निरदोष काजे दोषी नि ठेरावता. 8माणसोन पुऱ्यु ते शब्बाथोन दाहळान बी प्रभू छे.

सुकला हात वावाक वारू कोरनो

(मरकुस 3:1-6; लुका 6:6-11)

9चा गोथू चालीन चू तिंदरा प्रार्थना घोरमा आव्यु. 10चा एक माणूस होतु, जेरु हात सुकलु होतु, चे येसु पोर गुणू लागाळनेन कोरता तीनाक पुछ्या “काय शब्बाथोन दाहळे वारू कोरनो खोरलो छे.” 11चू तीनुक कोयू, “तुमरेमा ओसू कून छे जेरो एकुत गाडरो होसे, एने चो शब्बाथोन दाहळे खाडामा पोळ जाय, ती चू तीनाक धोरीन नी नीकावे, 12वारला माणसोन मुल गाडरा गोथो बोढीन छे! इनान कोरता शब्बाथोन दाहळे भोलाई कोरनो खोरलो छे.” 13तेत्यार चू तिना माणसो काजे कोयू, “आपनु हात ओगो कोर” चू ओगु कोऱ्यु एने चू पोछु दिसरा हातो सारखू वारू होय गोयू. 14तेत्यार फरुशी बारथे जायीन तेरा खिलापमा एकी कोऱ्या कि तीनाक काहना रितीसी मारजे.

परमेश्वरोन नेवाळलु सेवक

15यो जानीन येसु चा गोथू जात रोयू एने घोणा सोवटा माणसे तेरे पोछोव चाल पोळ्या, एने चू आखा काजे वारू कोऱ्यु, 16एने तीनु काजे जोताळ्यु कि मेसेक सामने मा लावू, 17काहाकि यो वचन यशयाह भविष्य कोरतान लारे कोवायलो होतो, पुरो होयो.

18“देखू, यु मारू सेवक छे, जिनाक मे नेवाळलु छे, मारू मोंगावू, जीनासी मे खुश छे मे मारी आत्मा तीना काजे आपीस, एने चू दिसरा जातीन नियावोन वारली खोबर कोयसे.”

19“एने चू नि झोगळू कोरे, एने नि धूम कोरे, नि हाटोमा कुदु तेरु आवाज सोमवे.”

20चू छोंदायला सुटा काजे नि भागे, एने धुवाळू निकवने वावी दिवा काजे नि उलवे, जेतार तोक चू नियाव काजे प्रबळ नि कोरे.

21एने दिसरा जातीन तेरेम वावा आस कोरसे.

येसु एने भुंडली आत्मान अगवू

22तेत्यार माणसे एक आंदवा-गुंगा काजे जीनामा भुंडली आत्मा होती, तेरेनचा लाव्या, एने चू तीनाक वारू कोऱ्यु, एने चू बुलने एने देखणे बाज गोयू. 23इनापोरसी आखा माणसे वाहारायीन कोयने बाज गोया, “यु काय दाऊदन पुऱ्यु छे?” 24बाकीन फरुशी यो सोमवीन कोया, “यु ते भुंडली आत्मान सरदार, भुतडान मदत विगुर भुंडली आत्मा काजे नि निकावतलु”. 25चू तिंदरा मोनोन विचार जानीन तीनु काजे कोयू, “जिना काहना राजमा फुट पोळे ती, चो उजाळ होय जातलो; एने एक सोहोरोमा नीती घोरोमा फुट पोळतेली, टेकिन नि रोये.” 26एने भुतडूत भुतडा काजे निकावे, ती चू आपनात खिलापमा होय जासे; ओवते तेरो राज कोसो टेकिन रोयसे? 27एने, ओगर मी भुतडान मदतसी भुंडली आत्मा काजे निकावतलु, ती तुमरा पुऱ्या कुनीन मदतसी निकवली? इनान कोरता चेत तुमरू न्याय कोरसे. 28बाकीन ओगर मे परमेश्वरोन साहायतासी भुंडली आत्मा काजे निकावतलु, ती परमेश्वरोन राज तुमरेनचा आव लागलो छे. 29नीती कोसू काहनु माणूस कुदान ताकत वावान घोरमा भोरायीन तेरु माल लुट सोकतेलू जेतार तोक कि पेहले चू तिना ताकत वावा काजे नि बांध लेये? तेत्यार चू तेरो घोर लुट लेसे. 30जू मारे साते नि होय चू मारा खिलापमा छे, एने जू मारे साते नि होय चू टूवू नि कोरतेलू बाकीन चू वेरवी देतलू. 31इनान कोरता मी तुमु काजे कोयो कि माणसोन आखा भातीन पाप एने बुराईन माफी कोराय जासे? बाकीन जू कुदू चुखली आत्मान बुराई कोरसे तेरी माफी नि होय. 32जू कुदू माणसोन पुऱ्यान खिलापमा काहीन वात कोयसे, तेरु यु गुणू माफ कोराय जासे, बाकीन जू कुदू पवित्र आत्मान खिलापमा काहीन कोयसे, तेरा गुणान नि ते इना संसार एने नि ते तिना आवने वावा संसारमा माफ कोरायसे.

