MATÌÙT 21
21
Yesùt hogorato kolek o Yerusalem kisike wene
(Mrk.11:1-11; Luk.19:28-40; Yoh.12:12-19)
1At Yesùt apùnì inom lagaukwa mene amanogo inom kota Yerusalem kuogolùk horok hogo asi lagasukwasik he, tom Saitun a'ma o sili Petpage higit asi lagasukwasik he, Yesùt en it at ane wanhì lagaukwa mene amanogo aike inebe pìre alebagìk laksasike. 2Laksìkì logolìk he,
“O sili hinelokoma a'lì lani o. Arat lagep halok, oan kìkì logolìk hineileken lakhogoin he, wam keledai eak eperak kopì kelik were'ma hineileken hogoin a'naga o. Nen, erat hineileken hegep halok he, kopì kelik atì hikalogo re, noba wolok we'no. 3Atì'nogo hele hikalhenem, it apùnì atoma mene aike nen he,
Nenahalok kopì hikalhì lagep, ìlùk wene palhe halok he, mel yogoisano:
Ninoe Etagepogot a'nogo nen wam yì mene lek en he, wolok lùogolùk kopì hikalhì lago, ìlùk yogotenem, at en he, hepok lakhei wesigin a'naga,” ìlùk, wene warogo laksasike. 4Atì'nogo laksasike atì re, at ap Ala ane yogoisìkì lagaike mene aike nen he:
5 #
Za.9:9 “Apùnì o Sion mene yogoisìkì logolìk he,
Hinoe Etagepogot hinoba wìrì'logo o. Oabùt enago logolìk, wam keledai mene apot oba hurek logolìk wagìk, keledai eak mene apot oba hùrek logolìk wagìk, wìrì'logo, ìlùk yogoisan o,”
ìlùk isike atì eperak higit hogo haga'lasuagalùk, at Yesùt en atì'nogo laksasike atì. 6Laksasikomo re, it a'nogo lagaukwasik, at Yesùt en yogoisasike higit hogoat hagatì logolìk, 7wam keledai a'nogo eak eperak wolok wagaukwasik he, inasu etakwe laberek mene nokologo wam a'nogo inapot oba talogo hesukwama re, at Yesùt ebe inapot oba hù'lagaike. 8Inapot oba hù'lagaikesik laganem, it apùnì apik amanogo inebe hùkokwe inasu etakwe laberek mene nokologo kwe ebekwe talogo hìlìk lagìk, it he'nakìt he, e eki mene ero ba nen hukalogo ebekwe talogo hìlìk lagìk, isukwa. 9#Mzm.118:26 Atì'nogo hìlìk laga logolìk he, at Yesùt ebe tùlemethìlìk, it aike ebalep agìk, it aike opolik agìk, laga logolìk he, inane hùkorogo mel ìlì k lagaukwa:
“Taùt tagokwe mene, noe wa! wa! wa!” ìlùk u hùk,
“Hosana! Ninopase Etagepogot Ala nen lakhagei wagama wagen yì, at enat hanothabuak o. Ala esin pogot oba welagarek mene nopase wa!” u hak,
“Hosana!” ìlùk a'mìt sup hogo ìlìk ìlìk, o Yerusalem kisukwa. 10Kisukwama re, it apùnì atoma mene obogat alìk watì logolìk he,
“Egi! Ap yì sa akegep,” ìlùk isukwama re, 11it apùnì logolek amanogo nen he,
“Yì Yesùt Ala ane yogoisikerek mene, awì o Kalilea tokwe kota Nasaret mene a'nogo waga yì o,” ìlùk, yogoisasukwa.
