Naanearü ügüchiga 9
9
Tupana rü Noémaxã nüxü̃ nixu nax tagutáma wena mucümaxã napoxcueãxü̃ i duü̃xü̃gü
1Rü Tupana rü ñaa mexü̃ ga dexa Noémaxã rü nanegümaxã naxuegu, rü ñanagürü: —¡Pimu rü penapaxẽxẽ i ñaa naane!
2Rü guxü̃ma i naeü̃gü i ñoma i naanewa ngẽxmagüxü̃ rü tá pexü̃ namuü̃e. Rü pexme̱xwa chanangexmagüxẽxẽ i guxü̃ma i ngẽma íxüüüxü̃, rü ngẽma waixü̃mügu ixĩxü̃, rü ngẽma márwa maxẽxü̃.
3Rü guxü̃ma i naeü̃gü i ñaa naanewa ngẽxmagüxü̃ rü nanetügü rü name nax penangṍxü̃. Erü choma rü marü pexna chanaxuaxü̃ i ngẽma.
4¡Natürü taxũtáma penangõ̱x i ngẽma namachi i ãgüxü̃! Erü yimá nagüwa nixĩ i nangẽxmaxü̃ i maxü̃.
5-6Rü tá nüxna chaca i ngẽma duü̃xü̃ i wüxíexü̃ imáxü̃ rü tá nayu. Rü ngẽma naexü̃ i duü̃xẽxü̃ imáxü̃ rü norü maxü̃maxã tátama tüxü̃ naxütanü. Rü wüxichigü i duü̃xü̃ rü tá nüxna chaca naxca̱x i namücüarü maxü̃. Rü ngẽxguma texé wüxi ya duẽxẽxü̃ ima̱xgu, rü tá to i duü̃xü̃ tüxü̃ nima̱x erü tüxü̃ tima̱x ya yíxema Tupana nügüraxü̃ãcü tüxü̃ üxe.
7Natürü i pemax ¡rü pimuxacü rü penapaxẽxẽ i ñaa naane namaxã i pexacügü rü petaxagü! —ñanagürü.
8Rü yexguma ga Tupana rü Noéxü̃ rü nanegüxü̃ ñanagürü:
9-11—Dücax, choma rü pemaxã rü petaagümaxã chanaxuegu, rü namaxã chanaxuegu i guxü̃ma i ngẽma naeü̃gü i ixãxpe̱xatüxü̃, rü naxü̃nagü rü naeü̃gü i dauxchitacüã̱x i pemaxã yima wapuruwa íchoü̃xü̃ rü nua pemaxã ngẽmaxü̃. Rü pemaxã nüxü̃ chixu rü tagutáma wena mucümaxã chanadai i guxü̃ma i ta̱xacü i ñaa naanewa maxẽxü̃. Rü ngẽmaca̱x tagutáma wena nangẽxma ya wüxi ya mucü ya taxüchicü ya nada̱i̱xcü i guxü̃ma i ta̱xacü i ñoma i naanewa maxẽxü̃. Rü ngẽma chorü uneta i pemaxã nüxü̃ chixuxü̃ rü tagutáma naxüchicüxü.
12Rü ñaa tá nixĩ i norü cua̱xruxü̃ i ngẽma chorü uneta i guxü̃gutáma ngẽxmaechaxü̃ i pemaxã rü guxü̃ma i naeü̃gümaxã chaxueguxü̃.
13Rü dücax, rü caixanexü̃wa tá chanango̱xẽxẽ ya yimá chorü chirapa nax yimáwa nüxü̃ pecuáxü̃ca̱x nax aixcüma yixĩxü̃ i ngẽma pemaxã rü guxü̃ma i ñoma i naanewa maxẽxü̃maxã chaxueguxü̃.
14Rü ngẽxguma daxũwa chanango̱xẽẽgu i caixanexü̃, rü yimá chirapa rü ngéma tá nango̱x.
15Rü yimáwa tá nüxna chacua̱xãchi ga yema pemaxã rü guxü̃ma i naeü̃gümaxã chaxueguxü̃ nax tagutáma wena nangẽxmaxü̃ ya wüxi ya mucü ya taxüchicü ya pexü̃ daicü.
