مَاتِيُ 11

يٜىٰسُ اٜ يَحَيَ غَطٛووٛ بَڤْتِسْمَ

1ندٜ يٜىٰسُ يٛتِّنِ کٛ وِعَتَ تٛکُّٻٜمٛ سَڤّٛ اٜ طِطٛ، سٜيْ اٛ اُمِّي دَغَ طٛنْ، اٛ دِلِّ، اٜ مٛ اٜکِّتِنَ، اٜ مٛ وَعَجِنَ ندٜرْ غَرِيجٜ؞

2اٜ شَرٜلْ نغٜلْ، يَحَيَ غَطٛووٛ بَڤْتِسْمَ سُرَامَ ندٜرْ سُودُ شُرَلْ؞ ندٜ اٛ نَنِ حَبَرُ کٛ اَلْمَسِيحُ وَطَتَ، سٜيْ اٛ نٛدِّ وٛٻّٜ ندٜرْ تٛکُّٻٜمٛ اٛ لِلِٻٜ تٛ مَاکٛ 3نغَمْ ٻٜ پَمَمٛ، ٻٜ مبِعَ، ‏«‏اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟»‏

4يٜىٰسُ نٛوتِي، وِعِٻٜ، ‏«‏نجَحٜىٰ، مبِعٛنْ يَحَيَ کٛ نَنُطٛنْ اٜ کٛ نغِيطٛنْ:‏ 5وُمْٻٜ اٜ مبُمْتَ، جَرَاٻٜ اٜ نجَاٻَ، غٛودُٻٜ ݧَوُ ݧَامٛوجُمْ لَرَلْ اٜ نجَمْطِتِنٜىٰ، ڤَحُٻٜ اٜ نَنَ، مَيْٻٜ اٜ اُمِّنٜىٰ، ٻٜ نغَلَنَا اٜ نغَعَجِنَنٜىٰ حَبَرُ بٜلْطُمْ؞ 6اٛ بَرْکِطِنَاطٛ نٜطّٛ مٛ اَلَايِ حٛولَاکِيَمْ؞»‏

7غَطَ لِلَاٻٜ ٻٜنْ ندِلِّ، سٜيْ يٜىٰسُ فُطِّ مٜتَنْکِ يِمْٻٜ دٛوْ يَحَيَ، اٛ وِعِٻٜ، ‏«‏طُمٜ نجَاطٛنْ رَارٛيْکِ ندٜرْ لَدّٜ؟ کُطٛلْ نغٛلْ حٜنْدُ دِمْبَتَ ندَارٛيْطٛنْ؟ 8تٛ نَاع نٛنْ، طُمٜ نجَاطٛنْ رَارٛيْکِ؟ نٜطّٛ ٻٛرْنِيطٛ لِمْشٜ بٛطّٜ؟ نَاع نٛنْ، نغَمْ ٻٛرْنٛتٛوٻٜ لِمْشٜ بٛطّٜ اٜ لَامٛرْدٜ ٻٜ نغٛنِ؞ 9تٛو، طُمٜ نجَاطٛنْ رَارٛيْکِ؟ اَنَّبِيجٛ؟ اٜ مِ وِعَعٛنْ غٛونغَ، اٛ ٻُرِي اَنَّبِيجٛ؞ 10کَنْکٛ وٛنِ مٛ اَللَّه وِعِ ندٜرْ اَايَارٜ، ‏‹‏رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞›‏ 11اٜ مِ وِعَعٛنْ غٛونغَ، ندٜرْ ٻٜ رٜوْٻٜ ندَݧِ فُو وَلَا ٻُرْطٛ يَحَيَ غَطٛووٛ بَڤْتِسْمَ مَنْغُ؞ فُو اٜ نٛنْ، ٻُرْطٛ فَمْطُکِ ندٜرْ لَامُ اَللَّه ٻُرِيمٛ مَنْغُ؞ 12دَغَ جَامَنُ يَحَيَ غَطٛووٛ بَڤْتِسْمَ حَا وَدُّکِ حَنْدٜ، لَامُ اَللَّه اٜ تٛرّٜىٰ؞ تٛرّٛوٻٜ لَامُ طُمْ اٜ نغِطِ تٜىٰتَطُمْ اٜ سٜمْبٜ؞ 13نغَمْ دٜفْتٜ اَنَّبٛعٜنْ فُو اٜ اَتَّوْرَ مٜتِي دٛوْ لَامُ طُمْ نَا يَحَيَ غَطٛووٛ بَڤْتِسْمَ وَرِ؞ 14تٛ اٛنْ نجَٻَيْ کٛ ٻٜ مبِعِ، يَحَيَ وٛنِ اِلِيَ مٛ طُمْ وِعِ وَرَيْ؞ 15غٛودُطٛ نٛڤِّ نَنُکِ فُو نَنَ؞

