MATIU 20

N-ndumwa Tumanganjɛ iwɛ Anjɛ-Ugondu ni Itimɛ ya Afwafwa

1Cɛnjɛ-ta-tugwama ta azuba tɛ shɛ gana agwuma-ihwɛ oko na beni urungo nu uvwungwa dididi maa jalakaka atwa na maa pana itimɛ ibwɛ ya afwafwa ụgwụ. 2Aka na baa twa-unu na anjɛ-ugondu ata, maa bi zhɛ na tụpa aŋ tụtụpa tu uwaŋna uko. Baa tumwanɛ aŋ ga, ni itimɛ ɛtɛ ibwɛ ya afwafwa. 3Bee beneneni urungo nu usaka, baa kwụbɛ sasana anya atwa te e shikekeni nu ugba udukwo, a zasa kaa iyi elele aa nda o. 4Bɛɛ hiɛŋ aŋ, Zhaga ma du ni itimɛ ɛtɛ maa hiɛ njɛ ugondu, N zhɛ ma hi tụpa ulumo na teni cɛŋ nu ugondu uwaŋna uko. Ee zhe ga. 5Bee beni sasana urungo gana tu uwaŋna tishikoko keeni uwaŋna tinyingana, baa ndaananɛ gana ebe gbaa. 6Ti yaa namɛ sasana gana tu uwaŋna ụrụmɛ, bee beni sasana urungo, baa kwụbɛ anya atwa te e shikekeni, bɛɛ hiɛŋ aŋ, Iwɛmbe po ehi shikekeni epe gbi taa ti iyi ge heri hwayɛ ahiɛ njɛ shɛ ugonduu?

7Ɛɛ hiɛŋ bụ, Iwɛnɛ ti yaa zasa bụtụ be elele na iti peni ụgwụ. Bɛɛ hiɛŋ aŋ, Zhaga ma du ni itimɛ ɛtɛ mi ya afwafwa.

8Aka na tụ ụrụmɛ shɛ ya, agwuma itimɛ ɛtɛ ya afwafwa hiɛŋ uhiu wa anjɛ-ugondu ubwa, Suyanɛ anjɛ-ugondu ata, maa cɛpɛ aŋ ukwuribi wa aba. Kwune na atwa na Ngee nge peni ụgwụ umɛwɛɛ uuwa i ci atwa ehiiŋ.#Liv 19:13; Undwa 24:15

9Atwa na ge ci nu uwaŋna ụrụmɛ, bụtụ bụtụ leshiji tụtụpa tu ugondu uwaŋna uko. 10Aka na atwa na ge ci hiiŋ zhajɛ, e ge heŋshi maa ɛ zhɛ a lashɛga uhwuri tụtụpa tu ugondu uwaŋna uko. Ama tụtụpa ta ata tu ugondu uwaŋna uko du aa cɛpɛ aŋ. 11Aka na te e lesheji uŋ, ee ngwulengengeni agwuma-ihwɛ ɛtɛ, ɛɛ hiɛŋ, 12Atwa ga ge ci umɛwɛɛ a njɛ ugondu na aka ticwɛŋ, abụ nangwụcɛnjɛ ya ukwuribi tu na aba, atuba na tɛ njɛ ụbaụta nu uwaŋna uvwo uuwa gụ ụrụmɛ.

13Ama agwuma-ihwɛ ɛtɛ jishijɛ bụtụ bu ko na ashashɛ aba, bɛɛ hiɛŋ bụ, E-biyejilo mi, M bụ njɛ shɛ kaa orugwusu. Bi ge leni shi suu maa tụtụpa tu ugondu uwaŋna uko Ngɛɛ zhɛ ma bụ tụpa? #Mat 22:12; 26:50 14Shapa unaa bụ, maa hwuri. Ma jala du maa ma pana bụtụ bu umɛwɛɛ gana na ebi leshiji unaa bụ. 15N shɛ shɛ suu ma nda iyi nɛ Ama jala ni iyi nɛ shɛ inee mi? Ba nda suu eshe awɛ ne mi iwɛnɛ tu Ngaa shɛ bụtụ bi biye? 16Gobwonu du yɛɛ zhɛ ya sha hwuŋ, atwa na shɛ atwa umɛwɛɛ, aba zhɛ a sha hwuŋ atwa ehiiŋ, atwa na kaa shɛ atwa ehiiŋ, aba zhɛ a sha hwuŋ atwa umɛwɛɛ.#Mat 19:30; Mak 10:31; Luk 13:30

Ge Jisus Jɛmɛ Sasana iwɛ Tu'wo tu Bwa

(Mak 10:32-34; Luk 18:31-34)

17Aka na ti ge Jisus zhɛ umungwo Jɛrusalɛm, bee suji eseshi-iyi ubwa umpwa-na-ba-eyebi zalụ bu uhwaŋna uko abaaba kiri, bɛɛ hiɛŋ aŋ, 18Hioko ma, ti zhɛ Jɛrusalɛm, ɛ zhɛ a shapa Yɛu Bụtụ a pana ehiu onongbo, te embisegeni Undwa. Ɛ zhɛ a pana bụ n-ndumwa-tụwụma maa a kwụnɛ bụ, 19ɛ zhɛ a shapa bụ a pana atwa na shɛ shɛ Eju,#20:19 a pana atwa na shɛ shɛ Eju: Tɛjɛshɛrɛga tu ko ti hiɛŋ, a pana agaiŋ kwo kaa atwa cɛnjɛ ti nya a na eri a sha atwa Rom a na untanganɛ cɛnjɛ tu Judia na aka ata. maa a njɛ bụ asada, maa e jibi bu nu unaba, maa e tegeni bu nrɛ nụ ụ'wụ'wụ-ubatanɛ, ama Agwatana zhɛ ɛ hicinjɛ bụ nụ ụjita ụtatụ.