16-17Rü ngẽxguma caixanexü̃wa nango̱xgu i chirapa rü tá nüxna chacua̱xãchi rü tagutáma nüxü̃ charüngüma i ngẽma uneta i namaxã chaxüxü̃ i guxü̃ma i duü̃xü̃gü rü naeü̃gü i ñoma i naanewa maxẽxü̃. Rü ngẽma chirapa nixĩ i norü cua̱xruxü̃ i ngẽma uneta i namaxã chaxüxü̃ i guxü̃ma i duü̃xü̃gü rü naeü̃gü i ñoma i naanewa maxẽxü̃ nax tagutáma wena mucümaxã chanadaixü̃ i duü̃xü̃gü —ñanagürü Noéxü̃ ga Tupana.
Noé nanegü
18Rü ñaagü nixĩ ga yema Noé nanegü ga guma wapuruwa íchoü̃xü̃: Rü wüxi nixĩ ga Chéü̃, rü to nixĩ ga Cáü̃, rü to nixĩ ga Yapéx. Rü nüma ga Cáü̃ rü nüxü̃́ nayexma ga wüxi ga nane ga Canaáü̃gu ãégaxü̃.
19Rü yemagü nixĩ ga yema tomaepü̱x ga Noé nanegü. Rü yema Noé nataagüwa rü wenaxarü nimu ga duü̃xü̃gü ga ñoma i naanewa.
20Rü nüma ga Noé rü inanaxügü nax naanewa napuracüxü̃, rü úba inatoxü̃.
21Rü wüxi ga ngunexü̃gu rü nayaxaxü ga bínu rü namaxã nangãxü̃ rü ngexchiruãcü napatachiü̃arü ngãxü̃gu nayangu.
22Rü nane ga Cáü̃ ga Canaáü̃ nanatü, rü yexguma nanatü ga Noéxü̃ nada̱u̱xgu nax nangexchiruxü̃, rü yema taxre ga naenexẽgümaxã nüxü̃ nixu.
23Rü yexguma ga Chéü̃, rü Yapéx rü yéma nanangegü ga wüxi ga düxruxü̃ rü nügüãtügu nanachoxgü. Rü yema nax tama nanatü ga ngexchirucüxü̃ nadaugüxü̃ca̱x rü nügüweama namaxã inaxĩ, rü tama nügüpe̱xegu narüdaunü. Rü yemaacü tüxü̃ nidüxgü ga nanatü.
24Rü yexguma marü nüxü̃ nangupetügu nax nangãxü̃xü̃ ga Noé, rü nüxü̃ nacua̱x ga yema Cáü̃ namaxã üxü̃.
25Rü yemaca̱x Canaáü̃maxã chixexü̃ naxuegu rü ñanagürü:
—Canaáü̃tanüxü̃ rü tá naenexẽgütanüxü̃arü mugüruü̃mare nixĩ
—ñanagürü.
26Rü yemawena rü ñanagürü ta:
—Pa Cori ya Tupanax, ¡nüxü̃ rüngü̃xẽxẽ ya Chéü̃!
¡Rü Canaáü̃tanüxü̃ rü Chéü̃tanüxü̃arü mugüruü̃gü yaxĩgüxẽxẽ!
27¡Rü nüxü̃́ natauxchaxẽxẽ i Yapéxtanüxü̃ nax yatachigüxẽẽãxü̃ca̱x i norü naane!
¡Rü ngẽma Yapéxtanüxü̃ rü Chéü̃tanüxü̃patagüwa tá namaxẽ!
¡Rü ngẽma Canaáü̃tanüxü̃ rü Yapéxtanüxü̃arü mugüruü̃gü yaxĩgüxẽxẽ!
—ñanagürü.
28-29Rü nawena ga gumá taxüchicü ga mucü rü 350 ga taunecü namaxü̃ ga Noé. Rü guxü̃wama rü 950 ga taunecü nixĩ ga namaxü̃xü̃. Rü yexgumaepü̱x ga taunecü nüxü̃́ nayexma ga yexguma nayu̱xgu.
Atualmente Selecionado:
Naanearü ügüchiga 9: tcaP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2022, Wycliffe Bible Translators, Inc. All rights reserved.
