Mbete Matiye 13
13
1Namu-aw Zezu ti̧h si kaɓ ɓel mahmbih, 2mí daɓa nzukri ɓa ŋgi̧-u gi mbu̧h hani mer mer ké ta̧w ye. Kaŋ mí Zezu hil ɓil kumbon ziŋ gel kaɓna. Nzukri-aw gbam ba, ƴo nzak mahmbih.
3Mí ke ɓah lawɓayri ɓa ŋgi̧-u hi̧ niri. Ke ɓahri : « Í lah, nzuk mbew si waka ɓay mi̧h mi̧hri. 4Ke ƴo mi̧h mi̧hri bale, mi̧hri a haniri ku̧ mahful, mí gundoyri gi te mi̧hri-u ɔh riw. 5Mi̧hri a ɓoruri ku̧ gel ké siɓa ŋgi̧ ri ya ɓay kasaw ké na diŋu bale, fe pay ra ti̧h ɓa gah-u ɓay siɓa ké ŋgi̧ ya. 6Seh ɓá zaŋ le, fe pay ra ri̧h mí el ho̧k wɔh ɓay sa̧wu ké ɓar siɓa ya. 7Mi̧hri fe pay a haniri ku̧ gel ŋgatukru. Fe pay ra ti̧h. Ŋgatukru kara ti̧h pi, mí ŋgatukru kaŋ tul fe pay ra kiɗik kiɗik fu̧h fe pay ra hi̧ ŋgu̧-ŋgu̧h. 8Mi̧hri a ɓoruri ba, ku̧ siɓa a suki. Fe payri ra ti̧h mí leh ɓa suki. Sa̧wu mbew le, leh sɔɗ, a ɓoru leh bon tɔtɔklɔ, a haniri ba, leh bon say.
9Nzuk ké ƴo ke suk-lah ɓay le, ké lah. »
10Nzukri ké dih fal Zezu loh ma ta̧w ye, mí ku ɓahri : « Ɓay fe mú-u ɓah ɓay hi̧ nzukri ke lawɓay le ? »
11Bale Zezu yih nzak woyri ɓahri se : « Ɓay fe le a woiri ra Ŋgerzah ten sa̧wɓay lák mbay a nunmbam ké mú̧-mu̧h hi̧ wuri i lah. Nzuk a kalari ba, sa̧wu mu̧-mu̧h ké ta̧w woyri. 12Nzuk a suŋ suŋ ké ƴo ke suk ké lah ɓay le, ke ɓay lah ɓay a mbaŋuri ŋgi̧ wɔrɔk wɔrɔk kal a pol ra ɓáy. Nzuk a a̧y ké ta ke suk-lah ɓay ya le, ɓay a ndi̧ ké-e lah-aw ɓay zi wu̧m. 13Sa̧wu mí-i ƴo ɓah ke lawɓay ɓay fe le, nzuk ko ke nun kara na nun ye da̧h. Ke lah ke suk kara na ni ɓa tuku. Ɓayu guh law ye ya. 14Ké ta̧w woyri le ɓay ké Ezay gun nzak pihna Ŋgerzah ɓah ra mgba tul woyri kȩk. Ke ɓahri, nzukri-ay lah ke suk woyri la-lah, mí ɓayu guh law woyri ya. Ku ko ke nun woyri ko-ko, mí ku ko da̧h. 15Nzukri-aw, ku hi̧ law woyri kpuh. Ku mbih suk woyri liɓ liɓ rɔkɔ kú lah. Ku u̧m nun si̧h si̧h rɔkɔ kú ko le, law woyri ɓá guh hi̧ ku el gi ta̧w bi ɓay mí gah niri.
16A woiri ba, pol tehna Ŋgerzah teh tul woiri ɓay fe le, nun woiri ko-ko, suk woiri lah ɓayu lah. 17Pol tehna ƴo ziŋ wuri gaŋ. Mi ɓahri se, daɓa gun nzak pihna Ŋgerzah a lewsa̧ri ke daɓa nzuk a lewsa̧ri kú-u tu ni ɓa záh woyri, ku taw ɓay ko fe ké i ko-ay, mí nun woyri ko ya. Ku taw ɓay lah ɓay ké i lah-ay, mí suk woyri lah ya.
