Mateo 13

Qaÿaloqnaxana cam danaxaatac

(Marcos 4.1-9; Lucas 8.4-8)

1Nachi se'eso na'a'q so Jesús ca'ai so nma', nachi taxaama na loigue aso lapel late'edai, nachi nso'ooñi. 2Nachi ÿataqta qalota na shiÿaxauapi laponeu'a cam hueta'a somayi. Nachi so Jesús huenojñigui aso barco, nachi 'enauac se'eso shiÿaxauapi hueto'ot na loigue aso lapel. 3Nachi somayi ÿataqta qalota na dapaxaguenataxanec, huota'a na laloqnaxanaxatpi, 'eeta':

–Huo'o so shiÿaxaua jec da danaxan, ÿaañi aso languishi ala. 4Qaq co'ollaq mashi danaxaatac, nachi huo'o aso languishi tajlec so nqa'aic. Ime, nachi anac ana qoÿo, nachi chic. 5Qaq aso lÿa languishi, qalaq tajlec som 'alhua mayi huaigui na coma'. Nachi asa'aso nanguishi saqaÿaloq da ñaxat, souaxat da saq 'amaqtaq na 'alhua. 6Qalaxayi co'ollaq ntaplec, nachi ÿavic, cha'ayi qaica ca lpa'a'q. Nachi daqaqa. 7Qaq asom lÿa languishi, qalaq tajlec so ÿaxatsat, nachi asom ÿaxat ñaxatshiguem, nachi aso nanguishi sa ishit da ñaxat. 8Qalaxayi aso lÿa languishi tajlec som 'onaxaic 'alhua, nachi ÿataqta 'onaxaic da alaÿaxac co'ollaq qanqat. Huo'o ana ivi' ana cien ana ala, qataq huo'o ana ivi' ana sesenta, qataq huo'o ana ivi' ana treinta co'ollaq qanqat. 9Qaq da qami' qauaÿajñi da qan'axaÿaxanaxaqui, qaq ¡no'on da qan'axaÿaxañi!

Dam 'eetec da huo'o mshi qaÿauota'a na qaÿaloqnaxana

(Marcos 4.10-12; Lucas 8.9-10)

10Nachi soua lapaxaguenataqa nquiguedeu'a so Jesús. Nachi ina't, 'eeta':

–¿Tá'ainco' da 'au'aqtaxanem na shiÿaxauapi, qalaq 'auauota'a na 'adaloqnaxanaxatpi?

11Nachi somayi 'enapeco':

–Qami' qaÿaÿajnaxanaxanque naua saq cha'alo lataxaco dam l'onataxanaxac ñi Dios mayi neta'ague da piguem. Qalaxayi namayipi sa ishit da qaÿaÿajnaxanaxanec. 12Qaq ÿoqo'oyi cam huo'o ca hueto'ot, qalaq qanquigaxatteec ca qoÿanem, nachi ÿataqta qaica ca iueetac. Qaq cam qaica ca hueto'ot, qalaq camayi qanhuo', ivida'a cam saq 'amaqtaq hueto'ot qaÿacona. 13Qaq ÿoqo'oyi da sa'aqtaxanem namayipi, qalaq sauota'a na ÿaloqnaxanaxatpi. Cha'ayi namayipi demejnaxaatac, qalaxayi 'eeta'am da sa nauaañi; hua'aqtac, qalaxayi sa ÿaÿaten cam qai'axattac, 'eeta'am da huo'otaq sa ishit da hua'aqtega. 14Qaq de'eda 'eetec namayipi, damayi ÿataqta ipacchigui co'ollaxa da i'axat som l'aqtaxanaxanec ñi Dios l'enaxat Isaías, co'ollaq 'eeta':

Qami' ÿoqta da qau'aqaitac,

qalaxayi sa ishit da qauaÿajñi ca qai'axat;

qami' qanloitauec, qalaxayi sa ishit da huo'o ca qauloÿa'a.

