Mateus 5

Nongen ad Jesu le bahali. Heb nongen hanu.

1Be Jesu gin ilndri su ndramed mabosanged dagara, i gobad ndre bahali si, i lugdo im boan, su lao aden su la born ndro i. 2I lug bohon, i henunuen su le nongen ogoro:

Jesu bamugueni maberndruo, su lao aden.

3Hian, horuan su, su de dansu danoni heb longu hian le bergolsu bui, gor ad Jehova i asu. 4Hian, horuan su, ndrnesu i reng le longu asu momen. Jehova i rederhi su. 5Hian, horuan su, su de dieni homo roud bui, dansu belengen su, su da heb ndoun bui. Su do da hian ge le gor asu. 6Hian, horuan su, su da mundrul le gan ber lang. Su gu mose su. 7Hian, horuan su, su da ibdi gahaloseli. Gahaloseli ad Jehova i gmeher ndro su. 8Hian, horuan su, bergolsu i rosan ge, su gu lele Jehova bersi muren. 9Hian horuan su, voasuiso beno, Jehova i bosoui su mbunana aden. 10Hian horuan su, su ndramed momen hingismad asu, le longu asu monen hian ge, lundielang i asu. 11Mu masi mu hian horuan ge, be su ndramed ber boan su boii mu, ar su rodi mu, be su hingismad ademu, be su boi nanennongen le ademu, nongen le bahilou ge. 12Hian mugmug manden leri. Surien hian ge ir belengen mu le gor lundielang. Su gin bo momen le ndro su Provet ber goru dagara lie.

Heb nongen dohongein le sol ma le sul ber boan.

13Mu dege sol ber boan, be sol i gina momen, homo i de danen daui, i le gan anen bui, i gina momen gane. Su gbieni i le boan, degesu gleri. 14Mu sul ber gor boan. Gor si i da ndre bahali, su masi su dansu ilndri i gle manan. 15Homo i hesul lamp i de gohoni i le behendra gombu bui, i ilgi i ndre geao, muren i danen hinganen le ndro su masi, su da le um. 16Ghinen i dagara lie, sul ademu ha hinganen le ndro su ndramed, dansu ilndri longu ademu hian, su gabmugueni Damen ber lang.

Nongen houen e bern houen i vonei le gor Lundielang.

17Mbue hanguruen, io gin meher, io beg hangaini nongen ad Mose, ma nongen asu Provet ber goru, io de bieni nongen asu bui, io beg hinen i hian gane. 18Ndangen io boi le ndro mu: Lang e boan na glos, nongen heb mandehege ber lang i de glos bui. Longu masigane na gmeher. 19Be homo i bieni longu hendre ge, i da le Buk Helian, muren i henunuen su ndramed, ndramed ogo i hom molhege le gor lundielang. Be homo i somui le longu masigane, i da le Buk Helian, muren i henunuen su ndramed leri, i ogo i hom labenen ber gor lundielang. 20Io boi le ndro mu: Be longu ademu i de hian hanu le longu asu Pharisi, le longu asu ndremda hernou bui, de danmu la lundielang bugane.

Jesu henunuen su le nongen ad Mose monen ge: Mbue rii homo.

21Mu gin hirong, Mose gin henunuen su, dansu ber goru: Mbue rii homo. Be homo i rii homo, i gina momen ge su bo gord le ndro i. 22Io ge, io vong: Be ndrnen ad homo i mah le ndern, i ogo i gina momen ge, gord i belengen aden. Be homo i boii ndern, i vong le ndro i, i boi raga, aga i vonei uo ndramed molhege, gord manden i belengen i. Be homo i vong le ndro ndern: Uo ndramed gouge, moan manden ir belengen i. 23Be uo leng dohor longu hendre le ndro Jehova, uo hanguruen le sal adem, nderm bergoln i irgu gle adem. 24Hian al ndro i hanu, hinen longu adem masi gmonen, muren am geao ad Jehova e dirhor le ndro i longu adem. 25Ghinen longu adem masi gmonen roud be ndrnen i irgu le ndern. Be uo da le sal beg bo gord le ndro nderm seslaini i, ghinen longu adem gmonen, debosan i gob gord le ndro uo, ndremda gord i rui uo gle su polisboi, polisboi i daui uo le kalabus. 26Ndangen io boi le ndro uo: Homo i de danen rumburdi uo le kalabus bui, hanu uo surien longu aden masigane sumburdi.

