PUDUT 8
8
Abpa' Nekeket
1Iamo' Allah nengerawé Noh idi amung-amung pung luk denganneh bang alud ineh. Idi Ieh nenganau' aceh bui malid pa luun tana', idi abpa' ineh pana' melena'. 2Idi amung-amung bued abpa' rayeh luk rat bang tana' melena', idi udan pana' mato. 3Idi abpa' ineh iuk melena'. Idi pangeh 150 aco, abpa' ineh melena'. 4Idi pulu' tudu' aco bulan tudu' ineh alud ineh nepasad luun Pegkung Ararat. 5Idi abpa' iuk melena', pad macing bulan pulu'. Idi aceh aco bulan pulu', amung-amung buduk pegkung melagan.
6Idi pangeh apat ngepulu' aco Noh nengukab tabuk alud ineh. 7Idi ieh nemuit sebuleng bungkak, luk netemulud kidi-kidi, pad macing abpa' ineh nekeket rat luun tana'. 8Pangeh ineh ieh nemuit sebuleng sukur pelé nier kudeng abpa' ineh pangeh nelena'. 9Iamo' sukur ineh na kali' luk inanneh ucep. Idi ieh nelemubed iné' ni Noh bang alud ineh, ngaceku inan teh abpa' pa luun tana' ineh. Idi Noh nengulang ticu'neh idi nengalap neneh semuet bang alud ineh. 10Idi Noh nenganét tudu' aco teh, idi ieh nemuit sukur ineh teh. 11Idi suit ineh nelemubed iné' ni Noh kareb malem aco, idi ieh nenguit bang ticukneh aceh don saitun. Ngaceku ineh Noh kali' abpa' ineh pangeh nekeket. 12Idi ieh nenganét tudu' aco teh, idi ieh nemuit sukur ineh teh. Iamo' na ieh nelemubed iné ni Noh peh.
13Kareb ulun Noh 601 lak, kareb aceh aco bulan aceh ineh, abpa' ineh pana' nekeket. Idi Noh nengukab itek alud ineh, idi nenier, idi matu tana' ineh netekering. 14Kareb dueh ngepulu' tudu' aco bulan dueh, idi tana' ineh netekering do'-do' peh.
15Idi kebala Allah ni Noh, 16“Remuat iko rat bang alud ineh, dengan awanmu idi anak-anakmu, idi awandeh. 17Idi nguit amung-amung suit idi pung denganmu, pad ideh miak nenganak idi amé'-amé' mula' luun tana'.” 18Idi Noh neremuat rat bang alud ineh dengan awanneh, anak-anakneh, idi awandeh. 19Idi amung-amung pung idi suit neremuat rat bang alud ineh, maya' ayudeh.
Noh Maré Acheh Baré Kuan Tuhan
20Idi Noh nenganau' aceh bubpun kuan Tuhan. Idi ieh nengalap ratnan amung-amung pung idi suit luk meligan, idi ieh nengeseb baré luk sabpen luun bubpun ineh. 21Idi baré ineh do' buen pa kiung Tuhan, idi Ieh nepebala bang niatNeh, “Na Ui sikal ngacing kediman bang tana' ini peh ngaceku ratnan lemulun, sagan pana' terawé niatdeh dat rat karebdeh isuut. Nateh Ui sikal ngaté amung-amung pudut luk mulun kudeng luk pangeh inau'Ku. 22Seruked tana' ini idi, inan kareb ngeranih idi nibu, teneb idi lau', udah idi merikan, macang idi medacem teh.”
Atualmente Selecionado:
PUDUT 8: BLD
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
BALA LUK DO' Lun Bawang Bible © The Bible Society of Malaysia 1982, Second Edition 1998.