15Cha'ayi da lquiyaqteÿaxac ne'ena shiÿaxauapi ÿi'iguelaxalec da ÿataqta qadamchigui,

qataq sa ishit da ÿoqta hua'aqa,

qataq naua l'ai'te ÿamaqta'a't;

da yaqto' sa ishit da huo'o ca ila'a,

qataq sa ishit da huo'o ca hua'axaÿa,

qataq sa ishit da huo'o ca ÿaÿaten da lquiyaqteÿaxac,

qataq sa ishit da aÿim ÿi'iguelaxa da yaqto' ñataden.

16Qalaxayi qami' ÿataqta qauamaichiguiñi, cha'ayi naua qad'ai'chilli' nauaachiyiñi, qataq naua qadtelalauacolli' hua'axai'. 17Qaq ÿataqta 'eesa de'eda qami' sa'axatema, da qalota co'ollaxa so l'aqtaxanaxanecpi ñi Dios qataq som no'on da lataxac shiÿaxauapi da nshitaique da ÿauaachigui de'eda mayi qami' qaumijñiitac, qalaxayi sa ishit da ila'a; qataq nshitaique da hua'axaÿa dam qau'aqaitega, qalaxayi namayipi sa ishit da hua'axaÿa.

So Jesús i'axat da naigui som danaxaatac

(Marcos 4.13-20; Lucas 8.11-15)

18Qaq qan'axaÿaxañiÿa qome dam naigui som shiÿaxaua mayi danaxaatac. 19Ca n'axaÿaxaatega da n'aqtaguec dam l'onataxanaxac ñi Dios mayi neta'ague da piguem, qalaq sa ishit da ÿaÿaten, camayi 'eeta'am aso nanguishi ala mayi tajlec so nqa'aic. Ime, qaq anac so shiÿaxaua lma'na, nachi deuotaxanec som n'aqtac mayi huetaigui añi lquiyaqte. 20Qaq aso nanguishi mayi tajlec som 'alhua mayi huaigui na coma', qalaq asomayi naigui na shiÿaxauapi mayi n'axaÿaxaatega da n'aqtac, qalaq huo'o da ntonaxac. 21Qalaxayi souaxat da qaica ca lpa'a'ÿaxac da n'aqtac, nachi sa ishit da 'eetai'. Cha'ayi da huo'o da ñi'iguenataguec, huo'otaq da ncanaguec souaxat da n'aqtac, nachi qoshiuec. 22Qaq aso nanguishi mayi tajlec so lma' ana ÿaxat, qalaq asomayi naigui nam shiÿaxauapi mayi n'axaÿaxaatega da n'aqtac. Qalaxayi souaxat da imelec 'enauac nam chochaqna huetalec ana 'alhua, qataq da lqopichi da nsallaxa, qaq 'enauac ne'ena i'ot da sa ishit da ñaxat naq'en da n'aqtac, qataq sa ishit da huo'o ca alaÿaxac naq'en ne'ena shiÿaxauapi. 23Qalaxayi aso nanguishi mayi tajlec so no'on 'alhua, asomayi naigui nam shiÿaxauapi mayi n'axaÿaxana da n'aqtac, qalaq ÿataqta ÿaÿateeteguet, qaq ÿataqta no'on da alaÿaxac da qanqat. Huo'o na 'eeta'am aca nanguishi mayi ivi' ana cien ana ala, qataq huo'o ana ivi' ana sesenta, qataq huo'o ana ivi' ana treinta.

