MATIU 19

Ge Jisus Mbisegeni Atwa iwɛ Biyikwo Tubacɛnga

(Mak 10:1-12)

1Aka na ti ge Jisus hwuwi iwɛ gɛ tụdụma, bee beni nu Galili, bɛɛ zhɛ na cɛnjɛ tu Judia, hileniye Urefa Jodan.#Mat 7:28; 13:53; 26:1 2Atwa ofwugwo ụ'wụtụ 'wụtụ 'wa bụ, baa nɛnjɛ aŋ apata.

3Afarisi oko zhajɛ pi Jisus, ee menji bu, ee heŋteni bu, ɛɛ hiɛŋ, Undwa leni suu maa bụtụ becinji biyikwo bwa iwɛ ecilo elele kpaaŋ?

4Ge Jisus jishijɛ aŋ, bɛɛ hiɛŋ, Hi ta rɛcɛ shɛ suu maa Bụtụ na karɛ aŋ taa nu umozhigo, bɛ njɛ aŋ butubwenyi ne biyikwo? #Umoz 1:27; 5:2 5Bɛɛ hiɛŋ, Iwɛ ecilo ata butubwenyi ba ganga bishi bwa no bino bwa, maa togwu ne biyikwo bwa, ebe yebi ata zhɛ a sha ya ike.#Umoz 2:24; 1 Kor 6:16; Ɛfɛ 5:31 6A shɛ shɛ ya iyebi o, ama a shɛ ya ike. Iwɛ ecilo ata iyi elele nɛ Agwatana togwowo, kede bụtụ bogwu iŋ o. 7Ee heŋteni bu, ɛɛ hiɛŋ, Asha iwɛmbe po tuba go Moses peni atwa unu maa ga butubwenyi peni biyikwo bwa utakada maa bacɛnga bụụ? #Undwa 24:1-4; Mat 5:31

8Ge Jisus jishijɛ aŋ, bɛɛ hiɛŋ, Iwɛ shɛmɛ shi hiŋ shɛ na shi 'yajɛ ikɛnyi, ibɛ po go Moses ihi leneni maa hiɛ 'wɛŋ eyikwo hiŋ. Shibwonu shɛ gana ata yaa shɛ la taa nu umwozhigo. 9Mo hi mbiso maa, bụtụ be elele na becinji biyikwo bwa ti yaa shɛ shɛ tuwɛle biyikwo ata ba nda, bee zeni biyikwo bi nya, asha tuwɛle du baa njɛ.#Mat 5:32; Luk 16:18; 1 Kor 7:10-13

10Nazhɛ eseshi-iyi Jisus hiɛŋ bụ, Yaa shɛ n-ndumwa ma bụtụ ne biyikwo bwa mɛ shɛ gana gonu, asha i zhɛshɛ maa bụtụ zeni biyikwo.

11Ama ge Jisus hiɛŋ aŋ, Shɛ atwa kpaaŋ eri a untangana iwɛ ɛtɛ o, semi atwa na ee peni iŋ kiri.#1 Kor 7:7-9 12Iwɛnɛ po nvwala mu namba, mu naa na ono aba meci aŋ gana ata, nvwala mu namba mu naa na atwa njɛ nvwala, nvwala mi nya mu namba sasana mu naa na mu mama njɛ nvwala iwɛ Cɛnjɛ-ta-tugwama ta azuba. Bụtụ na eri ba lashɛga iŋ, ga lashɛga iŋ.

Ge Jisus Peni Miaụŋ mu Tuweewee Uwɛbiye

(Mak 10:13-16; Luk 18:15-17)

13Nazhɛ ee suje miaụŋ mu tuweewee pi Jisus maa patangana mu i'ɛlɛ ibwɛ, maa ndana aŋ du adua. Ama eseshi-iyi ubwa tezhigeni atwa ata.

14Ama ge Jisus hiɛŋ aŋ, Ganga ma miaụŋ, ta lakana aŋ ma maa a zhajɛ pi mi o, iwɛnɛ ta Cɛnjɛ-ta-tugwama ta azuba tɛ shɛ ma tu ta atwa gana ga. 15Ge Jisus petengeni aŋ i'ɛlɛ ibwɛ, nazhɛ bee beni apata.

