मट्टि 10
10
सॆःक्ढुङ्पाचिम् योम्पक्
(मारकुस ३:१३-१९; लुका ६:१२-१६; ९:२-६)
1हाङ् येसुऎ खोम् एपङ्हि टिङ्खुबाचि खोबि सेःरुचिहाङ् खारिॽमाङ्चि यिक्मॆ हाङ् चोब्न टुक्मावाऎ लाप्भुङ्पा याॽमिचि नुबक्मिॽमॆ ढुप्पाट्ट पिट्टुचि।
2एपङ्हि सॆःक्ढुङ्पाचिम् निङ् इघान यो, चोब्बाङ् याॽल सिमोन खो पाट्रुस लोयुक्सुचि हाङ् खोम् नुसा आन्डेरेयास, जाब्डियामि पासा याकुब हाङ् उम् नुसा युहान्ना, 3फिलिप हाङ् बारठोलोमाइ, ठोमा हाङ् यावॆङ्ग खोम्खुबा मट्टि, आल्फायासमि पासा याकुब हाङ् ठेडियास, 4हाङ्टेम् नेन्चा सिमोन हाङ् येसु लाप्मिखुबा याहुडा इस्कारियोट। खोसॆ डॆङ्पि येसु बङ्सिटु।
5येसुऎ आक्खा एपङहि टिङ्खुबाचि गर कामानुङ् पाङ्हाङ्सुचि, “आन्ना होइडा हॆॽनिबारेक्चिम् लुम्पि हाङ् सामारिचिम् हाटा फेरा आखारानॆ। 6टर माखॆम्पा सामुङ् रहा इस्राएलिचिम् लुम्पि खारानॆ। 7हाङ् ‘निवाँहाङ्मि हाङ्डाम् मुबिॽन चु’ कामानुङ् खेम्मिटाम्चिनॆ। 8टुक्खाचि नुबक्मिट्टाम्नॆ, सिखॆम्पाचि हिङ्पक्मिट्टाम्चिनॆ, साखक्मि टुक्खाचि नुबक्मिट्टाम्चिनॆ हाङ् खारिॽमाङ्चि लाबकाम्नॆ। हाङ् आन्नॆ मरक्न टक्चाडाम्नि, आन्नॆ स मरक्न पिट्टाम्चिनॆ। 9आन्नामि हन्डङ्पि फिःइया, सिः हाङ् टाँबमि एक्क ढॆक्का याङ् स आखिनानॆ, 10मान्ठाभनॆ योम्पक् मुखुबॆ चामा ठका टक्चाकु। हाङ् लाम्फुबि पाबुक् कामानुङ् बॆक्खा, होइढा चे, सुःप्मारा हाङ् टोम्राङ् माङ्स आखिनानॆ।
11“आन्ना हाम्पिऎ हाटा हाङ् गाँवाँबि खॆकानि, आक्कबि आन्ना नुःर लॆखुबा याॽमि यगाम्नॆ हाङ् म ठाल मायाइलढारि आक्कुब्न पेनानॆ। 12आक्क खिम् हङ्सि भॆन्कानिर ग खिम्पि सान्टि लिर कामानुङ् लोसाम्चिनॆ। 13आक्क खिम्पिहाचिऎ सान्टि नेन्चाकुचि हाङ्ग, आक्क खिम्पि सान्टि लिर, टर नेन्चाउचिनि हाङ्ग आन्नामि सान्टि आन्नाब्न ऎन्टार। 14याॽमिचिऎ आन्ना नुःर मालॆटानि हाङ् आन्नाम् खानावाँ माखेमुचि हाङ्ग निवाँहाङ्मि न्यायॆ आन्नाबि सि कामानुङ् आम्नि लाङ्फॆॽमाबिऎ बाखा फाप्पिडाआम्नॆ हाङ् खाइटानॆ। 15चाइबान कॆ आन्ना लोकानि, निवाँहाङ्ऎ न्यायॆ लॆःॽमार आक्खाचिम् डुखा साडोम नुङ् गामोरामि बाङ्स ढ्या लि।