Qaÿaloqnaxana aso huoue mayi ñaxattashigueme' so trigo

24So Jesús ÿauo'o da lÿa daloqnaxana, 'eeta':

–Da l'onataxanaxac ñi Dios mayi neta'ague da piguem, damayi 'eeta'am ca shiÿaxaua mayi ÿataqta no'on aca languishi mayi ÿaalec ca n'alhua. 25Qalaxayi co'ollaq 'enauac da do'ochita somayipi, nachi anac som ipa'agueetac so lalamaxat se'eso nanguishic. Nachi ÿaañi aso huoue mayi 'eeta'am na trigo da ÿanoigui somayi. Ime, nachi jec. 26Qaq co'ollaq mashi ñaxat so trigo, qataq mashi huo'o na ala, huaña, nachi yi'oq aso huoue mayi 'eeta'am namayi. 27Nachi so nlatacpi jec da da'aqtaxanem so lalamaxat se'eso nanguishic, 'eeta': “'Am qan'aco', da ÿataqta no'on aso 'anguishi mayi 'ai'aalec yim 'anaxanqa', qaq ¿chaq huá'ago' ca chigaqa'ague aso huoue mayi ñaxattashigueme' na trigo?” 28Nachi so lalamaxat se'eso nanaxanqa' 'eeta': “Souaxai' nachiso so aÿim ipa'agueetac som i'ot de'eda.” Nachi so nlatacpi denataxan, 'eeta': “¿'Anshitaique peta'a da qomi' ñapogaq ana'ana huoue mayi ñaxattashigueme' na trigo?” 29Qalaxayi somayi 'enapeco': “'A'i, ten, qom qanapoqui ana huoue, nachi ishit da lÿashiguemgue' na trigo. 30Qaq ÿoqo'oyi no'on da ña qauauaqaÿa'a da ñaxattashiguema't naamayi, to' qom ivita ca laloqo' da qanqat na trigo. Nachi aÿim samaxalec qome ca i'onataxanaxanecpi da i'auaxaañi da nqateu'a ana huoue. Ime, qaq ÿauo'o ana laqtapi, da yaqto' qaÿavigaxat. Qaq da ime, nachi ÿaÿamaxat na trigo da ÿachaigui ca llaponaxanaxaqui.”

Qaÿaloqnaxana aso ala ana mostaza

(Marcos 4.30-32; Lucas 13.18-19)

31So Jesús nataq'en ÿauo'o da lÿa daloqnaxana, 'eeta':

–Da l'onataxanaxac ñi Dios mayi neta'ague da piguem, damayi 'eeta'am aca ala ana l'enaxat mostaza mayi ÿacona ca shiÿaxaua da ÿaalec ca n'alhua. 32Qaq 'eesa da acamayi ÿataqta saq 'amaqtaq, saq 'en'am ana laÿi nanguishipi. Qalaxayi da ivita da ñaxat, nachi ÿataqta napacalec 'enauac ana laÿi nanguishipi, ivida'a da 'eeta'am ana qo'ipaq ÿataqta late'edai. Ÿoqo'oyi ana qoÿopi mayi huaÿotac ishit da anac, nachi ÿauo'o na lpata'c, ÿanaigui ana lcouepi.

Qaÿaloqnaxana aca ÿashiidaxachigui ana pan

(Lucas 13.20-21)

33Nataq'en ÿauo'o so lÿa daloqnaxana, 'eeta':

–Da l'onataxanaxac ñi Dios mayi neta'ague da piguem, damayi 'eeta'am aca ÿashiidaxachigui ana pan mayi ÿacona aca 'alo. Ime, nachi ÿalecneguet ca lta'adaic lvigoxoshic trigo lsochi mayi ivi' yi lcata da tres qanaloqten, da yaqto' 'enauac ÿashiidaxachigui.