Iwɛ Bụtụ na 'Yajɛ Uduciya Duwa

(Mak 10:17-31; Luk 18:18-30)

16Bụtụ bu ko zhajɛ pi Jisus, bee heŋteni bu, bɛɛ hiɛŋ, E-Bimbisegeni, Imbe shɛ iyi ibiye nɛ Ngee eri ma nda maa Ma 'yaga uraiŋ unyizo-nomm? #Luk 10:25

17Ge Jisus jishijɛ bụ, bɛɛ hiɛŋ, Iwɛmbe po obu mo n hoŋtono iwɛ iyi ibiyee? Za bụtụ shɛ bụtụ bi biye o, semi bụtụ bu ko kiri. Yaa shɛ aba jala maa teni nu uraiŋ, asha untangana Onu-tupana.

18Bụtụ ata heŋteni bu, bɛɛ hiɛŋ, Una naa?

Ge Jisus jishijɛ bu, bɛɛ hiɛŋ, Ta kwụna bụtụ, ta nda tuwɛle, to zundo izunde, ta la tiseyida tu tukata o.#Ụban 20:13-16; Undwa 5:16-20; Rom 13:9; Jem 2:11 19Na pana bishi bu keeni bino bu ụjɛrụma, bɛ shɛ kaa bu no lubo uyebi bu gana na obu momo lubo.#Ụban 20:12; Liv 19:18; Undwa 5:16

20Usemberi ata hiɛŋ bụ, N untanganɛ kaa onu go tụpana kpaaŋ, asha imbe ta ma 'nyananɛ yaa?

21Ge Jisus hiɛŋ bụ, Yaa shɛ aba jala maa shɛ bụtụ na teni cɛŋ, asha zhaga sanga iyi elele nɛ abi 'yajɛ, maa suji ukwuribi ata peni okofwo, nazhɛ zhajɛ n 'wa, nazhɛ ɛbi zhɛ ba 'yaga uduciya na azuba.#Mat 6:20; Luk 12:33

22Ama aka na tu usemberi ata hwụjɛ iwɛ ɛtɛ, baa sanɛ ugwulwo na amɛ-tụhaŋtụ, iwɛnɛ tu baa 'yajɛ uduciya duwa.

23Ge Jisus hiɛŋ eseshi-iyi ubwa, Iwɛ-tɛkana Omo hi mbiso, i gwụmɛ maa bɛzhɛgba teni na Cɛnjɛ-ta-tugwama ta azuba. 24Mo hi mbiso sasana maa, i zasa iwɛ maa irihende duri ni inyɛnu yo otulo i ci maa bɛzhɛgba teni na Cɛnjɛ-ta-tugwama ta Agwatana o.

25Aka na te eseshi-iyi ubwa hwụjɛ iŋ, yaa dama aŋ duwa, ɛɛ hiɛŋ, Asha gaaba ya eri bo binoo?

26Ge Jisus ngbaracɛ aŋ, bɛɛ hiɛŋ, Atwa eri shi a nda iŋ o, ama tuba kpaaŋ ibɛ zana Agwatana iwɛ tɛnda o.#Umoz 18:14; Job 42:2

27Nazhɛ ga Pita jishijɛ bụ, bɛɛ hiɛŋ, Hioko, ti genji iyi elele kpaaŋ, atụ bụ 'wa, imbe tuba ɛti zhɛ ta 'yaga hwuuŋ?

28Ge Jisus hiɛŋ aŋ, Iwɛ-tɛkana Omo hi mbiso maa, na aka na aa njɛ hwuŋ unyizo ufwo, aka na ti Yɛu Bụtụ jɛjɛ hwuŋ ni idwɛtwɛ ụjɛrụma ubwa, ahiɛba ga hi n 'wa, ahiɛba hi zhɛ hia gɛgaga hwuŋ nu n-ndwụtwụ umpwa-na-muba-mi-yebi maa hiɛ jɛmɛ ụshɛrɛya wa alamụ atwa Isrɛl umpwa-na-ba-eyebi.#Mat 25:31; Luk 22:30; N-ndu 3:21 29Kwo kaa bụtụ be elele na genji nhwaŋ, okwo miaụŋ-mo-bino, okwo angwụfwụ, okwo bishi, okwo bino, okwo biyikwo, okwo miaụŋ, okwo ntuma, iwɛ mi, bi zhɛ ba lashɛga hwuŋ ule ibɛ karɛ dipi-yebi, bɛɛ zhɛ kaa ba 'yaganana uraiŋ unyizo-nom. 30Ama atwa ofwugwo a na shɛ atwa ehiiŋ aba zhɛ a sha hwuŋ atwa umɛwɛɛ, atwa umɛwɛɛ tuba aba zhɛ a sha hwuŋ atwa ehiiŋ.#Mat 20:16; Luk 13:30

Atualmente Selecionado:

MATIU 19: RBT

Destaque

Copiar