Biyikwo Zɛbɛdi Lụpɛ Jisus iwɛ Miaụŋ mu Bwa

(Mak 10:35-45)

20Nazhɛ bino bu miaụŋ-me-eyi mi Zɛbɛdi na miaụŋ mu bwa zhajɛ pi Jisus, bee leyi ni ivwunɛ ibwɛ, maa lụpa bụ ilupwɛ ike.#Mat 8:2; 9:18; 15:25; 18:26; Jon 9:38

21Ge Jisus heŋteni biyikwo ata, bɛɛ hiɛŋ, Imbe aba jalaa?

Biyikwo ata jishijɛ bụ, bɛɛ hiɛŋ, Hiɛŋ miaụŋ mu ga mi mi mi yebi maa mu gɛgaga hwuŋ na bụ, na Cɛnjɛ-ta-tugwama tụ bụ, ike nu u'ala ubiye bu, inɛ iyebi nu u'ala ugwulwo bu.

22Ge Jisus jishijɛ bụ, bɛɛ hiɛŋ, Hi mepi shi iyi nɛ ahia lụpa o. Hi eri suu hia swa ukwopi na Ngɛɛ zhɛ ma swa: okwo ubaptizim na ɛɛ zhɛ ma n nda, hi twa suu maa a hiɛ njɛ ụŋ? Ɛɛ jishijɛ bụ, ɛɛ hiɛŋ, Ti eri.#Mat 26:39; Jon 18:11

23Ge Jisus hiɛŋ aŋ, Hi zhɛ hia swa ukwopi ata mu gom, ama maa hi gɛgaga nu u'ala ubiye mu keeni u'ala ugwulwo mu, inɛ ɛtɛ shɛ shɛ inee mi maa Ma pana bụtụ be elele o, ama i shɛ inɛ ya atwa na Bishi mi imanjɛ iŋ iwɛ aba.

24Aka na te eseshi-iyi vwɛ umpwa hwụjɛ iwɛ ɛtɛ, aa njɛ isɛbwɛ na miaụŋ-mo-bino ma ata mi yebi. 25Ama ge Jisus suyanɛ aŋ, bɛɛ hiɛŋ, Hi mepi maa ehiu atwa na shɛ shɛ Eju mama nda gana shɛgwangwama sha aba, atwa aba a'wụtụ a nda aŋ gana na tụ ụhwada wa aba shɛ.#Mat 23:11; Mak 9:35; Luk 9:48 26Ama shɛ gana ata yaa shɛ na ashashɛ hiŋ o, ama bụtụ be elele na ba jala maa sha bụtụ bụ 'wụtụ, na ashashɛ hiŋ, ubwa tuba zhɛ ba sha yɛu-ugondu hiŋ. 27Ama bụtụ be elele na kaa ba jala maa sha bụtụ bi hiiŋ, na ashashɛ hiŋ, ubwa zhɛ ba sha hwuŋ bujama hiŋ. 28Gana na du ti Yɛu Bụtụ zhe shi maa a ndanɛ bụ iyi, ama iwɛ maa ndana atwa iyi, maa kaa pana uraiŋ ubwa iwɛ maa u gwube#20:28 u gwube: Tugwube tu ga tɛ shɛ gana usheyinji. Bi peni tu'wo uraiŋ ubwa, iwɛ maa tuba araiŋ atwa na ge zweni no tu'wo banɛ maa e bini. atwa ofwugwo.#Mat 26:28; 1 Timo 2:5,6; Tait 2:14; 1 Pita 1:18

Ge Jisus Hieci Inyɛmɛnyɛmɛ Sholubo shi Yebi

(Mak 10:46-52; Luk 18:35-43)

29Te e beni nu Jɛriko, atwa ofwugwo ụ'wụtụ 'wa Jisus. 30Sholubo shi yebi shɛ jɛjɛ nụ ụzalụ uhwaŋna, shaa hwụjɛ ti ge Jisus zhɛ tɛkashɛka, aa uganɛ, ɛɛ hiɛŋ, Agwangwama, gabụ Yɛu Devid, hioko kaa inyɛmɛnyɛmɛ tu.

31Ama ufwugwo wa atwa ata tezhigeni aŋ, maa ga a nama shiru, ama e keeni n'ungwa duwa, ɛɛ hiɛŋ, Agwangwama, gabụ Yɛu Devid, hioko kaa inyɛmɛnyɛmɛ tu.

32Ge Jisus shikeni, baa suyanɛ aŋ, bɛɛ hiɛŋ, Imbe ahia jala maa Ma hi ndanaa?

33Ɛɛ hiɛŋ bụ, Agwangwama, lono maa eshe tu ushigwo kaa.

34Gana na ti inyɛmɛnyɛmɛ ya aba shɛ Jisus, bee timengeni shishe sha aba. Nazhɛ shishe sha aba shi ushogwu, aa 'wa bụ.

Atualmente Selecionado:

MATIU 20: RBT

Destaque

Copiar