Mbete Matiye 16
16
1Fariziri ke sadusiri gi ta̧w Zezu. Ku fah ni, ku vbi ni ɓay ké laɓ fe saŋ ké sɔk ɓahri, sa̧w ŋgerna ye ur ke nunmbam hi̧ niri kú ko. 2Zezu ba, ɓah hi̧ niri ɓahri : « [Gel ɓa bɔklew mí seh na nzȩh#16.2 Sa̧w nzak vbeh ɓahri, nunmbam si̧h welele. Nunmbam si̧h welele ké tusiɓa ziɓri laɓ hi̧ kandɔk seh na nzȩh ké tusiɓa karaŋri le, nah sɔɓ kandɔkaw ɓay hi̧ kerɓayu ɓa máh hani. le, i ƴo ɓahri, pele le gel ɓay teh ɓa suki. 3Gel tipele, i ko ɗikmambam a si̧h-u ke a piri-u zukru hani hi̧ gel na gbukru le, i ɓahri, guri-ay, mbam ɓay to-u. Fe ké ti̧h nun woiri ké nunmbam, i ko-ko ra wa, ani mí sa̧w feri ké sɔk ɓahri, Ŋgermbay ti̧h tul woiri da ra ma, mí i tu ya le wo ?]#16.3 Mbete sa̧w nzak Ŋgerzah a haniri ta ke gel ki̧na 2 ke 3 ya. 4Gun tukala-ayri, ku poŋ Ŋgerzah, ku ti̧h kala si mbi záh a ɓoru. Ku nzah ɓay ko fe saŋ. Mí fe saŋ le ku ɓay ko ya. Sa ɓa fe saŋ a a̧y ké laɓ Zonas#16.4 Ɓay tu ɓay fe saŋ ké laɓ Zonas, í ki̧ Mbete Jonas. Ŋgerzah hi̧ mahnzuy tu̧h ni, ke na ɓil mahnzuy nam say dara mahnzuy el sam ni ke nun ɓáy. gun nzak pihna Ŋgerzah a lewsa̧ kú-u ko-aw. »
Mí ke sɔɓ fal hi̧ niri, ke tɔr ma kala mbih.
5Tɔrna woyri-aw, nzuk-dih fal yeri yȩkre peŋ. 6Mí Zezu ɓah hi̧ niri ɓahri : « Í ko-ko, í ru̧ ke mun woiri ɓay is fariziri ke ɓay is sadusiri. »
7Bale ku fah ɓay ké haŋsekle woyri ɓahri : « Ɓay tul peŋ ké nah fa̧h ya mí ke ɓah ɓayaw. »
8Zezu tu kerɓay woyri bale, ke ɓahri : « Ani mí i ƴo fah ɓay ke haniri le ? A woiri nzukri ké law woiri kehr seɗe, i ƴo ɓahri, ɓay peŋ ké i fa̧h ya ɓayu mí-i ɓah ɓay is fariziri ke sadusiri-aw le ? 9I tu ya ɓáy lo ? Law woiri ker ɓay ya le wo ? Peŋ ndiɓi ké nzukri sɔɗ sɔɗ boh gel ndiɓi (5.000) su̧ ra wa, i fa̧h tɔru mbah tɔlɔ ka̧h ani le ? 10Peŋ toŋndɔk say ké nzukri sɔɗ sɔɗ boh gel niŋ (4.000) su̧ ra ba wa, i fa̧h tɔru mbah tɔlɔ ka̧h ani le ? 11Ani mí i tu ya le ? Mi ɓah ɓay peŋ a su̧ ma ɓil ya. Mi ɓahri se, í ru̧ ke mun woiri ɓay tul is fariziri ke sadusiri. »
12Wara mí law woyri guh. Ta ɓa ɓay is a tɔ́k peŋ mí Zezu ɓah ɓayu ya. Wara le ke ɓah ɓay fe firma ké fariziri ke sadusiri firma nzukri.
13Ku ka̧h fál kɔr Sezareh-Filiɓ bale, Zezu nzah nzak nzuk-dih fal yeri ɓahri, a ye gun nzuk pirmatul ra wa, nzukri ɗi ni ɓa sam nzuk a suŋ le ?
14Ku ɓahri, nzukri ɗi ni ɓa Za̧h batisi, nzuk a ɓoruri ba, ɗi ni ɓa gun nzak pihna Ŋgerzah a lewsa̧ kandɔk Eli mini Zeremi mini gun nzak pihna Ŋgerzah a hani ɓáy ké ti̧h ke puh záh.