Da 'eetec da huo'o mshi ÿauota'a na laloqnaxanaxatpi so Jesús

(Marcos 4.33-34)

34Qaq 'enauac ne'ena i'axattacpi so Jesús ÿauota'a na laloqnaxanaxatpi da da'aqtaxaatapeguem na shiÿaxauapi, qaq sa ishit da sa ÿauo'o na laloqnaxanaxatpi da da'aqtaxaatac. 35Qaq 'eetec de'eda, cha'ayi yaqto' ishit da ipacchigui da ÿiyiñi co'ollaxa so l'aqtaxanaxanec ñi Dios, mayi 'eeta':

Sa'aqtaxan, qalaxayi sauota'a na ÿaloqnaxanaxatpi;

sa'axat nam sa ishit da qaÿaÿaten ca lataxac chigoqta'a co'ollaq chita'ague da i'ot ana 'alhua ñi Dios.

So Jesús i'axat da naigui aso huoue mayi 'eeta'am na trigo

36Nachi so Jesús ncoyiguene' so shiÿaxauapi. Ime, nachi taigui so nma'. Huaña, nachi soua lapaxaguenataqa nquiguedeu'a somayi. Nachi qoÿinapega, qoÿiita':

–Ña qomi' 'au'axatema ca naigui aso huoue mayi 'eeta'am na trigo mayi huetalec so nanaxanqa'.

37Nachi so Jesús 'enapeco':

–Som shiÿaxaua mayi no'on aso languishi, nachina na shiÿaxaua llalec. 38Qaq som nanaxanqa', qalaq nachana anam souaqtalec 'alhua. Qaq aso nanguishi mayi ÿataqta no'on, qalaq nachina nam shiÿaxauapi mayi huetaigui da l'onataxanaxac ñi Dios. Qaq aso huoue mayi 'eeta'am na trigo, qalaq nachina nam quetague' so shiÿaxaua lma'na. 39Qaq so depa'aguenataxaatac mayi ÿaañi aso huoue, qalaq nachiso so shiÿaxaua lma'na. Qaq da qanqat na ala so trigo, qalaq nachica cam loga't ana 'alhua. Qaq som daqataxaatacpi, qalaq nachina na namaxashicpi piguem l'ecpi. 40Qaq de'eda 'eetec aso huoue da qalapona't, nachi qaÿasaxangui so nodec da qaÿavigaxat, damayi nachida da 'eetec qom ivita ca loga't ana 'alhua. 41Na shiÿaxaua llalec namaq qome na lamaxashicpi piguem l'ecpi da nqateeguesop da l'onataxanaxac 'enauac nam ÿasouaxateguet ca lasouaxashit ca lÿa, qataq nam i'ottac na qauempi. 42Ime, nachi namayipi ÿasaxangui qome aca laÿi' na nodec. Huaña, nachi noÿiitac qataq ÿataqta inaga't naua lhue da nqui'ic. 43Nachi nam i'ottac ca ÿaÿamaxadeeta ñi Dios, namayipi na l'edaxa 'eeta'am añi nala' qom huetaigui ca l'onataxanaxac ñim lta'a. Qaq qami' da qauaÿajñi da qan'axaÿaxanaxaqui, qaq ¡no'on da qan'axaÿaxañi!

Qaÿaloqnaxana aso laÿi' ana plata mayi qoÿoxojñi

44Da l'onataxanaxac ñi Dios mayi neta'ague da piguem, damayi 'eeta'am aca laÿi' ana plata mayi qoÿoxotoigui ca 'alhua. Qaq huo'o so shiÿaxaua ilalec asa'aso laÿi' ana plata. Nachi qaltaq ÿoxojñi, ipagaqchiichiguiña ca lma'. Nachi ÿataqta lta'adaic da ntonaxac, nachi ÿi'iguelaq. Ime, nachi imen 'enauac nam logoxoshitpi, nachi deshijnaxana se'eso 'alhua.

Qaÿaloqnaxana aso perla mayi ÿataqta qalota da lashiichiÿaxac

45Da l'onataxanaxac ñi Dios mayi neta'ague da piguem, nataq'en damayi 'eeta'am ca nmenaxaic mayi nmittaique aca perla mayi ÿataqta no'on. 46Qaq da huo'otaq ÿanata aca 'oonole mayi ÿataqta qalota da lashiichiÿaxac, nachi ÿi'iguelaq. Ime, qaq imen 'enauac na logoxoshitpi, nachi deshijnaxana asa'aso perla.

