Mbete Matiye 17
17
1Falu laɓ nam tɔtɔklɔ, mí Zezu fa̧h Piyer, Zak ke toŋnafal ye Za̧h. Ku laɓ niŋ. Ku hil kasaw ké gaŋ zeŋleŋleŋ ke hȩk woyri. 2Ké nun Piyer-ri mí mun Zezu sɔɓ na ɓoɗ. Nun ye ndu̧y kandɔk ndu̧yna seh. Gar ye ba, su nda̧w nda̧w kandɔk hɔrɔ-teh gel. 3Mí í ko. Moyiz ke Eli gun nzak pihna Ŋgerzah a lewsa̧ri ti̧h nun woyri gi ziŋ Zezu. Ku ƴo lu mberem ziŋ ni.
4Piyer ba, ɓah hi̧ Zezu ɓahri : « Ŋgernzuk, gel ké nah ƴo ri-ay su-su. Mu hi̧ na náh pɔr vulri ɓa say. A mbew ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. »
5Piyer ƴo ɓah ɓay kɔɓ ɓáy, í ko, ɗikmambam#17.5 Í mgba Mbete Exode 40.34-35 tuh ke gel ki̧na-ay. ndu̧y ɓa puki gi guɓ tul woyri gbukru bale, kusol ti̧h ke ɓilu ɓahri : « A ye-ay, ke ɓa gun sana bi. Ke rih law bi mbamba. Í lah nzak ye. »
6Nzuk-dih fal yeri ɓá lah kusol ké mgbe ra le, ku lih gba̧y guɓ siɓa. Tem mun woyri ti̧h kereŋ. 7Zezu ba, loh ma ta̧w woyri. Ke za mun woyri, mí ke ɓahri : « Í ur síɓa, í laɓ hȩkme ya. »
8Ku ɔr nun woyri bale, ku ko nzuku ya. Sa ɓa Zezu ke hȩk ye mí toŋ.
9Ɗerna woyri ke tul kasaw ra, Zezu hah niri ɓáh ɓayu. Ke ɓahri se : « Í ɓah ɓay feri ké ti̧h nun woiri-aw hi̧ nzuk ɓá lah ya. Gun nzuk pirmatul ɓá ti̧h ke puh záh ke pa̧ymun a foyu dara í ɓah ɓayu ɓáy. »
10Mí nzuk-dih fal yeri ké sayaw vbi ni ɓahri : « Mí-aw ba, ɓay fe mí nzuk-sɔk mbete bolkusol Ŋgerzahri ɓahri, Eli a lewsa̧ ɓay gi pol dara Ŋgermbay ɓay gi ɓáy ra le ? »
11Ke yih nzak woyri ɓahri : « Eli ɓay gi-gi gaŋ ɓay ké lek gel ɓá ƴo gelu hi̧ Ŋgermbay#17.11 Ɓay gina Eli na ɓil Mbete Malachie 3.23-24. . 12Mi ƴo ɓah hi̧ wuri ɓahri, Eli gi da, mí ku tu ni ya. Wara le ku laɓ ni kandɔk kú-u yih. Gun nzuk pirmatul ɓay ko seh ké ndɔk nzukri-aw kaŋ pi. »
13Wara mí nzuk-dih fal yeri tu ɓahri, Zezu ɓah ɓay tul Za̧h batisi.
