isizwur 6
6
twrri ddunit tʷh̬šn bahra
1lliġ a‑ttigatn mddn ġ‑ddunit, ar‑darsn‑tlalnt‑tfrh̬in. 2lmlayka n‑rbbi ar‑ẓrran is‑šwant istis n‑bnadm, ar‑tawin h̬tinna gisnti ttirin. 3yini sidi rbbi ġakudan: «ur‑rad‑adjġ rruḥ‑inu ad‑bdda‑itẓi d‑bnadm, ašku tifiyi ka‑iga. ussan‑ns ġilad ur‑ra‑n‑ssurfn miyya d‑sin id‑mraw (120) n‑usggʷas.»
4kkan‑ttin llan ‹nafilim› ġ‑ddunit ussan‑an ula tigira‑nsn, ġakud lliġ a‑tmunun lmlayka n‑rbbi d‑istis n‑bnadm, ar‑didsnt‑skarn tarwa. gn ntni iġzuyfa tjhhdnin, tyawssann bahra ġ‑uwssan‑an. 5iẓr sidi rbbi is‑a‑bahra‑ttigat lh̬ʷšant n‑bnadm ġ‑ddunit. ġ‑iyḍ ula azal ur‑a‑swingimn mddn abla ġ‑ma‑yʷh̬šnn. 6tʷgraẓ sidi rbbi f‑bnadm lli‑iskr ġ‑ddunit, ṭiyr‑as bahra. 7yini sidi rbbi ġakudan: «han bnadm lli‑h̬lqġ, ra‑t‑ssittiġ zġ‑wakal. rad‑ssittiġ bnadm d‑luḥuš d‑igḍaḍ n‑ignwan d‑kullu ma‑itštutuln f‑iggi n‑wakal, ašku tʷgraẓ‑iyi ġ‑lliġ‑tn‑skrġ.» 8imma nuḥ yufa rrḍa ġ‑iẓri n‑sidi rbbi.
nuḥ ibna anaw
9ġmkad a‑iga‑warra n‑tasutin n‑nuḥ. iga nuḥ argaz ikmmln, iġus‑uwl‑ns ġ‑gr mddn n‑tasut‑an. nuḥ ar‑bdda‑itmunu d‑rbbi. 10iṭṭaf kraḍ tarwa, gn ismawn‑nsn sam d‑ḥam d‑yafat.
11iẓra rbbi is‑tʷh̬šnn ddunit, tɛmmr s‑lbaḍl. 12twrri tigat lh̬ʷšant ġ‑ddunit ġ‑iẓri n‑rbbi. ašku bnadm kullut iwrri ar‑iskar ma‑yʷh̬šnn. 13isawl rbbi s‑nuḥ yini‑as: «ha‑yyi rad‑gġ ttmi i‑kullu ma‑igan tifiyi, ašku tɛmmr ddunit s‑lbaḍl f‑ssibt‑nsn. han rad‑hlkġ kullu ma‑illan ġ‑ddunit. 14zayd kiyi tbnut yan‑wanaw i‑ih̬f‑nk zġ‑ukššuḍ n‑gufr, tskrt gis iḥuna, tġʷmt‑as zzft zġ‑brra ula agʷns. 15ġunškad a‑ra‑tssġlt anaw. a‑iġzzif s‑miyya d‑kraḍ id‑mraw d‑kraḍ (133) n‑mitru, yusɛu s‑sin id‑mraw d‑sin (22) n‑mitru, iɛlu s‑kraḍ d‑mraw (13) n‑mitru. 16tskrt asddul i‑wanaw, a‑ig mnaṣṣ n‑mitru f‑uflla‑ns. tskrt imi ġ‑tsga n‑wanaw, tskrt kraṭṭ‑tduliw ġ‑ugʷns‑ns 17ašku ra‑n‑aznġ anggay n‑waman f‑ddunit, hlkġ kullu ma‑igan tifiyi iṭṭaf rruḥ n‑tudrt. ra‑immt kullu ma‑illan ġ‑ddunit. 18imma kiyi rad‑ak‑fkġ lɛhd. ra‑tkšmt s‑wanaw kiyi d‑tmġart‑nk d‑tarwa‑nk d‑tmġarin‑nsn, 19tšškšmt dik sin zġ‑kullu ma‑iddrn ig tifiyi s‑wanaw, baš ad‑njmn ula ntni dik. ad‑gn awtm d‑tuwtmt 20zġ‑kraygatt kra igan agḍiḍ, ula kraygatt kra igan luḥš, ula kraygatt kra itštutuln f‑wakal. ra‑n‑dark‑aškin sin zġ‑kraygatt kra illan baš ad‑dark‑njmn. 21ssmun kraygatt kra igan amššu, tasit‑t dik ġ‑wanaw a‑zġ‑gis‑tšttat kiyi ula ntni.» 22inkr nuḥ iskr kullu maylli‑f‑t‑yuṣṣa rbbi.
Atualmente Selecionado:
isizwur 6: SHILOT20
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Selected Old Testament in Tashelhayt (Latin script) © United Bible Societies, 2020.
Robert Bernard Dann.
