MATIU 25

N-ndumwa Tumanganjɛ iwɛ Showo Umpwa Shɛ na Shɛ Shɛ Asapa

1Cɛnjɛ-ta-tugwama ta Azuba ti zhɛ ta sha hwuŋ na aka ata, gana showo umpwa shɛ na shi ta shɛ asapa, shɛ na shi suji asụtụla aba, ee beni maa e teji bwolo-be-eyikwo uhwaŋna. 2Showo sha ata shɛ ta, na amɛ aba, shɛ lagwụmɛ, shɛ ta shɛ incɛ.#Mat 7:24-27 3Ma shɛ ta shɛ lagwụmɛ, shi suji asụtụla aba, a 'waŋnɛ shɛ manɛbɛ ma asụtụla o. 4Ama ma shɛ ta shɛ incɛ, shɛ 'waŋnɛ manɛbɛ ma asụtụla ne ebene aba. 5Ama gana na to bwolo-be-eyikwo njɛ ti'insu na tizhajɛ tu bwa, aa ta ya ozhilwo kpaaŋ aba, ee leyi du malabụ.

6Tụ ụjita dwonu, n'ungwa mɛ shɛnjɛ ya, ɛɛ hiɛŋ, Bwolo-be-eyikwo ye be ci ma o, zhaga taga bụ ma uhwaŋna. 7Nazhɛ showo sha ata shɛ ishajɛ kpaaŋ aba, shaa nanganganɛ asụtụla aba. 8Shɛlagwụ shi hiɛŋ a na ata incɛ, Iti piɛ ma kaa manɛbɛ mi hiŋ cwɛŋ, iwɛnɛ ta asụtụla tu a jala tu'wogo.

9Ama showo sha ata shɛ incɛ, shi jishijɛ aŋ, shɛɛ hiɛŋ, Nekeshi mi zha shɛ ma tu twa hwayɛ atuba na te hiŋ o. Asha zhaga ma no ofwo atwa na a sanga, maa hi sɛ mi nee hiŋ.

10Aka na te e zhe maa ɛ sɛ, bwolo-be-eyikwo pushe, ibɛ po atwa na ga mama imwangwa zhagajɛ nu bwa, ee teni no ofwo towo, ee kepi odubo.#N-ndu 19:9

11Na aba ibɛ, nazhɛ showo sha ata shɛlagwụmɛ shɛ zhajɛ ya du, shɛɛ hiɛŋ, Iyɛri! Iyɛri! Iti kepishingeni odubo!

12Ama bi jishijɛ aŋ, bɛɛ hiɛŋ, Iwɛ-tɛkana Omo hi mbiso, N te hi mepi shi o.

13Iwɛ ecilo ata, no shiyono ma ya eshe, iwɛnɛ te ehi mepi shi ụjita ata, kwo kaa auwa ata.#Mat 24:42; Mak 13:35; Luk 12:40

N-ndumwa Tumanganjɛ iwɛ Miaụŋ-mu-ugondu mu tatụ

(Luk 19:11-27)

14Cɛnjɛ-ta-tugwama ta Azuba ti zhɛ ta sha hwuŋ sasana gana bụtụ bu ko na zhɛ ụ'ishɛgwa, maa ganga ihwɛ ibwɛ, baa suyanɛ miaụŋ mu bwa mu ugondu, bee peni aŋ i'wɛŋnɛ ihwɛ ibwɛ igbɛtɛtɛ. 15Bee peni bụtụ bu ko ukwuribi azhɛka a ta, bee peni binya bụtụ azhɛka eyebi, bee peni binya bụtụ sasana uzhɛka uko. Bi peni bụtụ bụtụ nu gana na ta bụtụ ata eri ba nda iyi nu bwa, nazhɛ bee hwuri tahaŋnụ tu bwa. 16Bụtụ na ge leshiji azhɛka a ta, hwuri tihinya tu bwa tɛnda, bee teni azhɛka a ta. 17Gobwonu du bụtụ na ge leshiji azhɛka eyebi, teni du azhɛka eyebi sasana. 18Ama bụtụ na ge leshiji uzhɛka uko, zhe bee hini u'ibwa na cɛnjɛ, bee sweci ukwuribi wa agwuma-ihwɛ ibwɛ.

