Lukas 23

Si Yesus an dior i Pilatus

(Mat. 27:1-2, 11-14; Mrk. 15:1-5; Yoh. 18:28-38)

1Wo pakasa é tou sé kumiit in sidang itu tumulung wo iwali éra mangé si Yesus saru a si gubernur Pilatus. 2Icateka' mangé am bitu, séra tumo'tolo matudu Sia, icua éra, “Sinéréo ami wo lininga amio sapaoka si tou anio' mengasélé'kow sé tou ami tou Yahudi. Wo pengapéron-Na sé tou mengawér im pajak a si Kaisar Romawi wo ka'i makua sapaoka Siao si Kristus si Colano.”

3Wo wuéien i Pilatus a si Yesus, “Wutul réén Ko Kolano é tou Yahudi?”

Isowat i Yesus, “Si amango in esa en cumua in itu.”

4Wo icua i Pilatus a sé kikiiten é imam wo a sé tou keli am bitu, “Ra'ica kinéréanku eng kaséaan i Tou anio' mandé esake'.”

5Taan makarepetke' taré séra malesé' si Pilatus in tana'i, “Sia memaso-maso' sé tou in sususuien-Na am pakasa in tana' paento'- an é tou Yahudi,#23:5 “Am pakasa in tana' Yudea”: An teks aseli, aipatic ‘Yudea’. Kumiit sé makailek wutul ing Kitap Le'nas sapaoka eng kaangéan in Yudea asi tuus anio' tumuru' im pakasa in tana' Israel, ra'ica an Yudeake'. en sumundur sé pemerénta. Mangé ito'tol-Na mai ang Galilea wo akaro an Yerusalem anio'.”

6Kelinga i Pilatus andumoro' in itu wo wuéienna ai séra in tana'i, “Anaé, si Yesus anio' réén tou Galilea?” 7Wo an tutuw kinailekano i Pilatus sapaoka si Yesus tou an sangkum ing Galilea owo wo iru'du'na sé tou e makawali mangé si Yesus a si Herodes. Ampa'paan sia makakawasa an sangkum itu wo ka'i asi témpo itu sia ang karoro'ané' an Yerusalem.

Si Yesus an dior i Herodes

8Keséré i Herodes si Yesus, en aténa arui keli ampa'paan uréo keli sia masalé' suméré si Yesus. Wo ka'i uréo sia melinga-linga in abar andumoro' i Yesus wo maarap ro'na suméré Sia méma' esa tuus kakaya'kaan. 9Wo si Herodes méé keli wuwuéien a si Yesus, taan si Yesus makapeneske'. 10Ang karoro'an in itu, sé kikiiten é imam wo sé makailek wutul in Torat mangé tumulung an dior wo ra'ica mento' menudu-nudu si ra'ica wutul a si Yesus.

11Wo tumo'tolo si Yesus paséro' wo para'i-ra'ien i Herodes wo sé surarona, karaian éra Sia in juba tanu im papakén é kolano. Wo iwali éra mangé sumawel Sia a si gubernur Pilatus. 12Asi endo-endo lumangkoi si Herodes wo si gubernur Pilatus mekaréndér, taan asi endo ituke' séra mekaromaano sumawel.

Si Yesus makéré in ukuman patén

(Mat. 27:15-26; Mrk. 15:6-15; Yoh. 18:39–19:16)

13Wo li'usen i gubernur Pilatus sé kikiiten é imam, sé matu'a é tou Yahudi wo ka'i sé tou éra. 14Wo icuana ai séra, “Si Tou anio' aiwalio miow a yaku wo icua miow sapaoka Sia mengasélé'kow sé tou in sususuien-Na en sumundur sé pemerénta. Intarépé' sérénai! Pineriksakuo Sia an dior iow, taan ra'ica kinéréanku mandé esake' eng kaléwo-léwo'an sé ipatudu miow ai Sia, 15taniituo ka'i si Herodes. Sia maanggap si Tou anio' ra'ica wana kaséaan, ampa'paano in itu iwaréngna mai sumawel ai cami. Anaé, si Tou anio' wutu-wutul ra'ica iméma' ing kaléwo-léwo'an si patus makéré in ukumen patén. 16Ampa'paano in itu, ru'du'ku oka tou en sumambok Sia, kumawusai in itu iwekarku oka.”

[17Si Pilatus kumua in taniitu ampa'paan susur in endo wangko' Paska, sia musti mekar esa tou si pakabuin, kumiit ing kasalé'an é tou Yahudi.]

18Taan sé tou keli sé makali'us am bitu imangko'ke' taré mangé a si Pilatus, “Paténo Sia! Iwekaro mai si Barabas torona ami!”