Jesu henunuen su: Mbue sungsou orge.

27Mu gin hirong, Mose i gin vong le ndro su damen ber goru: Mbue sungsou orge. 28Io ge, io boi le ndro mu: Homo ma homo i hangungrou hom bihin ge le bergoln, i ogo, i gin bo longu sungsou le bergoln. 29Ar begmarm sengen i gseslaini uo le longu momen hian ede i giao, i hian hanu, uo al ndro Jehova le begmarm si ge, de begmarn maruo i adem, uo al moan manden. 30Be nemem sengen i beg seslaini uo le longu momen, hian e sinderdi giao, i hian, nemem hagi ge, uo al ndro Jehova, de nemen marge, uo al moan manden. 31Mose i gin vong lie: Be homo i leng bieni nambulen, hian i hengen le ndro i peper, le robulda nambulen. 32Io ge, io vong le ndro mu: Be homo i bieni nambulen i seslaini nambulen, le longu sungsou (be i gin bo longu sungsou bui). Be homo i ibdi hom bihin le nambulen, hom gamel i gin robuldi bihin ogo mahanu, i ogo bo longu sungsou.

Jesu henunuen su: Mbue daui nemem le belengan.

33Mu gin hirong, Mose gin vong le ndro su damen ber goru: Mbue daui nemem le belengan, mbue bosoui nongen: Ndangen Jehova gle momen, Bosoui nongen ogo gle monen ge bormarn ad Jehova. 34Io ge, io vong le ndro mu: Mbue bosoui heb nongen dagara. Mbue bosoui: Ndangen le belengan. Hanguruen i, lang i logna ad Jehova, i helian ge. 35Mbue vong: Ndangen le boan. Boan i logna le degen ad Jehova. Mbue bosoui: ndangen Jerusalem. Jerusalem i logna ad King manden. 36Mbue bosoun Ndangen le borbalo. Uo heb ndoa bui le hinen lomon si beren de rogdan. 37Be mu bosoui: Ehe, aga i ehe ndangen. Be mu bosoui: Bugane, aga bugane ndangen. Nongen masi uo da bosoui la born i gmeher le Satan.

Nongen Jesu le suria.

38Mu gin hirong nongen ber mahanu: E surieni marm gle marn, lehem, gle lehen. 39Io ge, io boi le ndro mu: Mbue surien longu momen gle momen. Be homo i rii bouem sengen, vong le ndro i, i rii bouem gameao lie. 40Be homo i leng bo gord le ndro uo gle salo adem ge, hian hengen le ndro i salo adem eluen lie. 41Be homo i ndemani uo, uo bosilieni sal le ndro i, uo gdogi sal hebe la born ndro i, hian uo dogi bersi le sal aden eluen. 42Be homo i ndemani uo le longu hendre, hian hengen i. Be homo i lengi longu hendre adem, beg hengeni mul le ndro uo, mbue hedi, i aden gane.

Nongen le golnisden su, su bo iil le ndro uo.

43Mu gin hirong nongen ber goru: Golmgisden su, golsuisden uo, gus adem gle ndro su, ndrnesu i mah adem. 44Io ge, io vong le ndro mu: Golmugisden su, ndresu i irgu le adem, osbani su le aring adem, su da hingismad adem. 45Ar mu hinen dagara, mu mbunana ad Damen i da lundielang. Mernal aden i gobad le ndro su hian ma le ndro su momen lie. I daui lengen le beleng asu monen, ma asu momen lie. 46Be golmugisden su ge, golsugisden uomu lie, sehe surien i da belengen mu? Su ndramed momen su hanguruen dagara lie. 47Ar mu hanguruen hian su gous ademu ge, aga longu hian bui. Su Haiden masi su bo dagara lie. 48Bern ademu gmonen gane, dege Damen ber lang i monen gane.

Atualmente Selecionado:

Mateus 5: LLENT

Destaque

Copiar