Qaÿaloqnaxana ca naleguec

47Nataq'en da l'onataxanaxac ñi Dios mayi neta'ague da piguem, damayi 'eeta'am ca naleguec mayi qaÿalliguingui aca auaxai, nachi ÿataqta ÿalecta't nam lalliiguishic nÿaqpi. 48Qaq da mashi nlaxagui que'eca naleguec, nachi cam ÿi'acoxoicpi nqatta na loigue ca 'etaxat. Huaña, nachi qanso'oñiisop da qanatogui na nÿaq. Nachi nam no'on qaÿachagui aca laÿi', qaq nam qauem, qalaq qaÿalateec. 49Qaq 'eda da 'eetec qom ivita ca loga't ana 'alhua, da anac nam namaxashic piguem l'ecpi, da yaqto' nqateu'a na qauemaicpi, da nqateeguesop nam no'on da lataxac. 50Nachi na qauemaicpi ÿasaxangui aca laÿi' na nodec. Huaña, nachi noÿiitac qataq ÿataqta inaga't naua lhue, souaxat da nqui'ic.

Cam qaÿaÿamaxattac dalaxaicolec qataq cam toguishic

51Nachi so Jesús denataxan, 'eeta':

–¿Qami' peta'a qauaÿajñi 'enauac de'eda sa'axattac?

Nachi soomayi 'ena'po':

–Aja', 'am qadataxala'.

52Nachi somayi 'enapeco':

–Ca dapaxaguenataxaatapeguec na lqataxacpi so Moisés da huo'otaq ñaq napaxagueetega da l'onataxanaxac ñi Dios mayi neta'ague da piguem, nachi camayi ishit da ivida'a da 'eeta'am cam lalamaxat ca noÿic mayi ÿataqta ÿaÿaten da nqatshiguem nam ÿaÿamaxattacpi cam dalaxaicolec qataq cam toguishic.

So Jesús hueta'a yi Nazaret

(Marcos 6.1-6; Lucas 4.16-30)

53So Jesús co'ollaq imat ne'ena laloqnaxanaxatpi mayi i'axattac, nachi ca'ai yi hueta'a, 54nachi taÿa yi maichi lalamaxat lma'. Huaña, nachi dapaxaguenataxaatapoigui aso laponaxaqui na judiopi yi'iyi 'alhua. Nachi na shiÿaxauapi ÿataqta huo'o da l'aalaxa, nachi 'eeta':

–¿Huá'ague ca ÿachigoxota'ague da laÿajnec dam da' shiÿaxaua? ¿Chaq huá'ago' ca 'eetec yi ishit da i'ot nam sa qaÿauanapega? 55Cha'ayi damayi nachida da llalec som qo'ipaq l'o, l'enaxat José. Qataq aso late'e l'enaxat María. Damayi nachi lqaÿa't soua Santiago, José, Simón qataq so Judas. 56Qataq soua lqaÿa't 'alo nachi qomi' hueta'agueta. Qaq ¿huá'ago' cam ÿachigoxota'ague 'enauac de'eda?

57Qaq ÿoqo'oyi sa ishit da qaÿoqocha'a somayi. Qalaxayi so Jesús 'enapeco':

–'Enauac na shiÿaxauapi ÿataqta ÿauotec ca l'aqtaxanaxanec ñi Dios. Qalaxayi nam maichi lmayaxauapi qataq nam lalamaxat lqaÿañicpi, sa ishit da ÿauotec.

58Nachi sa ishit da qalota na i'ot nam sa qaÿauanapega da huaigui naq'en somayipi, cha'ayi somayipi sa ishit da i'amaqten somayi.

Atualmente Selecionado:

Mateo 13: TBSNT

Destaque

Copiar