15Zezu el ɓahri se : « A woiri ba, i ɗi gun nzuk pirmatul ɓa sam nzuk a suŋ le ? »
16Bale Simu Piyer yih nzak ye ɓahri : « A wo mú-u ɓa Ŋgermbay a ye gun Ŋgerzah ké ɓa Ŋgɔhnzuk. »
17Zezu ba, ɓahri : « Simu, gun Zonas, pol tehna Ŋgerzah teh tul wo ɓay fe le, ta ɓa nzuk pirmatul mí ten sa̧wɓayay hi̧ mu ya. Wara le ɓa bah bi ké nunmbam mí hi̧ mu tu. 18A bi le mi ƴo ɓah hi̧ mu ɓahri se, a wo ra, mi tu mu ɓa gun kasaw#16.18 Sa̧w nzak vbeh ɓahri, petros. Petros sɔk ɓahri, gun kasaw. Nzak faraŋse vbeh ɓahri, pierre. . Mí ké tul kasaw a bawu-ay#16.18 Sa̧w nzak vbeh ɓahri, petra. Petra na ɓoɗ ke petros. Petra sɔk ɓahri, fihri. Sa̧wu mí nah sɔɓ vbeh ɓahri, kasaw a bawu. mi ɓay mboh ri vul bi. Vulu ɓa nzukri kú-u ɓa sa̧w in bi. Tuhru nzak vul Hul ta mbih in biri ɓa mgbal ya. 19Mí mi hí̧ mu lakele nzak vul ké rih ɓil lák mbay a nzuk nunmbam. Ɓay a suŋ ké mu ŋga̧h ké tusiɓa, ɓa ɓay ké ŋga̧-ŋga̧h ké nunmbam. Ɓay a a̧y ké mu sel ké tusiɓa, ɓa ɓay ké se-sel ké nunmbam. »
20Wara mí Zezu ɓah ɓa teh-u hi̧ niri ɓahri, kú ɓah ɓay riŋ ɗina Ŋgermbay ye ra hi̧ nzuk ya.
21Ur ke sa̧wseh-u-aw dale, Zezu titil sɔk ɓa teh-u hi̧ nzuk-dih fal yeri ɓahri se, na ani ani gaŋ kara a ye ke sí Zurusalem, ke kó seh ké ndɔk ŋgernzuk puh woyri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri, ke hú hul. Nam a sayu le, ke tí̧h ke puh záh ke pa̧ymun a foyu.
22Piyer ba, ten Zezu bale, ke hah Zezu ɓahri : « Gaŋ wah, Ŋgerzah ɓá kɔr mu rɔkɔ fe-u ɓá ti̧h tul wo. »
23Zezu sɔɓ fal hi̧ Piyer, mí ke ɓahri : « Mbay záh tukala a wo nzukbaa, mú el ké ta̧w bi ma fal. Mu ɓa gburka ɓay nde mi ɓay fe le, law wo mbi kerɓay Ŋgerzah ya, wara le ɓa kerɓay nzukri. »
24Wara mí Zezu el ɓah hi̧ nzuk-dih fal yeri ɓahri : « Nzuk yih dih fal bi le, ké poŋ kerɓay tul ye ma fal, ké mbi kpuh vbatay hul ye, ké suk, ké dih keni fal bi, 25ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi le, ke ɓay ziŋ ɔkna. 26Fe ziŋna fe mí ɓay ti̧h suk hi̧ nzuk a a̧y ké su̧ tukala hu̧m hu̧m mí ɔ́h ɓay ye ɓa kɔk fe le ? Uwa. Fe ziŋna fe mí nzuku ɓay mbi soh keni tul ye le wo ? 27Ɓayu ké nam toŋ ŋgi̧ mba ɓay gun nzuk pirmatul ɓá gi ke tem nzak pihna yeri ɓil riŋ ɗina bah ye. Ur ke seh-u-aw ke ɓay el hi̧ nzuk mbew mbew gbam kpaŋndɔk pihna ye pihna ye#16.27 Í mgba Siŋ (Psaume) 28.4 ke 62.12 tuh ke gel ki̧na-ay.. 28Ɓa ketina, mí-i ƴo ɓah hi̧ wuri ɓahri, nzuk a haniri ké sakra wah-ay, hul ta ɗi riŋ woyri ya ɓáy, mí ku kó gina gun nzuk pirmatul ɓil lák mbay ye ke nun woyri. »
Atualmente Selecionado:
Mbete Matiye 16: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