14-15Ku si ka̧h ta̧w daɓa nzukri bale, nzuk mbew ti̧h ké sakra woyri gi huk siɓa ké pol Zezu ɓahri : « Ŋgernzuk, mú mgba in ziŋ gun bi-ay ɓay fe le, sena kuku ƴo laɓ ni mo̧r mo̧r. Kpatara sena ra ƴo mgba ni ndih ni ɓu hɔrɔ ya le, ndih ni ɓu mbih. 16Mi maŋ ni si keni ta̧w nzuk-dih fal wori, mí ŋgerna woyri mah gah ni ya. »
17Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, nzuk pirmatulri ké kerɓay woiri ra̧-ra̧h, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Í gi ke gun ra hi̧ mi. »
18Zezu hah záh ra hi̧ záh ti̧h poŋ gun ra, mí ke ziŋ mun gahna ɓa suki. 19Wara mí nzuk-dih fal Zezuri loh ma ta̧w ye. Ku ɓah hi̧ ni ɓahri : « Ɓay fe mí ŋgerna wah mah ni̧h záh ra ya le ? »
20Bale Zezu ɓah hi̧ niri : « Ɓay tul kanlaw woiri ké kehr seɗe. Ɓa ketina, mí-i ƴo ɓah hi̧ wuri ɓahri, law woiri ƴo mbew ke law Ŋgerzah mí eŋ ti̧hri ŋgahla le#17.20 Sa̧w nzak ɓahri, ti̧hri mutar, mí karaŋri tu mutar ya. Nzuk sɔɓ mbete vbeh ɓahri, ti̧hri ŋgahla ɓay hi̧ karaŋri ɓá lah ɓa gah-u., i ɓay ɓah hi̧ baw kasaw ké na-aw ɓahri, kasaw ɓá loh ke gelaw si na sa̧ le, baw kasaw ra ɓay loh-u gaŋ ba. Ɓay tul law woiri ké ƴo mbew ke law Ŋgerzah mí fe mbew ké ɓay mba wuri ta-a. » 21#17.21 Mbete sa̧w nzakri ɓa ŋgi̧-u ta ke gel ki̧na-ay ya. Mbete a haniri ƴo keni.
22Zezu ke nzuk-dih fal yeri si mbu̧h hani ké Galile bale, ke ɓah ɓay hi̧ niri ra ɓáy ɓahri, zah le, ku ɓay ndoh ni ye gun nzuk pirmatul ndɔk nzukri. 23Ku í ni. Nam a sayu dale, ke ɓay ti̧h ke puh záhri ke pa̧ymun a foyu.
Mí ɓayu hi̧ law nzuk-dih fal yeri sa̧-sa̧h.
24Ku ka̧h Kapernayum bale, nzuk-mbu̧h lampoh ɓay vul kani Ŋgerzahri#17.24 Ɓay tu ɓay lampoh vul kani Ŋgerzah, í ki̧ Mbete Exode 31.13 ke falu. Wo̧rori gbam ur ke tul wo̧rori ké mbihmbam woyri laɓ bon seɗe si ka̧h tul kpɔkɔrɔri, ku puh lampoh ɓa drakma seɗe. Drakma mbew mah lari pihna nam mbew. Ku puh mbihmbam ke mbihmbam ɓa fe puhna hi̧ Ŋgerzah. Nzuk fe puhnari bale, mgba sa̧w vul kani Ŋgerzah keni. gi ta̧w Piyer, mí ku ɓahri : « Metere woiri ra ta puh lampoh vul kani Ŋgerzah ya le ? »
25Ke ɓahri, ke pu-puh.
Piyer ɓá rih ɓil vul bale, Zezu kuŋ ni ɓahri : « Piyer, mu ker ani le ? Mbay tusiɓari ya̧ lampoh ké ta̧w gun puh woyri mini ké ta̧w nzuk a kalari le ? »
26Ke ɓahri : « Ké ta̧w nzuk a kalari. »
Bale Zezu ɓahri : « Kandɔkaw gaŋ dale, ɓay lampoh yiŋ tul gun puh-uri ya. 27Mí ɓayu ɓá ti̧h ɓa ndaw lihna hi̧ nzukri-aw ya le, mú si ɓu ɓoy. Nzuy ké mu mgba ra, mú ɗah haw ye. Mu zíŋ ri lari, mú si puh keni lampoh tul wah ke hani. »
Atualmente Selecionado:
Mbete Matiye 17: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
