Sélimɛ 17
17
Kɛ́nɛw kpéʔelele joogaanna
1Lǎli ni Abirami taa lè yɛ̀ʔɛlɛ dabata nibin fɔ̀n, a Yawe wiyɛɛ dɛ̀ɛn wi na níì wi pye: «Mii wi nyɛ Kolocɔlɔɔ, wee wi nyɛ lè Séew Myɛ Kàfɔlɔ. Ki n yɛlɛ mi kòro maa táanri mii yɛ́ʔɛ ma mí pye dìgire fun. 2Mii a mii joogaanni yaʔa li pye mii ní mɔ níngi ni, si tɔ̀nɔ́ mɔ kpéʔele syɛɛnnɛʔɛmɛ.»
3A Abirami too n yɛ́ɛgi cíbele tári na. A Kolocɔlɔɔ níì wi yari: 4«Wéle, mii n tɔ̀nɔ n mii joogaanni kpéʔele ní mɔ ní. Mɔ a tɔ̀nɔ́ ba pye syɛɛnfele-nɛʔɛyɛ tóo. 5#Wɔr 4:17 Pe a ní da mɔ yiri Abirami í, fwɔɔ pe a ra mɔ yiri Abirahami#17:5 Abirami, Abirahami: Mɔ ga lóʔo Abirami, ki kɔ́rɔw wi nyɛ Tofɔgbɔɔw. Mɔ si ga lóʔo Abirahami, ki kɔ́rɔw wi nyɛ Syɛɛnnɛʔɛmɛ tóo.. Níì cán mii n mɔ kpéʔele mɔ í pye syɛɛnfele-nɛʔɛyɛ tóo. 6Mii a gi yaʔa mɔ piibèle í tɔ̀nɔ́ nɛʔɛ, bi pye syɛɛnfeleyaa, àlí fànʔafɔɔlɔ a yiri mɔ ni. 7#Luk 1:54-55 Mii a mii joogaanni yaʔa li kòro mii ní mɔ níngi ni, si wɔ́ɔ ba kòro mii ní mɔ yodaʔayi nínge ni mɔ kadoʔo ma. Li a kòro mii ní be làrigèle myɛ syɛ̀ɛnnɛ nínge ni bàā syée yaà làla o làla. Kánmi bee na mii a pye mɔ Kolocɔlɔw, si wɔ́ɔ ba pye mɔ yodaʔayi Kolocɔlɔɔ mɔ kadoʔo ma. 8#Kap 7:5 Kanaan tári ni mɔ tɛ́ɛn lè dee n pye nibɔɔn, mii a ti myɛ kaan mɔ ní mɔ yodaʔayi ma, ti a pye mɔ yodaʔayi wóro làla o làla. Mii si pye be Kolocɔlɔw.»
9A Kolocɔlɔɔ gi joo Abirahami ma níì wi pye: «Mɔ si na, n fàra mɔ yodaʔayi na, yi a ra yìrigí mɔ kadoʔo ma lè, yi yìrigèle làrigēle myɛ syɛ̀ɛnnɛ ni, ki n yɛlɛ ye mii joogaanni syɛ́ɛnrɛ cò. 10#Kap 7:8; Wɔr 4:11 Wéle, kánmee na yele a joogaanni cò, lee mii kpéʔele ní yele ní lè, mɔ ní mɔ yodaʔayi ní, mɔ kadoʔo ma, koro gi nyɛ, bele myɛ be nyɛ lè nǎnbèle yele níngi ni, ki n yɛlɛ be kɛ́nɛw kpéʔele. 11Yele a ra kɛ́nɛw kpéʔele koro í pye joogaanni fɛ̀ɛ, li nyɛ mii ní yele níngi ni lè. 12Nànbile o nànbile ga see yele níngi ni, ki n yɛlɛ li kɛ́nɛ canya kɔrɔtaanri wógi na. Anbée ki a ra kpéʔele yele yìrigèle myɛ syɛ̀ɛnnɛ ma, a wi see mɔ kpáagi ni yoo, a gi náà pye pulowaa wi lè wi o nyɛ mɔ yodaʔaga í, á mɔ wi syɔɔ táraa wóo ma wáli na yoo. 13Syɔ́ɔnwee be see mɔ kpáagi ni lè, ní púlowee mɔ syɔɔ wáli na lè, ki n yɛlɛ pe myɛ í kɛ́nɛw kpéʔele koro ga pye mii joogaanni fɛ̀ɛ í pye yele céri ni làla o làla. 14Nàɔn o nàɔn ga pye wi ga kɛ́nɛw kpéʔele í, wee bee a kwɔ́ɔ yirige wi syɛ́ɛnbèle nínge ni àmɛɛ wi mii joogaanni kálagi lè.»