19Na aba na ti yee ilegeji, nazhɛ agwuma-ihwɛ miaụŋ ma ata mu ugondu jiye, maa imanga ya ukwuribi ata na aba.#Mat 18:23 20Ibɛ bụtụ ata ge leshiji la azhɛka a ta zhajɛ, baa 'waŋnananɛ azhɛka anya a ta, bɛɛ hiɛŋ bụ, Iyɛri, azhɛka a ta, ebu m peni la. Kwụba, N teni azhɛka a ta sasana.

21Agwuma-ihwɛ ibwɛ hiɛŋ bụ, Okwu, yɛu-ugondu ibiye, bɛ shɛ bụtụ bɛ tɛcara! Gana na abɛ shɛ bụtụ bɛ tɛcara ni iyi ticwɛŋ, N zhɛ mo bu shikicingo maa shɛ uhiu iyi ifwugwo. Tono nu unyasa wa agwuma-ihwɛ bu.#Mat 24:45; Luk 16:10 22Nazhɛ bụtụ na ge leshiji la azhɛka eyebi zhajɛ du, bɛɛ hiɛŋ bụ, Iyɛri, azhɛka eyebi, ebu m peni la. Kwụba, N teni du azhɛka eyebi sasana. 23Agwuma-ihwɛ ibwɛ hiɛŋ bụ, Okwu, yɛu-ugondu ibiye, bɛ shɛ bụtụ bɛ tɛcara! Gana na abɛ shɛ bụtụ bɛ tɛcara ni iyi ticwɛŋ, N zhɛ mo bu shikicingo maa shɛ uhiu iyi ifwugwo. Tono nu unyasa wa agwuma-ihwɛ bu.

24Ama bụtụ na ge leshiji la ụzhɛka uko zhajɛ du, bɛɛ hiɛŋ bụ, Iyɛri, M bi mepi maa bɛ shɛ bụtụ na hweteni, maa bo gwubo iyi no ofwo na abu ga bɛrɛ shɛ, obo sutongono iyi no ofwo na abu ga 'waŋtatanjɛ shɛ. 25Ibɛ po inyɛsɛ bụ i n shɛ, Ngee sweci ụzhɛka ga bụ na cɛnjɛ. Kwụba, iyi bu nɛ.

26Agwuma-ihwɛ ibwɛ jishijɛ bụ, bɛɛ hiɛŋ, Gabụ yɛu-ugondu iwɛ, gabụ bụrụna ga! Bi ge mepi maa Mo gwubo iyi no ofwo na Ngaa bɛrɛ shɛ, Omo sutongono iyi no ofwo na Ngaa nga 'waŋtatanjɛ shɛ. 27Asha bu ga shɛ bo zwono ukwuribi mu nu umwono-ukwuribi. Aka na Ngaa nga zhajɛ N ngɛ zhɛ ma lashɛga ukwuribi mu medeni titeni tu bwa. 28Lashɛga ma ụzhɛka ata ni i'ɛlɛ ibwɛ, maa hi peni bụtụ ata ga 'yajɛ azhɛka umpwa. 29Bụtụ be elele na 'yajɛ iyi, ubwa ɛɛ zhɛ a pananana, nazhɛ bɛɛ zhɛ ba kaana ti'yaga. Ama bụtụ na zasa iyi, okwo inɛɛ nɛ baa ga 'yajɛ, ɛ zhɛ a lashɛga iŋ ni i'ɛlɛ ibwɛ.#Mat 13:12; Mak 4:25; Luk 8:18 30Kala ma yɛu ɛtɛ ugondu i tisashɛ ne tishi to tupohondo, apata u'wo-tutwa keeni ene tiya zhɛ a nama.#Mat 8:12; 13:42,50; 22:13; Luk 13:28

