Matiyu 7

Mɔɔn mánngan kɛ ɲɔ́ɔn ngítitɛɛ

Luka 6.37-38,41-42

1«A kɛ́nan kíti tɛ́ɛ lɔ ka, kó óo kó é kɛ ke Ala kɛ́nan kíti tɛ́ɛ a ka. 2Kɛ mansɔɔ a kɛ́ mɔɔn tɔ́ ólu ta kíti o tɛ́ɛ tɛ́nmɛnne, Ala káa álee ta kíti o tɛ́ɛ céne. Aa dɔ ólu tá ó swáan swáannikɛfe mín nɔ, Ala káa a tá ó swáan o lé lɔ́. 3Tíkoo mín ŋé í bhádhye ŋó ɲán o mán, mínnɛɛn lé kósɔn ii ó mánfɛɛla, lɔ́ɔguun mín ŋé í tá ó mán, i tɛ́ ó yéla a? 4I lo ŋé sé kɛ́ fɔ i bhádhye ŋó yɛ́ díi kó: ‹Í lɔ́ tíkoo é í ɲán mán, i lɔ́ ké ní a bhɔ́›, kɛ́ɛ ké lɔɔguun ŋé íle tá ɲán o mán? 5Fyáangafo ó, lɔɔguun mín ŋé í tá ɲán ó mán, o bhɔ́ ótun. O lɔ, i yáa yéli kɛ́ cɛ́ɛne, kɛ́ tíkoo ó bhɔ́ i bhádhye ŋó ɲán o mán.

6A kɛ́nan fé nzɛ́nnɛnyanin ŋó bhyáa wúu ólu kɔɔ, ní o tɛ i yáa í ɲán yɛ́ɛman a mán kɛ a lɔ́falanvala. A kɛ́nan a yɛ́ kɔ́ɔnngoo ólu bhyáa gbóyoonin nú kɔɔ, ní o tɛ i yáa táaman kɛ́ a ka.»

Dɛ́liliko o

Luka 11.9-13

7«Á kɛ́ fé ŋóo fé ndɛ́li Ala fɛ́, á yáa o sɔ́ɔ, a kɛ́ fé ŋóo fé ɲíin a fɛ́, a yáa o yé, a kɛ́ í ka nányɛɛ Ala man kó óo kó la, Ala yáa o kó ó dhyáa ló a lɔ́. 8Áa céne, mɔɔn óo mɔɔn kɛ́ dɛ́lili kɛ, o yáa sɔɔ, mɔɔn mín ngɛ ɲíinnin kɛ, o yáa yéli kɛ, mɔɔn mín ngɛ lá ó mangbasi, i yáa lá ó láka o tíi ó yɛ. 9Álee mínnɛɛn le dhyénjɛ wɛ́ɛ búlu kófɔ a yɛ́ tó áa káwa di a man, 10Wáman kɛ san di a man kɛ́ɛke dhyé ŋóo yɔ́ɔ lé kófɔ? 11Áa yóo né wé kpán, wáa áa sháa fémɛɛ lú díla a dhyé ŋolu mán! Tó a Fá mín ŋé sá ŋó lɔ, o yáa sé í bánan kɛ́ fémɛɛ lú díla a mán, ni a kɛ́ a dɛ́li a?

12Álee fɛ́ ké mɔɔn tɔ ólu a kó mínnu kɛ́ a yɛ́, ále a o kɛ́ ilee lu yɛ: Musa ní céla tɔ́ ólu kó mínnu sɛ́wɛ kitabu o lɔ, olu lɔ́kan ŋó lée wé.»

Ɛliyanan o sɔ́ɔ a gbɛ́ɛ

Luka 13.24

13«Lá mín ŋan lɔ́ɔ, áa lo ŋo lé fɛ́, kɛ mansɔɔ lá mín ŋé mɔɔn lásela yaananman lɔ, o lá ó a bwó, a sháa o ló ndáaman fwáayanin ɲe. Tó mɔɔn mín núu o sháa o tála, o léelu a sháa. 14Wáa ɲáanmanɲan óo sɔɔla ywáa mínnɔn, o lá ó lé a lɔ́ɔ, o sháa o lé táamankɛ a gbɛ́ɛ. Tó mɔɔn mín núu o sɔ́ɔla, olu mán nzháa.»