16‏«‏کٛ نَنْدِنَيْمِ يِمْٻٜ جَامَنُ طُعُمْ؟ اٜ ٻٜ نَنْدِ اٜ سُکَحٛيْ نجٛوطِيکٛيْ ندٜرْ لُومٛ اٜ نٛدِّندِرَ، اٜ مبِعَ، 17‏‹‏مِنْ ندُودَنِيعٛنْ دُودَاندُ، اَمَّا اٛنْ نغَمَايِ؞ مِنْ مبٛيِ بٛ غٛطّٛ مَايِ، اَمَّا اٛنْ مبٛيَايِ؞›‏ 18نغَمْ يَحَيَ غَطٛووٛ بَڤْتِسْمَ وَرِي ݧَامَتَا ݧَمْندُ يَرَتَا ندِيَمْ اِنَبٛجَمْ، سٜيْ ٻٜ مبِعِ، ‏‹‏اٜ مٛ وٛودِ غِنّٛلْ؞›‏ 19ٻِي نٜطّٛ بٛو وَرِي اٜ ݧَامَ اٜ يَرَ، سٜيْ ٻٜ مبِعِ، ‏‹‏رَا اٛعٛ، اٛ بٜىٰلَاطٛ اٛ جَرٛووٛ، حِغٛ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؞›‏ فُو اٜ نٛنْ، تٛکُّٻٜ لَاوٛلْ اَللَّه فُو اٜ ٻٜ کٛلَّ کَنْغٛلْ وٛنِ غٛونغَوٛلْ؞»‏

غَرِيجٜ طٜ تُوبَايِ

20سٜيْ اٛ فُطِّ حَٻَنْکِ غَرِيجٜ طٜ اٛ وَطِ کُوطٜ کَيْطِنِيطٜ ندٜرْ مَاجٜ نغَمْ يِمْٻٜ غَرِيجٜ طٜنْ تُوبَايِ؞ 21اٛ وِعِ، ‏«‏يِمْٻٜ غَرِيرِ کٛرَسِنْ، اٛنْ مبٛنِي!‏ يِمْٻٜ غَرِيرِ بٜتَسَيْدَ، اٛنْ مبٛنِي!‏ دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ 22اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ 23اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ!‏ طُمْ نَتِّنَيْعٛنْ ندٜرْ نغَيْکَ حِيتٜ؞ دَا کُوطٜ کَيْطِنِيطٜ غَطَاطٜ ندٜرْ مَاطَ طٜ نغَطَامَ ندٜرْ غَرِيرِ سٛدٛمْ، دَا اٜ ندِ طٛنْ حَا جٛونِ؞ 24اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ دٛوْ مٛوطٛنْ؞»‏

سِوْتَارٜ تٛرّٛتٛوٻٜ

25اٜ شَرٜلْ نغٜلْ يٜىٰسُ وِعِ، ‏«‏مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ 26نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞»‏

27سٜيْ اٛ وِعِ يِمْٻٜ، ‏«‏ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞

28‏«‏نغَرٜىٰ تٛ اَمْ اٛنْ فُو دٛنْدِيٻٜ دٛݝْلٜ تٜدُّطٜ، مِ حٛکَّيْعٛنْ سِوْتَارٜ؞ 29تٛکّٜىٰ کٛ مبِعَيْمِعٛنْ؞ اٜکِّتٜىٰ تٛ اَمْ، نغَمْ اٜ مِ وٛودِ حَکِّيلٛ، مِ لٜسْتِنْطٛ حٛورٜ، ندٜنْ ٻٜرْطٜ مٛوطٛنْ مبَلْتٛتٛ؞ 30نغَمْ کٛ مبِيمِعٛنْ نغَطٛنْ طُمْ سَطَا وَطُکِ، ندٜنْ دٛنْغَلْ اَمْ تٜدَّا؞»‏

Atualmente Selecionado:

مَاتِيُ 11: fuv

Destaque

Copiar