Mateo 7

Zhãrãta kꞌawua o ẽbaidꞌebema

(Lucas 6:37-38, 41-42)

1Zhãrãta kꞌawua orãũdua, Daizezeba marã maʉ̃ kꞌarea kꞌawua o ẽbamarẽã. 2Zhãrãta kꞌawua odꞌara Daizezebara marã maʉ̃ zadꞌe kꞌawua oya, zhãrã sãwũã obʉda zadꞌe oya. 3¿Kꞌãrẽã bʉ mebea dabʉdꞌe ne jarra kꞌobꞌʉtrʉ akʉpe bʉ dabʉdꞌe bakuru pẽũ nʉmʉrã akʉ ẽpe? 4¿Mawũãrã bʉara bʉ mebea mawũãĩne bꞌʉka: Ne jarra bʉ dabʉdꞌe kꞌobꞌʉta mʉãã aubꞌaribirua aidꞌe bꞌʉka, bʉ dabʉdꞌe bakuru pẽũ nʉmʉnerã? 5¡Sewa bibaʉta bꞌarãrũã! Bakuru bʉ dabʉdꞌe pẽũ nʉmʉta naara ãĩ bꞌʉdua, mawũãtrʉ bia ũduya bʉ mebea dabʉdꞌe ne jarra kꞌobꞌʉta aubꞌariita. (Aramaʉ̃ kĩrãkꞌa bʉa kꞌazhirua obꞌʉta naara idu bꞌʉdua, mobedꞌeba zhãrã kꞌareba bꞌeya.)

6Daizezeitabemata usarãã diarãũdua marãta kꞌadꞌa ẽbamarẽã, miã perla marãne nʉmʉta chĩnarãã diarãũdua biradigadꞌa ẽbamarẽã, marãta dragꞌakuadꞌa ẽbamarẽã. (Ũrĩ krĩña ẽã bꞌeara aramaʉ̃ kĩrãkꞌa Daizeze bedꞌeara jararãũdua marã bĩ ẽã odꞌa ẽbamarẽã.)

Daizezea zhiwidꞌi ne widꞌidꞌaidꞌebema

(Lucas 11:9-13; 6:31)

7Daizezea ne widꞌiudua, mawũãrã marãã diaya. Ne widꞌi bꞌeba jʉrʉudua, mawũãrã ũdudꞌaya. Ne widꞌi bꞌeba trʉ̃ũdua, mawũãrã jigaita puerta ewaya. 8Daizezea ne widꞌi bꞌʉbara jidaya. Ne widꞌi bꞌʉba jʉrʉ bꞌʉbara ũduya. Ne widꞌi bꞌʉba trʉ̃ bꞌʉaara diaita puerta ewaya. 9¿Marãnebemabara zhi warraba panta widꞌira mongꞌarata diaita bꞌʉka? 10¿O bꞌedata widꞌira dãmata diaita bꞌʉka? 11Marã bia ẽãta bꞌeba mazhi warrarãã ne biata dia kꞌawua bꞌebʉrʉ, marã Zeze ʉ̃tre bꞌʉbara audrebai ne biata diaya widꞌibʉdaara. 12Zhãrãba ne jõmaʉ̃ne marã sãwũã odꞌaita krĩña bꞌedꞌe marãba ãzhita mawũã oudua. Maʉ̃ta Daizezeba ũrãgꞌa Moiséa diadꞌa, maʉ̃ta Daizezeba bedꞌeata jarabibarirãba bꞌʉdꞌapeadꞌa.

Puerta pẽũsuadꞌebema

(Lucas 13:24)

13Edꞌa wãũdua puerta pẽũsuadꞌe, puerta jedꞌeadꞌe edꞌa wãĩta ota kũrũgusabara aduadꞌe ede bꞌʉa, bio maʉ̃ne edꞌa wã nʉmʉã. 14Mawũãmina puerta pẽũsuadꞌe edꞌa wãĩta ota pẽũsuabara Daizeze ũme bꞌai jõ ẽãma ede bꞌʉa, maʉ̃ta bio ẽãba ũdu bꞌea.