Céla kóo ŋolu

Luka 6.43-44

15«Áa í yɛ́ɛ myaan céla kóo ŋolu man. Ii nánla a saala lé óyoo Saadhye nú, waa ké kóngowuu lée lúu wé. 16Á yáa lɔ i dhyé ŋó lée lúman. Mɔɔn é sháa lɛ́zɛnnye mɔ́la ŋwɛ́ɛnnzu ó lá díi, wáman kɛ tólodhye mɔ́ lɛ́ɛninɲii ó lá? 17Yíibhɛɛ óo dhyé mɛ́ɛbhɛɛ lé kɛ́la, tó yíi yóo ŋóo dhyé ɲóo née lú kɛ́la. 18Yíibhɛɛ o súu óo súu tɛ́ sé dhyéɲoo ngɛ́la, yíiyoo nzúu óo súu tɛ́ sé dhyémɛɛ kɛ́la. 19Yíi súu óo súu man kɛ́ dhyé mɛ́ɛ kɛ́la, fɔ́ kɛ o tɛ́ɛ lé kɛ a lafii tá lɔ. 20O ɲán o mán, á yáa lɔ i dhyé ŋólu mán.»

Kaamɔɔndhye mín ŋé Ala dhyáaɲɛnngo ó kɛ́la óni mín ndɛ́ kɛla

Luka 13.25-27

21«Mɔɔn mín mbɛ́ɛ fɔ́la mán kó: Mantii ó, Mantii ó, o bɛ́ táa Ala yɛ́ Mansaya ó hɛ́lɛ o sɔ́ɔ dhyaalagbeyala la lɛ! Nvá mín ŋé sá ŋó lɔ, mɔɔn mín núu o dhyáaɲɛnngo ó kɛ́la, o léelu káa Ala yɛ́ Mansaya ó hɛ́lɛ o sɔ́ɔ.» 22Ala yɛ kítitɛɛlo ŋo kɛ́ sé, mɔɔn shɛ́ɛman ɲáan fɔ ɲɛ́n kó: Mantii ó, Mantii ó, án ni célayakoman lu láse íle lé tɔ́ɔla, án ni lámansa yóo nú gbɛ́ íle lé tɔ́ɔla, án ni káwananngo shɛ́ɛman ngɛ́ íle lé tɔ́ɔla, bháa díi? 23Ɲáan a láse o mɔɔn ólu mán ngó: «Mán a lɔ́ tún; Áa í cɛ́bhɔ nán, ále kóyoongɛbhaa olu.»

Bhó nvyaa olu

Luka 6.47-49

24«Oo lɔ mínngɛ, ŋwɛ́ɛn kóman mínnu fɔ́ nín, mɔɔn ó mɔɔn kɛ́ ó kóman ó lɔ́myɛn kɛ́ a bháto, o tíi ó yáa kɛ́ óyoo mɔɔn hákiiman mín ŋwɛ́ɛn a yɛ bhó ŋo lɔ́ fáa ó ka. 25Sá ŋóo bé, kwɔ ólu fá fɔ́ kɛ waawaa, fwɛ́ɛnba é bhyáa o bhó ŋó ka. Wáa a man bé, kɛ mansɔɔ bhónzu ó gbáannin ndɛ́ɛ fáa o le ka. 26Wáa ní wɛɛla dhyaa mínnu fɔ́la nín, ni mɔɔn mínnu kɛ́ olu myɛ́n kɛ í bá i lataaman ó mán, o tíi ó káa kɛ́ lé wé ŋóo mɔɔn Hákiinda mín wɛɛ bhó nɔ́ cɛnfuywaa lɔ. 27Sá ŋóo bé, kwɔ ólu waawaa, fwɛ́ɛnba é bhyáa o bhó ŋó ka tó óo bé kɛ wéyaa féfe.»

Ɛnza ɲɛn sébhaaya ó

28 Ɛnza é wɛɛ a yɛ kóman olu la wáati mín nɔn, a yɛ kaangbɛseɲan o tɛ wɛɛ yaman o kɔ́ɔnnɔn bha. 29Kɛ mansɔɔ a tɛ́ɛ lakawanin kɛla óo fáan é mɔɔn mín móo, wáa a tɛ tɛ́ a kɛ́la óyoo í yɛ́ sɛliya kaamɔɔn olu.

Atualmente Selecionado:

Matiyu 7: MXX

Destaque

Copiar