NAHUM 3
3
1Kenku, lo dukeshvu nyida,
kenya kesü thyüo nke lo kechala nrün
gü we thyülo tiso!
2Nyüshülo! Thün pe kevü,
Kekerüpha khwen,
Keru ketin khwe,
Terikeru kenmhe khwe!
3Kerukezen temi le when,
zhethon le kerü, nmi le nshwen bin!
Simin le keren,
kesimin swülobu keho le--
temi dan le tsüdan gen pha nsü bin!
4Nineve, keyüla gü le shaja hyulo bin.
Zegwasa lo me boshvula kegwai kegwa nti,
a-le senye dan seme pe dothyü.
5Kekvutsin Npugü le zo,
“Nineve, ale shaja pe ntsüti!
le nno kenben la
lo senye dan no nhyu ti,
nkejokepvü aphu hyuti.
6Ale kemeni kethyü pe ntsü
lo nshünkemvu pe nhen lati.
Temi dan le nshwikenyü thyüti.
7Nkehyu nyu aphu tesen ti.
Anyugun le zo-o, ‘Nineve, le nkela sele!’ ” tsonti.
Segü le a-shwi njün bin nla?
Segü le a-nyun thyü nbwe nyü bin mon?”
8Nineve, nle Ijipt nyida Thebes nyiki gwa kethyü le bin ole? A-ko züri nme le chwida hontse a-no bin. Nile züri le a-keno thyü hü. 9A-le Sudan lo Ijipt so kekvusen, a-kekvu le a-keni ndi; Libya le a-keche gü. 10Ai Thebes temi dan pvüo me kazü ki tinla. Tsonda quen aphu ka a-nyenyu vüshvu. Anyugun sharhi dan dyü sen-o kenjün pe a-nyugun kentsen nyu ben nyu shüla.
11Nineve, nko zu tsü nzeü la! Nko n shwikerüchün nyu ben nyu tinla titse ndoti. 12N chwida kekhwen aphu kherobin a-sha nyün kebin hontse ti: Senbin chwen kenu shülo, tsonlo a-sha le nmün nyu chetsü ryüti le! 13N shüpahü jule tenunyu hontse, lo nkazü le nshwikerüchün nyu mhundyü nyu keno kendi thyü laso. Mah le nkhinrun khincha dan ro lati. 14Zü pvü pe kehun ndalo, tson-o nchwida thyü nkolo! Nnyo kedü pe a-thün thyülo, lo nnyo nnukelo tsü pe ndalo! 15Nle lihi thyü bin-e nroshvu nmvue teri nyu n ga lati. Tsekhvu le low tyü kela hontse n nke lati.
Nle tsekhvu hontse chon laso! 16Nle hada kethyü thyü n chon pe tsangneki shyenyü dan nyeki chon laso! Ai ntsoka we tsüdan le tsekhvü le a-sekin sükhun-o nyetin kela hontse ndi laso. 17Hagun kedanyu le tsang kekun ka tsekhvu dan le kabon gen bin kehü hontse: Ai yhüko le chwiryülo tsüdan le nyetin lao temi nme-e anyugun kegü bin shamvu lahü.
18Assiria raja gü, hagun ahng dan le silaso, lo hagun dan nyu kegwanyu le kethonthen jütin laso! N temi dan le kazüthun ki tsenchvu tinla, lo temi nme-e tsüdan zen niryüo kaki keshüi ndi. 19Hagun tejünshvu thyü ngwa keloi ndi, lo hagun kethyü shvue pon lohoso. N kenke rüla nyü kelo nyu aphu kenyüo ben kekhü. Temi peha le n gwakemvu keni kendi nrhilo le!
Atualmente Selecionado:
NAHUM 3: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.