Yesùt en Ala awì wùrì'mo kìlìk tegelhìke wene
(Mrk.11:15-19; Luk.19:45-48; Yoh.2:13-22)
12Atì'nogo isukwama, at Yesùt Ala awì wùrì'mo kisikesik he, it apùnì Ala awì wùrì'mo kìlìk logolìk, yì mene tì mene oko wanhìk, palhìk, ìkì lagaukwa mene heleleng hogo mùk hogo mak hogo eta'ma wulaksìgìk, it aike uang e talek oba hìlìk okotì lagaukwa mene mel, it aike e talogo inebe hùrek logolìk sùe pel hake mene oko wanhì lagaukwa mene mel, e talek mene atì abel eten-haten hogo potsìgìk, ìlìk lagaikesik he, 13#Yes.56:7; Yer.7:11 mel yogoisasike:
“Helal waganek oba re, at Ala nen ìkì logolìk,
An nawì wùrìk yì hesik apùnì nen ìkì logolìk he,
O sapan ìkì logogun oba, ìlùk ìkì logogun,
ìlùk isikomo helal waganek werek o. Meneat he, hit en he, it ap apùnì inagarok ineki abusak telogo helagarek mene inawì negen wùrogo hisìkì lagep yì rì!” ìlùk wenagisasike. 14Atì'nogo yogoisasikesik he, apùnì ineileken mùm mene mel, inesok wat warek mene mel, Yesùt oba Ala awì wùrì'mo atoma wagaukwama re, at en hano hagarinapike. 15Atì'nogo hagarinapikomo re, it ap Ala esewerek mene inogogi kaintek amanogo mel, Ala ane helal waganek esewerek mene amanogo mel, inom en he, Yesùt en hagasusak lek mene elalinat hagatenem ineileken hìgìk, nen, yekerùgì magatek mene nen,
“Noe wa!” ìlùk u hak,
“Hosana! Taùt tagokwe mene noe,” ìlùk Ala awì wùrì'mo inane hùkorogo Yesùt eloko wanhenem inasuk holhìk, isukwasik ina'mage nen 16#Mzm.8:3 Yesùt mel yogosukwa:
“It yekerùgì ìlì'lùgì atì hasuk holhì lagen a?” ìlùk, yo osukwama, at en he,
“Ì o. Holhì lagì o. Nen, wene mel ìlùk helal waganek werek a'nogo hit en etage salhì'lek welagep nogo? It en Ala hogoratì logolìk he,
Hat hebe katok hogo hogothapì logouagalùk,
yekerùgì ketago mene mel, eilak oan nìlì'lùgì mene mel, motok yakùlisegenma hìgì,
ìlùk isukwama, helal waganek atì hit en etage salhì'lek welagep nogo?” ìlùk yogoisasikesik, 17it apùnì amanogo hebisalùk, o kota atoma nen wùlìbi wagaikesik he, nogo o Petania i wagaike.
Yesùt en e ara ero aike homan hesike wene
(Mrk.11:12-14,20-24)
18Nogo ìlùk hùp siak hogo re, at Yesùt o kota a'nogo apotkwe kìkì logolìk, ebekalem sùpùrùk nele agaike. 19Sùpùrùk nele agaikomo re, e ara ero aike kwe pìtma were'ma eileken lakhalùk eroma lagaikesik eileken penasike mene re, eken aike ìtì'lek, we, eka muli nek werek en he, mel yogosike:
“Hat e yì, hùlì yogotak en pìkìt hobuk heken motok ìtì'lek logoino,” ìlùk homan hiko kolek aremnogoat he, e ara a'nogo motok pùk agaike. 20Atì'nogo hagatenem, at agoromì ane wanhì lagaukwa mene amanogo ineileken hasukwasik he,
“Egi!” ìlùk ìkì logolìk he,
“E ara yì omake hesigat pùk aga yì nìkì'nogo nen,” ìlùk isukwama, 21at Yesùt en he,
“Wene eberogoat yogohisak. An nen e ara yì hagatì hak, hit en atì'nogo hagasusagat mene re, atì nek hagasusak hùk. Hina'la wenesùgì uan horo ebetì'lek, we hinetaùken Ala ba hìpìrethìlìk, hit en he,
Tom yì yoma nen he'nok hogo i laut yekele'ma a'loma pong hogo lan o, ìlùk yogotep halok he, haga'lasiginat o. 22Nen, hit yì mene tì mene Ala kìno yogotì logolìk hinetaùken at oba hìpìrethegep halok he, wokhisegeinat, o,” ìlùk yogoisasike.