टामा परक्डॆ डुखामि खानावाँ
(मारकुस १३:९-१३; लुका २१:१२-१७)
16“खाङाम्नॆ, कॆ आन्ना ठाॽनाम् हुॽवाचिम् लुम्पि सामुङर पाङ्हाङ्मॆ पाइकानि। मसॆ आन्ना पुसॆःॽमाचिर चेन्टुबाङ् हाङ् उक्खिरिॽवा र आब्डिक् मॆड्डिङ्मा लिसानॆ। 17याॽमिचिबाङ् नुःर पेनानॆ, मान्ठाभनॆ खोचिऎ आन्ना न्यायॆ लॆठाम ठालबि टॆःॽमि हाङ् याहुडिचि खोम्ठाम् खिम्पि कोर्रा टिकानि। 18काङा निवाँयुङ् लॆःॽमिम्पासॆ खोचिऎ आन्ना टुङ्घङ्पा नुङ् हाङ्चिम् ङारिङ्पि येप्मिकानि। आक्रल आन्नॆ आक्खाचि हाङ् होइढा हॆॽनिबारेक्चि काम् बारेबि इकाम्नि। 19खोचिऎ आन्ना लाबुकानि, आक्रल आन्नॆ माङ् यामुमॆ हाङ् मान्टहाङ् यामुमॆ कामानुङ् निवाँ आफॆरानॆ, मान्ठाभनॆ माङ् याम्मा लॆऎ लोमॆ खानावाँ आक्रल चोब्न टक्चाकाम्नि। 20मान्ठाभनॆ आक्रल आन्ना टाङ्पा यामुसानिनि, टर आन्नामि निवाँहाङ् आपामि लावा आन्नाबाङ् यामुक्।
21“एक्क नुसाऎ होइक उम् बुबुनुसा सेॽमिकु। आक्रहाङ्न आपाऎ टाङ्पाम् पासा हाङ् पासॆ चाइ खोम् आपाआमाचि आब्डिक् टिकुचि हाङ् सेॽमिकुचि। हाङ् काङाबि निवाँयुङ् लॆःॽमिम्पासॆ आन्ना चोप्पसॆ सिच्चाक्मि। टर डॆङ्पिढारि निवाँयुङ् लॆखुबाचि चाइ हिङ्पःक्मि। 22आन्नॆ काङा निवाँयुङ् लॆःॽमिम्पासॆॽन चोब्पासॆ आन्ना सिच्चाकानि, टर डॆङ्पिढारि टाङ्पाम् निवाँयुङ् आमाइखुबा चाइ हिङ्चा। 23याॽमिचिऎ आन्ना खॆॽमिम्पा एक्क गाँवाँबि डुखा पिट्टामि हाङ्ग होइक गाँवाँबि खुरारानॆ। चाइबान कॆ आन्ना लोकानि, याॽमिमि पासा टामाबाङ् याॽलन आन्नॆ इस्राएलबिहा चोब्न गाँवाँ वाइसिम्पा लिसानिनि।
24“टिङ्खुबा चाइ हानाम्स चिन्खुबाबाङ् ढ्या लिनि हाङ् योम्पक् मुखुबा टाङ्पाम् टुङ्घङ्पाबाङ् ढ्या लिनि। 25टिङ्खुबा चाइ चिन्खुबा रक्न हाङ् योम्पक् मुखुबा चाइ टुङ्घङ्पा रक्न लिमॆ खानावाँन ढ्या यो। खोचिऎ खिम्पिऎ टुङ्घङ्पान टा बालाजिबुला#१०:२५ बालाजिबुला लोमिम्पा चाइ साइटान रेम। लोकुचि हाङ्ग खोम् खिम्पिहा याॽमिचि ऎॽवा लोकुचि हला।
आसानुङ् किसिमॆ?