झाड एने तेरो फोव

(लुका 6:43-45)

33“ओगर झाडोक वारलो कोये, ती तेरा फोव काजे वारला कोयू, नि ती रिकामो कोयू, काहाकि झाड आपना फोव सी उखाये.” 34“हे घोळसान पीला, तुमु भुंडला होयीन बी कोसा वारलो वाते कोय सोकतला? काहाकि जो मोनोमा भोरलो छे, चोत मुयोमा आव लागतेलो.” 35वारलु माणूस मोनोन वारलो भोंडारमा गोथू वारली वाते निकावतलु. 36एने तुमु काजे कोयो कि जे-जे रिकामा वाते माणसे कोयसे, नियावोन दाहळे हर एक तिनी वातोन हिसाब आपसे. 37काहाकि तू आपनी वातोन वोजेसी निरदोष एने आपनी वातोन वोजेसीच गुणावू ठेराय जाश.

येसु जू चिन्हान मांग

(मरकुस 8:11-12; लुका 11:29-32)

38इनापोरसी काहना शास्त्री एने फरुशी तीनाक कोया, “हे गुरु, आमु तारे जुवू एक निशाणी देखणेन कोर रोया.” 39चू तीनुक जोवाब आप्यू, “इनी कोवीन भुंडा एने व्यभिचारोन माणसे निशाणी हेरतेला, बाकीन योना भविष्य कोरतान निशाणी काजे छुळीन कानली ओवी निशाणी नि आपाये”. 40योना तीन रात तीन दाहळा माछान पेटोमा रोयू, तोसुच माणसोन पुऱ्यु तीन रात तीन दाहळा धोरतीन माहिय रोयसे. 41नीनवेन माणसे नियावोन दाहळे इनी कोवीन माणसो पुठी उठीन तीनुक गुणावा ठेरावसे, काहाकि चे योनान प्रचार सोमवीन बी मोन नि फिराव्या; एने देखू, या चू छे जू योना गोथू बी मोटू छे, 42दक्षिणोन राणी न्यायोन दाहळे इनी कोवीन माणसो पुठी उठीन तीनुक गुणावा ठेरावसे काहाकि ची सुलेमानोन राजान ग्यान देखनेन कोरता धोरतीन इने धोळे गोथी पोरले धोळे आवी; एने देखू, या चू छे जू शलमोनोन गोथू बी मोटू छे.

भुंडली आत्मान हेरे

(लुका 11:24-26)

43“जेतार भुंडली आत्मा माणसोमा गोथी निकवी जातली, ती सुखोन जागामा आराम हेरतली एने तिनीक नि जोळतली. 44तेत्यार ची कोयतली छे, मे मारा जिना घोरमा मे आवली होती, तीना घोरमा पोछि जाती रोयीस, एने जेतार ची पोछि आवतेली छे ती ठारलो, झाडलो बाहारलो सजाडलो देखतली छे. 45तेत्यार चू जायीन तेर गोथी सात भुंडली आत्मा काजे तेरे साते लीन आवतेली, एने चे चा वास कोरे एने तिना माणसोन पेहली दशासी पोछली दशा जादा भुंडी होय जातली छे. इनी कोवीन भुंडला माणसोन हालत बी ओसीत होयसे.”

येसुन खोरलो परिवार

(मरकुस 3:31-35; लुका 8:19-21)

46जेतार चू भीळमा वाते कोरणे बाज रोयू होतु, तेत्यार तेरी आया एने भाश बारथे उभरोय रोया होता, एने तीना पुठी वाते कोरनेन कोर रोया होता. 47कुदु तरी येसु काजे कोयू, “देख, तारी आया एने तारू भाश बारथे उभरोय रोया, एने तारे पुठी वाते कोरनेन कोर रोया.” 48यो सोमवीन तीनाक कोयने वावाक जोवाब आप्यू, “कून छे मारी आया? एने भाश?” 49एने तेरा चेला वोखे तेरु हात ओगु कोरीन, कोयू “देखू, मारी आश एने भाशे ये छे, 50काहाकि जो कुदु मारा सोरगोन बासोन मोर्जी पोर चाले, चेत मारा भाशे एने बहोनिशा, एने मारी आया छे.”

Atualmente Selecionado:

मत्ती 12: BFBNT

Destaque

Copiar