Ụshɛrɛya Ụjita Umɛwɛɛ

31Aka na ti Yɛu Bụtụ ye ci hwuŋ, nụ ụjɛrụma ubwa, keeni atumwa ubwa azuba kpaaŋ, nazhɛ bɛɛ zhɛ ba gɛga ni idwɛtwɛ ụjɛrụma ubwa.#Mat 16:27; 19:28 32Bi zhɛ bo sotulonu edenji elele na agba ubwa, bɛɛ zhɛ bo bogotogwu aŋ gana na ta bi'iywa-ba-agwụdụ bo bogotogwu agwụdụ ni iyweywe.#Izik 34:17 33Bi zhɛ bo tulono agwụdụ nu u'ala ubwa ubiye, bɛɛ zhɛ tuba bo tulono iyweywe nu u'ala ubwa ugwulwo. 34Nazhɛ Agwuma ata zhɛ hiɛŋ atwa na namɛ nu u'ala ubwa ubiye, Zhajɛ ma, ahiɛba na Bishi mi peni uwebiye, maa hiɛ yɛ ogwu cɛnjɛ-ta-tugwama tu na aa hi imwangwanua taa na aka na aa karɛ la unyizo.#Mat 5:3; Luk 12:32 35Imunɛ i n gwụmɛ la, ehi m peni iyimɛyɛ, i'uyɛ i n iri la, ehi m peni meni Ngee swe, Ngaa shɛ la bugaiŋ, ehi tecinji nu nhwaŋ mi hiŋ; 36Ngaa namɛ la mohondo, ehi n urigeni tugwuno, Ngaa gwụmɛ la, ehi me hikeni, Ngaa namɛ la nu umwono-tishi, ahia zhajɛ pi mi.

37Nazhɛ atwa ata tiririri zhɛ o hoŋtono bu, ɛ hiɛŋ, Agwangwama, aka na kwuŋ atụ bụ kwụbɛ la ti imunɛ i bụ gwụmɛ eti bi peni iyimɛyɛɛ, kwo kaa ti i'uyɛ i bụ gwụmɛ la eti bi peni iyi-tiswaa? 38Aka na kwuŋ atụ bụ kwụbɛ la ta abɛ shɛ bugaiŋ, eti bi leshiji nu nhwaŋ mu tuu, kwo kaa ta abụ namɛ la mohondo, eti bi peni tugwunoo? 39Kwo kaa aka na atụ bụ kwụbɛ la ta aba gwuma, kwo kaa abụ namɛ nu umwono-tishi, eti bi hikenii?

40Nazhɛ Agwuma ata zhɛ ɛ jishijɛ aŋ, bɛɛ hiɛŋ, Iwɛ-tɛkana Omo hi mbiso maa, taa ta ahi ndwanua la okwo bụtụ bu ko gba ijɛ ɛtɛ na ashashɛ atwa na 'nyanɛ, a na kaa shɛ miaụŋ-mo-bino mi, asha Gamba ahiɛ ndanɛ iŋ.#Eshi 19:17; Mat 10:42; Mak 9:41; Ehib 6:10

41Nazhɛ bɛɛ zhɛ bɛ hiɛŋ ya du atwa na namɛ nu u'ala ubwa ugwulwo, Ishɛga ma epe hi n genji, ahiɛba na ee keleni-unu. Zhaga tono ma nu ulwa ata unyizo-nom, aa imwangwa iwɛ Ibiri keeni atumwa ubwa! #Mak 9:48; Luk 16:23; N-ndu 20:10 42Imunɛ i n gwụmɛ la, hi m peni shi iyimɛyɛ, i'uyɛ i n iri la, hi m peni shi iyi-tuswa; 43Ngaa shɛ la bugaiŋ, hi n leshiji shi nu nhwaŋ mi hiŋ, Ngaa namɛ la mohondo, hi m peni shi tugwuno maa mo urugono, Ngaa gwụmɛ la, Ngaa namɛ nu umwono-tishi, hi n hikeni shi o.

44Nazhɛ ɛ zhɛ o hoŋtono bu, ɛɛ hiɛŋ, Agwangwama, aka na kwuŋ atụ bụ kwụbɛ la ti imunɛ, ti i'uyɛ, ibu gwụmɛ, ta abɛ shɛ bugaiŋ, ta abụ namɛ mohondo, ta aba gwuma, ta abụ namɛ nu umwono-tishi, atụ bụ ndanɛ shɛ iyi elelee?

45Nazhɛ bɛɛ zhɛ bɛ jishijɛ aŋ, bɛ hiɛŋ, Iwɛ-tɛkana Omo hi mbiso maa, taa ta ahiɛ ndanɛ shɛ la okwo bụtụ bu ko gba na ashashɛ atwa ga 'nyanɛ, asha hi n ndanɛ shɛ du o.

46Nazhɛ atwa ata zhɛ o hwulo, o tono nụ ụbaụta ata, ɛɛ zhɛ a pana aŋ unyizo-nom, ama atwa tiririri tuba zhɛ o tono nu uraiŋ unyizo-nom.#Dan 12:2; Jon 5:29

Atualmente Selecionado:

MATIU 25: RBT

Destaque

Copiar