(लुका १२:२-७)
26“मसॆ आक्खा याॽमिचि नुङ् आकिसिआनॆ, मान्ठाभनॆ डॆक्मिम्पा चोब्न खानावाँ बाहिरा लाबक् हाङ् चुम्मिम्पा चोब्न खानावाँ लेटक्। 27कॆ आन्ना चुम्मिम्पा खानावाँ चोप्पासॆ खेम्मे गारि लो हाङ् कॆ नाबाक्पि खुनिङ्म लोमिम्पा खानावाँ ढ्या साम्लाबि चोब्पासॆ खेमुचिर कामानुङ् इसाम्नॆ। 28आन्नामि सालुङ् टे सेॽमा हेखुबा, टर आन्नामि लावा माङ्स लॆःॽमा आहेखुबा याॽमिचि नुङ् आकिसिआनॆ, टर सालुङ् नुङ् लावा हिच्चिन नाराक्पि सेॽमा हेखुबा निवाँहाङ् नुङ् किसिआनॆ। 29माङ् एक्क मिःक्म ढॆक्का याङ्पिॽन हिच्चि बिरुम्मा इन्चाक् हॆॽनॆ? मरहाङ्स एक्क बिरुम्मा स आम्नि आपामि निवाँ मॆड्डिङ् सिखॆॽनि। 30हाङ् गरढारि रु, आन्नामि निङ्टवाँबिऎ चोब्न टाङाक् सङ्क ङेप्डा। 31मसॆ आकिसिआनॆ, आक्खा डिरिक् बिरुम्माबाङ्ग आन्ना एट्टान योम्पक् पिक्खुबा लॆकानि।
32“मसॆ आसॆ काङा याॽमिचिम् लुम्पि काम् पारभु ये कामानुङ् लोॽङामि, कॆस खो पारुबि चुऎ काम् आपामि ङारिङ्पि काम् याॽमि ये कामानुङ् लोकुङ। 33टर आसॆ चाइ काङा याॽमिचिम् लुम्पि निवाँयुङ् लॆःॽङानि, कॆ सङ्क खो काम् पारुबिऎ आपामि ङारिङ्पि लेङाचिनि लोकुङ्चि।
टिङ्खुबाऎ आङ्मा लॆऎ डुखा
(लुका १२:५१-५३; १४:२६-२७)
34“काङा बाखाटेम्पि सान्टि लाटॆसि टाडिङ् कामानुङ् आमिनानॆ, सान्टि लाटॆसि हॆॽनॆ, टर याॽमिचिम् लुम्पि फेया फॆस्सि टाडिङ। 35मान्ठाभनॆ काङा ग ठुप्पा चाइ उम्पा काइर लॆःॽमिसि, साम्सामा चाइ उम्मा काइर लॆःॽमिसि हाङ् नाम्मि चाइ नाम्मा काइर लॆःॽमिसि टाडिङ। 36हाङ् याॽमि काइर लॆखुबाचि खोम् टाङ्पाम् खिम्पिहा याॽमिचिन लिःक्मि।
37“आसॆ चाइ काङा बाङ्स खोम् आपा नुङ् आमा नाम्नाम् पिसिकु, खो काम् टिङ्खुबा लिहिनि। हाङ् आसॆ चाइ काङा बाङ्स टाङ्पाम् पासाचि नाम्नाम् पिसिकु आक्क स काम् टिङ्खुबा लिहिनि। 38हाङ् आसॆ चाइ टाङ्पामि कुरुसा खिन्मानुङ् काङा डॆङ्डॆङ् टिङ्ङानि, आक्क काम् टिङ्खुबा लिहिनि। 39हाङ् आसॆ चाइ टाङ्पाम् हिङ्खामा हिङ्चामिॽमा यगुक्, खोसॆ आक्क माइकु, टर आसॆ चाइ खोम् हिङ्खामा काम् लागि माइकु, खोसॆ म टक्चाकु।
टिङ्खुबाऎ टक्चामॆ नाम्याक्
(मारकुस ९:४१; लुका १०:१६)
40“आन्ना नुःर लॆखुबाऎ काङा नुःर लॆःॽङा हाङ् काङा नुःर लॆखुबाऎ काङा पाङ्हाङ्खुबान नुःर लॆकु। 41हाङ् आसॆ चाइ निवाँहाङ्मि खानावाँ लोखुबा ग निवाँहाङ्मि खानावाँ लोखुबा ये कामानुङ् नुःर लॆकु, खोसॆ निवाँहाङ्मि खानावाँ लोखुबॆ टक्चामॆ नाम्याक् टक्चाकु। हाङ् निवाँनेन् याॽमि निवाँनेन् ये कामानुङ् नुःर लॆखुबॆ निवाँनेन् याॽमिऎ टक्चामॆ नाम्यक् टक्चाकु। 42आसॆ चाइ इघा मिःछुॽमा याॽमिचिबाङ् एक्क याॽमि काम् याॽमिचि कामानुङ् मिःक्म येम्पॆ योवा टे हाङ्स डुङ्मा पिकुचि, चाइबान कॆ आन्ना लोकानि, खोचिऎ टाङ्पाम् नाम्याक् टक्चाकुचि।”
Atualmente Selecionado:
मट्टि 10: LBR
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023, Wycliffe Bible Translators, Inc. and Nepal Bible Society
