MATIU 3
3
A toretore noi Jon Garuhigogona
1Lo tarogi hi i Jon Garuhigogona u vonai mo tauvuigi mo toretore lo vanue vurogi a Judia, 2mo veve vena: “Nen ladowenigi, huri a Ute noi God mo kakarani vonai!”
3Huri i Jon hi i Aesaea a tangaloi ligoligogi u laqagi huri vena:
“A diloi hine gatagale mo waregi
lo vanue vurogi mo veve vena:
‘Nen vagatai
na matahalai Huqe!
Nen vai vovohoigi
na turegine!’ ”
4I Jon mo luqegi na vinui kamel, ko mo wasigi na vinui bulugi, mo gani na diso mena nubui bi talolo labute.
5Ko ingere ta Jerusalem meire ta Judia doluegi ko ingere doluegi talo mwararai wai Jodan ram vonai lobena. 6Ko ram veve sere na bugure, ko i Jon mo garuhigogona ginire lolo wai Jodan.
7I Jon mo lehire Varise meire Sadusi rau sao ram vonai huri na nona garuhigogona, mo veve lawera vena:
!Igimiu neu mwere na mwata! ?Ihine u veve lawe gimiu ve nein mwelue dena leo vevegi noi God hi vin vonai? 8Giniehi, igimiu nen vai na gineu a gigilegi huri ve neu ladowenigi. 9Nen mese lado hagegi gimiu ve nein veve lawe gimiu sibomiu vena, ‘I Ebraham i tubude.’ Huri ineu nam veve lawe gimiu vena i God vin vei lei na vatu ingere ngaha rain voragi renetui Ebraham! 10Siseri ngaha a talai u rarai beno vena tai vohogi na gai lolo vuigi. A gai ngerehi ra he wai tea vena garea vin tei vohoginire ko vin tulire talolo avi.
11Ineu nam garuhigogonagi gimiu gina wai hogosie huri ve vin serelue na nomiu ladowenigi. Ihine hi vin vonai lo taguku, u lawua liu denieu; na he tatarise tea ve nain weli na nona butu. Ingeie vin garuhigogonagi gimiu gena Vui Gogona mena avi. 12Nge mo hakovi na nona gaigigi lo limana, huri ve vin gigi langa na mwasi matui. Nge vin teu na mwasigi lo nona qea, nge vin hure vohogi na rongigi lolo avi hi vin he mate lai tea.”
I Jon mo garuhigogonagi Jisas
13Lo tagugi hi i Jisas mo vonai dena Kalili mo dadari Jodan mo vano lobei Jon ve vin garuhigogona ginie. 14Nge i Jon mo gato goroe mo veve vena, “U vovohoi ve ineu nain lei na garuhigogona denigo, nge iniko gom vonai lobeku!”
15I Jisas mo duvi vena, “Gon siregi vena mwerehi siseri ngaha u tatarise huri ve i gideru dori vei na gineu doluegi vin huri na taraniana noi God.” Siu i Jon mo masinge.
16I Jisas u lei na garuhigogona beno, mo beno mwalue dena wai. Ko a dodo mo waga, ko ingeie mo lehi na Vui noi God mo hivo mwere na rangamea ko mo toga lo ulune. 17A dilogi mo himei dena mahava mo veve vena: “Ngaha i Netuku, a Mweratabe, ko nam leo lolo garea ginie.”
Atualmente Selecionado:
MATIU 3: HNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Bible Society of the South Pacific, 2013
