MATIU 28

Ge Jisus Hiɛ

(Mak 16:1-10; Luk 24:1-12; Jon 20:1-10)

1Aka na tụ Ụjita-ụhinjanụ keshici, iyi heri nụ ụjita ulade, nu uvwungwa dididi, ge Meri biyikwo ata bu Magdala, ne Meri yebi zhe maa ɛ kwubɛ u'uye ata.#Mat 27:56; Luk 8:2 2Aa kwụbɛ ta cɛnjɛ to zhingotu duwa duwa, iwɛnɛ ta butumwa ba Agwangwama banɛ na azuba, bee kezhe. Baa zhajɛ bee jirinjii utayɛ ata beye, baa jɛjɛ nu bwa. 3Ụsụbwa ubwa ụ shɛ gana ɛbɛrɛ, tugwuno tu bwa tɛ cɛnjɛmɛ paawụụ. 4Inyɛsɛ ibwɛ shɛ angbaracɛ ebe u'uye, aa zhɛgɛda, ee tilegeni gana atwa na 'wegeni.#Mat 27:62-66

5Ama butumwa ata ba azuba hiɛŋ eyikwo ata, Ahiɛba eyikwo ga, ta nda ma inyɛsɛ o. M mepi maa hia jalakaka Jisus ata ee tegeni nrɛ nụ ụ'wụ'wụ-batanɛ. 6Bu zasaba ya epe o, bi hiwa gana ata tu baa dumwa la. Zhajɛ ma hiɛ kwụbɛ ofwo na ee ge wecicinji bu.#28:6 ee ge wecicinji bu: Tɛjɛshɛrɛga tu ko ti hiɛŋ, ofwo na Agwangwama ge weci. 7Zhaga ma kakayɛ maa hi mbishe eseshi-iyi ubwa maa, Bi hiwa no tu'wo, bi zhɛ mo hi hwulono ba zha Galili. Apata ɛhi zhɛ hia kwụba bụ. Zhaga ma, N hi mbiswo ya.#Mat 26:32; 28:16; Jon 21:1-23

8Ee beni ga no olugwo u'uye ata kakayɛ, ni inyɛsɛ keeni unyasa ụ'wụtụ, ee gezhiji, ee mbishe eseshi-iyi ubwa.

9Eshigiri, ge Jisus twa na aba, tɛ ɛ zhɛ, bɛɛ hiɛŋ aŋ, Okwu ma yoo! Aa zhajɛ pu bwa, aa 'imɛ ɛvwɛvwɛjɛ ubwa dimi, aa zhɛbɛ bụ.#Jon 20:14-18 10Nazhɛ ge Jisus hiɛŋ aŋ, Ta nda ma inyɛsɛ o. Zhaga mbishe ma miaụŋ-mo-bino mi maa ga zhajɛ Galili, apata ɛɛ zhɛ ma n kwụba.

Angbaracɛ Shepi Unabarɛ ee Mbishe Ehiu Onongbo

11Aka na te eyikwo ata hwuri, nazhɛ umeseyi uko na ashashɛ angbaracɛ ata, teni nụ ụshɛpwụ ata ụ'wụtụ, ee mbishi ehiu onongbo unabarɛ iyi nɛ tenenji kpaaŋ.#Mat 27:62-66 12Ibɛ po aa ụlwatagwụ tu n-nyarɛ, aka na ta a njɛ ushaura, ee peni asaza ukwuribi duwa, 13ɛɛ hiɛŋ aŋ, Na duma ma maa eseshi-iyi ubwa aba zhajɛ nụ ụjita, ee zunji ru'wo ru bwa, aka na oto woto malabụ. 14Yaa shɛ iwɛ gɛ teni ugwomina na acɛbɛ, amɛ ubwa zhɛ o lomo no tu, ibɛ du zhɛ ya nda maa kede ohwulu ihi herikeni ya o.

15Ee leshiji ukwuribi, aa njɛ ga gana ata ee mbishi aŋ. Unabarɛ iwɛ ɛtɛ kaa mburusonu na ashashɛ Eju uuwa i ci taa hwayɛ.

Eseshi-iyi Jisus Kwụbɛ Bụ

(Mak 16:14-18; Luk 24:36-49; Jon 20:19-23; Ugo 1:6-8)

16Nazhɛ eseshi-iyi umpwa-nu-boo-ko zhe Galili, no ofwo ishɛmɛ ɛtɛ ge Jisus peni aŋ la unu. 17Aka na ta a kwụbɛ bụ, aa mama 'wɛŋ na cɛnjɛ, nɛ ɛvwɛvwɛjɛ ubwa. Ama atwa oko na ashashɛ aba, a ta 'yajɛ waa oruwo. 18Ge Jisus zhajɛ, bɛɛ hiɛŋ aŋ, E m peni ya ụhwada we elele na namɛ na azuba keeni unaa na namɛ nu unyizo. 19Ibɛ po zhaga ma, nda ma edenji kpaaŋ eseshi-iyi. Nda aŋ ma ubaptizim, ni izeci Bishi, ni inɛ Yɛu keeni inɛ Mpiala mi Tijilo.#Luk 24:47; Ugo 1:8 20No mbisogono aŋ ma iyi elele nɛ Ngee hi peni-unu ibɛ. Hioko ma, N namɛ ne hiŋ tutu ukwunanga sara ga.

Atualmente Selecionado:

MATIU 28: RBT

Destaque

Copiar