18Kaŋaw le í lah sa̧w lawɓay nzuk-mi̧h mi̧hri fe pay ra wara. 19Nzukri gbam ké lah ɓay lák mbay a nunmbam kú-u hi̧ ɓayu guh law woyri ya ra, záh law a pipiri-u gi lu ɓayu ké law woyri. A woyri ra ku ɓa mahful ké mi̧hri fe pay ku̧ ri. 20Gel ké siɓa ŋgi̧ ya ɓay kasaw ké na diŋu ra ɓa nzukri kú-u lah ɓay Ŋgerzah bale, ku ya̧ ɓayu ɓa gah-u ke law rihna. 21Mí ɓayu ɓar sa̧w ya. Kal ɓa kuna. Fe-leh law ziŋ niri mini nzuk laɓ niri koseh ɓay tul ɓay lák mbay Ŋgerzah ra le, ɓayu el ti̧h ɓa ndaw ké nun woyri. 22Gel ŋgatukru ké mi̧hri ku̧ ri ra ɓa nzukri ké lah ɓay lák mbay Ŋgerzah, mí kerɓay tukala ke kuŋɓay fe ziŋnari ri̧h law woyri. Fe-uri kaŋ tul nzukuri-aw kiɗik kiɗik. Ku hi̧ Ŋgerzah lak mbay tul woyri ya. Ku ŋgu̧-ŋgu̧h, ku le-lehna ya. 23Siɓa a suki ké mi̧hri fe pay ku̧ ri ra ɓa nzukri ké lah ɓay lák mbay Ŋgerzah, mí ɓayu guh law woyri. Ku hi̧ ɓayu leh lehna kandɔk sa̧w fe pay mbew le, leh sɔɗ, a ɓoru leh bon tɔtɔklɔ, a ɓoru ba, leh bon say. »
24Zezu ɓah lawɓay a ɓoru hi̧ nzukri, ke ɓahri : « Lák mbay a nunmbam na kandɔkay : nzuk a hani mbew si ruh naŋ a suki ɓil waka ye. 25Suŋ sih, nzukri na nam dale, nzukbaa ye gi ruh kɔk naŋ ku̧ ɓilu, mí ke tɔr. 26Naŋ a suki hu̧h, sel, laɓ ti̧hri ba, kɔk naŋ ra sel pi. 27Gun-laɓ pihna yeri ɓá ko kɔk naŋ ra bale, ku si vbi bahgaŋ woyri ɓahri : “Mbay, naŋ a suki mí i ruh ku̧ waka woiri wa, ani mí kɔk naŋ ti̧h ri pi-aw le ?”
28Ke yih nzak woyri ɓahri : “Nzukbaa bi mí laɓ fe-aw.”
Gun-laɓ pihna yeri el vbi ni ɓayay : “Mí le, náh lur kɔk naŋ ra ku̧ kpah le ?”
29Bale ke ɓah ɓay kandɔkay : “Í lur aŋay ya rɔkɔ í lur ke naŋ a suki pi. 30Í poŋ naŋ a suki ɓá nze. Few-vbeh naŋ dale, mi ɓáh hi̧ nzuk-vbeh naŋri ɓá vbeh naŋ a suki dale, kú mbu̧h ti̧hri naŋ bi ku̧ ɓil pul. Kɔk naŋ ba, kú nzuh ke hɔrɔ.” »
31Ke ɓah lawɓay a ɓoru ɓáy : « Lák mbay a nunmbam na kandɔk mi̧hri fe pay a hani#13.31 Mi̧hri fe pay a hani ɓa mi̧hri kú-u ɗi ke sa̧w nzak ɓa mutar. Kpuh-u, nzukri kar keni gahay ɓay hi̧ ba̧ri-u fu ɓa suki. ké nzuk mi̧h ké waka. 32Mi̧hri ra hu̧h ya kalak kaŋto. Hu̧hna-aw mah ke mi̧hri fe a ɓoruri ya. Gelke fe pay ra ti̧h mí hu̧h dale, laɓ kpuh ké hu̧h mba tul fe pay a ɓoruri gbam. Ndɔkuri vba gbah gbah, mí gundoyri gi laɓ ri vul. »
33Ke ɓah lawɓay a ɓoru ra ɓáy : « Lák mbay a nunmbam na kandɔk is ké wu̧ynzuk wa̧h ɓil som kilo bon seɗe. Is ra rih ɓil som ya̧h ya̧h mí ur som mbah fe ɓaɗ ɓaɗ. »
34Ɓayawri gbam ké Zezu ɓah hi̧ daɓa nzukri-aw ɓa lawɓay. Lawɓay ta-a le, ke ɓah ya. 35Fe laɓna-aw hi̧ ɓay ké gun nzak pihna Ŋgerzah a lewsa̧ ɓah ra laɓ ƴo gelu. Ɓayu ɓahri, haw ye ah ti̧h ke lawɓay. Sa̧wɓayri ké mu̧h ke sew ké Ŋgerzah laɓ nunmbam ke tusiɓa ke titilu da̧y ra, ke ten na gel a teh-u.