“Yesùt, hat nena mene esewerek agatik hagatì lagen,” ìlùk anema wanhukwa wene
(Mrk.11:27-33; Luk.20:1-8)
23At Yesùt en wene atì'nogo yogoisalùk he, at ebe Ala awì wùrì'mo kisikesik logolìk wene yakùlisikenem he, it ap Ala esewerek mene inogogì kaintek mel, it ap inalùgetek mel, Yesùt oba wagaukwasik he, mel yogosukwa:
“Hat he, nena mene esewerek agatik yì hagatìk, tì hagatìk, ìkì lagen. Nen, ap sa nen esewerek logouagalùk, menhageikomo hagatì lagen,” ìlùk yogosukwama, 24at Yesùt en he,
“An hogo re, hinok omakeat aike wokhisagat. Hinok wanhenem, hit en sekek hogo yogonetep halok he, an nen hogo re, atì mene esewerek agarìk hagatì lagì, ìlùk, nane pak hogo yogohisegeinat o. 25Ma re, at Yohanet en apùnì ima pegalinapì lagaike a'nogo re, Ala pogot oba mene nen yakùlesikomo pegalinapì lagaike a? Ì a, at he, apùnì kweangma mene nen yakùlesukwama pelaginapì lagaike a. Yogone'ni ta!” ìlùk yogoisasikomo, it-it ìkì logolìk he, mel isukwa:
“Pogot oba mene nen yakùlesikomo pelaginapì lagaike, ìlùk yogosumo re, at en he,
Halok he, hit en Yohanet ane eberogoat ìlùk hùthìgì'lek welagagip atì nenahalok, ìlùk, yogonisanogo. 26Nen,
Apùnì nen yakùlesukwama pelaginapì lagaike, ìlùk yogosumo re, it apùnì yoma obogat en,
Yohanet atì Ala aneat yogonisìkì lagaike, ìlùk egaresi'mo atì re, nit ninayùk,” ìlùk isukwasik, 27hobuk Yesùt yogotì logolìk he,
“Wene atì nit ninokot o,” ìlùk yogosukwama re, at Yesùt he, mel yogoisasike:
“Halok he, an nen hogo re,
Atì mene esewerek agarìk hagatì lagi, ìlùk, hit yogohisegein legat o,” ìlùk yogoisasike.
Ap aike againapùrì inebe pìre inom inoba lìrogo yogoisasike wene
28At Yesùt en atì'nogo yogoisìkì lagaikesik hobuk mel yogoisasike:
“Wene igin yì re, hit nìkì'nogo akìkì lagep mene igiìn. Ap aike againapùrì inebe pìre welagaukwa. Were'ma, aput makusa mene atì oba lagaikesik he, mel yogosike:
Naput. Yogotak hat he, anggur yabumo a'nogo yabu hagasi lan, ìlùk yogosike. 29Yogosikomo, at aput a'nogo nen he,
Ì o, nopase, isike meneat he, yabu ebe hagasi lagì'lek kamo isike. 30Kamo isikomo re, at opase a'nogo aput hobuk mene atì oba lagaikesik atì'nogoat yogosike mene re, at en he,
Nabìt o, ìlùk, yogosike. Meneat he, hobuk a'la ebesikesik, yabu a'nogo hagasi lagaike. 31Halok he, hit hina'la nen he, it ap inebe pìre atem sa hak en inopase a'la akasike higit hogo hagasike akegep,” ìlùk, yogoisasikomo, it en he,
“Atì aput hobuk mene atì nen hagasike,” ìlùk yogosukwama, at Yesùt en he,
“Halok he, an nen wene aike eberogoat yogohisak. Hit oan werek kolek he, it ap uang pemerìntah hesik kìno ìlìk atogotarek mene mel, hìmì yùgùnat yanani nìlìk negarek mene mel, it atì tak Ala awe a'ma hisikere'ma atoma kugun o. 32At Yohanet a'nogo Ala a'la akikerek mene higit hogoat hagatì logouagalùk yakùlhisa wagaike meneat he, hit hina'la nen he,
At ane atì eberogoat ìlùk, hùthìgì'lek welagagip. Mene re, it ap pemerìntah hesik uang kìno ìlìk atogotarek mene atì mel, hìmì yùgùnat yanani nìlìk negarek mene atì mel, inom en,
At ane atì eberogoat ìlì'logo, ìlùk, hùthasukwa. It en atì'nogo hagatenem hineileken isasigip meneat he, hit enek he, hinoabùt hebelarìk hùthìgì'lek welagep yì rì!” ìlùk, yogoisasike.