15A Kolocɔlɔɔ níì gi joo Abirahami ma níì wi pye: «Mɔ céw Sarayi si na, mɔ a ní da wi yiri Sarayi#17:15 Sarayi: Mɔ ga lóʔo Sarayi, ki kɔ́rɔw a gbǎn pye mii fànʔafɔjew. í, fwɔɔ wi mɛ́ɛgi a pye Sara#17:15 Sara: Mɔ si ga lóʔo Sara, ki kɔ́rɔw wi nyɛ Fànʔafɔjaa. Wi a ba pye fànʔafɔɔlɔ nɔ́n. Kóloyi kɛɛ ní kɔrɔni wéle.. 16Mii a dùbaw taʔa wi na si wɔ́ɔ nànbile kaan mɔ ma wi bárigaw ni. Mii a dùbaw taʔa wi na, wi a ba pye syɛɛnfeleyaa nɔ́ɔ. Syɛɛnfeleyaa fànʔafɔɔlɔ a yiri wi ni.»
17A Abirahami too n yɛ́ɛgi cíbele tári na ní i gi tɛ́ʔɛ. Níì gi joo wiyɛɛ fúngi ni níì jo: «Nàɔn í yɛ̀ʔɛlɛ dabata taa lé si ní gbǎn pyà see? Ba Sara wi yɛ̀ʔɛlɛ togoye sicɛrɛ ní kpɔrigɔ taa lè, woro í gbǎn pyà see lé?» 18A wi gi joo Kolocɔlɔɔ ma lǎli bee ni níì jo: «Ee! Ki n yɛlɛ Isimayɛli í tɛ́nɛ kòro beè sìi na mɔ yɛ́ʔɛ ma.»
19A Kolocɔlɔɔ jo: «Ɛɛn, mɔ céw Sara si a nànbile see mɔ ma, mɔ a ra wi yiri Izaaki. Mii a mii joogaanni yaʔa li kòro wi ma, ní wi yòdaʔayi ma wi kàdoʔo ma li pye bàngwɔɔ joogaanna. 20Gee si mɔ joo Isimayɛli kéeli na lè, mii n gi lóʔo. Mii a dùbaw taʔa wi na. Mii a wi yaʔa wi tɔ̀nɔ́ see saʔa bi wi kpéʔele syɛɛnnɛʔɛmɛ. Wi a fànʔafɔbiigéle kɛɛ ní siin see. Mii a wi kpéʔele syɛɛnfelege, gee ki a tɔ̀nɔ́ nɛʔɛ lè. 21Gee si gi mii joogaanni kéele kwɔ́ɔ lè, Izaaki ní mii a li sogi, woro wee Sara a see mɔ ma lè yɛɛláa níbeena nyɔʔɔmɔ na.»
22Lǎli ni Kolocɔlɔɔ syɛ́ɛnri bee joo n kwɔ́ɔ Abirahami ma lè, a wi núngo Abirahami taana n lúru n lúgu. 23A Abirahami fala n wi pìíw Isimayɛli kɛ́nɛ n fàra bele myɛ na be see wi kpáagi ni lè, ní bele myɛ wi syɔɔ wáli na lè, gee bee n jo nàɔn o nàɔn wi pye wi kpáagi ni lè. A wi bele bee kɛ́nɛ cángi bee wonijanga n yɛlɛ ní gi ní àmɛɛ Kolocɔlɔɔ da gi joo wi ma lè. 24Abirahami maa taa yɛ̀ʔɛlɛ dabata nibin fɔ̀n lǎli ni wi kɛ́nɛw kpéʔele lè, 25á Isimayɛli taa yɛ̀ʔɛlɛ kɛɛ ní taanri lǎli ni wi kɛ́nɛw kpéʔele lè. 26Cángi bee wonijanga Abirahami ní wi jáaw Isimayɛli kɛ́nɛw pínɛ n kpéʔele, 27n fàra wi kpáagi nànbēle myɛ na be see wi kpáagi ni lè, ní bele wi syɔɔ wáli na lè táraa nikwɔɔ wòolo ma.
Atualmente Selecionado:
Sélimɛ 17: CB10
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Kolocɔlɔɔ Syɛ́ɛnri © Bible Society of Côte d'Ivoire, 2008.