19Si Barabas anio' ayuntep am bui ampa'paan sia mengasundur sé pemerénta Romawi wo imaté tou ang kota itu.

20Icasalé' woo i Pilatus wekarna si Yesus, ampa'paan in ituo makasapé' ka'i si Pilatus kumua in taangko' a sé tou keli itu. 21Taan makarepetke' taré sé tou keli itu masowat in taangko' a si Pilatus, “Isalipo Sia, isalipo Sia!”

22Wo icua i Pilatus ing kumatelu a sé tou keli itu, “En ulitna, kaléwo'an sapa réén e niéma' i Tou anio'? Mandé esake', ra'ica wana eng kaléwo-léwo'an si kinéréanku ai Sia si patus makéré in ukumen patén. Anaé, ru'du'ku oka tou en sumambok Sia wo iwekarku oka.”

23Taan pelesé-leséén érake' taré si Pilatus wo séra mengangko-ngangko' wo tumuntut wosama' si Yesus isalip. Sumiwakio' isérake' e imuntung, ampa'paan séra mengangko-ngangko'. 24Wo énan i Pilatus sapa en tinuntut é tou keli itu. 25An tutuw itu si Barabas an untep im bui ampa'paan masundur sé pemerénta wo ka'i maté tou, anaé sia iwekar i Pilatus iciit in aituntut éra. Taan si Yesus aisarakanna a sé tou keli wosama' okoien éra kiit ing kasalé'an éra.

Si Yesus aisalip

(Mat. 27:32-44; Mrk. 15:21-32; Yoh. 19:17-27)

26Wo si Yesus iwali é suraro Romawi kumesot ang kota Yerusalem. An uner in lalan séra meta'up wo si esa tou makangaran Simon tou Kirene si ang karoro'an i meuntep ing kota. Wo tangen éra sia wo papawuléng éra en salip i Yesus, akar wuléngenna en salip itu wo mawaya' an somoi i Yesus.

27Keli en tou sé makiit an somoi i Yesus. An uner éra awéan piraan wéwéné sé mengamé-ngamé' akar in sesendu'an oka ampa'paan en até éra wendu ulit. 28Wo si Yesus suméléng ai séra wo kumua, “Éi wéwéné-wéwéné Yerusalem! Tioo paamé'an iow Aku. Taan amé'ano mio' en owak iow in esa wo sé toyaang iow! 29Ampa'paan maai oka en témpona sé tou sumangkum oka ing kawenduan, akar sé tou makua oka in tana'i, ‘Pakakamangeno si wéwéné ra'ica kawisa maowa-owak, wo si wéwéné ra'ica kawisa méé toyaang wo si wéwéné ra'ica kawisa sumusu toyaang.’ 30#Hos. 10:8; Why. 6:16 Asi témpo itu sé tou okoien oka, akar séra tumo'tolo makua in tana'i a sé kuntu-kuntung, ‘Sa woo ro'na, tawunano mai im pokal kami!’ Wo makua a sé tola-tolaina in tana'i, ‘Sa woo ro'na, mokalo mai ai cami!’ 31Ampa'paan si kayu maséépé' niéma'o é tou tanu sia'i, wopé'taré sé kayu perao tantu lumébé mai. Eng kaangéanna Yaku si ra'ica meséa' niokoio é tou tanu sia'i, wopé'taré sé tou meséa' tantu lumébé mai in okoien.”

32Asi témpo itu, awéan ka'i rua tou walina, séra tou léwo' sé aiwali mai é suraro Romawi en ukumen im patén mewali-wali wo si Yesus. 33An tutuw éra icateka'o an esa tampa makangaran ‘ru'i in do'kos’ wo isalip éra si Yesus am bitu. Sé rua tou léwo' itu ka'i aisalip éra, si esa ang kakan wo si esa ang ka'biri-Na. 34#Mzm. 22:19 Wo si Yesus sumombayang, “O Amang, ampunganai séra, ampa'paan ra'ica kailekan éra sapa em pengaémaan éra.” Wo pewéténgen éra eng karai i Yesus ang kerapi in lumotréi.

35Keli sé tou makatulung am bitu wo sinéré éra waya sapa sé imamuali. Ang karoro'an in itu, sé kikiiten é tou Yahudi maséro' Sia, icua éra: “Sé tou walina ro'na lowiren-Na, intarépé', sa Sia wutu-wutul Mesias, Tou sinisir i Amang Kasuruan, mandéo Sia lumowir in owak-Na in esa.”

36Sé suraro ka'i mengara'i-ra'i Sia. Séra rumuru mangé ai Sia wo wéan éra mangé elepen anggor esem Sia, 37wo kumua, “Sa Ko kolano é tou Yahudi, lowireno mangé en owak-Mu!” 38A mangéna in do'kos i Yesus ang kayu salip, pinakuan esa papang si pinatican in tana'i, “Si anioo si Colano é tou Yahudi.”