“Ap aike anggur yabu serogo welagaukwa,” ìlùk, oba lìrogo yogoisasike wene
(Mrk.12:1-12; Luk.20:9-19)
33At Yesùt en wene atì'nogo oba lìrogo arat yogoisasikesik he,
“Hobuk wene aike yì oba lìrogo yogohisak. Ap aike akweang esewerek mene nen eyabumo anggur awì yakasikesik he, leget wùtìk, eken sagalogo amusu keralhì logogun oba kweang habulhik, ineileken logogun oba laleka pelatìk, isikesik he, ap aike serogo logouagalùk hisalùk he, o wele'ma atoma lagaike. 34Lagaikesik werek kolek, eken ìtenem palharek oba higit asi agaikomo re, ap eyabu esewerek mene a'nogo nen, atitigeke mene aike it ap serogo logouagalùk hisasike mene amanogo nen anggur eken aike wogosuagalùk, inoba laksa wagaike. 35Mene re, it ap serogo welagaukwa mene amanogo nen, ap akweang esewerek mene atitigeke eken wani wesuagalùk laksa wagaike mene amanogo inebe haksilik he, aike tùgì watìk, aike ebe motok watìk, aike ebe motok helep oba watìk, isukwa. 36Atì'nogo hagasukwama re, at ap akweang esewerek mene a'nogo nen he, ebalep he, inebe wenago negen laksa wagaikesik, hobuk enek he, motok apik laksa wagaike meneat he, ebalep hagasukwa hagat hagarìnapukwa. 37Atì'nogo hagasukwama re, at ap kain a'nogo nen mel isike:
Halok he, yogotak an nokawerek naput yì nek he, inane agauk hogo hai warogo wanugun o, ìlùk akasikesik, aput a'nogoat lakhei wagaike. 38Lakhei wagaikomo waganem, it ap yabu serogo welagaukwa mene amanogo nen, ineileken lakhasukwasik he, it-it ìkì logolìk,
Ap arì Opase obùlù'mo yabu esewerek asigin mene a'nogo ebe waga a'lì. Halok, yabu yì nirat esewerek asuok en he, ebe wasuok o, ìlùk, 39ebe hakhìlìk yabumo nen legeta'ma wulakhesukwasik, ebe motok wasukwa. 40Atì'nogo hagasukwa atì nen, hobuk ap akweang esewerek atì wìrìk, it ap serogo welagaukwa mene atì nìkì'nogo hagarìnabigin akegep,” ìlùk, yogoisasikomo, 41it en he,
“Ap akweang esewerek mene atì wìrìk he, it inoabùt weak mene atoma motok heleleng hogo inoarìk, yabu anggur yabu atì serogo logolìk, eken arat wurìk aganem palogo wogosi laga logouagalùk he, ap hùnogoat mene aike inayoko housagat o,” ìlùk yogosukwa. 42#Mzm.118:22-23 Atì'nogo yogosukwama, at Yesùt en he,
“Hit en Ala ane yì'nogo helal waganogo hesukwama etage salhì'lek welagep nogo? It en he,
It ap tukang o helep mene wùtarek mene nen, o ebe watì logolìk he,
Helep yì weak, ìlùk heraksasukwa mene atì obùleat ya'lagama o. Atì'nogo haga'laga atì,
ninopase Ala Etagepogot enat hagate o, ìlùk,
nineileken hogosik he,
Egi! ìlùk hogoratì lago,
ìlùk helal waganogo hesukwa mene atì etage salhì lagep lek nogo? Etage salhì lagebat o. 43Hit he, Ala nen awe a'ma hikasagat welagagip meneat he, awe a'ma hikegein lek o. We, hit hinobùlù'mo re, e eken hano mene isu hak, it apùnì inùkùl etage hùnogoat mene nen, Ala a'la akikerek mene higit hogo hagatì logogun mene halok hisegein o. [44Sa nen ebe pile helep atì ba pi waga halok, ebe motok yeloken tagalasigin o. Nen, helep atì sa oba sebeli waga halok he, ebe motok al lebelogo wasigin o,]” ìlùk, 45yogoisasikomo, it ap Ala esewerek inogogi kaintek mene mel, it ap Parisi mene mel, inom en he,
“Wene oba lìrogo ike atì, nit hesigat yogonisike hìgì,” o ìlùk, hùthasukwasik, 46Yesùt ebe hakhouogolùk isukwa meneat he, apùnì inebe logolegat en,
“At Yesùt atì Ala ane yogonisikerek mene o,” ìlùk, egaresi'mo nogo nen he, inayùk en he, hebesukwa.
Atualmente Selecionado:
MATÌÙT 21: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