Kꞌãrẽ obꞌedꞌeba ũdukꞌawadꞌaya

(Lucas 6:43-44)

15Kĩrãkuita bꞌeaudua sewata Daizezeba bedꞌeata jarabibaridꞌe bꞌe kꞌarea, marãma zedꞌaya oveja zhãrã zuburia odꞌakꞌa kĩrãkꞌa, mawũãmina sodꞌera usa pãne kĩrãkꞌa zhãrã warrea ẽãta bꞌea. 16Marãbara ãzha kꞌãrẽ obꞌedꞌeba ũdukꞌawadꞌaya. Uvara ʉrʉba zaudꞌata bꞌʉadꞌakꞌa, miã igora bꞌʉadꞌakꞌa jũẽchichiba zaudꞌata. 17Aramaʉ̃ kĩrãkꞌa bakuru biabara zau bꞌʉa zhi tara biata. Mawũãmina bakuru bia ẽãbara zau bꞌʉa zhi tara bia ẽãta. 18Bakuru biabara zau ẽã zhi tara bia ẽãta, miã bakuru bia ẽãbara zau ẽã zhi tara biata. 19Bakurura zhi ta biata zaudꞌa ẽãrã jõma tudꞌape buebada tebʉdꞌe. 20Sewata Daizezeba bedꞌeata jarabibaridꞌe bꞌeta aramaʉ̃ kĩrãkꞌa marãbara ãzha kꞌãrẽ obꞌedꞌeba ũdukꞌawadꞌaya.

Bia ẽã omiãta bꞌera ũdukꞌa aidꞌebema

(Lucas 13:25-27)

21Mʉta Nokꞌó abꞌera jõmarã edꞌa wãna ẽã ʉ̃tre Daizezeta Nokꞌo maẽrã, awuarabʉrʉ edꞌa wãnaña mʉ Zeze ʉ̃tre bꞌʉba krĩñata obꞌeta. 22Daizezeba kꞌawua oi ewadera bioba mʉãã mawũãnaña: Nokꞌó, ¿daibara bedꞌeata bʉa jarabibʉrʉta jarasidꞌa ẽka, bʉ trʉ̃neba daibara jaira ãĩ jʉrekuasidꞌa ẽka, bʉ trʉ̃neba daibara bio osidꞌa ẽka ũdudꞌakꞌata? 23Mawũãnaĩ mʉãrã mawũãña: Mʉã marã ũdukꞌa. ¡Mʉ maẽbara ãĩ wãũdua, marã bia ẽã omiãta bꞌea!

De ũmenebema

(Lucas 6:46-49)

24Bariduba mʉ bedꞌeata ũrĩpe aribꞌaera, ũmakĩrã bia krĩcha bꞌadꞌa kĩrãkꞌa bꞌʉa, izhi dera pãrãsia peña ʉ̃rʉ̃. 25Maʉ̃ne zesia kueta, zesia dota, pʉ̃ãdrʉsia nanguta, aramaʉ̃ne maʉ̃ dema jiradrʉsidꞌa. Mawũãmina kꞌora wã ẽbasia pãrã nʉmʉ baera peña ʉ̃rʉ̃. 26Mawũãmina bariduba mʉ bedꞌeata ũrĩpe aribꞌae ẽbʉrʉ, ũmakĩrã bia krĩcha bꞌadꞌa ẽkĩrãkꞌa bꞌʉa, izhi dera pãrãsia ibudꞌe. 27Maʉ̃ne zesia kueta, zesia dota, pʉ̃ãdrʉsia nanguta, aramaʉ̃ne maʉ̃ dema jiradrʉsidꞌa. Mawũẽ kꞌora wãsia, aramaʉ̃ne jipadꞌe teguezoasia.

28Jesúsba maʉ̃ bedꞌeata ma jarabʉrʉdꞌera zhãrãbara bia akʉdruasidꞌa bia miã ũrãgꞌa bꞌʉdꞌeba. 29Aramaʉ̃ne ãzhira ũrãgꞌa nʉmasia miã ũrãgꞌaita zarea bꞌʉba, mawũẽ miã ũrãgꞌa ẽbasia ũrãgꞌa Moisédꞌe jarabada kĩrãkꞌara.

Atualmente Selecionado:

Mateo 7: cto

Destaque

Copiar