36Wara mí Zezu poŋ daɓa nzukri ra tɔr, mí ke el si rih vul. Dale nzuk-dih fal yeri loh ma ta̧w ye. Ku ɓahri : « Metere, mú ten sa̧w lawɓay kɔk naŋ ra hi̧ na náh lah. »
37Ke yih nzak woyri ɓahri : « Nzuk-ruh mi̧hri naŋ a suki ɓa gun nzuk pirmatul-ay. 38Waka mí ɓa tusiɓa ke nunmbam ké Ŋgerzah laɓ. Mi̧hri naŋ a suki ɓa nzukri ké ɓa gun puh lakna a nunmbamri. Kɔk naŋ ba, ɓa nzukri ké ɓa gun mbay záh tukalari a ye záh law a pipiri-u. 39Nzukbaa ké ruh kɔk naŋ ra ɓa mbay záh tukala. Few-vbeh naŋ ra ɓa ɔ́h nam tukala. Nzuk vbeh naŋri ba, ɓa tem nzak pihna Ŋgerzahri. 40Kandɔk kɔk naŋ kú-u nzuh ke hɔrɔ ra, kaŋaw mí ɓa ɔ́h nam tukala. 41Gun nzuk pirmatul ɓay pih tem nzak pihna yeri. Ku lúr sam ndaw lihnari ké ɓil puh lakna ye gbam ké hi̧ nzukri saŋ Ŋgerzah, ku lúr nzuk-poŋ Ŋgerzahri pi. 42Ku fá̧h fe-awri-aw ke nzukuri-aw gbam vbuk ku̧ ɓil hɔrɔ. Gelu-aw mí ku ɓay vuh rew ke mbihnun darara darara. Ku sú̧ sel woyri ŋger ŋger. 43Wara mí nzukri ké tu Ŋgerzah ɓa záh woyri le, ku ɓay ndu̧y ɓil lák mbay bah woyri kandɔk seh ké ndu̧y kaŋ. Nzuk ké ƴo ke suk-lah ɓay le, ké lah.
44Lák mbay a nunmbam na kandɔk fe ziŋna a luki ké mu̧h ké waka. Nzuk ziŋ fe-u. Ke el mbi si mu̧h ma pol. Ɓay law rihna tul fe ziŋna-u, ke si puh mí ke fa̧h fe yeri riw yeh dara mí ke el lari-u si yeh keni waka ké fe ziŋna mu̧h ri ra.
45Lák mbay a nunmbam ra ɓáy, lák mbayu na kandɔk nzuk fe yehna ké ƴah zaw lari a ŋgeru. 46Ke ziŋ zaw ra mbew bale, ke si puh mí ke fa̧h fe yeri riw yeh dara mí ke el lari-u si yeh keni zaw lari a ŋgeru ra.
47Lák mbay a nunmbam ra ɓáy, lák mbayu na kandɔk kȩke ké nzuk sa̧h ɓil mbih. Ke mgba keni nzuyri ɓoɗ ɓoɗ gbam. 48Kȩke ra mbah tuɓ tuɓ dale, ke kɔklɔ ti̧h kala. Ke san nzuy a sukiri. Nzuy a suya-uri ba, ke poŋ ku̧ kpah. 49Kaŋaw mí ɓa ɔ́h nam tukala. Tem nzak pihna Ŋgerzahri ɓay ti̧h ke gelri gbam ké tusiɓa, ku sán nzukri ké tu Ŋgerzah ɓa záh woyri. 50Nzuk a a̧yri kú-u ɓa gun záh law a pipiri-u ba, ku vbúk niri ku̧ ɓil hɔrɔ. Gelu-aw mí ku ɓay vuh rew ke mbihnun darara darara, ku sú̧ sel ŋger ŋger. »
51Zezu el ɓahri : « Lawɓayri ké mi ɓah riway wa, i la-lah gaŋ le ? »
Ku ɓahri : « Nah la-lah. »
52Ke el ɓah hi̧ niri ɓahri : « Sa̧wu mí nzuk a suŋ suŋ gbam ké sɔk ɓay mbete bolkusol Ŋgerzah mí ke tih ke lák mbay ye ra, ke na kandɔk nzuk puh. Fe a ta̧wuri ke fe a foyuri ŋgi̧ ké ta̧w ye, mí ke ten wal hi̧ nzuk kerpuh-uri. »
53Zezu ɔh firma nzukri lawɓay yeri, mí ke loh ma gel a ɓoru. 54Ke si ka̧h puh ké-e hu̧h ké ri, mí ke firma nzuk puh yeri ɓay lák mbay Ŋgerzah ké vul misoŋ. Law nzukri na niri ɓa saŋ. Ku ɓahri se : « Sa̧w ru̧na ye ur ke fál suŋ le ? Sa̧w ŋgerna ye ɓa fe le ? 55Bah ye ɓa nzuk-ɓar kpuh ya wa ? Mah ye ɓa Mari ya le ? Zak, Zezeɓ#13.55 Mbete Marki 6.3 sɔk riŋ Zezeɓ ke riŋ ye a ɓoru ké ɓa Zoze., Simu, Zuda, ku ɓa yi̧n yeri ya le wo ? 56Manah yeri ƴo ziŋ na-ay pi ya le ? Mí-aw ba, sa̧w feri-ay ur ke fál suŋ le ? »
57Ɓay Zezu zɔr law woyri. Zezu ba, el ɓahri : « Gelri ɓoɗ ɓoɗ, ku ƴo hȩk gun nzak pihna Ŋgerzah. Sa ɓa nzukri ké puh ye ke yi̧n yeri, mí ku hȩk ni ya. »
58Kandɔkaw mí Zezu laɓ fe saŋri ŋgi̧ ya ké puh ye ɓay law woyri ké ta ziŋ ni ya.
Atualmente Selecionado:
Mbete Matiye 13: SIAFNK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