39Esaan asé rua tou léwo' aisalip itu maojat si Yesus, icuana, “Ico anio' to si Kristus? Lowireno mio' en owak-Mu wo ka'i cami in dua!”

40Taan sia rinomaan i esa tou léwo' walina, icuana, “Ra'ica réén maindé' ko a si Amang Kasuruan? Ico ka'i mewali-wali makéré in ukuman tanu Sia. 41Kita in dua patus makéré ukuman ampa'paan kita makéré ukuman si patus suli' ang kaléwo-léwo'an niéma'ta. Taan si Tou anio' wutu-wutul ra'ica iméma' ing kaséaan mandé esake'.” 42Wo icuana a si Yesus, “Yesus, ta'néienai aku, sa Ko maai tanu Kolano sa.”

43Icua i Yesus ai sia, “En ulitna icua-Ku ai co, asi endo anio'ke', ico mewali-wali oka wo Yaku an sorga.” #23:43 “An sorga”: An teks aseli aipatic ‘Firdaus’, eng kaangéanna tampa lumoo-loor. Firdaus ka'i ngaran walina in sorga (2Kor. 12:4; Why. 2:7).

Si Yesus maté

(Mat. 27:45-56; Mrk. 15:33-41; Yoh. 19:28-30)

44Asi oras itu, makuao wona' in jam dua belas katoora i yéndo, tumarépé'anke'mai si yéndo mento' masendot. Pakasa in sangkum in tampa itu mariréimbeng akar asi jam tiga im bawaando. 45#Kel. 26:31-33 Wo eng kaéng pengakawu' si aiwérén am Balé Le'nas pengakawu' ing Kamar Le'nas wo ing Kamar Lume'na-le'nas mawirang maperua.

46 # Mzm. 31:6 Wo si Yesus kumua in taangko', “O Amang, ang kakawasaan-Muo, isarakan-Ku e mu'kur-Ku.” Kekawusai kumua in taniitu wo Sia maté.

47An tutuw sérén i kikiiten é suraro Romawi sapa e imamuali wo sia rumayo si Amang Kasuruan, icuana, “Si Tou anio' uli-ulit ra'ica wana kaséaan!”

48Sé tou keli sé mai mali'us asi tampa itu, séra pakasa imakaséré sapa e imamuali. Keséré éra in itu wo séra maréng ang karoro'- an in itu menepé-nepé' in owak ampa'paan en até éra wendu keli. 49#Luk. 8:2-3 Wo pakasa in tou sé wutu-wutul makatuus si Yesus cauntep ka'i sé wéwéné makii-kiit Sia tumo'tolke' mai ang Galilea, séra makatulung an tayang wo makaséré waya ing kinamamualian itu.

E mayat i Yesus aicubur

(Mat. 27:57-61; Mrk. 15:42-47; Yoh. 19:38-42)

50Awéan esa tou makangaran Yusuf, anggota Mahkamah Agama Yahudi, tou loor wo ka'i mengaéma' im butul an dior i Amang Kasuruan. 51Sia ang kota Arimatea owo an Yudea wo ang karoro'an i mengento-ngento' in oras i Amang Kasuruan mai Kumawasa tanu Kolano. Mandé sia anggota Mahkamah Agama taan ra'ica énanna sapa em pinusé' wo e niéma' é Mahkamah Agama itu andumoro' in ukuman si aiwéé a si Yesus. 52Wo sia mangé meta'up wo si Pilatus, pangilekenna e mayat i Yesus wosama' cuburna. 53Wo énan i Pilatus. Kumawus in itu sia mangé wo mangé tumpana e mayat i Yesus an salip wo saputenna ing kaéng lénen. Wo tekelna ang kubur, am bo'bok an tolaina wawatuan. Eng kubur itu ra'ipé' sumangkum winetaan i mayat. 54En endo itu tumena in endo tumu'tul in endo Sabat wo mekeremo, anaé tawio tumo'tol muka' in Sabat.

55Wo sé wéwéné sé imai ang Galilea owo sé mewali-wali wo si Yesus an tutuw Sia menonoué', séra kumiit ka'i ang karapi i Yusuf wo suméré ing kubur itu. Séra ka'i suméré tambisa e mayat i Yesus aitekel. 56#Kel. 20:10; Ul. 5:14 Kumawus in itu séra maréng angé en tumu'tul i nanamur wo in solo mawou manam en icisu' a mayat i Yesus. Wo a si endo Sabat séra mento' am pakasa in tawoien éra, kumiit in atoran an ukum Torat.

Atualmente Selecionado:

Lukas 23: TNT

Destaque

Copiar